ကုလသမဂ္ဂ ပဋိညာဉ်စာချုပ်
[ 1 ]ကုလသမဂ္ဂအဖွဲ့၏ ပဋိညာဉ်စာချုပ်
ကျွန်ုပ်တို့ ကမ္ဘာ့ကုလသမဂ္ဂအဖွဲ့၏
ကမ္ဘာသူကမ္ဘာသား အပေါင်းတို့သည်-
ကျွန်ုပ်တို့လက်ထက်တွင် နှစ်ကြိမ်တိုင်တိုင်ပင် လူသားအပေါင်းတို့အပေါ်၌ စာဖွဲ့၍မပြနိုင်အောင် ဆင်းရဲဒုက္ခကျရောက်စေခဲ့သော စစ်၏ဘေးအန္တရာယ်အသွယ်သွယ်မှ နောင်လာနောက်သားများအား ကယ်တင်ရန်အလို့ငှာလည်းကောင်း၊
လူတိုင်း အခြေခံလူ့အခွင့်အရေးများ၊ လူ့ဂုဏ်သိက္ခာနှင့် တန်ဖိုးရှိသည်ကိုလည်းကောင်း၊ ယောက်ျား-မိန်းမတန်းတူအခွင့်အရေးရှိသည်ကိုလည်းကောင်း၊ နိုင်ငံကြီး နိုင်ငံငယ်မဟူ တန်းတူရည်တူ အခွင့်အရေးရှိသည်ကိုလည်းကောင်း၊ သက်ဝင်ယုံကြည်ကြောင်းကို ထပ်မံ၍ အလေးအနေက်ပြုရန် အလို့ငှာလည်းကောင်း၊
နိုင်ငံအချင်းချင်းချုပ်ဆိုထားသော စာချုပ်များနှင့် အပြည်ပြည်ဆိုင်ရာ တရားဥပဒေ၏ အခြားအခြေအမြစ်များမှ ပေါ်ပေါက်လာအပ်သောတာဝန်များနှင့် စပ်လျဉ်း၍ တရားမျှတမှုရှိရေး၊ ထိုတာဝန်များကို ရိုသေလေးစားရေးအတွက် လိုအပ်သောအခြေအနေများ ဖန်တီးပေးရန်အလို့ငှာလည်းကောင်း၊
လူမှုရေးရာတိုးတက်မြင့်မားရေးနှင့် လူနေမှုအဆင့်အတန်းများ ပိုမို လွတ်လပ်ကောင်းမွန်ရေးအတွက် အားပေးချီးမြှင့်ရန် သန္နိဋ္ဌာန်ချကြလျှက်၊
ဤရည်ရွယ်ချက်များအတိုင်း . . . .
သည်းခံတရားကိုကျင့်သုံးကာ တစ်ဦးနှင့်တစ်ဦး အိမ်နီးချင်းကောင်းများကဲ့သို့ ငြိမ်းချမ်းစွာ အတူတကွ နေထိုင်၍ လည်းကောင်း၊
ကမ္ဘာ့ငြိမ်းချမ်းရေးနှင့်လုံခြုံရေးတို့ကို တည်မြဲအောင် ထိန်းသိမ်းစောင့်ရှောက်ရန်အတွက် ကျွန်ုပ်တို့၏စွမ်းပကားများကို စုရုံးပေါင်းစည်း၍ လည်းကောင်း၊ [ 2 ]ချမှတ်ထားအပ်သောမူများကိုလက်ခံကာ စည်းကမ်းနည်းလမ်းများကို ပြဋ္ဌာန်းတီထွင်ထားရှိခြင်းအားဖြင့် လက်နက်အင်အားကို အများ၏အကျိုးကျေးဇူးအတွက်မှတပါး အသုံးပြုရခြင်းမရှိစေရန် ယုံကြည်စိတ်ချရအောင် စီမံ၍လည်းကောင်း၊
လူခပ်သိမ်းတို့၏ စီးပွားရေးနှင့် လူမှုရေး တိုးတက်ကောင်းမွန်အောင် အားပေးရေးအတွက် စီမံဖွဲ့စည်းထားသော အပြည်ပြည်ဆိုင်ရာအဖွဲ့အစည်းများကို အသုံးပြု၍လည်းကောင်း၊
ထိုရည်ရွယ်ချက်များ အထမြောက်အောင်
ကျွန်ုပ်တို့ ပူးပေါင်း ဆောင်ရွက်
အားထုတ်ကြိုးပမ်းရန် ဆုံးဖြတ်ကြသည်။
ယင်းသို့ဆုံးဖြတ်ချက်နှင့်အညီကျွန်ုပ်တို့၏ အစိုးရအသီးသီးသည် ဆန်ဖရန်စစ္စကိုမြို့တွင် ကျင်းပသော အစည်းအဝေးသို့ တက်ရောက်ကြသော မိမိတို့နည်းလမ်းတကျ ခိုင်လုံစွာ အာဏာကုန်လွှဲအပ်ထားသသည့် ကိုယ်စားလှယ်များမှတဆင့် ကမ္ဘာ့ကုလသမဂ္ဂအဖွဲ့၏ ယခုလက်ရှိပဋိညာဉ်စာချုပ်ကို သဘောတူညီပြီးဖြစ်ကြသည့်အတိုင်း ဤစာချုပ်အရ ဖွဲ့စည်းတည်ထောင်ကြသည်။
အခန်း(၁)
ရည်ရွယ်ချက်များနှင့် အခြေခံမူများ
အပိုဒ် ၁။
ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များမှာ အောက်ပါအတိုင်း ဖြစ်သည်။
- ၁။ ကမ္ဘာ့ငြိမ်းချမ်းရေးနှင့်လုံခြုံရေးကို တည်တံ့အောင်ထိန်းသိမ်းရန်။ ထိုသို့ထိန်းသိမ်းရေးကိုရှေ့ရှု၍ ငြိမ်းချမ်းရေး၏အန္တရာယ်များကို တားဆီးဖယ်ရှားရန်အလို့ငှာလည်းကောင်း၊ ကျူးကျော်ရန်စမှုများ သို့မဟုတ် ငြိမ်းချမ်းရေး ပျက်ပြားစေသည့် အခြားအပြုအမူများကို နှိပ်ကွပ်ရန်အလို့ငှာလည်းကောင်း၊ ထိရောက်စွာ ပူးပေါင်းအရေးယူရန်၊ ထို့အပြင် ငြိမ်းချမ်းရေးပျက်ပြားစေတတ်သည့် ပြည်ထောင်အချင်းချင်း အငြင်းပွားမှုများ၊ သို့မဟုတ် အရေးကိစ္စများကို တရားမျှတမှုအခြေခံမူများ၊ အပြည်ပြည်ဆိုင်ရာ တရားဥပဒေများနှင့်အညီ ငြိမ်းချမ်းသောနည်းလမ်းများဖြင့် ပြေလည်ကျေအေးအောင် ဆောင်ရွက်ရန်။ [ 3 ]
- ၂။ လူတို့၌ တန်းတူရည်တူအခွင့်အရေးများနှင့် ကိုယ်ပိုင်ဆုံးဖြတ်နိုင်သည့် အခွင့်အရေးများ ရှိသည်ဟူသောမူကို လေးစားမှုအပေါ် အခြေပြု၍ နိုင်ငံအချင်းချင်း ချစ်ကြည်စွာ ပေါင်းသင်းဆက်ဆံရေး တိုးတက်ကောင်းမွန်အောင် ဆောင်ရွက်ရန်နှင့် ကမ္ဘာ့ငြိမ်းချမ်းရေး တိုးတက်ခိုင်မြဲစေရေးအတွက် အခြားသင့်လျော်သော အရေးကိစ္စများကို ဆောင်ရွက်ရန်။
- ၃။ အပြည်ပြည်ဆိုင်ရာ စီးပွားရေးပြဿနာ၊ ယဉ်ကျေးမှု ပြဿနာ၊ သို့မဟုတ် လူ့အကျိုးဆောင်ရွက်မှုနှင့် သက်ဆိုင်သော ပြဿနာများကို ဖြေရှင်းရာတွင် လည်းကောင်း၊ လူမျိုးမရွေး၊ ကိုးကွယ်ရာဘာသာမရွေး၊ ပြောဆိုရာ ဘာသာစကားမရွေး၊ ယောက်ျား မိန်းမ မရွေး၊ လူခပ်သိမ်းတို့၏ လူ့အခွင့်အရေးများနှင့် အခြေခံလွတ်လပ်ခွင့်များအား လေးစားမှုကို အားပေးချီးမြှင့်ရာတွင်လည်းကောင်း၊ ပြည်ထောင်အချင်းချင်း ပူးပေါင်းဆောင်ရွက်မှုကို ရရှိစေရန်၊ ထို့အပြင်-
- ၄။ အထက်ပါ ရည်ရွယ်ချက်များ ထမြောက်အောင်မြင်ရေးအတွက် နိုင်ငံများ၏ ကြိုးပမ်းဆောင်ရွက်မှုများကို အဆင်ပြေညီညွတ်အောင် ညှိနှိုင်းပေးရာ ဗဟိုဌာနကြီးအဖြစ် တည်ရှိရန်။
အပိုဒ် ၂။
ကမ္ဘာ့ကုလသမဂ္ဂအဖွဲ့နှင့် အဖွဲ့ဝင်နိုင်ငံတို့သည် အပိုဒ် - ၁ တွင် ဖော်ပြထားသည့် ရည်ရွယ်ချက်များအတိုင်း ဆောင်ရွက်ရာတွင် အောက်ပါမူများနှင့်အညီ လိုက်နာဆောင်ရွက်ရမည်။
- ၁။ ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံးမှာ အချုပ်အခြာအာဏာ အရာ၌ တူညီကြသည်ဟူသော မူပေါ်တွင် အခြေခံ၍ ကမ္ဘာ့ကုလသမဂ္ဂအဖွဲ့ကို ဖွဲ့စည်းသည်။
- ၂။ ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံးသည် ကမ္ဘာ့ကုလသမဂ္ဂအဖွဲ့ဝင်နိုင်ငံအဖြစ်ဖြင့် ခံစားသင့် ခံစားထိုက်သော အခွင့်အရေးများနှင့် အကျိုးကျေးဇူးများကိုမလွှဲမသွေ ခံစားရရှိနိုင်ကြစေရန်အတွက် ယခုလက်ရှိ ပဋိညာဉ်စာချုပ်နှင့်အညီ မိမိတို့ခံယူသော တာဝန်ဝတ္တရားများကို စိတ်စေတနာကောင်းဖြင့် ဆောင်ရွက်ရမည်။
- ၃။ ကမ္ဘာ့ကုလသမဂ္ဂအဖွဲ့ဝင်နိုင်ငံအားလုံးသည် မိမိတို့ ပြည်ထောင်အချင်းချင်း အငြင်းပွားမှုများကို စေ့စပ်ဖြေရှင်းကြရာတွင် ကမ္ဘာ့ငြိမ်းချမ်းရေးနှင့် လုံခြုံရေးကိုလည်းကောင်း၊ တရားမျှတရေးကိုလည်းကောင်း၊ အန္တရာယ် မဖြစ်စေဘဲ ငြိမ်းချမ်းသော နည်းလမ်းများဖြင့်သာလျှင် စေ့စပ်ဖြေရှင်းကြရမည်။
- ၄။ ကမ္ဘာ့ကုလသမဂ္ဂအဖွဲ့ဝင်နိုင်ငံအားလုံးသည် မိမိတို့ ပြည်ထောင် အချင်းချင်း ဆက်ဆံရေးတွင် တစ်နိုင်ငံ၏ နယ်ပယ်အဝှမ်းကို သို့မဟုတ် နိုင်ငံရေး လွတ်လပ်မှုကို [ 4 ]ထိပါးအောင်သော်လည်းကောင်း၊ ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များနှင့် အခြားတစ်နည်းနည်း ဆန့်ကျင်အောင်သော် လည်းကောင်း၊ လက်နက်အင်အားဖြင့် ခြိမ်းခြောက်ခြင်းမှ သို့မဟုတ် လက်နက်အင်အားကို အသုံးပြုခြင်းမှ ရှောင်ကြဉ်ရမည်။
၅။ ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံးသည် ယခုလက်ရှိ ပဋိညာဉ် စာချုပ်အရ ကမ္ဘာ့ကုလသမဂ္ဂအဖွဲ့က အရေးယူဆောင်ရွက်သည့် ကိစ္စဟူသမျှတွင် အဘက်ဘက်က ကူညီအားပေးရမည့်ပြင် ကမ္ဘာ့ကုလသမဂ္ဂအဖွဲ့က တားမြစ်သည့်သဘောဖြင့် သို့မဟုတ် လိုက်နာစေရန် သဘောဖြင့် အရေးယူ ထားသော နိုင်ငံများအား အကူအညီပေးခြင်း မှလည်း ရှောင်ကြဉ်ရမည်။
၆။ ကမ္ဘာ့ကုလသမဂ္ဂအဖွဲ့သည် ကမ္ဘာ့ငြိမ်းချမ်းရေးနှင့် လုံခြုံရေးတို့ကိုထိန်းသိမ်းရန် လိုအပ်သည်နှင့်အမျှ အဖွဲ့ဝင်မဟုတ်သော နိုင်ငံများအား ဤမူများနှင့်အညီ မုချမသွေ လိုက်နာဆောင်ရွက်အောင် ပြုလုပ်ရမည်။
၇။ ယခုလက်ရှိပဋိညာဉ်စာချုပ်တွင် ပါရှိသည် အချက်များကြောင့် ကမ္ဘာ့ကုလသမဂ္ဂ အဖွဲ့မှာ နိုင်ငံတစ်နိုင်ငံ၏ ပြည်တွင်းစီရင်ပိုင်ခွင့် အာဏာအတွင်း၌သာ သက်ရောက်သော ကိစ္စများတွင် ဝင်ရောက်စွက်ဖက်ရန် အအာဏာမရှိ စေရ၊ သို့မဟုတ် ကမ္ဘာ့ကုလသမဂ္ဂအဖွဲ့ဝင်နိုင်ငံများမှာ အဆိုပါကိစ္စများကို ယခုလက်ရှိစာချုပ်အရ ဆုံးဖြတ်ရန် တင်သွင်းရမည့် တာဝန်မရှိစေရ။ သို့ရာတွင် ဤမူမှာ အခန်း ၇ တွင် အတင်းအကြပ်၊ လိုက်နာစေရမည် သဘောဖြင့် အရေးယူချက်များအတိုင်း ဆောင်ရွက်မှုကို ထိခိုက်ခြင်း မရှိစေရ။
အခန်း(၂)
ကမ္ဘာ့ကုလသမဂ္ဂအဖွဲ့ဝင်နိုင်ငံဖြစ်ရေး
အပိုဒ် ၃။
ကမ္ဘာ့ကုလသမဂ္ဂအဖွဲ့၏ မူလအဖွဲ့ဝင်နိုင်ငံများမှာ အပြည်ပြည်ဆိုင်ရာ အဖွဲ့အစည်း တည်ထောင်ရေးအတွက် ဆန်ဖရန်စစ္စကိုမြို့တွင် ကျင်းပခဲ့သော ကမ္ဘာ့ကုလသမဂ္ဂအဖွဲ့ညီလာခံတွင် ပါဝင်ခဲ့ပြီး သို့မဟုတ် ၁၉၄၂ ခုနှစ် ဇန်နဝါရီလ(၁) ရက်နေ့က ထုတ်ပြန်ခဲ့သော ကမ္ဘာ့ကုလသမဂ္ဂအဖွဲ့ ကြေညာစာတမ်းကို ယခင်က လက်မှတ်ရေးထိုးခဲ့ပြီး ယခုလက်ရှိပဋိညာဉ်စာချုပ်ကို လက်မှတ်ရေးထိုး၍ အပိုဒ် ၁၁ဝ နှင့်အညီ အတည်ပြုသော နိုင်ငံများသာ ဖြစ်ရမည်။
အပိုဒ် ၄။
၁။ ငြိမ်းချမ်းရေးကို မြတ်နိုးသော အခြားနိုင်ငံအားလုံးသည် လက်ရှိ ပဋိညာဉ်စာချုပ်ပါ တာဝန်ဝတ္တရားများကိုလက်ခံ၍ ကမ္ဘာ့ကုလသမဂ္ဂအဖွဲ့၏ ယူဆချက်အရ ဤတာဝန် [ 5 ]ဝတ္တရားများကို ထမ်းဆောင်နိုင်စွမ်းလည်းရှိပြီး ထမ်းဆောင်လိုသော ဆန္ဒလည်းရှိလျှင် ကမ္ဘာ့ကုလသမဂ္ဂအဖွဲ့တွင် အဖွဲ့ဝင်နိုင်ငံအဖြစ် ပါဝင်နိုင်သည်။
၂။ အဆိုပါနိုင်ငံတစ်ခုခုအား ကမ္ဘာ့ကုလသမဂ္ဂအဖွဲ့တွင် အဖွဲ့ဝင်နိုင်ငံအဖြစ် လက်ခံရန် အထွေထွေညီလာခံက လုံခြုံရေးကောင်စီ၏ ထောက်ခံချက်အရ ဆုံးဖြတ်ရမည်။
အပိုဒ် ၅။
လုံခြုံရေးကောင်စီက တားမြစ်သည်သဘောဖြင့် ဖြစ်စေ၊ အတင်းအကြပ် လိုက်နာစေသည့်သဘောဖြင့်ဖြစ်စေ၊ အရေးယူထားသော ကမ္ဘာ့ကုလသမဂ္ဂ အဖွဲ့၀င်နိုင်ငံ တစ်နိုင်ငံအား လုံခြုံရေးကောင်စီ၏ ထောက်ခံချက်အရ အထွေထွေ ညီလာခံကအဖွဲဝင်နိုင်ငံအဖြစ်ဖြင့် ခံစားသင့် ခံစားထိုက်သော အခွင့်အရေးများ ခံစားခွင့်ကို လုံခြုံရေးကောင်စီက ပြန်လည် ပေးအပ်နိုင်သည်။
အပိုဒ် ၆။
ကမ္ဘာ့ကုလသမဂ္ဂအဖွဲ့ဝင် နိုင်ငံတစ်နိုင်ငံသည် ယခုလက်ရှိ ပဋိညာဉ် စာချုပ်တွင်ပါရှိသောမူများကို ထပ်တလဲလဲ ဖောက်ဖျက်ကျူးလွန်လျှင် ထိုနိုင်ငံကို အထွေထွေညီလာခံက လုံခြုံရေးကောင်စီ၏ ထောက်ခံချက်အရ ကမ္ဘာ့ကုလသမဂ္ဂ အဖွဲ့မှ ထုတ်ပယ်နိုင်သည်။
အခန်း (၃)
လုပ်ငန်းအဖွဲ့များ
အပိုဒ် ၇။
၁။ ကမ္ဘာ့ကုလသမဂ္ဂအဖွဲ့၏ အဓိက လုပ်ငန်းအဖွဲ့များအဖြစ်ဖြင့် အထွေထွေ ညီလာခံကိုလည်းကောင်း၊ လုံခြုံရေးကောင်စီကိုလည်းကောင်း၊ စီးပွားရေးနှင့် လူမှုရေးကောင်စီကိုလည်းကောင်း၊ နိုင်ငံငယ်များထိန်းသိမ်းရေး ကောင်စီကို လည်းကောင်း၊ အပြည်ပြည်ဆိုင်ရာ တရားရုံးကိုလည်းကောင်း၊ အတွင်းရေးမှူးချုပ်ရုံးကိုလည်းကောင်း ဖွဲ့စည်း တည်ထောင်ထားသည်။
၂။ ထပ်ဖြည့် တည်ထောင်ဖွဲ့ စည်းရန် လိုအပ်ကြောင်း တွေ့ရှိရသော လက်အောက်ခံလုပ်ငန်းအဖွဲ့များကို ယခုလက်ရှိ ပဋိညာဉ်စာချုပ်နှင့်အညီ ဖွဲ့စည်းတည်ထောင်နိုင်သည်။ [ 6 ]အပိုဒ် ၈။
ကမ္ဘာ့ကုလသမဂ္ဂအဖွဲ့ သည် ၎င်း၏ အဓိကလုပ်ငန်းအဖွဲ့များနှင့် လက်အောက်ခံ လုပ်ငန်းအဖွဲ့များတွင် မည်သည့်အလုပ်၌မဆို တန်းတူ စည်းကမ်းချက်အရ ယောက်ျား မိန်းမ၀င်ရောက်ဆောင်ရွက်နိုင်ခွင့်ကို ချုပ်ချယ်ခြင်းမပြုရ။
အခန်း(၄)
အထွေထွေညီလာခံ
- ဖွဲ့စည်းပုံ
အပိုဒ် ၉။
၁။အထွေထွေညီလာခံတွင် ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံး ပါဝင်ရမည်။
