Jv/Alkitab/Wilangan/22

^22:1 ꦧꦁꦱ​꧊ꦆꦱꦿꦲꦺꦭ꧀ꦩꦗꦸꦠꦼꦫꦸꦱ꧀ꦭꦤ꧀ꦩꦱꦁꦏꦺꦩꦃꦲꦶꦁꦊꦧꦏ꧀​꧊ꦩꦺꦴꦮꦧ꧀꧈​ꦱꦮꦺꦠꦤ꧀ꦤꦺꦏꦭꦶ​꧊ꦪꦂꦢꦺꦤ꧀꧈​ꦲꦶꦁꦔꦉꦥ꧀ꦥꦺꦏꦸꦛ​꧊ꦪꦺꦫꦶꦏꦺꦴ꧉​

^22:2 ꦤꦭꦶꦏꦫꦗ​꧊ꦩꦺꦴꦮꦧ꧀꧈​ꦱꦶꦁꦗꦼꦤꦼꦁ​꧊ꦧꦭꦏ꧀ꦧꦶꦤ꧀​꧊ꦗ꦳ꦶꦥꦺꦴꦂ꧈​ꦏꦿꦸꦔꦸꦕꦫꦤꦺꦮꦺꦴꦁ​꧊ꦆꦱꦿꦲꦺꦭ꧀ꦔ꧀ꦒꦼꦩ꧀ꦥꦸꦂꦮꦺꦴꦁ​꧊ꦄꦩꦺꦴꦫꦶ꧈​ꦭꦤ꧀ꦕꦕꦃꦲꦺꦮꦺꦴꦁ​꧊ꦆꦱꦿꦲꦺꦭ꧀ꦩꦲꦸ꧈​

^22:3 ꦫꦗꦭꦤ꧀ꦫꦏꦾꦠ꧀ꦠꦺꦥꦝꦮꦼꦢꦶꦧꦔꦼꦠ꧀꧉​

^22:4 ꦮꦺꦴꦁ​꧊ꦩꦺꦴꦮꦧ꧀ꦧꦚ꧀ꦗꦸꦂꦏꦤ꧀ꦝꦏꦫꦺꦴꦥꦫꦥꦼꦁꦒꦼꦝꦺꦤꦺꦮꦺꦴꦁ​꧊ꦩꦶꦢꦶꦪꦤ꧀꧈​"ꦧꦁꦱ​꧊ꦆꦱꦿꦲꦺꦭ꧀ꦏꦸꦮꦶꦲꦺꦴꦫꦱꦸꦮꦺꦩꦼꦤꦺꦃꦧꦏꦭ꧀ꦤꦸꦩ꧀ꦥꦼꦱ꧀ꦧꦁꦱꦧꦁꦱꦏꦧꦺꦃꦱꦶꦁꦲꦤꦲꦶꦁꦏꦶꦮꦠꦼꦔꦼꦤ꧀ꦏꦶꦠ꧈​ꦏꦪꦱꦥꦶꦱꦶꦁꦚꦼꦁꦒꦸꦠ꧀ꦲꦶꦁꦥꦔꦺꦴꦤ꧀ꦤꦤ꧀꧉"​ꦩꦸꦭꦤꦺꦫꦗ​꧊ꦧꦭꦏ꧀