၂။ အဖွဲ့ဝင်နိုင်ငံအသီးသီးမှာ အထွေထွေညီလာခံတွင် ကိုယ်စားလှယ် ငါးဦးထက်ပို၍ မရှိရ။
- အလုပ်ဝတ္တရားများနှင့် အာဏာများ။
အပိုဒ် ၁၀။
အထွေထွေညီလာခံသည် ယခုလက်ရှိ ပဋိညာဉ်စာချုပ်တွင် အကြုံးဝင်သော သို့မဟုတ် ယခုလက်ရှိ ပဋိညာဉ်စာချုပ်တွင် ပြဋ္ဌာန်းထားသည့် လုပ်ငန်းအဖွဲ့တစ်ခု၏ အာဏာ၊ အလုပ်ဝတ္တရားများနှင့် သက်ဆိုင်သော မည်သည့် ပြဿနာ သို့မဟုတ် ကိစ္စကိုမဆို စဉ်းစားဆွေးနွေးနိုင်သည့်ပြင် အပိုဒ် - ၁၂ ပါ ပြဋ္ဌာန်းချက်များနှင့် မဆန့်ကျင်ဘဲအဆိုပါပြဿနာ သို့မဟုတ် ကိစ္စ တစ်ခုခုနှင့် စပ်လျဉ်း၍ ကမ္ဘာ့ကုလသမဂ္ဂအဖွဲ့ဝင်နိုင်ငံများသို့ဖြစ်စေ၊ လုံခြုံရေး ကောင်စီသို့ဖြစ်စေ၊ အဆိုပါ နှစ်ဌာန လုံးသို့ဖြစ်စေ ထောက်ခံချက်များ တင်ပြနိုင်သည်။
အပိုဒ် ၁၁။
၁။ အထွေထွေညီလာခံသည် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မှုအတွက် လက်နက်ဖျက်သိမ်းရေးနှင့် လက်နက်တပ်ဆင်မှု စည်းမျဉ်းသတ်မှတ်ရေးဆိုင်ရာ မူများအပါအဝင် အရပ်ရပ်ပူးပေါင်းဆောင်ရွက်ရေးမူများကို စဉ်းစားဆွေးနွေးနိုင်သည့်ပြင် အဆိုပါမူများနှင့်စပ်လျဉ်း၍ ကမ္ဘာ့ကုလသမဂ္ဂအဖွဲ့ဝင်နိုင်ငံများသို့ဖြစ်စေ၊ လုံခြုံရေးကောင်စီသို့ဖြစ်စေ၊ အဆိုပါ နှစ်ဌာနလုံးသို့ ဖြစ်စေ ထောက်ခံချက်များတင်ပြနိုင်သည်။ [ 7 ]၂။ အထွေထွေညီလာခံသည် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှုနှင့်စပ်လျဉ်း၍ ကမ္ဘာ့ကုလသမဂ္ဂအဖွဲ့ဝင်နိုင်ငံ တစ်နိုင်ငံကဖြစ်စေ လုံခြုံရေးကောင်စီကဖြစ်စေ၊ ကမ္ဘာ့ကုလသမဂ္ဂအဖွဲ့ဝင် မဟုတ်သော နိုင်ငံ တစ်နိုင်ငံက အပိုဒ် - ၃၅။ စာပိုဒ် - ၂ နှင့်အညီဖြစ်စေ မိမိကသို့ တင်ပြအပ်သော မည်သည့်ကိစ္စကို မဆို ဆွေးနွေးနိုင်သည့်အပြင် အပိုဒ် - ၁၂ ပါပြဋ္ဌာန်းချက်များနှင့် မဆန့်ကျင်စေဘဲ အဆိုပါကိစ္စတစ်ခုခုနှင့် စပ်လျဉ်း၍ သက်ဆိုင်ရာ နိုင်ငံ သို့မဟုတ် နိုင်ငံများသို့ ဖြစ်စေ၊ လုံခြုံရေးကောင်စီသို့ ဖြစ်စေ၊ အဆိုပါနှစ်ဌာနလုံးသို့ဖြစ်စေ ထောက်ခံချက်များ တင်ပြနိုင်သည်။ အဆိုပါကိစ္စကို အရေးယူဆောင်ရွက်ရန် လိုအပ်လျှင် အထွေထွေညီလာခံက ယင်းကိစ္စကို မဆွေးနွေးမီဖြစ်စေ၊ ဆွေးနွေးပြီးနောက် ဖြစ်စေ လုံခြုံရေး ကောင်စီသို့ လွှဲအပ်ရမည်။
၃။ အထွေထွေညီလာခံသည် ကမ္ဘာ့ငြိမ်းချမ်းရေးနှင့် လုံခြုံရေးကို ထိပါးဖွယ်ရာရှိသော အရေးကိစ္စများနှင့် စပ်လျဉ်း၍အရေးယူရန် လုံခြုံရေး ကောင်စီအား သတိပေးနှိုးဆော်နိုင်သည်။
၄။ ဤအပိုဒ်တွင် ဖော်ပြထားသော အထွေထွေညီလာခံ၏ အာဏာများသည် အပိုဒ် -၁၀ တွင် ယေဘုယျ အားဖြင့် အကျုံးဝင်သော အာဏာများကို ကန့်သတ်ခြင်း မရှိစေရ။
အပိုဒ် ၁၂။
၁။ လုံခြုံရေးကောင်စီက အငြင်းပွားမှု သို့မဟုတ် အရေးကိစ္စတစ်ရပ်နှင့် စပ်လျဉ်း၍ ၎င်းအား ယခုလက်ရှိ ပဋိညာဉ်စာချုပ်အရ လွှဲအပ်ထားသော အလုပ်ဝတ္တရားများကို ဆောင်ရွက်နေစဉ်အတွင်း အထွေထွေညီလာခံသည် ထိုအငြင်းပွားမှု သို့မဟုတ် အရေးကိစ္စနှင့် စပ်လျဉ်း၍ မည်သည့် ထောက်ခံချက်ကိုမျှ လုံခြုံရေးကောင်စီက မတောင်းဆိုဘဲ မပေးရ။
၂။ အတွင်းရေးမှူးချုပ်သည် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မူနှင့်စပ်လျဉ်း၍ လုံခြုံရေးကောင်စီက အရေးယူဆောင်ရွက်လျက်ရှိသော ကိစ္စများကို လုံခြုံရေးကောင်စီ၏ ခွင့်ပြုချက်ဖြင့် အထွေထွေညီလာခံအား အစည်းအဝေးကျင်းပသည့်အခါတိုင်း အကြောင်းကြားရမည်။ ထိုနည်းတူ အဆိုပါကိစ္စများကို လုံခြုံရေးကောင်စီက အရေးမယူတော့ သည်နှင့်တပြိုင်နက် အထွေထွေညီလာခံအား သို့မဟုတ် အထွေထွေညီလာခံ အစည်းအဝေးမရှိလျှင် ကမ္ဘာ့ကုလသမဂ္ဂအဖွဲ့ ဝင်နိုင်ငံများအား အကြောင်း ကြားရမည်။
အပိုဒ် ၁၃။
၁။ အထွေထွေညီလာခံသည် အောက်ပါကိစ္စများ အတွက် စူးစမ်းလေ့လာမှုများကို စတင်ပြုလုပ်၍ ထောက်ခံချက်များ ပေးရမည်။ [ 8 ]
- (က) နိုင်ငံရေးဘက်တွင် ပြည်ထောင်အချင်းချင်း ပူးပေါင်းဆောင်ရွက်မှုရရှိရေးကိစ္စ၊ ထို့ပြင် အပြည်ပြည်ဆိုင်ရာ တရားဥပဒေအဆင့်ဆင့် တိုးတက်ရေးနှင့် ယင်းတရားဥပဒေ စုပေါင်းပြဋ္ဌာန်းရေးကို အားပေးရန်ကိစ္စ။
- (ခ) စီးပွားရေး၊ လူမှုရေး၊ ယဉ်ကျေးမှု၊ ပညာရေးနှင့် ကျန်းမာရေး လုပ်ငန်းများတွင် ပြည်ထောင်အချင်းချင်း ပူးပေါင်းဆောင်ရွက်မှုရရှိရေးကိစ္စ၊ ထို့ပြင် လူ့အခွင့်ရေးနှင့် အခြေခံလွတ်လပ်ခွင့်များကို လူမျိုးမရွေး ကိုးကွယ်ရာ ဘာသာမရွေး၊ ပြောဆိုရာတွင် ဘာသာစကားမရွေး၊ ယောက်ျား မိန်းမမရွေး၊ လူတိုင်းခံစားနိုင်အောင် အကူအညီပေးရန်ကိစ္စ။
၂။ အထက်ပါစာပိုဒ် ၁ (ခ) တွင် ဖော်ပြထားသော ကိစ္စများနှင့် စပ်လျဉ်းသည့် အထွေထွေညီလာခံ၏ နောက်ထပ် တာဝန်ဝတ္တရားများ၊ အလုပ်ဝတ္တရားများနှင့်အာဏာများကို အခန်း ၉ နှင့် ၁ဝ တွင် ဖော်ပြထားသည်။
အပိုဒ် ၁၄။
အပိုဒ် ၁၂ ပါ ပြဋ္ဌာန်းချက်များနှင့် မဆန့်ကျင်စေဘဲ အထွေထွေညီလာခံသည် နိုင်ငံများ၏ အရပ်ရပ် အကျိုးစီးပွားကို သို့မဟုတ် ချစ်ကြည်စွာ ပေါင်းသင်းဆက်ဆံရေးကို ထိခိုက်စေတန်ရာသည် အရေးကိစ္စပေါ်ပေါက်လာလျှင် ထိုအရေးကိစ္စသည် မည်သို့ပင် ပေါ်ပေါက်စေကာမူ ထိုအရေး ကိစ္စကို ငြိမ်းချမ်းစွာ စေ့စပ်ပြေငြိမ်းရန် မည်ကဲ့သို့ အရေးယူဆောင်ရွက် သင့်သည်ဟု ထောက်ခံချက်ပေးနိုင်သည်။ အဆိုပါ အရေးကိစ္စတွင် ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များနှင့် မူများ ဖော်ပြပါရှိသော ယခုလက်ရှိ ပဋိညာဉ်စာချုပ်ပါပြဋ္ဌာန်းချက်များကို ဆန့်ကျင်ကျူးလွန်သောကြောင့် ဖြစ်ပွားသည် အရေးကိစ္စများလည်းပါဝင်သည်။
အပိုဒ် ၁၅။
၁။ အထွေထွေညီလာခံသည် လုံခြုံရေးကောင်စီက တင်သွင်းသော နှစ်ပတ်လည် အစီရင်ခံစာများနှင့် အထူးအစီရင်ခံစာများကိုလက်ခံ၍ စဉ်းစားဆွေးနွေးရမည်။ ဤအစီရင်ခံစာများတွင် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မှုအတွက် လုံခြုံရေးကောင်စီက ဆောင်ရွက်ရန် ဆုံးဖြတ်ခဲ့သော သို့မဟုတ် ဆောင်ရွက်ခဲ့သော ကိစ္စများအကြောင်း ရှင်းလင်းဖော်ပြချက်တစ်ရပ် ပါရှိရမည်။
၂။ အထွေထွေညီလာခံသည် ကမ္ဘာ့ကုလသမဂ္ဂအဖွဲ့၏အခြားလုပ်ငန်းများက တင်သွင်းသော အစီရင်ခံစာများကို လက်ခံ၍ စဉ်းစားဆွေးနွေးရမည်။
အပိုဒ် ၁၆။
အထွေထွေညီလာခံသည် အပြည်ပြည်ဆိုင်ရာ နိုင်ငံငယ်များ ထိန်းသိမ်းရေး စနစ်နှင့် စပ်လျဉ်း၍ အခန်း ၁၂ နှင့် ၁၃ အရ မိမိအား လွှဲအပ်ထားသော အလုပ်ဝတ္တရားများကို [ 9 ]ဆောင်ရွက်ရမည်။ သို့ဆောင်ရွက်ရသည့် အလုပ်ဝတ္တရားများတွင် စစ်ရေးစစ်ရာ အချက်အချာဟူ၍ သတ်မှတ်ထားခြင်းမရှိသော နယ်မြေများနှင့် သက်ဆိုင်သည့် နိုင်ငံငယ်ထိန်းသိမ်းရေး သဘောတူစာချုပ်များ အတည်ပြုခြင်းလည်း ပါဝင်သည်။
အပိုဒ် ၁၇။
၁။ အထွေထွေညီလာခံသည် ကမ္ဘာ့ကုလသမဂ္ဂအဖွဲ့၏ ရသုံးမှန်းခြေ ငွေစာရင်းကို စဉ်းစားဆွေးနွေး၍ အတည်ပြုရမည်။
၂။ ကမ္ဘာ့ကုလသမဂ္ဂအဖွဲ့၏ ကုန်ကျစရိတ်များကို အထွေထွေညီလာခံက ခွဲဝေသတ်မှတ်ထားသည့်အတိုင်း အဖွဲ့ဝင်နိုင်ငံများကထည့်ဝင်ကျခံရမည်။
၃။ အထွေထွေညီလာခံသည် အပိုဒ် ၅၇ တွင် ရည်ညွှန်းထားသော အထူးအဖွဲ့များနှင့် ပြုလုပ်သည့် ဘဏ္ဍာရေး အစီအစဉ်၊ ရ-သုံး ခန့်မှန်းခြေ ငွေစာရင်းအစီအစဉ်အားလုံးကို ဆွေးနွေး၍ အတည်ပြုရမည့်ပြင် အဆိုပါ အထူးအဖွဲ့များ၏ အုပ်ချုပ်ရေးဆိုင်ရာ ရ-သုံး ခန့်မှန်းခြေငွေ စာရင်းများကိုလည်း သက်ဆိုင်ရာ အထူးအဖွဲ့များသို့ ထောက်ခံချက်ပေးရန် ရည်ရွယ်ချက်ဖြင့် စစ်ဆေးရမည်။
- မဲပေးခြင်း
အပိုဒ် ၁၈။
၁။ အထွေထွေညီလာခံတွင် ပါဝင်သည့် အဖွဲ့ဝင်နိုင်ငံအသီးသီး၌ မဲတစ်မဲစီ ပေးပိုင်ခွင့်ရှိသည်။
၂။ အထွေထွေညီလာခံသည် အရေးကြီးသော ကိစ္စများကို ဆုံးဖြတ်သည့်အခါ အစည်းအဝေးသို့ တက်ရောက် မဲပေးသော အဖွဲ့ဝင်နိုင်ငံများ၏ သုံးပုံ နှစ်ပုံမဲအများစုဖြင့် ဆုံးဖြတ်ရမည်။ ထိုကိစ္စများတွင် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှုအတွက် ထောက်ခံချက် ပေးရန်ကိစ္စ၊ လုံခြုံရေးကောင်စီတွင် အမြဲတန်းမဟုတ်သော အဖွဲ့ဝင်နိုင်ငံများ ရွေးကောက်တင်မြှောက်ရေးကိစ္စ၊ အပိုဒ် -၈၆၊ စာပိုဒ် ၁ (ဂ) နှင့်အညီ နိုင်ငံငယ်များ ထိန်းသိမ်းရေးကောင်စီတွင် ပါဝင်မည့် နိုင်ငံများ ရွေးကောက်တင်မြှောက်ရေးကိစ္စ၊ ကမ္ဘာ့ကုလသမဂ္ဂအဖွဲ့သို့ အဖွဲ့ဝင်နိုင်ငံသစ်များ ပါဝင်ခွင့်ပြုရေးကိစ္စ၊ အဖွဲ့ဝင်နိုင်ငံများ၏ အခွင့်အရေးများ ရပ်ဆိုင်းထားရေးကိစ္စ၊ အဖွဲ့ဝင်နိုင်ငံများကို ထုတ်ပယ်ရေးကိစ္စ၊ နိုင်ငံငယ်များ ထိန်းသိမ်းရေးစံနစ်အရ လုပ်ကိုင်ဆောင်ရွက်မှုနှင့် စပ်လျဉ်းသည့် ကိစ္စများနှင့် ရသုံးခန့်မှန်းခြေ ငွေစာရင်းကိစ္စများ ပါဝင်သည်။ [ 10 ]၃။ အခြားကိစ္စများကို ညီလာခံအစည်းအဝေးသို့ တက်ရောက်မဲပေးခဲ့သော အဖွဲ့ဝင်နိုင်ငံများ၏ မဲအများစုဖြင့် ဆုံးဖြတ်ရမည်။ ထိုကိစ္စများတွင် မဲသုံးပုံနှစ်ပုံ မဲအများစုဖြင့် ဆုံးဖြတ်ရမည့် နောက်ထပ် ကိစ္စအမျိုးအစားများ သတ်မှတ်ရေးလည်း ပါဝင်သည်။
အပိုဒ် ၁၉။
ကမ္ဘာ့ကုလသမဂ္ဂအဖွဲ့ဝင် နိုင်ငံတစ်နိုင်ငံသည် အဖွဲ့အား ပေးသွင်းရန် ထောက်ပံ့ငွေကျန်ရှိနေ၍ သို့ကျန်ရှိနေသည့် ငွေပေါင်းမှာလည်း ယခင် (၂) နှစ်ပတ်လုံးအတွက် မိမိပေးသွင်းသင့်သည့် ထောက်ပံ့ငွေနှင့် ညီမျှလျှင် သို့မဟုတ် ထို့ထက်ပိုလျှင် အထွေထွေညီလာခံတွင် မဲမပေးစေရ။ သို့ရာတွင် ထိုသို့ပေး သွင်းရန် ပျက်ကွက်ခြင်းမှာ ယင်းအဖွဲ့ဝင်နိုင်ငံကတားဆီးဖြေရှင်းခြင်းငှာ မစွမ်းနိုင်သော အခြေအနေအကြောင်းခြင်းရာများကြောင့်ဖြစ်သည်ဟူ၍ အထွေထွေညီလာခံက ယုံကြည်ကျေနပ်လျှင် ထိုအဖွဲ့ဝင်နိုင်ငံကို မဲပေးခွင့်ပြုနိုင်သည်။
အပိုဒ် ၂၀။
လုပ်ငန်းစဉ်
အထွေထွေညီလာခံသည် ကျင်းပမြဲ နှစ်ပတ်လည် ညီလာခံများကို ကျင်းပရမည်ပြင် အထူးညီလာခံများကိုလည်း လိုအပ်သည်အခါတိုင်း ကျင်းပရမည်။ အထူးညီလာခံများကို လုံခြုံရေးကောင်စီ၏ တောင်းဆိုချက်အရဖြစ်စေ၊ ကမ္ဘာ့ ကုလသမဂ္ဂအဖွဲ့ဝင်နိုင်ငံအများစု၏ တောင်းဆိုချက်အရ ဖြစ်စေ အတွင်းရေးမှူးက ဖိတ်ခေါ်ရမည်။
အပိုဒ် ၂၁။
အထွေထွေညီလာခံသည် မိမိ၏ လုပ်ငန်းစဉ်နည်း ဥပဒေများကို မိမိကပင် ပြဋ္ဌာန်းရမည်။ အထွေထွေညီလာခံသည် ညီလာခံ ကျင်းပသည်အခါတိုင်း ဥက္ကဋ္ဌကို ရွေးကောက်တင်မြှောက်ရမည်။
အပိုဒ် ၂၂။
အခန်း(၅)
လုံခြုံရေးကောင်စီ
- ဖွဲ့စည်းပုံ
အပိုဒ် ၂၃။
၁။ လုံခြုံရေးကောင်စီတွင် ကမ္ဘာ့ကုလသမဂ္ဂအဖွဲ့ဝင်နိုင်ငံ တစ်ဆယ်ငါးနိုင်ငံပါဝင်ရမည်။ တရုတ်သမ္မတနိုင်ငံ၊ ပြင်သစ်နိုင်ငံ၊ ဆိုဗီယက်ဆိုရှယ်လစ် ပြည်ထောင်စု သမ္မတနိုင်ငံ၊ ဗြိတိန်နှင့် အိုင်ယာလန် မြောက်ပိုင်း ပြည်ထောင်စု ဗြိတိသျှနိုင်ငံနှင့် အမေရိကန် ပြည်ထောင်စုနိုင်ငံတို့သည် လုံခြုံရေးကောင်စီတွင် အမြဲတမ်းအဖွဲ့ ဝင်နိုင်ငံများ ဖြစ်ရမည်။ အထွေထွေညီလာခံသည် ကမ္ဘာ့ကုလသမဂ္ဂအဖွဲ့ဝင်ဖြစ်သော အခြားဆယ်နိုင်ငံကို လုံခြုံရေး ကောင်စီတွင် အမြဲတမ်းမဟုတ်သော အဖွဲ့ဝင်နိုင်ငံများအဖြစ်ဖြင့် ရွေးကောက်တင်မြှောက်မည်။ ဤသို့ ရွေးကောက်တင်မြှောက်ရာတွင် ကမ္ဘာငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှုမှစ၍ ကမ္ဘာ့ ကုလသမဂ္ဂအဖွဲ့၏ အခြားရည်ရွယ်ချက်များအတွက် ကမ္ဘာ့ကုလသမဂ္ဂအဖွဲ့ဝင်နိုင်ငံများက မည်မျှကူညီဆောင်ရွက်ခဲ့သည်ကို လည်းကောင်း၊ ပထဝီဒေသအလိုက်လည်း မျှတစွာ ရွေးကောက်တင်မြှောက်ခြင်းဖြစ်စေရန်လည်းကောင်း ရှေးဦးစွာ အထူးအထောက်အထားပြု၍ ရွေးကောက် တင်မြှောက် ရမည်။
၂။ လုံခြုံရေးကောင်စီ၏ အမြဲတန်းမဟုတ်သော အဖွဲ့ဝင်နိုင်ငံများကို နှစ် - နှစ်ကာလအတွက် ရွေးကောက် တင်မြှောက်ရမည်။ လုံခြုံရေးကောင်စီ၏ အဖွဲ့ဝင်နိုင်ငံ ဦးရေကိုတဆယ့်တစ်ဦးမှ တဆယ့်ငါးဦးသို့ တိုးမြှင့်ပြီးသည့်နောက် အမြဲတန်းမဟုတ်သော အဖွဲ့ဝင်များကို ပထမအကြိမ် ရွေးကောက်ရာတွင် နောက်တိုးအဖွဲ့ဝင်နိုင်ငံ လေးနိုင်ငံအနက်မှ နှစ်နိုင်ငံကို တစ်နှစ်တာကာလ အတွက် ရွေးချယ်ရမည်။ သက်တမ်းကုန်ဆုံး၍ ထွက်ရသောအဖွဲ့ဝင်နိုင်ငံမှာ ချက်ခြင်း ပြန်လည်၍ အရွေးခံနိုင်ခွင့် မရှိစေရ။
- လုပ်ငန်းများနှင့် အာဏာများ
အပိုဒ် ၂၄။
၁။ ကမ္ဘာ့ကုလသမဂ္ဂအဖွဲ့ ၏ အရေးယူဆောင်ရွက်ချက်များ အဆောတလျှင် ခရီးရောက်စေရန်အလို့ငှာ ကမ္ဘာ့ကုလသမဂ္ဂအဖွဲ့ဝင်နိုင်ငံများသည် ကမ္ဘာ့ငြိမ်းချမ်း ရေးနှင့် လုံခြုံရေး ထိန်းသိမ်းမှုနှင့် စပ်လျဉ်း၍ ဆောင်ရွက်ရန် အဓိက တာဝန်ကို လုံခြုံရေးတပ်စီအား အပ်နှင်းသည့်ပြင် ထိုတာဝန်အရ လုံခြုံရေးကောင်စီက ၎င်း၏ ဝတ္တရားများကို ဆောင်ရွက်ရာတွင် မိမိကို ကိုယ်စား ဆောင်ရွက်ရသည် ဟူ၍လည်း သဘောတူကြသည်။ [ 12 ]၂။ လုံခြုံရေးကောင်စီသည် အဆိုပါ တာဝန်ဝတ္တရားများကို ဆောင်ရွက်ရာတွင် ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များနှင့် မူများအတိုင်း ဆောင်ရွက်ရမည်။ ၎င်းတာဝန်ဝတ္တရားများကို ဆောင်ရွက်ရန်အတွက် လုံခြုံရေး ကောင်စီအား အပ်နှင်းထားသည့် သီးခြားအာဏာကို အခန်း ၆၊ ၇၊ ၈ နှင့် ၁၂ တို့တွင် ပြဋ္ဌာန်းထားသည်။
၃။ လုံခြုံရေးကောင်စီသည် နှစ်ချုပ်အစီရင်ခံစာများကို လိုအပ်ပါက အထူးအစီရင်ခံစာများကို ၎င်း အထွေထွေ ညီလာခံသို့ စဉ်းစားဆွေးနွေးနိုင်ရန် တင်ပြရမည်။
အပိုဒ် ၂၅။
ကမ္ဘာ့ကုလသမဂ္ဂအဖွဲ့ဝင်နိုင်ငံများသည် လုံခြုံရေးကောင်စီက ချမှတ်သော ဆုံးဖြတ်ချက်များကို ယခုလက်ရှိ ပဋိညာဉ်စာချုပ်နှင့်အညီ လက်ခံ၍ ဆောင်ရွက်ရန် သဘောတူကြသည်။
အပိုဒ် ၂၆။
ကမ္ဘာ့လူသားတို့၏ စွမ်းပကားနှင့် ကမ္ဘာ့စီးပွားရေး အင်အားကို လက်နက်တပ်ဆင်မှုဘက်သို လွှဲပြောင်းအသုံးပြု ခြင်းမျိုးကို နည်းနိုင်သမျှနည်း စေလျက် ကမ္ဘာ့ငြိမ်းချမ်းရေးနှင့် လုံခြုံရေးတည်ဆောက်မူမှစ၍ ထိန်းသိမ်း စောင့်ရှောက်မှုကို အားပေးချီးမြှင့်ရန် အလို့ငှာလုံခြုံရေးကောင်စီသည် လက်နက်တပ်ဆင်မှု လျော့ပေါ့ရန် စည်းမျဉ်းသတ်မှတ်သည့် စံနစ်တစ်ရပ် ပြုလုပ်ချမှတ်နိုင်ရေးအတွက် လိုအပ်သော စီမံကိန်းများကို အပိုဒ် ၄၇ တွင် ရည်ညွှန်းထားသည့် စစ်ဦးစီးအဖွဲ့၏ အကူအညီဖြင့် ရေးဆွဲ၍ ကမ္ဘာ့ကုလသမဂ္ဂ အဖွဲ့ဝင်နိုင်ငံများထံတင်သွင်းရန် တာဝန်ရှိရမည်။
- မဲပေးခြင်း
အပိုဒ် ၂၇။
၁။ လုံခြုံရေးကောင်စီ အဖွဲ့ဝင်နိုင်ငံတိုင်းမဲတစ်မဲစီ ပေးပိုင်ခွင့် ရှိသည်။
၂။ လုံခြုံရေးကောင်စီသည်လုပ်ငန်းစဉ်နှင့်စပ်လျဉ်းသည့်ကိစ္စများကို ကောင်စီအဖွဲ့ဝင်နိုင်ငံ ကိုးနိုင်ငံ တို့၏ သဘောတူ မဲဖြင့် ဆုံးဖြတ်ရမည်။
၃။ လုံခြုံရေးကောင်စီသည်အခြားကိစ္စအားလုံးကို အမြဲတမ်းအဖွဲ့ဝင်နိုင်ငံများ အပါအဝင် အဖွဲ့ဝင်နိုင်ငံ ကိုး နိုင်ငံတို့၏ သဘောတူ မဲဖြင့် ဆုံးဖြတ်ရမည်။ သို့ရာတွင် အခန်း ၆ နှင့် အပိုဒ် ၅၂၊ စာပိုဒ် ၃ အရ ဆုံးဖြတ်ချက်များ ချမှတ်ရာတွင် အငြင်းပွားမှု၌ ပါဝင်သော အဖွဲ့ဝင်နိုင်ငံသည် မဲပေးခြင်းမပြုရ။ [ 13 ]
- လုပ်ငန်းစဉ်
အပိုဒ် ၂၈။
၁။ လုံခြုံရေးကောင်စီကို ၎င်း၏ လုပ်ငန်းများ အဆက်မပြတ် ဆောင်ရွက်နိုင်စေရန် ဖွဲ့စည်းရမည်။ ထိုသို့ ဆောင်ရွက်ရန်ကိစ္စအတွက် လုံခြုံရေးကောင်စီအဖွဲ့ဝင် နိုင်ငံအသီးသီးသည် ကမ္ဘာ့ကုလသမဂ္ဂအဖွဲ့ ရုံးစိုက်ရာ ဌာနတွင် ကိုယ်စားလှယ် တစ်ဦးစီ အမြဲထားရှိရမည်။
၂။ လုံခြုံရေးကောင်စီသည် အစည်းအဝေးများကို အခါအားလျော်စွာ ကျင်းပရမည်။ ထိုအစည်းအဝေးများတွင် လုံခြုံရေးကောင်စီ အဖွဲ့ဝင် နိုင်ငံအသီးသီးသည် မိမိ၏ အစိုးရအဖွဲ့ ဝင်တစ်ဦးကိုဖြစ်စေ၊ အထူးခန့်ထားသည် အခြားပုဂ္ဂိုလ် တစ်ဦးကိုဖြစ်စေ မိမိကိုယ်စားလှယ်အဖြစ် ဆောင်ရွက်စေလိုက ဆောင်ရွက်စေနိုင်သည်။
၃။ လုံခြုံရေးကောင်စီသည် အစည်းအဝေးများကို ကမ္ဘာ့ကုလသမဂ္ဂအဖွဲ ရုံးစိုက်ရာ ဌာနတွင်သာမက မိမိ၏ လုပ်ငန်းဆောင်ရွက်ရန် အလွယ်ကူဆုံးဖြစ်မည်ဟု ယူဆရသော အခြားနေရာဒေသများ၌လည်း ကျင်းပနိုင်သည်။
အပိုဒ် ၂၉။
လုံခြုံရေးကောင်စီသည် မိမိ၏လုပ်ငန်းဆောင်ရွက်နိုင်ရေးအတွက် လိုအပ်သည်ဟု ယူဆသော လက်အောက်ခံ လုပ်ငန်းအဖွဲ့ များကို ဖွဲ့စည်း တည်ထောင်နိုင်သည်။
အပိုဒ် ၃၀။
လုံခြုံရေးကောင်စီသည် မိမိ၏လုပ်ငန်းစဉ် နည်းဥပဒေ များကို မိမိပင် ပြဋ္ဌာန်းရမည်း။ ထိုးနည်းဥပဒေများတွင် မိမိ၏ဥက္ကဋ္ဌ ရွေးချယ်ရန် နည်းလမ်းများ လည်းပါဝင်သည်။
အပိုဒ် ၃၁။
လုံခြုံရေးကောင်စီသို့ တင်သွင်းသည် အရေးကိစ္စ တစ်ရပ်ရပ်မှာ လုံခြုံရေးကောင်စီဝင် မဟုတ်သော ကမ္ဘာ့ ကုလသမဂ္ဂအဖွဲ့ ဝင်နိုင်ငံ တစ်ခုခု၏ အကျိုးသက်ဆိုင်ခွင့်များနှင့် အထူးသက်ဆိုင်သည်ဟု လုံခြုံရေးကောင်စီက ထင်မြင်ယူဆသည် အခါတိုင်း၊ အဆိုပါနိုင်ငံသည် ထိုအရေး ကိစ္စနှင့် စပ်လျဉ်း၍ ဆွေးနွေးရာတွင် မဲပေးပိုင်ခွင့်မရှိ သော်လည်း ပါဝင် ဆွေးနွေး ပိုင်ခွင့် ရှိသည်။
အပိုဒ် ၃၂ ။
လုံခြုံရေးကောင်စီ အဖွဲ့ဝင် မဟုတ်သော ကမ္ဘာ့ကုလသမဂ္ဂ အဖွဲ့ဝင်မည်သည်နိုင်ငံမဆို သို့မဟုတ် ကမ္ဘာ့ကုလသမဂ္ဂအဖွဲ့ ဝင်မဟုတ်သော မည်သည်နိုင်ငံမဆို လုံခြုံရေးကောင်စီကအရေးယူ စဉ်းစားဆွေးနွေး လျက်ရှိသော အငြင်းပွားမှု တစ်ရပ်တွင် ပါဝင်နေလျှင် [ 14 ]ထိုအငြင်းပွားမှုနှင့် စပ်လျဉ်း၍ ဆွေးနွေးရာတွင် မဲပေး ပိုင်ခွင့်မရှိပါဘဲ ပါဝင်ရန် ထိုနိုင်ငံကို ဖိတ်ကြားရမည်။ ယင်းသို့ ကမ္ဘာ့ကုလသမဂ္ဂအဖွဲ့ဝင် မဟုတ်သော နိုင်ငံ တစ်နိုင်ငံပါဝင်ဆွေးနွေးရေးအတွက် လုံခြုံရေးကောင်စီသည် မိမိ တရားမျှတ သည်ဟု ထင်မြင် ယူဆသော စည်းကမ်းချက်များကို သတ်မှတ်ပေးရမည်။
အခန်း (၆)
အငြင်းပွားမှုများကို ငြိမ်းချမ်းစွာ ဖျန်ဖြေခြင်း
အပိုဒ် ၃၃။
၁။ ပြည်ထောင်အချင်းချင်း အငြင်းပွားမှုတစ်ခုခု ဆက်လက်ဖြစ်ပွား လျက်ရှိသောကြောင့် ကမ္ဘာ့ငြိမ်းချမ်းရေးနှင့် လုံခြုံမှုထိန်းသိမ်းမှုကို အန္တရာယ်ဖြစ်ဖွယ်ရာ အကြောင်းရှိလျှင် ထိုအငြင်းပွားမှုတွင် ပါဝင်သည့် နိုင်ငံ များသည် ထိုအငြင်းပွားမှုကို ရှေးဦးစွာ စေ့စပ်ဆွေးနွေးခြင်း၊ စုံစမ်းမေးမြန်းခြင်း၊ ဖျန်ဖြေခြင်း၊ ကျေချမ်းအောင်ပြုခြင်း၊ ခုံတင်ဆုံးဖြတ်ခြင်း၊ တရားရုံးအဆုံးအဖြတ်ကို ခံယူခြင်း၊ ဒေသဆိုင်ရာ အဖွဲ့အစည်းများ တည်ထောင်ဖွဲ့စည်း၍ ဖြစ်စေ၊ ဒေသဆိုင်ရာ အစီအစဉ်များ ပြုလုပ်၍ဖြစ်စေ ဖြေရှင်းခြင်း၊ သို့မဟုတ် မိမိတို့ နှစ်သက်ရာ အခြားငြိမ်းချမ်းသော နည်းလမ်းများအတိုင်း ဖြေရှင်းခြင်းဖြင့် ပြေငြိမ်းစေရမည်။
၂။ လုံခြုံရေးကောင်စီသည် မိမိလိုအပ်သည်ဟု ယူဆသောအခါ အငြင်းပွားမှုတွင် ပါဝင်သော နိုင်ငံများအား ၎င်းတို့၏ အငြင်းပွားမှုကို အဆိုပါနည်းလမ်းများဖြင့် ပြေငြိမ်းအောင်ပြုရန် ဆင့်ဆိုရမည်။
အပိုဒ် ၃၄။
အငြင်းပွားမှု တစ်ခုခုသော်လည်းကောင်း၊ ပြည်ထောင်အချင်းချင်း ပဋိပက္ခဖြစ်စေ တန်ရာသော သို့မဟုတ် အငြင်းပွားမှု ဖြစ်စေတန်ရာသော အရေးကိစ္စ တစ်ရပ်ရပ် သော်လည်းကောင်း၊ ဆက်လက်ဖြစ်ပွားနေမှုကြောင့် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှုကို အန္တရာယ်ဖြစ်နိုင်ဖွယ်ရာ အကြောင်း ရှိ - မရှိ ဆုံးဖြတ်ရန် အလို့ငှာ၊ လုံခြုံရေးကောင်စီသည် ထိုအငြင်းပွားမှု သို့မဟုတ် ထိုအရေးကိစ္စနှင့် စပ်လျဉ်း၍ စုံစမ်းစစ်ဆေးနိုင်သည်။
အပိုဒ် ၃၅။
၁။ ကမ္ဘာ့ကုလသမဂ္ဂအဖွဲ့ဝင် မည်သည်နိုင်ငံမဆို၊ အငြင်းပွားမှု တစ်ခုခုကို သို့မဟုတ် အပိုဒ် ၃၄ တွင် ရည်ညွှန်းထားသည် အရေးကိစ္စမျိုးကို လုံခြုံရေးကောင်စီသို့ ဖြစ်စေ အထွေထွေညီလာခံသို့ ဖြစ်စေ တိုင်ကြားနိုင်သည်။ [ 15 ]၂။ ကမ္ဘာ့ကုလသမဂ္ဂအဖွဲ့ ဝင်မဟုတ်သော နိုင်ငံ တစ်နိုင်ငံသည် မိမိပါဝင်နေသော အငြင်းပွားမှုကို လုံခြုံရေး ကောင်စီသို့ဖြစ်စေ၊ အထွေထွေညီလာခံသို့ဖြစ်စေ တိုင်ကြားနိုင်သည်။ သို့ရာတွင် ထိုသို့ မတိုင်ကြားမီ ထိုအငြင်းပွားမှုနှင့် စပ်လျဉ်း၍ ယခုလက်ရှိပဋိညာဉ်စာချုပ်တွင် ပြဋ္ဌာန်းထားသည် ငြိမ်းချမ်းစွာ ဖျန်ဖြေရေး တာဝန်များကို လက်ခံရမည်။
၃။ အထွေထွေညီလာခံသည် ဤအပိုဒ်အရ မိမိအားတိုင်ကြားသည့် ကိစ္စများနှင့်စပ်လျဉ်း၍ အရေးယူ ဆောင်ရွက်လျှင် အပိုဒ် ၁၁ နှင့် ၁၂ ပါ ပြဋ္ဌာန်းချက်များနှင့် ဆန့်ကျင်စေဘဲ ဆောင်ရွက်ရမည်။
အပိုဒ် ၃၆။
၁။ အပိုဒ် ၃၃ တွင် ရည်ညွှန်းထားသော အငြင်းပွား မှုမျိုး သို့မဟုတ် အလားတူ ကိစ္စမျိုးသည် မည်သည့် အခြေအနေ တွင်မဆို ရှိစေကာပူ လုံခြုံရေးကောင်စီသည် ထိုအငြင်းပွားမှု သို့မဟုတ် အရေးကိစ္စကို ဖြေရှင်းရန်အတွက် သင့်လျော်သော လုပ်ငန်းစဉ် သို့မဟုတ် နည်းစနစ်များကို ထောက်ခံ တင်ပြနိုင်သည်။
၂။ လုံခြုံရေးကောင်စီသည် အငြင်းပွားမှုဖျန်ဖြေရေးအတွက် အငြင်းပွား နိုင်ငံများ လိုက်နာကျင့်သုံးခဲ့သည့် လုပ်ငန်းစဉ်များကို လက်ခံစဉ်းစားရမည်။
၃။ လုံခြုံရေးကောင်စီသည် ဤအပိုဒ်အရ ထောက်ခံ တင်ပြထားခြင်း ပြုရာတွင် တရားဥပဒေနှင့် စပ်ဆိုင်သော အငြင်းပွားမှုများကို၊ အငြင်းပွားနိုင်ငံများက အပြည်ပြည်ဆိုင်ရာတရားရုံးသို့၊ ထိုတရားရုံး၏ ဥပဒေပါ ပြဋ္ဌာန်းချက် များနှင့် အညီ သာမန်အားဖြင့် တင်ပြရမြဲဖြစ်သည်ဟူသော အချက် ကိုလည်း လက်ခံစဉ်းစားရမည်။
အပိုဒ် ၃၇။
၁။ အပိုဒ် ၃၃ တွင် ရည်ညွှန်းထားသည် အငြင်းပွားမှု မျိုးတွင်ပါဝင်သော နိုင်ငံများသည် ထိုအငြင်းပွားမှုကို ထိုအပိုဒ်တွင် ဖော်ပြထားသည် နည်းလမ်းများဖြင့် ပြေငြိမ်းအောင်မပြုနိုင်ခဲ့သော်၊ လုံခြုံရေးကောင်စီသို့ လွှဲအပ်ရမည်။
၂။ လုံခြုံရေးကောင်စီသည် အငြင်းပွားမှု ဆက်လက် ဖြစ်ပွား နေသောကြောင့် ကမ္ဘာ့ငြိမ်းချမ်းရေးနှင့် လုံခြုံရေး ထိန်းသိမ်း စောင့်ရှောက်မှုကို အမှန်တကယ် အန္တရာယ်ဖြစ်ဖွယ်ရာ အကြောင်းရှိသည်ဟူ၍ ယူဆလျှင် အပိုဒ် ၃၆ အရ အရေးယူဆောင်ရွက်ရန်ဖြစ်စေ၊ မိမိသင့်လျော်သည်ဟု ထင်မြင်ယူဆသည် ဖျန်ဖြေရေးစည်းကမ်းချက်များကို အကြံပေး ထောက်ခံရန်ဖြစ်စေ ဆုံးဖြတ်ရမည်။
အပိုဒ် ၃၈။
အခန်း (၇)
ငြိမ်းချမ်းရေးကို ခြိမ်းခြောက်သည့် အန္တရာယ်များ
ငြိမ်းချမ်းရေး ပျက်ပြားမှုများ
ကျူးကျော်စော်ကားမှုများနှင့် စပ်လျဉ်း၍