^22:5 ꦧꦚ꧀ꦗꦸꦂꦔꦶꦫꦶꦩ꧀ꦲꦸꦠꦸꦱ꧀ꦱꦤ꧀ꦤꦶꦩ꧀ꦧꦭ꧀ꦭꦶ​꧊ꦧꦶꦭꦺꦪꦩ꧀ꦧꦶꦤ꧀​꧊ꦧꦺꦪꦺꦴꦂ꧈​ꦱꦶꦁꦩꦁꦒꦺꦴꦤ꧀ꦲꦶꦁꦏꦸꦛ​꧊ꦥꦺꦠꦺꦴꦂ꧈​ꦕꦼꦝꦏ꧀ꦏꦫꦺꦴꦧꦼꦔꦮꦤ꧀​꧊ꦌꦥ꦳ꦿꦠ꧀ꦭꦤ꧀ꦩꦫꦁꦤꦼꦒꦫꦤꦼꦒꦫꦱꦶꦁꦏ꧀ꦭꦼꦧꦸꦩꦶꦠꦿꦤꦺ꧉​ꦲꦸꦠꦸꦱ꧀ꦱꦤ꧀ꦩꦲꦸꦢꦶꦏꦺꦴꦤ꧀ꦏꦤ꧀ꦝꦏꦫꦺꦴ​꧊ꦧꦶꦭꦺꦪꦩ꧀ꦩꦼꦁꦏꦺꦤꦺ꧈​"ꦤ꧀ꦢꦢꦺꦴꦱ꧀ꦤꦲꦶꦁꦥꦩꦶꦂꦱ꧈​ꦧꦶꦭꦶꦃꦮꦺꦴꦤ꧀ꦠꦼꦤ꧀ꦱꦼꦠꦸꦁꦒꦭ꧀ꦭꦶꦁꦧꦁꦱꦝꦠꦼꦁꦱꦏꦶꦁꦠꦤꦃ​꧊ꦩꦺꦱꦶꦂ꧈​ꦠꦶꦪꦁꦠꦶꦪꦁꦔꦶꦥꦸꦤ꧀ꦱꦸꦩꦼꦧꦂꦮꦺꦴꦤ꧀ꦠꦼꦤ꧀ꦲꦶꦁꦥꦸꦤ꧀ꦢꦶꦥꦸꦤ꧀ꦢꦶ꧉​ꦧꦁꦱꦮꦲꦸꦱꦒꦼꦢ꧀ꦤ꧀ꦝꦠꦼꦁꦔꦏꦼꦤ꧀ꦧꦼꦧꦪꦏꦁꦒꦺꦤꦼꦒꦫꦶꦏꦸꦭ꧉​

^22:6 ꦕꦕꦃꦲꦶꦥꦸꦤ꧀ꦭꦁꦏꦸꦁꦲꦒꦼꦁꦏꦼꦠꦶꦩ꧀ꦧꦁꦏꦭꦶꦪꦤ꧀ꦧꦁꦱꦏꦸꦭ꧉​ꦩꦶꦭ꧈​ꦏꦸꦭꦲꦠꦸꦂꦫꦶꦝꦠꦼꦁꦔꦶꦥꦠ꧀ꦲꦶꦥꦠꦶꦧꦁꦱꦩꦼꦤꦶꦏ꧈​ꦱꦸꦥꦢꦺꦴꦱ꧀ꦱꦒꦼꦢ꧀ꦏꦸꦭꦏꦮꦺꦴꦤ꧀ꦤꦏꦼꦤ꧀ꦱꦂꦠꦏꦸꦭꦠꦸꦤ꧀ꦝꦸꦁꦱꦏꦶꦁꦤꦼꦒꦫꦶꦏꦸꦭ꧉​ꦏꦸꦭꦪꦏꦶꦤ꧀ꦧꦶꦭꦶꦃꦱꦶꦤ꧀ꦠꦼꦤ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦧꦼꦂꦏꦃꦲꦶ꧈​ꦠꦼꦩ꧀ꦠꦸꦧꦝꦺꦤꦩ꧀ꦥꦶꦧꦼꦂꦏꦃ꧈​ꦭꦤ꧀ꦱꦶꦤ꧀ꦠꦼꦤ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦲꦶꦥꦠ꧀ꦲꦶꦥꦠ꧀ꦠꦶꦠꦼꦩ꧀ꦠꦸꦧꦝꦺꦤꦩ꧀ꦥꦶꦥꦲꦸꦏꦸꦩ꧀ꦩꦤ꧀꧉"​