အရေးယူဆောင်ရွက်ချက်
အပိုဒ် ၃၉။
လုံခြုံရေးကောင်စီသည် ငြိမ်းချမ်းရေးကို ခြိမ်းခြောက်မည် အန္တရာယ် တစ်ခုခုကိုသော်လည်းကောင်း၊ ငြိမ်းချမ်းရေးပျက်ပြားမှုတစ်ခုခုသော်လည်းကောင်း၊ ကျူးကျော်စော်ကားမူတစ်ခုခုကိုသော်လည်းကောင်း ရှိ - မရှိ ဆုံးဖြတ်ရမည်။ ရှိသည်ဟု ဆုံးဖြတ်လျှင် ကမ္ဘာ့ငြိမ်းချမ်းရေးနှင့် လုံခြုံရေး ထိန်းသိမ်းစောင့်ရှောက်မှု သို့မဟုတ် ပြန်လည်တည်ရှိမှုအတွက် ထောက်ခံချက်များ တင်ပြရမည်။ သို့မဟုတ် အပိုဒ် ၄၁ နှင့် ၄၂ တို့အရ မည်သို့ အရေးယူဆောင်ရွက်ရမည်ကို ဆုံးဖြတ်ရမည်။
အပိုဒ် ၄၀။
အခြေအနေ ပိုမိုဆိုးရွားလာမည်ကိုတားဆီးနိုင်ရန် အလို့ငှာ လုံခြုံရေး ကောင်စီသည် အပိုဒ် ၃၉ တွင် ပြဋ္ဌာန်းထားသည့် အတိုင်း ထောက်ခံချက်များ တင်ပြခြင်း သို့မဟုတ် မည်သို့ အရေးယူဆောင်ရွက်ရမည်ကို ဆုံးဖြတ်ခြင်းမပြုမီ မိမိလိုအပ်သည် သို့မဟုတ် သင့်လျော်သည်ထင်မြင်ယူဆသော ယာယီအစီအစဉ်များကို လိုက်နာဆောင်ရွက်ကြရန် သက်ဆိုင်ရာ နိုင်ငံများကို ဆင့်ဆိုနိုင်သည်။ အဆိုပါ ယာယီအစီအစဉ်များသည် သက်ဆိုင်ရာ နိုင်ငံများ၏ အခွင့်အရေးများ၊ ရသင့်ရထိုက်ကြောင်း တောင်းဆိုခွင့်များကိုသော်လည်းကောင်း၊ ထိုနိုင်ငံများ၏ အခြေအနေကို သော်လည်းကောင်းမထိခိုက်စေရ။ ထိုယာယီအစီအစဉ် များကို လိုက်နာရန် ပျက်ကွက်လျှင် သို့ပျက်ကွက်မှုကို လုံခြုံရေးကောင်စီက ထိုက်သည်အားလျော်စွာ ထည်သွင်း စဉ်းစားရမည်။
အပိုဒ် ၄၁။
လုံခြုံရေးကောင်စီသည် မိမိ၏ ဆုံးဖြတ်ချက်များ အကျိုးသက်ရောက်စေရန် စစ်မက်အင်အားအသုံးမပြုဘဲ မည်သို့စီမံဆောင်ရွက်ရမည်ကို ဆုံးဖြတ်နိုင်သည်အပြင်၊ ကမ္ဘာ့ကုလသမဂ္ဂအဖွဲ့ဝင်နိုင်ငံများအားလည်း မိမိ စီမံဆောင်ရွက်သည်အတိုင်း လိုက်နာဆောင်ရွက်ရန် မေတ္တာ ရပ်ခံနိုင်သည်။ ထိုသို့ စီမံဆောင်ရွက်ချက်များတွင် စီးပွားရေး အဆက်အသွယ်များကို လုံးဝ၊ သို့မဟုတ် တစ်စိတ်တစ်ဒေသ ဖြတ်တောက်ခြင်း၊ မီးရထား၊ ပင်လယ် ရေကြောင်း၊ လေကြောင်း၊ စာပို့၊ ကြေးနန်း၊ ရေဒီယို စသည့် ဆက်သွယ်ရေး ကိစ္စများကို [ 17 ]လုံးဝသို့မဟုတ်တစ်စိတ်တစ်ဒေသရပ်စဲစေခြင်းနှင့်သံတမန်ဆက်သွယ်မှုကို ဖြတ်တောက် ခြင်းများလည်း ပါဝင်သည်။
အပိုဒ် ၄၂။
လုံခြုံရေးကောင်စီသည်၊ အပိုဒ် ၄၁ တွင် ပြဋ္ဌာန်းထားသော အစီအစဉ်များမှာ လုံလောက်မည်မဟုတ်ဟူ၍သော်လည်းကောင်း၊ လုံလောက်ခြင်း မရှိကြောင်း ထင်ရှားသည်ဟူ၍ သော်လည်းကောင်း ယူဆလျှင် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်ရန် သို့မဟုတ်ပြန်လည်တည်ရှိရန်အတွက် လိုအပ်သည့်အတိုင်း ကြည်းတပ်များ၊ ရေတပ်များ သို့မဟုတ် လေတပ်များဖြင့် အရေးယူဆောင်ရွက်နိုင်သည်။ ထိုသို့ အရေးယူဆောင်ရွက်မှုများတွင် ကမ္ဘာ့ကုလသမဂ္ဂအဖွဲ့ ဝင်နိုင်ငံများ၏ ကြည်းတပ်များ၊ ရေတပ်များ သို့မဟုတ် လေတပ်များဖြင့် အင်အားပြခြင်း ပိတ်ဆို့ခြင်းနှင့် အခြားစစ်ဆင်ခြင်းများလည်း ပါဝင်နိုင်သည်။
အပိုဒ် ၄၃။
၁။ ကမ္ဘာ့ကုလမဂ္ဂအဖွဲ့ဝင်နိုင်ငံအားလုံးသည် ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှုကို ကူညီထောက်ပံ့သောအားဖြင့် လုံခြုံရေးကောင်စီ၏မေတ္တာရပ်ခံချက်အရ၊ ထို့အပြင် အထူးသဘောတူစာချုပ် သို့မဟုတ် စာချုပ်များနှင့်အညီ ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မှုကိစ္စအတွက် လိုအပ်သည့် လက်နက်ကိုင်တပ်များ အကူအညီများ၊ ပြည်တွင်း ဖြတ်သန်းသွားလာခွင့် အပါအဝင် လွယ်ကူမှုများကို လုံခြုံရေးကောင်စီသို့ လွှဲအပ်ရန် တာဝန်ခံယူကြရမည်။
၂။ အဆိုပါသဘောတူစာချုပ် သို့မဟုတ် စာချုပ်များတွင် လက်နက်ကိုင် တပ်များ၏ အရေအတွက်နှင့် အမျိုးအစားများကိုလည်းကောင်း၊ ထိုလက်နက်ကိုင်တပ်များ အသင့်ပြင်ဆင်ပြီး ရှိရမည့် အခြေအနေနှင့် သာမန်တည်ရာဌာနကိုလည်းကောင်း စီမံပေးရမည့် လွယ်ကူမှုနှင့် အကူအညီမျိုးကိုလည်းကောင်း သတ်မှတ်ရမည်။
၃။ ထိုသဘောတူစာချုပ် သို့မဟုတ် စာများချုပ်ဆိုရန် လုံခြုံရေးကောင်စီက ဆောလျင်နိုင်သမျှ ဆောလျင်စွာ စတင်စေ့စပ်ပြောဆိုရှိမည်။ ထိုသဘောတူစာချုပ်များကို လုံခြုံရေးကောင်စီနှင့် ကမ္ဘာ့ကုလသမဂ္ဂအဖွဲ့ဝင်နိုင်ငံများက ဖြစ်စေ လုံခြုံရေးကောင်စီနှင့် ကမ္ဘာ့ကုလသမဂ္ဂအဖွဲ့ဝင်နိုင်ငံစုများကဖြစ်စေ ချုပ်ဆိုရမည်အပြင် လက်မှတ်ရေး ထိုးသည့် နိုင်ငံများကလည်း မိမိတို့၏ သက်ဆိုင်ရာဖွဲ့စည်းအုပ်ချုပ်ပုံ အခြေခံဥပဒေအရ လိုက်နာ ကျင့်သုံးသည့် လုပ်ထုံးလုပ်နည်းများ နှင့်အညီ လက်ခံအတည်ပြုရမည်။
အပိုဒ် ၄၄။
လုံခြုံရေးကောင်စီသည် စစ်မက်အင်အားကို အသုံးပြုရန် ဆုံးဖြတ်ပြီးသောအခါ ကောင်စီဝင် မဟုတ်သည့် ကမ္ဘာ့ ကုလသမဂ္ဂ အဖွဲ့ဝင် နိုင်ငံ တစ်နိုင်ငံအား အပိုဒ် ၄၃ အရ [ 18 ]ပဋိညာဉ်ပြုထားသော တာဝန်များကို ဖြည့်စွမ်းသောအားဖြင့် လက်နက်ကိုင်တပ်များ ပေးပို့ရန်အတွက် တောင်းဆိုခြင်း မပြုမီ ထိုနိုင်ငံ၏ လက်နက်ကိုင်တပ်ဖွဲ့ များ အသုံးပြုရေးနှင့် စပ်လျဉ်း၍ လုံခြုံရေးကောင်စီ ဆုံးဖြတ်ချက်ချမှတ်ရာတွင် ပါဝင်ဆွေးနွေးရန် ထိုနိုင်ငံက လိုလားပါက ထိုနိုင်ငံအား ယင်းသို့ ပါဝင် ဆွေးနွေးရန် ဖိတ်ကြားရမည်။
အပိုဒ် ၄၅။
ကမ္ဘာ့ကုလသမဂ္ဂအဖွဲ့အား အဆောတလျင် ဆောင်ရွက်ရမည့် စစ်ရေး ကိစ္စများကို ဆောင်ရွက်နိုင်စေရန်အလို့ငှာ ကမ္ဘာ့ကုလသမဂ္ဂအဖွဲ့ဝင် နိုင်ငံ တို့သည် အပြည်ပြည်ဆိုင်ရာ ပူးပေါင်းနှိမ်နှင်းရေးဆောင်ရွက်မှုအတွက် ရနိုင်သမျှသော မိမိတို့ နိုင်ငံဆိုင်ရာအရ လေတပ်များကို ချက်ခြင်းရနိုင်အောင် ထားရှိရမည်။ အပိုဒ် ၄၃တွင် ရည်ညွှန်းထားသည့် အထူးသဘောတူစာချုပ် သို့မဟုတ် စာချုပ်များဖြင့် ပြဋ္ဌာန်းထားသော ကန့်သတ်ချက်များအရ ထိုအရံတပ်များ၏ အင်အားနှင့် တိုက်ပွဲဆင်ရန် အသင့်ရှိနေမှု အခြေအနေကို လည်းကောင်း ယင်းတပ်ဖွဲ့ များ၏ ပူးပေါင်းဆောင်ရွက်ရေး စံနစ်များကို လည်းကောင်း၊ လုံခြုံရေးကောင်စီက စစ်ဦးစီးအဖွဲ့၏ အကူအညီဖြင့် သတ်မှတ် ဆုံးဖြတ်ရမည်။
အပိုဒ် ၄၆။
လက်နက်ကိုင်တပ်များအသုံးပြုရန် စံနစ်များကို လုံခြုံရေးကောင်စီက စစ်ဦးစီးအဖွဲ့၏ အကူအညီဖြင့် စီမံပြုလုပ်ရမည်။
အပိုဒ် ၄၇။
ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မှုအတွက် လုံခြုံရေးကောင်စီ၏ စစ်ရေး လိုအပ်ချက်များနှင့် လည်းကောင်း၊ လုံခြုံရေးကောင်စီသို့ လွှဲအပ်ထားသော တပ်ဖွဲ့များကို အသုံးပြုမှု၊ ကြီးကြပ်ကွပ်ကဲမှုနှင့်လည်းကောင်း လက်နက်တပ်ဆင်မှု စည်းမျဉ်းသတ်မှတ်ရေးနှင့် လည်းကောင်း၊ ဖြစ်နိုင်ဖွယ်ရာရှိသော လက်နက်တပ်ဆင်မှု ဖျက်သိမ်းရေး နှင့်လည်းကောင်း သက်ဆိုင်သော ကိစ္စအရပ်ရပ်တွင် လုံခြုံရေးကောင်စီအား အကြံဉာဏ်နှင့် အကူအညီပေးရန် စစ်ဦးစီးအဖွဲ့ ကို တည်ထောင် ဖွဲ့စည်းရမည်။
၂။ စစ်ဦးစီးအဖွဲ့တွင် လုံခြုံရေးကောင်စီ၏ အမြဲတန်း အဖွဲ့ဝင်နိုင်ငံတို့မှ စစ်ဦးစီးချုပ်များ သို့မဟုတ် ၎င်းတို့၏ ကိုယ်စားလှယ်များပါဝင်ရမည်။ စစ်ဦးစီးအဖွဲ့၏ တာဝန် များကို ထိရောက်တွင်ကျယ်စွာ ဆောင်ရွက်နိုင်ရေး အတွက် ယင်းအဖွဲ့တွင် အမြဲတန်းကိုယ်စားလှယ်ထားရှိ ပါဝင်ခြင်း မရှိသော၊ ကမ္ဘာ့ကုလသမဂ္ဂအဖွဲ့ဝင် နိုင်ငံတစ်နိုင်ငံ၏ ပါဝင်ဆောင်ရွက်မှုကို လိုအပ်သောအခါ စစ်ဦးစီးအဖွဲ့က ထိုကမ္ဘာ့ ကုလသမဂ္ဂအဖွဲ့ဝင်နိုင်ငံကို မိမိနှင့် အတူပူးပေါင်း ဆောင်ရွက် ရန်အလို့ငှာ ဖိတ်ခေါ်ရမည်။
၃။ စစ်ဦးစီးအဖွဲ့သည် လုံခြုံရေးကောင်စီ၏ ကြီးကြပ်မှုကို ခံယူလျက် ထိုကောင်စီသို့ လွှဲအပ်ထားသော မည်သည့် လက်နက်ကိုင် တပ်ဖွဲ့များကိုမဆို သေနင်္ဂဗျူဟာ ခင်းကျင်းရန် ညွှန်ကြားရမည့် တာဝန်ရှိသည်။ ထို့နောက် အဆိုပါ လက်နက်ကိုင်တပ်များအား [ 19 ]ကွပ်ကဲအုပ်ချုပ်ရေးနှင့် သက်ဆိုင်သော အရေးကိစ္စများကို သက်ဆိုင်သည့် အသေး စိတ် စီမံဆောင်ရွက်ရ မည်။
၄။ စစ်ဦးစီးအဖွဲ့ သည် ဒေသဆိုင်ရာ အဖွဲ့ခွဲများကို လုံခြုံရေးကောင်စီ၏ အခွင့်အမိန့်ရယူ၍ ဒေသဆိုင်ရာ ကိုယ်စားလှယ်များနှင့် နှီးနှောတိုင်ပင်ပြီး နောက် ဖွဲ့စည်း တည်ထောင်နိုင်သည်။
အပိုဒ် ၄၈။
၁။ ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်းစောင့်ရှောက်မှု အတွက် လုံခြုံရေးကောင်စီ၏ ဆုံးဖြတ်ချက်များ အတိုင်းပြီးမြောက်အောင် ဆောင်ရွက် ရန်လိုအပ်သည့် ကိစ္စများကို လုံခြုံရေးကောင်စီက သတ်မှတ်သည်အတိုင်း ကမ္ဘာ့ကုလသမဂ္ဂအဖွဲ့ဝင်နိုင်ငံအားလုံးက သော်လည်းကောင်း၊ အချို့ကသော်လည်းကောင်း ဆောင်ရွက်ရမည်။
၂။ အဆိုပါဆုံးဖြတ်ချက်များအတိုင်း ပြီးမြောက်စေရန် အလို့ငှာ ကမ္ဘာ့ကုလသမဂ္ဂအဖွဲ့ဝင်နိုင်ငံများက တိုက်ရိုက် ဆောင်ရွက်ရမည့်အပြင် မိမိတို့ ကိုယ်တိုင် အဖွဲ့ဝင်များအဖြစ်ပါဝင်သက်ဆိုင်သည့် အပြည်ပြည်ဆိုင်ရာ ကိုယ်စားလှယ်အဖွဲ့များဖြင့်လည်း အရေးယူဆောင်ရွက်ရမည်။
အပိုဒ် ၄၉။
ကမ္ဘာ့ကုလသမဂ္ဂအဖွဲ့ဝင်နိုင်ငံများသည် လုံခြုံရေး ကောင်စီက ဆုံးဖြတ်သော စီမံချက်များကို ဆောင်ရွက်ရာတွင် ပူးပေါင်း၍ အချင်းချင်း ရိုင်းပင်းကူညီရမည်။
အပိုဒ် ၅၀။
အကယ်၍ လုံခြုံရေးကောင်စီက နိုင်ငံတစ်နိုင်ငံအားတားမြစ်သည့် သဘောဖြင့် သို့မဟုတ် လိုက်နာစေသည့် သဘောဖြင့် အရေးယူလျှင် ယင်းသို့အရေးယူခြင်းကြောင့် ဖြစ်ပေါ်လာသည့် အထူးစီးပွားရေး ပြဿနာများနှင့် ရင်ဆိုင်တွေ့ ကြုံနေရသော အခြားမည်သည့် နိုင်ငံမဆို ကမ္ဘာ့ကုလသမဂ္ဂအဖွဲ့ဝင်နိုင်ငံ ဟုတ်သည်ဖြစ်စေ၊ မဟုတ်သည်ဖြစ်စေ ထိုပြဿနာများ ဖြေရှင်းရေးနှင့် စပ်လျဉ်း၍ လုံခြုံရေးကောင်စီအား တိုင်ပင်နိုင်သည့် အခွင့်အရေးများ ရှိစေရမည်။
အပိုဒ် ၅၁။
ကမ္ဘာ့ကုလသမဂ္ဂအဖွဲ့ဝင်နိုင်ငံ တစ်နိုင်ငံကို စစ်မက်အင်အားဖြင့် ထိပါးတိုက်ခိုက်သည့်အခါ လုံခြုံရေးကောင်စီက ကမ္ဘာ့ငြိမ်းချမ်းရေးနှင့် လုံခြုံရေးထိန်းသိမ်း စောင့်ရှောက်မှု အတွက် လိုအပ်သည့်အတိုင်း အရေးယူဆောင်ရွက်ခြင်း မပြုသေးသမျှ ကာလပတ်လုံး မိမိနိုင်ငံအား မိမိတစ်ဦးတည်း ဖြစ်စေ၊ အများနှင့် ပူးပေါင်း၍ဖြစ်စေ ကာကွယ်နိုင်သည့် မူလရှိရင်းစွဲ အခွင့်အရေးကို ယခုလက်ရှိပဋိညာဉ်စာချုပ်ပါ အချက်အလက်များကြောင့် ထိခိုက်ခြင်းမရှိစေရ။ [ 20 ]ကမ္ဘာ့ ကုလသမဂ္ဂအဖွဲ့ဝင်နိုင်ငံများသည်၊ မိမိတို့နိုင်ငံ မိမိတို့ ကာကွယ်နိုင်သည့် အခွင့်အရေးကို သုံးစွဲလျက် ဆောင်ရွက်သည့် အရေးကိစ္စများကို လုံခြုံရေးကောင်စီအားချက်ခြင်း အစီရင်ခံရမည်။ ထို့ပြင် ထိုသို့ဆောင်ရွက်သည် အရေးကိစ္စများကြောင့် ယခုလက်ရှိ ပဋိညာဉ်စာချုပ်အရ ကမ္ဘာ့ငြိမ်းချမ်းရေးနှင့် လုံခြုံရေး ထိန်းသိမ်းစောင့်ရှောက်မှုအတွက် သို့မဟုတ် ပြန်လည်တည်ရှိမှုအတွက် မိမိလိုအပ်သည် ထင်မြင်သည့်အတိုင်း မည်သည် အခါမဆို အရေးယူဆောင်ရွက်နိုင်သည့် လုံခြုံရေးကောင်စီ၏ အခွင့်အာဏာနှင့် တာဝန်ကိုလည်း မည်သို့မျှ ထိခိုက်ခြင်း မရှိစေရ။
အခန်း(၈)
ဒေသဆိုင်ရာ အစီအစဉ်များ
အပိုဒ် ၅၂ ။
၁။ ကမ္ဘာ့ငြိမ်းချမ်းရေးနှင့်လုံခြုံရေး ထိန်းသိမ်းစောင့်ရှောက်မှုနှင့် စပ်လျဉ်း၍ ဒေသအလိုက် အရေးယူသင့်သောကိစ္စများကို ဆောင်ရွက်ရေးအတွက် ဒေသဆိုင်ရာအစီအစဉ်များ သို့မဟုတ် ဒေသဆိုင်ရာ ကိုယ်စားလှယ်အဖွဲ့များ တည်ရှိခြင်းကိုယခုလက်ရှိ ပဋိညာဉ်စာချုပ်ပါ အချက်များကြောင့် ပိတ်ပင်ခြင်းမရှိစေရ။ သို့ရာတွင် အဆိုပါအစီအစဉ်များ သို့မဟုတ် ကိုယ်စားလှယ်အဖွဲ့များနှင့် ၎င်းတို့၏ လုပ်ငန်းဆောင်တာများသည် ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များ၊ အခြေခံမူများနှင့်အညီ ဖြစ်စေရမည်။
၂။ အဆိုပါအစီအစဉ်များ ပြုလုပ်ဆောင်ရွက်သော သို့မဟုတ် အဆိုပါ ကိုယ်စားလှယ်အဖွဲ့များတွင်ပါဝင်သော ကမ္ဘာ့ကုလသမဂ္ဂအဖွဲ့ဝင်နိုင်ငံများသည် ဒေသဆိုင်ရာ အငြင်းပွားမှုများကို လုံခြုံရေးကောင်စီသို့ လွှဲအပ်တင်ပြခြင်း မပြုမီ ယင်းဒေသဆိုင်ရာ အစီအစဉ်များအားဖြင့် ဖြစ်စေ၊ ယင်းဒေသဆိုင်ရာ ကိုယ်စားလှယ်အဖွဲ့များ၏ ဆောင်ရွက်မှုဖြင့်ဖြစ်စေ ငြိမ်းချမ်းစွာ ဖျန်ဖြေရန် တတ်နိုင်သမျှ ကြိုးပမ်း အားထုတ်ရမည်။
၃။ ဒေသဆိုင်ရာ အငြင်းပွားမှုများကို သက်ဆိုင်ရာ နိုင်ငံများ၏ ရှေ့ဆောင်မူအရ သို့မဟုတ် လုံခြုံရေးကောင်စီ၏ လွှဲအပ်ချက်အရ အဆိုပါ ဒေသဆိုင်ရာ အစီအစဉ်များအားဖြင့်သော်လည်းကောင်း၊ အဆိုပါဒေသဆိုင်ရာကိုယ်စားလှယ်အဖွဲ့များ၏ ဆောင်ရွက်မှုဖြင့်သော်လည်းကောင်း၊ ငြိမ်းချမ်းစွာ ဖျန်ဖြေမှု တိုးတက် ဖွံ့ဖြိုးလာစေရန် လုံခြုံရေးကောင်စီက အားပေးရမည်။
၄။ ဤအပိုဒ်သည် အပိုဒ် ၃၄ နှင့် ၃၅ အရ ဆောင်ရွက်ခြင်းကို မည်သို့မျှ ထိခိုက် ပျက်ပြယ်စေခြင်း မရှိစေရ။
အပိုဒ် ၅၃။
၁။ လုံခြုံရေးကောင်စီသည် မိမိအာဏာအရ လိုက်နာစေသည့် သဘောဖြင့် အရေးယူနိုင်ရန်အတွက် အဆိုပါ ဒေသဆိုင်ရာ အစီအစဉ်များ သို့မဟုတ် ဒေသဆိုင်ရာ ကိုယ်စားလှယ်အဖွဲ့ [ 21 ]များကို အသုံးချသင့်လျှင် အသုံးချရမည်။ သို့ရာတွင် ထိုသို့ လိုက်နာစေသည့်သဘောဖြင့် အရေးယူမှုကိစ္စများကို လုံခြုံရေးကောင်စီ၏ အခွင့်အမိန့်မရဘဲ ဒေသဆိုင်ရာ အစီအစဉ်များအရဖြစ်စေ ဒေသဆိုင်ရာ ကိုယ်စားလှယ် အဖွဲ့များဖြင့်ဖြစ်စေ ဆောင်ရွက်ခြင်းမပြုရ။ သို့ရာတွင် ဤအပိုဒ်၏ စာပိုဒ် ၂ တွင် အဓိပ္ပာယ်ဖေါ်ပြထားသည် ရန်သူ နိုင်ငံနှင့်စပ်လျဉ်း၍ အပိုဒ် ၁၀၇ နှင့်အညီ ဆောင်ရွက်ရန် ပြဋ္ဌာန်းထားသည့် သို့မဟုတ် ထိုရန်သူနိုင်ငံ၏ ကျူးကျော်မှုဝါဒပြန်လည်ကျင့်သုံးမှုကို တားဆီး ပိတ်ပင်ရန် ရည်ရွယ်သော ဒေသဆိုင်ရာ အစီအစဉ်များတွင် ပြဋ္ဌာန်းထားသည့် စီမံချက်များကိုမူကား သက်ဆိုင်ရာအစိုးရများ၏ မေတ္တာရပ်ခံချက်အရ ထိုရန်သူနိုင်ငံ၏ နောက်ထပ် ကျူးကျော်မှုကို တားဆီးရန်အတွက် ကမ္ဘာ့ကုလသမဂ္ဂ အဖွဲ့အား တာဝန်လွှဲအပ်သည့် အချိန်ထိ ဆောင်ရွက်နိုင်သည်။
၂။ ဤအပိုဒ်၏ စာပိုဒ် ၁ တွင် သုံးနှုန်းထားသည် “ရန်သူနိုင်ငံ” ဆိုသည်မှာ ယခုလက်ရှိ ပဋိညာဉ် စာချုပ်တွင် လက်မှတ်ရေးထိုးထားသော မည်သည့်နိုင်ငံနှင့်မဆို ဒုတိယ ကမ္ဘာစစ်ကြီးအတွင်းက ရန်သူဖြစ်ခဲ့သော နိုင်ငံကို ဆိုလိုသည်။
အပိုဒ် ၅၄။
၁။ ကမ္ဘာ့ငြိမ်းချမ်းရေးနှင့် လုံခြုံရေး ထိန်းသိမ်းစောင့်ရှောက်မှုအတွက် ဒေသဆိုင်ရာ အစီအစဉ်များအရသော် လည်းကောင်း၊ ဒေသဆိုင်ရာ ကိုယ်စားလှယ်အဖွဲ့များက သော်လည်းကောင်း၊ ဆောင်ရွက်သည့် သိုမဟုတ် ဆောင်ရွက်ရန်ကြံရွယ်သည့်လုပ်ငန်းများနှင့်စပ်လျဉ်း၍ လုံခြုံရေးကောင်စီအား အခါခပ်သိမ်း အကြောင်းစုံ ကြားသိစေရမည်။
အခန်း(၉)
အပြည်ပြည်ဆိုင်ရာ စီးပွားရေးနှင့် လူမှုရေး
ပူးပေါင်းဆောင်ရွက်မှု
အပိုဒ် ၅၅။
ကမ္ဘာသူကမ္ဘာသားတို့၌ တန်းတူရည်တူရပိုင်ခွင့်များနှင့် ကိုယ့်ကြမ္မာ ကိုယ်ဖန်တီးနိုင်ခွင့်ရှိသည်ဟူသော အခြေခံမူကို လေးစားသည့်သဘောထားပေါ် အခြေပြု၍ ပြည်ထောင်အချင်းချင်း ငြိမ်းချမ်းစွာနှင့် ချစ်ကြည်စွာ ဆက်ဆံနိုင်ရန်အတွက် လိုအပ်သော တည်တံ့ခိုင်မြဲရေးနှင့် ကြီးပွားကောင်းစားရေး အခြေအနေများကို ဖန်တီးပေးရန် ရည်သန်လျက် ကမ္ဘာကုလသမဂ္ဂအဖွဲ့သည် အောက်ပါကိစ္စများကို ဆောင်ရွက်ရန် အားပေးရမည်။
- (က) လူနေမှုအဆင့်အတန်းများကို ပိုမို မြင့်မား လာမှု၊ အလုပ်လက်မဲ့ ပပျောက်မှု၊ စီးပွားရေးနှင့် လူမှုရေး အခြေအနေ တိုးတက်ဖွံ့ဖြိုးမှုကိစ္စ။
- (ခ) အပြည်ပြည်ဆိုင်ရာ စီးပွားရေး၊ လူမှုရေး၊ ကျန်းမာရေးမှစ၍ ၎င်းတို့နှင့် ဆက်စပ်လျက်ရှိသော ပြဿနာရပ်များအား ဖြေရှင်းမှုကိစ္စ၊ ထို့ပြင် အပြည်ပြည် ဆိုင်ရာ ယဉ်ကျေးမှုနှင့် ပညာရေး ပူးပေါင်းဆောင်ရွက်မှုကိစ္စ။ [ 22 ]
- (ဂ) လူမျိုးမရွေး၊ ကိုးကွယ်ရာဘာသာမရွေး၊ ပြောဆိုရာ ဘာသာ စကားမရွေး၊ ယောက်ျား မိန်းမ မရွေး လူခပ်သိမ်းတို့အတွက်ဖြစ်သော လူ့အခွင့်အရေးများနှင့် အခြေခံလွတ်လပ်ခွင့်များကို တစ်ကမ္ဘာလုံးလေးစားမှုနှင့် လိုက်နာ ကျင့်သုံးမှုကိစ္စ။
အပိုဒ် ၅၆။
အဖွဲ့ဝင်နိုင်ငံအားလုံးသည် အပိုဒ် ၅၅ တွင် ဖော်ပြပါရှိသည့်ကိစ္စများ အထမြောက်ရေးအတွက် ကမ္ဘာ့ကုလသမဂ္ဂအဖွဲ့ နှင့် ပူးပေါင်းဆောင်ရွက်ရာတွင် ပူးတွဲ၍လည်းကောင်း၊ သီးခြားအားဖြင့် လည်းကောင်း ဆောင်ရွက်ရန် ကတိပြုကြသည်။
အပိုဒ် ၅၇။
၁။ အစိုးရအချင်းချင်း သဘောတူချက်အရ ဖွဲ့စည်းတည်ထောင်ထားသည့် အထူးကိုယ်စားလှယ်အဖွဲ့အစည်း အမျိုးမျိုးသည် ၎င်းတို့၏ အခြေခံစာချုပ်များ၌ သတ်မှတ်ဖော်ပြထားသည်အတိုင်း စီးပွားရေး၊ လူမှုရေး၊ ယဉ်ကျေးမှု၊ ပညာရေး၊ ကျန်းမာရေးမှစ၍ ၎င်းတို့နှင့် ဆက်စပ်လျက်ရှိသော လုပ်ငန်းနယ်ပယ်များတွင် ထမ်းဆောင်ရန် ကျယ်ပြန့်သော အပြည်ပြည်ဆိုင်ရာ တာဝန်များရှိလျှင် ထိုအထူးအဖွဲ့ အစည်းများကို အပိုဒ် ၆၃ ပါ ပြဋ္ဌာန်းချက်များနှင့်အညီ ကမ္ဘာ့ကုလသမဂ္ဂအဖွဲ့နှင့် ဆက်သွယ်၍ ဆောင်ရွက်စေရမည်။
၂။ ထိုသို့ကမ္ဘာ့ကုလသမဂ္ဂအဖွဲ့နှင့် ဆက်သွယ် ဆောင်ရွက်စေရမည့် အဖွဲ့အစည်းများကို အောက်အပိုဒ်များတွင် အထူး ကိုယ်စားလှယ်အဖွဲ့များဟု ရည်ညွှန်းသည်။
အပိုဒ် ၅၈။
၁။ ကမ္ဘာ့ကုလသမဂ္ဂအဖွဲ့သည်၊ အထူးကိုယ်စားလှယ် အဖွဲ့ အစည်းများ၏ ဝါဒများကို လုပ်ငန်းများ တစ်ညီတစ်ညွတ် တည်းရှိအောင် ညှိနှိုင်းရေးအတွက်၊ ထောက်ခံချက်များ တင်ပြရမည်။
အပိုဒ် ၅၉။
၁။ ကမ္ဘာ့ကုလသမဂ္ဂအဖွဲ့သည် အပိုဒ် - ၅၅ တွင် ဖော်ပြထားသည့်ကိစ္စများ အထမြောက်စေရန် လိုအပ်သော အထူးကိုယ်စားလှယ်အဖွဲ့အစည်းသစ်များ ဖန်တီးရေးအတွက် သက်ဆိုင်ရာ နိုင်ငံအချင်းချင်း စေ့စပ် ဆွေးနွေးမှုများကို ပြုလုပ်သင့်လျှင်စတင်ပြုလုပ်ရမည်။
အပိုဒ် ၆ဝ။
၁။ ဤအခန်းတွင် ဖော်ပြပါရှိသော ကမ္ဘာ့ကုလသမဂ္ဂအဖွဲ့၏ အလုပ်ဝတ္တရားများဆောင်ရွက်ရန် တာဝန်များကို အထွေထွေညီလာခံ အားလည်းကောင်း၊ အထွေထွေညီလာခံ၏ အခွင့်အမိန့်အရ စီးပွားရေးနှင့် လူမှုရေးကောင်စီအားလည်းကောင်း အပ်နှင်းရမည်။ စီးပွားရေးနှင့် [ 23 ]လူမှုရေး ကောင်စီမှာ ထိုတာဝန်ကို ဆောင်ရွက်ရန် အလို့ငှာ အခန်း ၁၀ တွင် ဖော်ပြထားသော အာဏာများရှိရမည်။
အခန်း(၁ဝ)
စီးပွားရေးနှင့် လူမှုရေးကောင်စီ
- ဖွဲ့စည်းပုံ
အပိုဒ် ၆၁။
၁။ စီးပွားရေးနှင့် လူမှုရေးကောင်စီတွင် အထွေထွေညီလာခံက ရွေးကောက်တင်မြှောက်အပ်သော ကမ္ဘာ့ကုလသမဂ္ဂအဖွဲ့ဝင်နိုင်ငံပေါင်း (၅၄) နိုင်ငံ ပါဝင်ရမည်။
၂။ စာပိုဒ် ၃ ပါပြဋ္ဌာန်းချက်များနှင့် မဆန့်ကျင်စေဘဲ စီးပွားရေးနှင့် လူမှုရေးကောင်စီဝင်နိုင်ငံ တစ်ဆယ့်ရှစ်နိုင်ငံကို သုံးနှစ်ကာလ အပိုင်းအခြားအတွက် နှစ်စဉ် ရွေးကောက်တင်မြှောက်ရမည်။ နှစ်စေ့၍ထွက်ရသော ကောင်စီဝင်နိုင်ငံမှာ ချက်ခြင်း ပြန်လည်၍ အရွေးခံနိုင်ခွင့်ရှိသည်။
၃။ စီးပွားရေးနှင့် လူမှုရေးကောင်စီဝင် နိုင်ငံဦးရေကို နှစ်ဆယ့်ခုနစ်မှ ငါးဆယ်လေးနိုင်ငံသို့ တိုးမြှင့်လိုက်ပြီး နောက် ပထမဆုံးအကြိမ် ကျင်းပသော ရွေးကောက်ပွဲတွင် ထိုနှစ်ကုန်၌ သက်တမ်းကုန်ဆုံးသွားသော ကောင်စီဝင်ကိုးနိုင်ငံ၏နေရာတွင် ရွေးကောက်တင်မြှောက်သည့် ကောင်စီဝင်နိုင်ငံများ အပြင် နောက်ထပ် ကောင်စီဝင်နိုင်ငံ နှစ်ဆယ့်ခုနစ်နိုင်ငံကိုလည်း ရွေးကောက် တင်မြှောက်ရမည်။ အထွေထွေညီလာခံက ချမှတ်သော အစီအစဉ်များနှင့်အညီ ထိုသို့ နောက်ထပ် ရွေးကောက်တင်မြှောက်လိုက်သော ကောင်စီဝင်နိုင်ငံ နှစ်ဆယ့်ခုနှစ်နိုင်ငံအနက် ကိုးနိုင်ငံ၏ရာထူးသက်တမ်းမှာ တစ်နှစ်ပြည်သည့် အခါကုန်ဆုံးစေ၍ အခြားကိုးနိုင်ငံ၏ ရာထူးသက်တမ်းမှာ နှစ် နှစ်ပြည့်သည်အခါ ကုန်ဆုံးစေရမည်။
၄။ စီးပွားရေးနှင့် လူမှုရေးကောင်စီဝင်နိုင်ငံအသီးသီး၌ ကောင်စီတွင် ကိုယ်စားလှယ်တစ်ဦးစီရှိရမည်။
- အလုပ်ဝတ္တရားများနှင့် အာဏာများ
အပိုဒ် ၆၂။
၁။ စီးပွားရေးနှင့် လူမှုရေးကောင်စီသည် အပြည်ပြည် ဆိုင်ရာ စီးပွားရေး၊ လူမှုရေး၊ ယဉ်ကျေးမှု၊ ပညာရေး၊ ကျန်းမာရေးမှစ၍ ၎င်းတို့နှင့် ဆက်စပ်လျက် ရှိသောအကြောင်းကိစ္စများကို လေ့လာခြင်းနှင့် အစီရင်ခံစာများ တင်သွင်းခြင်း ပြုလုပ်နိုင်သည်။ သို့မဟုတ် စတင်ပြုလုပ်နိုင်သည်။ ထို့ပြင် ယင်းအကြောင်း ကိစ္စများနှင့် စပ်လျဉ်း၍လည်း [ 24 ]အထွေထွေညီလာခံသို့ လည်းကောင်း ကမ္ဘာ့ကုလသမဂ္ဂအဖွဲ့ဝင်နိုင်ငံများသို့လည်းကောင်း၊ သက်ဆိုင်ရာ အထူး ကိုယ်စားလှယ်အဖွဲ့ အစည်းများသို့ လည်းကောင်း ထောက်ခံချက်များ ပေးနိုင်သည်။
၂။ စီးပွားရေးနှင့် လူမှုရေးကောင်စီသည် လူခပ်သိမ်းတို့အတွက် လူ့အခွင့်အရေးများနှင့် အခြေခံလွတ်လပ်ခွင့်များကို လေးစားလိုက်နာရန် အားပေးချီးမြှင့်ရေးအတွက် ထောက်ခံချက်များပေးနိုင်သည်။
၃။ စီးပွားရေးနှင့် လူမှုရေးကောင်စီသည် မိမိ ဆောင်ရွက်နိုင်ခွင့် အာဏာရှိသည့်ကိစ္စများနှင့် စပ်လျဉ်း၍ အထွေထွေညီလာခံသို့ တင်သွင်းရန် သဘောတူစာချုပ်ကြမ်းများကို ရေးဆွဲနိုင်သည်။
၄။ စီးပွားရေးနှင့်လူမှုရေးကောင်စီသည် မိမိဆောင်ရွက်နိုင်ခွင့်အာဏာရှိသည်ကိစ္စများနှင့် စပ်လျဉ်း၍ အပြည်ပြည် ဆိုင်ရာ ညီလာခံများကို ကမ္ဘာ့ကုလသမဂ္ဂအဖွဲ့က ပြဋ္ဌာန်း ထားသည့်နည်းဥပဒေများနှင့် အညီ ဖိတ်ခေါ်နိုင်သည်။
အပိုဒ် ၆၃။
၁။ စီးပွားရေးနှင့် လူမှုရေးကောင်စီသည် အပိုဒ် ၅၇ တွင် ရည်ညွှန်းထားသော မည်သည့်အထူးကိုယ်စားလှယ် အဖွဲ့အစည်းနှင့်မဆို သဘောတူစာချုပ် ချုပ်ဆို၍ ထိုအထူးကိုယ်စားလှယ်အဖွဲ့အစည်းနှင့် ကမ္ဘာ့ကုလသမဂ္ဂအဖွဲ့ ဆက်သွယ်ရမည့်စည်းကမ်းချက်များကို သတ်မှတ်နိုင်သည်။ အဆိုပါ သဘောတူစာချုပ်များကို အထွေထွေညီလာခံသို့ သဘောတူရန် တင်သွင်းရမည်။
၂။ စီးပွားရေးနှင့် လူမှုရေးကောင်စီသည် အထူး ကိုယ်စားလှယ်အဖွဲ့အစည်းများနှင့် လုပ်ငန်းဆောင်တာများကို တညီတညွတ်တည်းဖြစ်အောင် အဆိုပါအဖွဲ့အစည်းများနှင့် တိုင်ပင်နှီးနှော၍ လည်းကောင်း၊ ထိုအဖွဲ့အစည်းများအား ထောက်ခံချက်များပေး၍လည်းကောင်း အထွေထွေညီလာခံနှင့် ကမ္ဘာ့ကုလသမဂ္ဂအဖွဲ့ဝင်နိုင်ငံများအား ထောက်ခံချက်များ ပေး၍လည်းကောင်း ဆောင်ရွက်နိုင်သည်။
အပိုဒ် ၆၄။
၁။ စီးပွားရေးနှင့် လူမှုရေးကောင်စီသည် အထူး ကိုယ်စားလှယ်အဖွဲ့အစည်းများထံမှ အစီရင်ခံစာများကို မှန်မှန်ရရှိရန်အတွက် သင့်လျော်သလို စီမံဆောင်ရွက်နိုင်သည်။ စီးပွားရေးနှင့် လူမှုရေးကောင်စီသည် မိမိ၏ ထောက်ခံချက်များကိုလည်းကောင်း၊ မိမိဆောင်ရွက်နိုင်ခွင့် အာဏာရှိသော ကိစ္စများနှင့်စပ်လျဉ်း၍ အထွေထွေ ညီလာခံကပေးသော ထောက်ခံချက်များကို လည်းကောင်း၊ အကျိုးသက်ရောက်အောင် မည်သို့စီမံဆောင်ရွက်ကြောင်း အစီရင်ခံစာများရရှိရန် ကမ္ဘာ့ကုလသမဂ္ဂအဖွဲ့ဝင်နိုင်ငံများနှင့် လည်းကောင်း၊ အထူးကိုယ်စားလှယ်အဖွဲ့အစည်းများနှင့် လည်းကောင်း အစီအစဉ်များ ပြုလုပ်နိုင်သည်။ [ 25 ]၂။ စီးပွားရေးနှင့် လူမှုရေးကောင်စီသည် ထိုအစီရင်ခံစာများနှင့်စပ်လျဉ်း၍ မိမိ၏ ထင်မြင်ချက်များကို အထွေထွေ ညီလာခံသို့ ပေးပို့နိုင်သည်။
အပိုဒ် ၆၅။
စီးပွားရေးနှင့် လူမှုရေးကောင်စီသည် လုံခြုံရေးကောင်စီသို့ သတင်းပေးပို့ နိုင်သည့်ပြင် လုံခြုံရေးကောင်စီက အကူအညီ တောင်းဆိုလျှင်လည်း အကူအညီ ပေးရမည်။
အပိုဒ် ၆၆။
စီးပွားရေးနှင့် လူမှုရေးကောင်စီသည် အထွေထွေ ညီလာခံ၏ ထောက်ခံချက်များအတိုင်း ပြီးမြောက်အောင် ဆောင်ရွက်ရေးနှင့် စပ်လျဉ်း၍ မိမိဆောင်ရွက်နိုင်ခွင့် အာဏာရှိသည့် အလုပ်ဝတ္တရားများကို ဆောင်ရွက်ရမည်။
၂။ စီးပွားရေးနှင့် လူမှုရေးကောင်စီသည် ကမ္ဘာ့ကုလသမဂ္ဂအဖွဲ့ဝင်နိုင်ငံများက လည်းကောင်း၊ အထူးကိုယ်စားလှယ်အဖွဲ့ အစည်းများက လည်းကောင်း ဆောင်ရွက် ပေးရန်တောင်းဆိုသော လုပ်ငန်းများကို အထွေထွေညီလာခံ၏ သဘောတူညီချက်ဖြင့် ဆောင်ရွက်ပေးနိုင်သည်။
၃။ စီးပွားရေးနှင့် လူမှုရေးကောင်စီသည် ယခုလက်ရှိ ပဋိညာဉ်စာချုပ်၏အခြားတစ်နေရာရာ၌ သီးခြားဖော်ပြထားသော သို့မဟုတ် အထွေထွေညီလာခံက မိမိအား သတ်မှတ်ချထားပေးသော အခြားအလုပ်ဝတ္တရားများကို ဆောင်ရွက်ရမည်။
အပိုဒ် ၆၇။
၁။ စီးပွားရေးနှင့် လူမှုရေးကောင်စီဝင်နိုင်ငံအသီးသီး၌ မဲတစ်မဲစီ ပေးပိုင် ခွင့်ရှိသည်။
၂။ စီးပွားရေးနှင့် လူမှုရေးကောင်စီ၏ ဆုံးဖြတ်ချက်များကို ကောင်စီအစည်းအဝေးသို့ တက်ရောက် မဲပေးသော ကောင်စီဝင်နိုင်ငံ အများစု၏ မဲဆန္ဒဖြင့် ချမှတ်ရမည်။
- လုပ်ငန်းစဉ်
အပိုဒ် ၆၈။
စီးပွားရေးနှင့် လူမှုရေးကောင်စီသည် စီးပွားရေးနှင့် လူမှုရေးကော်မရှင်အဖွဲ့များကိုလည်းကောင်း၊ လူ့အခွင့်အရေးများ အားပေးချီးမြှင့်ရေး ကော်မရှင်အဖွဲ့များကိုလည်းကောင်းမိမိ၏ အလုပ်ဝတ္တရားများ ဆောင်ရွက်ရန် လိုအပ်သော အခြားကော်မရှင်များကို လည်းကောင်း ဖွဲ့စည်းရမည်။ [ 26 ]
အပိုဒ် ၆၉။
စီးပွားရေးနှင့် လူမှုရေးကောင်စီသည် ကမ္ဘာ့ကုလသမဂ္ဂ အဖွဲ့ဝင် မည်သည့်နိုင်ငံနှင့်မဆို အထူးသက်ဆိုင်သော အကြောင်းကိစ္စ တစ်ရပ်ရပ်ကို စဉ်းစားဆွေးနွေးသည်အခါ ထိုနိုင်ငံအား မဲပေးပိုင်ခွင့် မရှိစေဘဲပါဝင်ဆွေးနွေးရန် ဖိတ်ကြားရမည်။
အပိုဒ် ၇၀။
စီးပွားရေးနှင့် လူမှုရေးကောင်စီသည် မိမိ၏ အစည်းအဝေးများနှင့် မိမိဖွဲ့စည်းထားသော ကော်မရှင်အဖွဲ့များ၏ အစည်းအဝေးများတွင် အထူးကိုယ်စားလှယ်အဖွဲ့ အစည်းများမှ ကိုယ်စားလှယ်များ မဲပေးပိုင်ခွင့်မပြုဘဲ ပါဝင်ရေးအတွက်လည်းကောင်း၊ အထူးကိုယ်စားလှယ် အဖွဲ့အစည်းများ၏ အစည်းအဝေးများတွင် မိမိ၏ကိုယ်စားလှယ်များ ပါဝင်ရေးအတွက်လည်းကောင်း အစီအစဉ်များပြုလုပ် နိုင်သည်။
အပိုဒ် ၇၁။
စီးပွားရေးနှင့် လူမှုရေးကောင်စီသည် မိမိဆောင်ရွက် နိုင်ခွင့်အာဏာရှိသော ကိစ္စများနှင့် သက်ဆိုင်သည့် အစိုးရ မဟုတ် သော အဖွဲ့အစည်းများနှင့် တိုင်ပင်နှီးနှောရန် သင့်လျော်သော အစီအစဉ်များကို ပြုလုပ်နိုင်သည်။ အဆိုပါ အစီအစဉ်များကို အပြည်ပြည်ဆိုင်ရာ အဖွဲ့အစည်းများနှင့် ပြုလုပ်နိုင်သည့်အပြင် သင့်လျော်သောကိစ္စတွင် သက်ဆိုင်ရာ ကမ္ဘာ့ကုလသမဂ္ဂ အဖွဲ့ဝင် နိုင်ငံနှင့် တိုင်ပင် ဆွေးနွေးပြီးနောက် ထိုနိုင်ငံဆိုင်ရာ အဖွဲ့အစည်းများနှင့်လည်း ပြုလုပ်နိုင်သည်။
အပိုဒ် ၇၂။
၁။ စီးပွားရေးနှင့် လူမှုရေးကောင်စီသည် မိမိ၏ ဥက္ကဋ္ဌ ရွေးချယ်နည်း အပါအ၀င် မိမိ၏ လုပ်ငန်းစဉ်နည်းဥပဒေများကို မိမိကပင် ပြဋ္ဌာန်းရမည်။
၂။ စီးပွားရေးနှင့် လူမှုရေးကောင်စီသည် မိမိ၏ လုပ်ငန်းစဉ် နည်းဥပဒေများနှင့် အညီ လိုအပ်သလို အစည်းအဝေးများကျင်းပရမည်။ ထိုနည်းဥပဒေများတွင် ကောင်စီဝင်နိုင်ငံအများစု၏ တောင်းဆိုချက်အရ အစည်းအဝေးများ ဖိတ်ခေါ်ကျင်းပရေးအတွက် ပြဋ္ဌာန်းချက်လည်း ပါဝင်ရမည်။ [ 27 ]အခန်း(၁၁)
ကိုယ်ပိုင် အုပ်ချုပ်ရေး မရသေးသော နယ်ပယ်ဒေသများနှင့်
စပ်လျဉ်းသည့် ကြေညာချက်
အပိုဒ် ၇၃။
လုံးဝ ကိုယ်ပိုင်အုပ်ချုပ်ရေး မရသေးသော လူမျိုးများ၏ နယ်ပယ်ဒေသများကို စီရင်အုပ်ချုပ်ရေးအတွက် တာဝန်ရှိသော သို့မဟုတ် တာဝန်ယူသော ကမ္ဘာ့ကုလသမဂ္ဂအဖွဲ့ဝင်နိုင်ငံများသည် ထိုနယ်ပယ်ဒေသများ၌ မှီတင်း နေထိုင်သူများ၏ အကျိုးကိုသာ အဓိကထားရမည်ဟူသော မူကို အသိအမှတ်ပြုကြပြီးလျှင် ယခုလက်ရှိ ပဋိညာဉ်စာချုပ်အရ တည်ထောင်ထားသည့် ကမ္ဘာ့ငြိမ်းချမ်းရေးနှင့် လုံခြုံရေး စနစ်အတွင်း ထိုနယ်သူနယ်သားတို့၏ အကျိုးစီးပွား ဖွံ့ဖြိုးစေရန် အစွမ်းကုန်ဆောင်ရွက်ရမည့် တာဝန်ကိုလည်း ယုံကြည်စွာ လွှဲအပ်သည်ဖြစ်၍ မွန်မြတ်သော တာဝန်အဖြစ်ဖြင့် လက်ခံကြသည်။ ဤရည်ရွယ်ချက်အရ အောက်ပါအတိုင်း ဆောင်ရွက်ရန် တာ၀န်ကို လက်ခံကြသည်။
- (က) သက်ဆိုင်ရာ နယ်သူနယ်သားတို့၏ ယဉ်ကျေးမှုကို ထိုက်သည့် အားလျော်စွာ လေးစားလျက် ၎င်းတို့၏ နိုင်ငံရေး၊ စီးပွားရေး၊ လူမှုရေးနှင့် ပညာရေး တိုးတက်မှုရှိအောင် ဆောင်ရွက်ရန် ၎င်းတို့အပေါ် တရားမျှတစွာ ပြုမူဆက်ဆံရန်နှင့် ၎င်းတို့အား မတရားပြုမှုများမှ ကာကွယ်စောင့်ရှောက်ရန်။
- (ခ) နယ်ပယ်ဒေသအသီးသီးနှင့် နယ်သူနယ်သားများ၏ သီးခြားအခြေအနေကိုလည်းကောင်း၊ ထိုနယ်သူ နယ်သားတို့၏တိုးတက်မှု အဆင့်အမျိုးမျိုးကို လည်းကောင်း လိုက်၍ ကိုယ်ပိုင်အုပ်ချုပ်ရေး တိုးတက်အောင်ဆောင်ရွက်ရန်၊ နယ်သူနယ်သားတို့၏ နိုင်ငံရေးလိုလားချက်များအား ထိုက်သည့်အားလျော်စွာ ထောက်ထားအရေးပေးရန်၊ ထို့ပြင် ၎င်းတို့၏ လွတ်လပ်သော နိုင်ငံ ဖွဲ့စည်း အုပ်ချုပ်ပုံအဆင့်ဆင့် တိုးတက်လာစေခြင်းငှာ ၎င်းတို့အား ကူညီရန်။
- (ဂ) ကမ္ဘာ့ငြိမ်းချမ်းရေးနှင့် လုံခြုံရေး တည်တံ့ခိုင်မြဲ အောင် ဆောင်ရွက်ရန်။
- (ဃ) ဤအပိုဒ်တွင် ဖော်ပြထားသော လူမှုရေး၊ စီးပွားရေးနှင့် သိပ္ပံပညာဆိုင်ရာ ရည်မှန်းချက်များလက်တွေ့အောင်မြင်စေမှုကို ရှေးရှုလျက် တိုးတက်ဖွံ့ဖြိုးရေးဆိုင်ရာ အပြုသဘောစီမံချက်များကို အားပေးချီးမြှင့်ရန်၊ သုတေသန လုပ်ငန်းကို အားပေးရန်၊ တစ်နိုင်ငံနှင့် တစ်နိုင်ငံ ပူးပေါင်းဆောင်ရွက်ရန်နှင့် သင့်လျော်သောကိစ္စနှင့် အချိန်ကာလတွင် အပြည်ပြည် ဆိုင်ရာ အထူးအဖွဲ့အစည်းများနှင့် ပူးပေါင်းဆောင်ရွက်ရန်၊
- (င) အခန်း(၁၂)နှင့်(၁၃) တို့နှင့် သက်ဆိုင်သော နယ်ပယ်ဒေသများမှ တပါး မိမိတို့ အသီးသီး တာဝန်ယူသော နယ်ပယ်ဒေသများတွင် စီးပွားရေး၊ လူမှုရေး၊ ပညာရေး [ 28 ]အခြေအနေများနှင့် သက်ဆိုင်သည် စစ်တမ်းများနှင့် လုပ်ငန်းဆိုင်ရာ အခြားသတင်းများကို လုံခြုံမှုကိစ္စနှင့် ဖွဲ့စည်းအုပ်ချုပ်ပုံ အခြေခံဥပဒေအတွက် လိုအပ်သော ကန့်သတ်ချက်နှင့် မဆန့်ကျင်စေဘဲအတွင်းရေးမှူးချုပ်ထံသို့ သိသာအောင် မှန်မှန် ပေးပို့ရန်။
အပိုဒ် ၇၄။
ကမ္ဘာ့ကုလသမဂ္ဂအဖွဲ့ဝင်နိုင်ငံတို့သည် ဤအခန်းနှင့် သက်ဆိုင်သော နယ်ပယ်ဒေသများအပေါ် ထားရှိသည့် မိမိတို့ဝါဒမှာ မိမိတို့ ပြည်မ၏ တစ်စိတ်တစ်ဒေသဖြစ်သော နယ်ပယ်ဒေသများအပေါ်ထားရှိသော မိမိတို့၏ ဝါဒနှင့် မခြား အိမ်နီးချင်းကောင်းပီသမှုတည်းဟူသော ယေဘုယျမူအပေါ်အခြေခံ၍ လူမှုရေး၊ စီးပွားရေးနှင့် ကူးသန်းရောင်းဝယ်ရေးကိစ္စများတွင် ကမ္ဘာပေါ်ရှိ အခြားနိုင်ငံသူ နိုင်ငံသား တို့၏ အကျိုးနှင့်ကောင်းစားချမ်းသာရေးကို ထိုက်သည့်အားလျော်စွာ ထည့်သွင်းစဉ်းစားရန်လည်း သဘောတူကြသည်။
အခန်း(၁၂)
အပြည်ပြည်ဆိုင်ရာ ထိန်းသိမ်းရေးစနစ်
အပိုဒ် ၇၅။
ကမ္ဘာ့ကုလသမဂ္ဂအဖွဲ့သည် မိမိ၏အာဏာအရ အပြည်ပြည်ဆိုင်ရာ ထိန်းသိမ်းရေးစနစ်တစ်ရပ်ကို နောက်ထပ် သီးခြားချုပ်ဆိုသော သဘောတူစာချုပ်များဖြင့် ထိုစနစ်အောက်အကျုံးဝင်စေမည့် နယ်ပယ်ဒေသများအုပ်ချုပ်ကြီးကြပ်ရေးအတွက် တည်ထောင်ထားရှိရမည်။ ထိုနယ်ပယ်ဒေသများကို အထိန်းသိမ်းခံနယ်ပယ်ဒေသများဟု နောက်တွင် ရည်ညွှန်းထားသည်။
အပိုဒ် ၇၆။
ယခုလက်ရှိ ပဋိညာဉ်စာချုပ် အပိုဒ် ၁ တွင် ပြဋ္ဌာန်း ထားသော ကမ္ဘာ့ကုလသမဂ္ဂအဖွဲ့၏ ရည်ရွယ်ချက်များနှင့်အညီ ထိန်းသိမ်းရေးစနစ်၏ အခြေခံရည်မှန်းချက်များမှာ အောက်ပါအတိုင်းဖြစ်ရမည်။
- (က) ကမ္ဘာ့ငြိမ်းချမ်းရေးနှင့် လုံခြုံရေး တည်တံ့ ခိုင်မြဲအောင် ဆောင်ရွက်ရန်။
- (ခ) အထိန်းသိမ်းခံ နယ်ပယ်ဒေသများတွင် နေထိုင်သူများ၏ နိုင်ငံရေး၊ စီးပွားရေး၊ လူမှုရေးနှင့် ပညာရေး တိုးတက်မှုကို အားပေးချီးမြှင့်ရန် နယ်ပယ် ဒေသအသီးသီးနှင့် နယ်သူနယ်သားတို့၏ သီးခြား အခြေအနေကိုလည်းကောင်း၊ သက်ဆိုင်ရာ နယ်သူနယ်သားတို့၏ လွတ်လပ်စွာ ထုတ်ဖော် ပြောဆိုသော လိုလားချက်များကို လည်းကောင်း၊ ထောက်ထား၍ သင့်လျော်သော ထို့ပြင် ထိန်းသိမ်းရေး သဘောတူစာချုပ် အသီးသီးပါ စည်းကမ်းချက်များဖြင့် ပြဋ္ဌာန်းထားသော ကိုယ်ပိုင်အုပ်ချုပ်ရေး၊ သို့မဟုတ် လွတ်လပ်ရေးကို ရှေ့ရှုလျက် တစတစ တိုးတက်လာစေရေးအတွက် မြှင့်တင်ပေးရန်။ [ 29 ]
- (ဂ) လူမျိုးမရွေး၊ ကိုးကွယ်ရာဘာသာမရွေး၊ ပြောဆိုရာ ဘာသာစကား မရွေး၊ ယောက်ျားမိန်းမ မရွေး၊ လူခပ်သိမ်း တို့အတွက် လူ့အခွင့်အရေးများနှင့် အခြေခံ လွတ်လပ်ခွင့်များ ရိုသေလေးစားမှုကို အားပေးရန်နှင့် ကမ္ဘာသူ ကမ္ဘာသား အပေါင်းတို့ တစ်ဦးအပေါ် တစ်ဦး အမှီသဟဲပြုနေရကြောင်း အသိအမှတ်ပြုမှုကို အားပေးရန်၊ ထို့ပြင် -
- (ဃ) ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံးနှင့် ၎င်းတို့၏ နိုင်ငံသူ နိုင်ငံသားတို့အား လူမှုရေး၊ စီးပွားရေးနှင့် ကူးသန်းရောင်းဝယ်ရေးကိစ္စများတွင် ညီတူညီမျှ အခွင့်အရေး ပေးရန်။ ထို့ပြင် တရားစီရင်ရေးတွင်လည်း အဆိုပါ နိုင်ငံသူ နိုင်ငံသားများအား အထက်ပါ ရည်မှန်းချက်အထမြောက်ရေးကိုလည်းကောင်း၊ အပိုဒ် ၈၀ ပါ ပြဋ္ဌာန်းချက်များကို လည်းကောင်း မထိခိုက်စေဘဲ ညီတူညီမျှ အခွင့်အရေး ပေးရန်။
အပိုဒ် ၇၇။
၁။ ထိန်းသိမ်းရေးစနစ်သည် ထိန်းသိမ်းရေး သဘောတူ စာချုပ်များဖြင့် ထိုစနစ်အောက် အကျုံးဝင်စေသော အောက်ပါ အမျိုးအစားဝင် နယ်ပယ်ဒေသများနှင့် သက်ဆိုင်ရမည်။
- (က) ကြီးစိုးခွင့်အမိန့်အရ ယခုလက်ရှိ ထားသော နယ်ပယ်ဒေသများ။
- (ခ) ဒုတိယ ကမ္ဘာစစ်ကြီးကြောင့် ရန်သူနိုင်ငံများမှ ခွဲထုတ်ထားသော နယ်ပယ်ဒေသများ။
- (ဂ) သက်ဆိုင်ရာ အုပ်ချုပ်ရေးတာဝန်ခံ နိုင်ငံများက မိမိတို့ အလိုအလျောက် ထိန်းသိမ်းရေးစနစ်အောက် အကျုံး၀င်စေသော နယ်ပယ်ဒေသများ။
၂။ အထက်ဖော်ပြပါ အမျိုးအစားဝင် မည်သည် နယ်ပယ်များအား မည်သည့် စည်းကမ်းချက်များအရ ထိန်းသိမ်းရေးစနစ်အောက်သို့ သွတ်သွင်း ရမည်ကို နောက်ထပ် ချုပ်ဆိုမည့် သဘောတူစာချုပ်ဖြင့် ဆုံးဖြတ်ရမည်။
အပိုဒ် ၇၈။
အဆိုပါနယ်ပယ်ဒေသများသည် တန်းတူလွတ်လပ်သော အချုပ်အခြာ အာဏာပိုင်များအဖြစ် အချင်းချင်း အသိအမှတ်ပြုသောမူကို လေးစားမှုအပေါ် အခြေပြု၍ တစ်နယ်နှင့် တစ်နယ် ဆက်ဆံလျက် ကမ္ဘာ့ကုလသမဂ္ဂအဖွဲ့ဝင်နိုင်ငံများအဖြစ်သို့ ရောက်ရှိလာကြလျှင် ထိန်းသိမ်းရေး စနစ်နှင့် သက်ဆိုင်ခြင်းမရှိစေရ။
အပိုဒ် ၇၉။
ထိန်းသိမ်းရေးစနစ်အောက်တွင် သွတ်သွင်းထားရှိမည် နယ်ပယ်ဒေသ အသီးသီးအတွက် ထိန်းသိမ်းရေးစည်းကမ်းချက်များနှင့်တကွ ထိုစည်းကမ်းချက်များတွင် ပြုလုပ်သော ပြောင်းလဲချက် သို့မဟုတ် ပြင်ဆင်ချက်ကို တိုက်ရိုက် သက်ဆိုင်သည့်နိုင်ငံများက [ 30 ]သဘောတူရမည့်အပြင် အပိုဒ် - ၈၃ နှင့် ၈၅ တွင် ပြဋ္ဌာန်းထားသည့်အတိုင်းလည်း အတည်ပြုရမည်။ ကမ္ဘာ့ကုလသမဂ္ဂအဖွဲ့ဝင် နိုင်ငံ တစ်နိုင်ငံက နိုင်ငံပေါင်းချုပ်အသင်းကြီး၏ ကိုယ်စားလှယ်လွှဲ အမိန့်အရ ထိုနယ်ပယ်ဒေသများကို လက်ရှိထားရလျှင် ထိုအဖွဲ့ဝင်နိုင်ငံလည်း ထိုနိုင်ငံများတွင် အပါအဝင်ဖြစ်ရမည်။
အပိုဒ် ၈ဝ။
၁။ နယ်ပယ်ဒေသ အသီးသီးကို ထိန်းသိမ်းရေးစနစ်အောက်တွင် သွတ်သွင်းထားရှိရန် အပိုဒ် - ၇၇၊ ၇၉ နှင့် ၈၁ အရ သီးခြားထိန်းသိမ်းရေး သဘောတူစာချုပ်များ မချုပ်ဆိုရသေးသမျှကာလပတ်လုံး အကယ်၍ ချုပ်ဆိုပြီးဖြစ်လျှင် ထိုသဘောတူစာချုပ်တွင် သဘောတူထားသည့်အချက်များကို ချန်လှပ်၍ ဤအခန်းပါ ပြဋ္ဌာန်းချက်များကြောင့် နိုင်ငံ တစ်နိုင်ငံ၏ သို့မဟုတ် လူတစ်မျိုးမျိုး၏ အခွင့်အရေးများ ကိုသော်လည်းကောင်း၊ ကမ္ဘာ့ကုလသမဂ္ဂအဖွဲ့ဝင်နိုင်ငံများ ပါဝင်ချုပ်ဆိုထားသော လက်ရှိပြည်ထောင် အချင်းချင်းစာချုပ်စာတမ်းများပါ စည်းကမ်းချက်များကိုသော်လည်းကောင်း၊ တိုက်ရိုက်ဖြစ်စေ၊ သွယ်ဝိုက်၍ဖြစ်စေ၊ တစ်နည်းနည်းဖြင့်ပြောင်းလဲစေသည်ဟု အဓိပ္ပာယ်ကောက်ယူခြင်းမပြုရ။
၂။ ဤအပိုဒ်၏ စာပိုဒ် - ၁ မှာ အပိုဒ် ၈၇ တွင် ပြဋ္ဌာန်းထားသည်အတိုင်း နိုင်ငံပေါင်းချုပ်အသင်းကြီး၏ ကိုယ်စားလှယ်လွှဲ အမိန့်အရ အုပ်ချုပ်ထားသော နယ်ပယ်ဒေသများနှင့် အခြားနယ်ပယ်ဒေသများကို ထိန်းသိမ်းရေးစနစ်အောက် သွတ်သွင်းထားရှိမှုအတွက် သဘောတူစာချုပ်များချုပ်ဆိုရန် စေ့စပ်ဆွေးနွေးရေးကိုသော်လည်းကောင်း၊ သဘောတူစာချုပ်များချုပ်ဆိုရေးကိုသော်လည်းကောင်း၊ နှောင့်နှေးစေရန် သို့မဟုတ်ရွှေဆိုင်း ထားရန် အကိုးအကားပြုနိုင်သော ပြဋ္ဌာန်းချက်ဖြစ်သည် ဟူ၍ အဓိပ္ပာယ်မကောက်ယူရ။
အပိုဒ် ၈၁။
ထိန်းသိမ်းရေး သဘောတူစာချုပ်အသီးသီးတွင် အထိန်းသိမ်းခံ နယ်ပယ် ဒေသကို အုပ်ချုပ်ရန် စည်းကမ်းချက်များပါရှိရမည့်ပြင် ထိုအထိန်းသိမ်းခံ နယ်ပယ်ဒေသကို အုပ်ချုပ်မည့်အာဏာပိုင်ကိုလည်း ခန့်အပ်ရမည်။ နောင်တွင် "အုပ်ချုပ်ရေး အာဏာပိုင်" ဟူ၍ ခေါ်တွင်မည့် အဆိုပါ အာဏာပိုင်သည် နိုင်ငံတစ်နိုင်ငံ၊ သို့မဟုတ် နိုင်ငံအများကိုသော်လည်းကောင်း ကမ္ဘာ့ကုလသမဂ္ဂအဖွဲ့ ကိုယ်တိုင်သော်လည်းကောင်း ဖြစ်နိုင်သည်။
အပိုဒ် ၈၂။
အပိုဒ် ၈၃။
၁။ ထိုစစ်ရေးစစ်ရာ အချက်အခြာ နယ်မြေများနှင့် စပ်လျဉ်း၍ ကမ္ဘာ့ကုလသမဂ္ဂအဖွဲ့၏ အလုပ်ဝတ္တရားအားလုံးကို လုံခြုံရေးကောင်စီက ဆောင်ရွက်ရမည်။ ထိုအလုပ် ဝတ္တရားများတွင် ထိန်းသိမ်းရေးသဘောတူစာချုပ်များပါ စည်းကမ်းချက်များကို သော်လည်းကောင်း၊ ထိုစည်းကမ်းချက်များတွင် ပြုလုပ်သော ပြောင်းလဲချက် သို့မဟုတ် ပြင်ဆင်ချက်သော် လည်းကောင်း အတည်ပြုခြင်း လည်းပါဝင်သည်။
၂။ အပိုဒ် ၇၆ တွင်ဖော်ပြထားသော အခြေခံရည်မှန်း ချက်များသည် စစ်ရေးစစ်ရာ အချက်အခြာနယ်မြေ အသီးသီးတွင် နေထိုင်သူတို့နှင့် သက်ဆိုင်ရမည်။
၃။ လုံခြုံရေးကောင်စီသည် ထိန်းသိမ်းရေး သဘောတူစာချုပ်များပါ ပြဋ္ဌာန်းချက်များနှင့်အညီ လုံခြုံမှုအတွက် လိုအပ်ချက်များကိုလည်း မထိခိုက်စေပဲ စစ်ရေးစစ်ရာ အချက်အခြာနယ်မြေများ၏ နိုင်ငံရေး၊ စီးပွားရေး၊ လူမှုရေးနှင့် ပညာရေးကိစ္စများ၌ ထိန်းသိမ်းရေးစနစ်အရ ဆောင်ရွက်ရန်ရှိသော ကမ္ဘာ့ကုလသမဂ္ဂအဖွဲ့၏ အလုပ် ဝတ္တရားများကို နိုင်ငံငယ်များ ထိန်းသိမ်းရေး ကောင်စီ၏ အကူအညီဖြင့် ဆောင်ရွက်ရမည်။
အပိုဒ် ၈၄။
အုပ်ချုပ်ရေးအာဏာပိုင်သည် အထိန်းသိမ်းခံ နယ်ပယ် ဒေသအား ကမ္ဘာ့ငြိမ်းချမ်းရေးနှင့် လုံခြုံရေး ထိန်းသိမ်းစောင့်ရှောက်မှုတွင် မလွှဲမသွေ ပါဝင်ဆောင်ရွက်စေရမည့် တာဝန်ရှိသည်။ ဤကိစ္စအလို့ငှာ အုပ်ချုပ်ရေး အာဏာပိုင်သည် လုံခြုံရေးကောင်စီအတွက် ဆောင်ရွက်မည်ဟု ခံယူထားသောတာဝန်များကို ဆောင်ရွက်ရန် အလို့ငှာ လည်းကောင်း၊ အထိန်းသိမ်း ခံနယ်ပယ်ဒေသအတွင်း ရပ်ရွာကာကွယ်ရေးနှင့် ငြိမ်ဝပ်ပိပြားရေးထိန်းသိမ်း စောင့်ရှောက်ရန် အလို့ငှာလည်းကောင်း ထိုအထိန်းသိမ်းခံ နယ်ပယ်ဒေသမှ အပျော်တမ်းတပ်များ၊ လွယ်ကူမှုများနှင့် အကူအညီများကို လက်ခံအသုံးပြုနိုင်သည်။
အပိုဒ် ၈၅။
၁။ စစ်ရေးစစ်ရာ အချက်အခြာဖြစ်သည်ဟု သတ်မှတ်ဖော်ပြမထားသော နယ်မြေအားလုံးအတွက်ဖြစ်သော ထိန်းသိမ်းရေး သဘောတူစာချုပ်များနှင့် စပ်လျဉ်း၍ ကမ္ဘာ့ကုလသမဂ္ဂအဖွဲ့ ၏အလုပ်ဝတ္တရားများကို အထွေထွေညီလာခံကဆောင်ရွက်ရမည်။ ထိုအလုပ်ဝတ္တရားများတွင် ထိန်းသိမ်းရေး သဘောတူစာချုပ်များပါ စည်းကမ်းချက်များကိုလည်းကောင်း၊ ထိုစည်းကမ်းချက်များတွင်ပြုလုပ်သော ပြောင်းလဲချက် သို့မဟုတ် ပြင်ဆင်ချက်ကိုလည်းကောင်း သဘောတူခြင်းလည်း ပါဝင်သည်။
၂။ အထွေထွေညီလာခံ၏ အာဏာအရ လုပ်ကိုင်ဆောင်ရွက်ရသည် နိုင်ငံငယ်များ ထိန်းသိမ်းရေးကောင်စီသည် အထွေထွေညီလာခံအား ယင်းအလုပ်ဝတ္တရားများကို ဆောင်ရွက်ရာတွင် ကူညီရမည်။ [ 32 ]အခန်း (၁၃)
နိုင်ငံငယ်များ ထိန်းသိမ်းရေးကောင်စီ
- ဖွဲ့စည်းပုံ
အပိုဒ် ၈၆။
၁။ နိုင်ငံငယ်များ ထိန်းသိမ်းရေးကောင်စီတွင် အောက်ပါ ကမ္ဘာ့ကုလသမဂ္ဂ အဖွဲ့၀င် နိုင်ငံများ ပါဝင်ရမည် -
- (က) အထိန်းသိမ်းခံ နယ်ပယ်ဒေသများကို အုပ်ချုပ်ရသည့် ကမ္ဘာ့ကုလသမဂ္ဂအဖွဲ့ဝင် နိုင်ငံများ။
- (ခ) အထိန်းသိမ်းခံနယ်ပယ်ဒေသများကို အုပ်ချုပ်ခြင်းမပြုသည့် အပိုဒ် ၂၃ တွင် အမည်ဖော်ပြထားသော ကမ္ဘာ့ကုလသမဂ္ဂအဖွဲ့ဝင်နိုင်ငံများ။
- ထို့ပြင်
- (ဂ) နိုင်ငံငယ်များ ထိန်းသိမ်းရေးကောင်စီဝင်နိုင်ငံ အရေအတွက် စုစုပေါင်းကို အထိန်းသိမ်းခံနယ်ပယ်ဒေသများကို အုပ်ချုပ်ရသော ကမ္ဘာ့ကုလသမဂ္ဂအဖွဲ့ဝင်နိုင်ငံများနှင့် မအုပ်ချုပ်ရသော ကမ္ဘာ့ကုလသမဂ္ဂအဖွဲ့ဝင် နိုင်ငံများအား တစ်ဝက်စီအညီအမျှခွဲဝေပေးနိုင်ခြင်းငှာ လိုအပ်သည့်အတိုင်း အထွေထွေညီလာခံက သုံးနှစ် သက်တမ်းအကွက် ရွေးကောက် တင်မြှောက်ထားသော အခြား ကမ္ဘာ့ကုလသမဂ္ဂ အဖွဲ့ဝင်နိုင်ငံများ။
၂။ နိုင်ငံငယ်များ ထိန်းသိမ်းရေးကောင်စီဝင် နိုင်ငံအသီးသီးသည် ကောင်စီတွင် မိမိကိုယ်စား ပါဝင် ဆောင်ရွက်ရန် အထူးအရည်အချင်းနှင့် ပြည်စုံသည့် ပုဂ္ဂိုလ်တစ်ဦးကို ခန့်ထားရမည်။
- အလုပ်ဝတ္တရားနှင့် အာဏာများ
အပိုဒ် ၈၇။
အထွေထွေညီလာခံနှင့် ၎င်း၏ အာဏာအရဆောင်ရွက်ရသည် နိုင်ငံငယ်များ ထိန်းသိမ်းရေးကောင်စီတို့သည် မိမိတို့၏ အလုပ်ဝတ္တရားများကို အောက်ပါအတိုင်း ဆောင်ရွက်နိုင်သည်။
- (က) အုပ်ချုပ်ရေးအာဏာပိုင်က တင်ပြသော အစီရင်ခံစာများကို စဉ်းစားဆွေးနွေးခြင်း။
- (ခ) လျှောက်လွှာများကို လက်ခံ၍ အုပ်ချုပ်ရေး အာဏာပိုင်နှင့် တိုင်ပင်နှီးနှောကာ ယင်းလျှောက်လွှာများကို စစ်ဆေးခြင်း။ [ 33 ]
- (ဂ) အုပ်ချုပ်ရေးအာဏာပိုင်နှင့် သဘောတူညီထားသော အချိန်များတွင် သက်ဆိုင်ရာ အထိန်းသိမ်းခံ နယ်ပယ်ဒေသများသို့ မှန်မှန်သွားရောက်ကြည့်ရှုမှုအတွက် စီမံခြင်း။
- (ဃ) ဤအရေးကိစ္စများနှင့် အခြားအရေးကိစ္စများကို ထိန်းသိမ်းရေး သဘောတူစာချုပ်များပါ စည်းကမ်းချက်များနှင့်အညီ ဆောင်ရွက်ခြင်း။
အပိုဒ် ၈၈။
နိုင်ငံငယ်များ ထိန်းသိမ်းရေးကောင်စီသည် အထိန်းသိမ်းခံ နယ်ပယ် အသီးသီးတွင် နေထိုင်သူတို့၏ နိုင်ငံရေး၊ စီးပွားရေး၊ လူမှုရေးနှင့် ပညာရေးတွင် မည်ရွေ့ မည်မျှ တိုးတက်မှုရှိကြောင်း သိရှိနိုင်ရေးအတွက် မေးခွန်းစု တစ်ရပ်ကို သတ်မှတ်ရေးသားရမည်။ အထွေထွေညီလာခံ၏ အာဏာပိုင်နက်အတွင်းရှိ အထိန်းသိမ်းခံနယ်ပယ် အသီးသီးနှင့် သက်ဆိုင်သော အုပ်ချုပ်ရေး အာဏာပိုင်သည် အဆိုပါ မေးခွန်းများအပေါ် အခြေပြု၍ အထွေထွေညီလာခံသို့ နှစ်ချုပ်အစီရင်ခံစာ တင်သွင်းရမည်။
- မဲပေးခြင်း
အပိုဒ် ၈၉။
၁။ နိုင်ငံငယ်များထိန်းသိမ်းရေးကောင်စီဝင် နိုင်ငံအသီးသီး၌ မဲတစ်မဲစီ ပေးပိုင်ခွင့်ရှိသည်။
၂။ နိုင်ငံငယ်များ ထိန်းသိမ်းရေးကောင်စီ၏ ဆုံးဖြတ်ချက်များကို ကောင်စီ အစည်းအဝေးသို့ တက်ရောက် မဲပေးသည့်ကောင်စီဝင်နိုင်ငံ အများစု၏ မဲဆန္ဒဖြင့် ချမှတ်ရမည်။
- လုပ်ငန်းစဉ်
အပိုဒ် ၉၀။
၁။ နိုင်ငံငယ်များ ထိန်းသိမ်းရေးကောင်စီသည် မိမိ၏ လုပ်ငန်းစဉ် နည်းဥပဒေများကို မိမိကပင် ပြဋ္ဌာန်းရမည်။ ထိုနည်းဥပဒေများတွင် မိမိ၏ ဥက္ကဋ္ဌ ရွေးချယ်ရန် နည်းလမ်းကိုလည်း တည်သွင်း သတ်မှတ်ရမည်။
၂။ နိုင်ငံငယ်များ ထိန်းသိမ်းရေးကောင်စီသည် မိမိ၏ နည်းဥပဒေ များနှင့်အညီ လိုအပ်သည်အတိုင်း အစည်းအဝေးကျင်းပရမည်။ ထိုနည်းဥပဒေများတွင် ကောင်စီဝင်နိုင်ငံ အများစု၏ တောင်းဆိုချက်အရ အစည်းအဝေးများကို ကျင်းပရန်အတွက် ပြဋ္ဌာန်းချက်လည်း ပါဝင်ရမည်။
အပိုဒ် ၉၁။
အခန်း (၁၄)
အပြည်ပြည်ဆိုင်ရာ တရားရုံး
အပိုဒ် - ၉၂။
အပြည်ပြည်ဆိုင်ရာ တရားရုံးသည် ကမ္ဘာ့ကုလသမဂ္ဂအဖွဲ့၏ အဓိက တရားစီရင်ရေးအဖွဲ့ ဖြစ်ရမည်။ ထိုတရားရုံးသည် ပူးတွဲပါ ဥပဒေနှင့်အညီ ဆောင်ရွက်ရမည်။ ထိုဥပဒေမှာ အပြည်ပြည်ဆိုင်ရာ အမြဲတမ်း တရားရုံး၏ ဥပဒေပေါ်တွင် အခြေပြုသော ဥပဒေဖြစ်သည့်ပြင် ယခုလက်ရှိ ပဋိညာဉ် စာချုပ်တွင် လိုအပ်သော အစိတ်အပိုင်းအဖြစ်ဖြင့်လည်း ပါဝင်သည်။
အပိုဒ် - ၉၃။
၁။ ကမ္ဘာ့ကုလသမဂ္ဂအဖွဲ့ဝင် နိုင်ငံအားလုံးသည် ကမ္ဘာ့ကုလသမဂ္ဂအဖွဲ့တွင် ပါဝင်သည့်အကြောင်းကြောင်းနှင့် အပြည်ပြည်ဆိုင်ရာတရားရုံး၏ ဥပဒေနှင့် သက်ဆိုင်သည်ချည်းဖြစ်ကြသည်။
၂။ ကမ္ဘာ့ကုလသမဂ္ဂအဖွဲ့ဝင် မဟုတ်သော နိုင်ငံသည် အထွေထွေ ညီလာခံက လုံခြုံရေးကောင်စီ၏ ထောက်ခံချက်ဖြင့် ကိစ္စတစ်ခုစီ တစ်ခုစီ အလိုက် သတ်မှတ်ထားသည့် စည်းကမ်းချက်များအရ အပြည်ပြည်ဆိုင်ရာ တရားရုံးကဥပဒေနှင့် အကျုံးဝင်သော နိုင်ငံဖြစ်လာနိုင်သည်။
အပိုဒ် - ၉၄။
၁။ ကမ္ဘာ့ကုလသမဂ္ဂအဖွဲ့ဝင်နိုင်ငံ အသီးသီးသည် မိမိပါဝင်သော မည်သည့်အမှုတွင်မဆို အပြည်ပြည်ဆိုင်ရာ တရားရုံး၏ဆုံးဖြတ်ချက်ကို လိုက်နာဆောင်ရွက်ရန် တာဝန်ယူရသည်။
၂။ အမှုတစ်ခုခုတွင် ပါဝင်သောအမှုသည် နိုင်ငံ တစ်နိုင်ငံက အဆိုပါတရားရုံး၏ စီရင်ချက်အရ မိမိအပေါ် ကျရောက်သောတာဝန်များကို ဆောင်ရွက်ရန် ပျက်ကွက်လျှင် တဘက်အမှုသည် နိုင်ငံသည် လုံခြုံရေးကောင်စီ၏ အကူအညီကို ရယူနိုင်သည်။ လုံခြုံရေးကောင်စံသည် မိမိလိုအပ်သည်ထင်မြင်လျှင် ထိုစီရင်ချက်အတိုင်း အတည် ဖြစ်အောင် မည်သို့ စီမံဆောင်ရွက်ရမည် ဖြစ်ကြောင်း ထောက်ခံချက်များပေးနိုင်သည်၊ သို့မဟုတ် ဆုံးဖြတ်နိုင်သည်။
အပိုဒ် - ၉၅။
အပိုဒ် - ၉၆။
၁။ အထွေထွေညီလာခံသည် သို့မဟုတ် လုံခြုံရေး ကောင်စီသည် တရားဥပဒေနှင့်ဆိုင်သော မည်သည့်ကိစ္စတွင်မဆို အပြည်ပြည်ဆိုင်ရာ တရားရုံးအား တိုင်ပင်နှီးနှော၍ ထင်မြင်ချက်တောင်းဆိုနိုင်သည်။
၂။ ကမ္ဘာ့ကုလသမဂ္ဂအဖွဲ့၏ အခြားလုပ်ငန်းအဖွဲ့များနှင့် အထူး ကိုယ်စားလှယ်အဖွဲ့အစည်းများသည်လည်း မည်သည့်အခါအဆို အထွေထွေ ညီလာခံ၏ အခွင့်အမိန့်ကို ရရှိပါက မိမိတို့၏လုပ်ငန်းဆောင်တာအတွင်း အကျုံး၀င်သော ကိစ္စများမှ ပေါ်ပေါက်လာသည့် ဥပဒေရေးရာ ပြဿနာများနှင့် စပ်လျဉ်း၍ အပြည်ပြည်ဆိုင်ရာတရားရုံးအား တိုင်ပင်နှီးနှော၍ ထင်မြင်ချက်များ တောင်းဆိုနိုင်သည်။
အခန်း(၁၅)
အတွင်းရေးမှူးချုပ်ရုံး
အပိုဒ် - ၉၇။
အတွင်းရေးမှူးချုပ်ရုံးတွင် အတွင်းရေးမှူးချုပ်နှင့် ကမ္ဘာ့ကုလသမဂ္ဂအဖွဲ့က လိုအပ်သော ရာထမ်းမှုထမ်းများ ပါဝင်ရမည်။ အတွင်းရေးမှူးချုပ်ကို လုံခြုံရေးကောင်စီ၏ ထောက်ခံချက်အရ အထွေထွေညီလာခံက ခန့်ထားရမည်။ အတွင်းရေးမှူးချုပ်သည် ကမ္ဘာ့ကုလသမဂ္ဂအဖွဲ့၏ အုပ်ချုပ်ရေးအရာရှိချုပ် ဖြစ်ရမည်။
အပိုဒ် - ၉၈။
အတွင်းရေးမှူးချုပ်သည် အထွေထွေညီလာခံအစည်းအဝေး၊ လုံခြုံရေးကောင်စီ အစည်းအဝေး၊ စီးပွားရေးနှင့် လူမှုရေးကောင်စီ အစည်းအဝေးနှင့် နိုင်ငံငယ်များထိန်းသိမ်းရေးကောင်စီ အစည်းအဝေးအားလုံးတွင် အတွင်းရေးမှူးချုပ် အဖြစ် ဆောင်ရွက်ရမည့်အပြင် ထိုလုပ်ငန်း အဖွဲ့များက မိမိအားလွှဲအပ်ထားသည့် အခြားအလုပ် ဝတ္တရားများကိုလည်း ဆောင်ရွက်ရမည်။ အတွင်းရေးမှူး ချုပ်သည် ကမ္ဘာ့ကုလသမဂ္ဂအဖွဲ့၏ လုပ်ငန်းဆောင်တာနှင့် စပ်လျဉ်း၍ အထွေထွေ ညီလာခံသို့ နှစ်စဉ် အစီရင်ခံစာ တင်သွင်းရမည်။
အပိုဒ် - ၉၉။
အပိုဒ် - ၁၀၀။
၁။ အတွင်းရေးမှူးချုပ်နှင့် ဝန်ထမ်းများသည် မိမိတို့၏ တာဝန်ဝတ္တရားများကို ဆောင်ရွက်ရာတွင် မည်သည် အစိုးရထံကမျှ၊ သို့မဟုတ် ကမ္ဘာ့ကုလသမဂ္ဂအဖွဲ့၏ ပြင်ပရှိ အခြားမည်သည့် အာဏာပိုင်ထံကမျှ ညွှန်ကြားချက်များကို တောင်းခံခြင်း၊ သို့မဟုတ် လက်ခံခြင်းမပြုရ။ အတွင်းရေးမှူးချုပ်နှင့် ဝန်ထမ်းများသည် ကမ္ဘာ့ကုလသမဂ္ဂအဖွဲ့ကိုသာ တာဝန်ခံရသည့် အပြည်ပြည်ဆိုင်ရာ ဝန်ထမ်းများ ဖြစ်သည့်အားလျော်စွာ ၎င်းတို့၏ ဂုဏ်အဆင့်အတန်းနှင့် မလျော်သည့် အပြုအမူမှန်သမျှကို ရှောင်ကြဉ်ရမည်။
၂။ ကမ္ဘာ့ကုလသမဂ္ဂအဖွဲ့ဝင်နိုင်ငံ အသီးသီးသည် အတွင်းရေးမှူးချုပ်နှင့် ဝန်ထမ်းများ၏ အပြည်ပြည်နှင့် သက်ဆိုင်သည့် သဘောလက္ခဏာသာ သက်ဝင်သော တာဝန်များကိုလေးစားရန်နှင့် ၎င်းတို့၏တာ၀န်များကို ဆောင်ရွက်ရာတွင် ၎င်းတို့အပေါ် ဩဇာလွှမ်းမိုးခြင်းမပြုရန် တာ၀န်ယူရသည်။
အပိုဒ် - ၁၀၁။
၁။ ဝန်ထမ်းများကို အတွင်းရေးမှူးချုပ်က အထွေထွေညီလာခံမှ ချမှတ်ထားသော စည်းမျဉ်းဥပဒေများအရ ခန့်ထားရမည်။
၂။ သင့်လျော်သော ဝန်ထမ်းများကို စီးပွားရေးနှင့် လူမှုရေးကောင်စီ သို့လည်းကောင်း၊ နိုင်ငံငယ်များ ထိန်းသိမ်းရေးကောင်စီသို့ လည်းကောင်း၊ လိုအပ်ပါက ကမ္ဘာ့ကုလသမဂ္ဂအဖွဲ့၏ အခြားလုပ်ငန်းအဖွဲ့များသို့လည်းကောင်း အမြဲတမ်း ချထားပေးရမည်။ ထိုဝန်ထမ်းများသည် အတွင်းရေးမှူးချုပ်ရုံးတွင် အပါအဝင် ဖြစ်ရမည်။
၃။ ဝန်ထမ်းများကို ခန့်ထားရာတွင်လည်းကောင်း၊ ဝန်ထမ်း စည်းကမ်းများကို သတ်မှတ်ရာတွင်လည်းကောင်း၊ အလုပ်အကိုင်၊ အရည်အချင်းနှင့် သိက္ခာ သမာဓိ ဂုဏ်အဆင့်အတန်း အမြင့်ဆုံးရရှိရန် လိုအပ်ခြင်းကို အဓိက ထား၍ ထည်သွင်းစဉ်းစားရမည်။ အရာထမ်းအမှုထမ်းများကို ခေါ်ယူခန့်ထားရာတွင် ပထဝီအခြေခံအရ ကျယ်ပြန့်နိုင်သမျှ ကျယ်ပြန့်စေရေးကို မူတည်၍ ခန့်ထားရန် အရေးကြီးကြောင်းကို ထိုက်သင့်သလို ထောက်ထားရမည်။
အခန်း (၁၆)
အထွေထွေပြဋ္ဌာန်းချက်များ
အပိုဒ် - ၁၀၂။
ယခုလက်ရှိ ပဋိညာဉ်စာချုပ်စတင်အာဏာ တည်သည့် နောက်မည်သည့်ကမ္ဘာ့ကုလသမဂ္ဂအဖွဲ့ဝင် နိုင်ငံကမဆို ချုပ်ဆိုသော စာချုပ်အသီးသီးနှင့် ပြည်ထောင် [ 37 ] အချင်းချင်းသဘောတူစာချုပ်အသီးသီးကို ဆောလျင်နိုင်သမျှဆောလျှင်စွာ အတွင်းရေးမှူးချုပ်ရုံးတွင် မှတ်ပုံတင်ရမည့်ပြင် ထိုရုံးကလည်း ထုတ်ပြန်ကျေညာရမည်။
၂။ အဆိုပါစာချုပ်ကို သို့မဟုတ် အဆိုပါ ပြည်ထောင် အချင်းချင်း သဘောတူစာချုပ်ကို ဤအပိုဒ်၏ စာပိုဒ် ၁ ပါ ပြဋ္ဌာန်း ချက်များနှင့်အညီ မှတ်ပုံတင်ထားခြင်းမရှိပါက ထိုစာချုပ်၊ သို့မဟုတ် ထိုသဘောတူစာချုပ်တွင် သက်ဆိုင်ပါဝင်သော မည်သည့် နိုင်ငံတွင်မျှ ထိုစာချုပ် သို့မဟုတ် ထိုသဘော တူစာချုပ်နှင့် စပ်လျဉ်း၍ ကမ္ဘာ့ကုလသမဂ္ဂအဖွဲ့၏ လုပ်ငန်းအဖွဲ့ တစ်ခုခုတွင် တိုင်တည်နိုင်ခွင့် မရှိစေရ။
အပိုဒ် - ၁၀၃ ။
ယခုလက်ရှိ ပဋိညာဉ်စာချုပ်အရဖြစ်သော ကမ္ဘာ့ကုလသမဂ္ဂအဖွဲ့ဝင်နိုင်ငံများ၏ တာဝန်များနှင့် အခြားပြည်ထောင်စု အချင်းချင်း သဘောတူစာချုပ်တစ်ခုခုအရဖြစ်သော ၎င်းတို့၏တာဝန်များ ဆန့်ကျင်ကွဲလွဲနေလျှင် ယခုလက်ရှိ ပဋိညာဉ် စာချုပ်အရဖြစ်သော ၎င်းတို့၏ တာဝန်များသာ အတည်ဖြစ်ရမည်။
အပိုဒ် - ၁၀၄။
ကမ္ဘာ့ကုလသမဂ္ဂအဖွဲ့သည် အဖွဲ့ဝင်နိုင်ငံအသီးသီး၏ နယ်ပယ်တွင် မိမိ၏ အလုပ်ဝတ္တရားများဆောင်ရွက်ရေးနှင့် မိမိ၏ ရည်ရွယ်ချက်များ အထမြောက်ရေးအတွက် လိုအပ်သည့်အတိုင်း တရားဝင် အရေးယူဆောင်ရွက်နိုင်သော အခွင့်အရေးကို ခံစားခွင့်ရှိရမည်။
အပိုဒ် - ၁၀၅။
၁။ ကမ္ဘာ့ကုလသမဂ္ဂအဖွဲ့သည် အဖွဲ့ဝင်နိုင်ငံ အသီးသီး၏ နယ်ပယ်တွင် မိမိ၏ ရည်ရွယ်ချက်များ အထမြောက်ရေးအတွက် လိုအပ်သော အခွင့်အရေးများနှင့် ကင်းလွတ်ခွင့်များကို ခံစားခွင့်ရှိရမည်။
၂။ ကမ္ဘာ့ကုလသမဂ္ဂအဖွဲ့ဝင် နိုင်ငံများ၏ ကိုယ်စားလှယ်များနှင့် ကမ္ဘာ့ကုလသမဂ္ဂအဖွဲ့၏ ဝန်ထမ်းများသည် ကမ္ဘာ့ကုလသမဂ္ဂအဖွဲ့နှင့် စပ်လျဉ်းသည် မိမိတို့၏ အလုပ်ဝတ္တရားများကို လွတ်လပ်စွာဆောင်ရွက်နိုင်ရန်အတွက် လိုအပ်သော အခွင့်အရေးများနှင့် ကင်းလွတ်ခွင့် များကို အလားတူ ခံစားခွင့် ရှိရမည်။
၃။ အထွေထွေညီလာခံသည် ဤအပိုဒ်၏ စာပိုဒ် ၁ နှင့် ၂ အရ ခံစားရမည့် အခွင့်အရေးများနှင့် ကင်းလွတ်ခွင့်များ အသေးစိတ်သတ်မှတ်ရေးကို ရှေ့ရှု၍ ထောက်ခံချက်များ ပေးနိုင်သည်။ သို့မဟုတ် ဤကိစ္စအလို့ငှာ သဘောတူစာချုပ်များ ချုပ်ဆိုရန် ကမ္ဘာ့ကုလသမဂ္ဂအဖွဲ့ဝင် နိုင်ငံများသို့ အဆိုပြုနိုင်သည်။ [ 38 ]အခန်း (၁၇)
အကူးအပြောင်းကာလအတွက် လုံခြုံရေးအစီအစဉ်များ
အပိုဒ် - ၁၀၆။
အပိုဒ် ၄၂ အရဖြစ်သော မိမိ၏ တာဝန်များကို စတင်ဆောင်ရွက် စေနိုင်မည် စာချုပ်များဖြစ်သည်ဟု လုံခြုံရေးကောင်စီက ထင်မြင်သည့် အပိုဒ် ၄၃ တွင် ရည်ညွှန်းဖော်ပြထားသော အထူးသဘောတူစာချုပ်များ အတည်မဖြစ်သေးမီအတွင်း ၁၉၄၃ ခုနှစ်၊ အောက်တိုဘာလ (၃၀) ရက်နေ့တွင် မော်စကိုမြို့၌ လက်မှတ်ရေးထိုးခဲ့သော လေးနိုင်ငံ ကျေညာချက်ဝင် နိုင်ငံများနှင့် ပြင်သစ်နိုင်ငံသည် ကမ္ဘာ့ငြိမ်းချမ်းရေးနှင့် လုံခြုံရေးတို့ကို ထိန်းသိမ်းစောင့်ရှောက်မှု အတွက် ကမ္ဘာ့ကုလသမဂ္ဂအဖွဲ့ကိုယ်စား လိုအပ်သလို ပူးပေါင်းဆောင်ရွက်ရေးကို ရှေ့ရှု၍ အဆိုပါ ကျေညာချက်၏ စာပိုဒ် - ၅ ပါ ပြဋ္ဌာန်းချက်များနှင့် အညီ တစ်နိုင်ငံနှင့် တစ်နိုင်ငံ ညှိနှိုင်းတိုင်ပင်ရမည့်ပြင် ကမ္ဘာ့ကုလသမဂ္ဂအဖွဲ့ဝင် အခြားနိုင်ငံများနှင့်လည်း လိုအပ်သည့်အခါ ညှိနှိုင်း တိုင်ပင်ရမည်။
အပိုဒ် - ၁၀၇။
ယခုလက်ရှိ ပဋိညာဉ်စာချုပ်ကို လက်မှက်ရေးထိုးသော မည်သည့် နိုင်ငံနှင့် မဆို ဒုတိယကမ္ဘာစစ်အတွင်းက ရန်သူဖြစ်ခဲ့သော နိုင်ငံတစ်နိုင်ငံအပေါ်တွင် အရေးယူရန် တာဝန်ရှိသော အစိုးရများက ထိုစစ်ကြောင့် အရေးယူခြင်းကို သော်လည်းကောင်း၊ ထိုသို့ အရေးယူရန် ခွင့်ပြုခြင်းကို သော်လည်းကောင်း ယခုလက်ရှိ ပဋိညာဉ်စာချုပ်ပါ အချက်ကြောင့်ပျက်ပြယ်စေခြင်း သို့မဟုတ် တားဆီးခြင်း မရှိစေရ။
အခန်း (၁၈)
ပြင်ဆင်ချက်များ
အပိုဒ် - ၁၀၈။
အပိုဒ် - ၁၀၉။
၁။ ယခုလက်ရှိ ပဋိညာဉ်စာချုပ်ကို ပြန်လည်စစ်ဆေးကြည်ရှုရန် အလို့ငှာ ကမ္ဘာ့ကုလသမဂ္ဂအဖွဲ့ဝင် နိုင်ငံပေါင်းစုံ အစည်းအဝေးကြီးကို အထွေထွေညီလာခံတွင် ပါဝင်သည့် နိုင်ငံ သုံးပုံနှစ်ပုံ၏ မဲဖြင့်လည်းကောင်း၊ လုံခြုံရေးကောင်စီ အဖွဲ့ဝင် နိုင်ငံများအနက် ကိုးနိုင်ငံ၏ မဲဖြင့်လည်းကောင်း သတ်မှတ်သော နေ့ရက်နှင့် နေရာတွင် ကျင်းပနိုင်သည်။ ထိုနိုင်ငံပေါင်းစုံ အစည်းအဝေးကြီးတွင် ကမ္ဘာ့ကုလသမဂ္ဂအဖွဲ့ဝင် နိုင်ငံအသီးသီးမှာ မဲတစ်မဲစီ ပေးပိုင်ခွင့်ရှိသည်။
၂။ ထိုနိုင်ငံပေါင်းစုံ အစည်းအဝေးကြီးသို့ တက်ရောက်သော နိုင်ငံသုံးပုံနှစ်ပုံတို့၏ မဲဖြင့် ထောက်ခံချက်အရ လက်ရှိ ပဋိညာဉ်စာချုပ်တွင် ပြုလုပ်အပ်သော ပြောင်းလဲချက် တစ်ခုခုကို လုံခြုံရေးကောင်စီ၏ အမြဲတမ်းအဖွဲ့ဝင်နိုင်ငံအားလုံးအပါအဝင် ကမ္ဘာကုလသမဂ္ဂ အဖွဲ့ဝင် နိုင်ငံ သုံးပုံနှစ်ပုံတို့က မိမိတို့၏ ဆိုင်ရာ ဖွဲ့စည်းအုပ်ချုပ်ပုံ အခြေခံဥပဒေအရ လိုက်နာကျင့်သုံးသည့် လုပ်ထုံးလုပ်နည်း များနှင့်အညီ လက်ခံအတည်ပြုသောအခါ ထိုပြောင်းလဲချက်သည် အတည်ဖြစ်ရမည်။
၃။ ယခုလက်ရှိ ပဋိညာဉ်စာချုပ် အတည်ဖြစ်ပြီးသည့်နောက် ဆယ်ကြိမ်မြောက် နှစ်ပတ်လည် အထွေထွေညီလာခံ အစည်းအဝေးမကျင်းပမီ အဆိုပါ နိုင်ငံပေါင်းစုံ အစည်းအဝေးကြီးကို မကျင်းပရသေးလျှင် ယင်းနိုင်ငံပေါင်းစုံအစည်းအဝေးကြီးဖိတ်ခေါ်ရန် အဆိုကို ဆယ်ကြိမ်မြောက် အထွေထွေညီလာခံ အစည်းအဝေးအစီအစဉ်တွင် ထည်သွင်းရမည်။ ထိုနိုင်ငံ ပေါင်းစုံအစည်းအဝေးကြီးကို ကျင်းပရန် အထွေထွေညီလာခံတွင် ပါဝင်သော နိုင်ငံများ၏မဲများရာဖြင့်လည်ကောင်း၊ လုံခြုံရေးကောင်စီအဖွဲ့ဝင် ကိုးနိုင်ငံ၏မဲဖြင့်လည်းကောင်း ဆုံးဖြတ်လျှင် ထိုဆုံးဖြတ်သည့် အတိုင်းကျင်းပရမည်။
အခန်း (၁၉)
လက်ခံအတည်ပြုခြင်းနှင့် လက်မှတ်ရေးထိုးခြင်း
အပိုဒ် - ၁၁၀။
၁။ ယခုလက်ရှိ ပဋိညာဉ်စာချုပ်ကို လက်မှတ်ရေးထိုး ထားကြသော နိုင်ငံများသည် မိမိတို့၏ သက်ဆိုင်ရာ ဖွဲ့စည်း အုပ်ချုပ်ပုံ အခြေခံဥပဒေအရ လိုက်နာကျင့်သုံးသည် လုပ်ထုံးလုပ်နည်းများနှင့်အညီ လက်ခံအတည်ပြုရမည်။
၂။ လက်ခံအတည်ပြုချက်များကို အမေရိကန် ပြည်ထောင်စုနိုင်ငံ အစိုးရထံသို့ ပေးအပ်ရမည်။ ထိုသို့ပေး အပ်သည့်အခါတိုင်း အမေရိကန်နိုင်ငံ အစိုးရက စာချုပ် လက်မှတ်ရေးထိုးသည့် နိုင်ငံအားလုံးအားလည်းကောင်း၊ ကမ္ဘာ့ကုလသမဂ္ဂအဖွဲ့၏ အတွင်းရေးမှူးချုပ် ခန့်ထားပြီး ဖြစ်လျှင်လည်းယင်း အတွင်းရေးမှူးချုပ်အား လည်းကောင်း အကြောင်းကြားရမည်။