^22:7 ꦥꦫꦥꦼꦁꦒꦼꦝꦺꦤꦺꦮꦺꦴꦁ​꧊ꦩꦺꦴꦮꦧ꧀ꦭꦤ꧀ꦮꦺꦴꦁ​꧊ꦩꦶꦢꦶꦪꦤ꧀ꦩꦲꦸꦤꦸꦭꦶꦥꦝꦧꦸꦝꦭ꧀꧈​ꦏꦫꦺꦴꦔ꧀ꦒꦮꦲꦺꦴꦥꦃꦲꦺ​꧊ꦧꦶꦭꦺꦪꦩ꧀꧈​ꦧꦚ꧀ꦗꦸꦂꦥꦝꦤꦼꦩꦺꦴꦤ꧀ꦤꦶ​꧊ꦧꦶꦭꦺꦪꦩ꧀ꦭꦤ꧀ꦔꦤ꧀ꦝꦏ꧀ꦏꦏꦺꦲꦥꦱꦶꦁꦢꦶꦮꦼꦭꦶꦁꦔꦏꦺꦢꦺꦤꦶꦁꦫꦗ​꧊ꦧꦭꦏ꧀꧉​

^22:8 ​꧊ꦧꦶꦭꦺꦪꦩ꧀ꦩꦁꦱꦸꦭ꧀ꦭꦶ꧈​"ꦱꦲꦺꦤꦶꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦱꦩꦶꦠꦶꦊꦩ꧀ꦔꦿꦶꦏꦶꦏꦺꦩꦮꦺꦴꦤ꧀꧉​ꦩ꧀ꦧꦺꦚ꧀ꦗꦶꦁꦲꦺꦚ꧀ꦗꦶꦁꦏꦸꦭꦧꦝꦺꦚꦿꦶꦪꦺꦴꦱ꧀ꦱꦏꦼꦤ꧀ꦩꦼꦤꦥꦲꦶꦁꦏꦁꦏꦝꦮꦸꦃꦲꦏꦼꦤ꧀ꦢꦺꦤꦶꦁꦥꦔꦺꦫꦤ꧀ꦝꦠꦼꦁꦏꦸꦭ꧉"​ꦥꦫꦲꦸꦠꦸꦱ꧀ꦱꦤ꧀ꦤꦺ​꧊ꦩꦺꦴꦮꦧ꧀ꦩꦲꦸꦲꦶꦪꦧꦚ꧀ꦗꦸꦂꦥꦝꦔꦶꦤꦼꦥ꧀ꦲꦶꦁꦏꦺꦴꦤꦺꦴ꧉​

^22:9 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦿꦮꦸꦃꦲꦶ​꧊ꦧꦶꦭꦺꦪꦩ꧀ꦱꦂꦠꦤ꧀ꦢꦔꦸ꧈​"ꦮꦺꦴꦁꦮꦺꦴꦁꦱꦶꦁꦥꦝꦔꦶꦤꦼꦥ꧀ꦲꦶꦁꦲꦺꦴꦩꦃꦩꦸꦏꦸꦮꦶꦱꦥ?"

^22:10 ꦲꦠꦸꦂꦮꦁꦱꦸꦭ꧀ꦭꦤ꧀ꦤꦺ​꧊ꦧꦶꦭꦺꦪꦩ꧀꧈​"ꦩꦼꦤꦶꦏꦲꦸꦠꦸꦱ꧀ꦱꦤ꧀ꦤꦶꦥꦸꦤ꧀ꦫꦗ​꧊ꦧꦭꦏ꧀ꦱꦏꦶꦁ​꧊ꦩꦺꦴꦮꦧ꧀꧈​ꦱꦥꦽꦭꦸꦩ꧀ꦧꦼꦏ꧀ꦠꦥꦮꦂꦠꦺꦴꦱ꧀꧈​

^22:11 ꦧꦶꦭꦶꦃꦮꦺꦴꦤ꧀ꦠꦼꦤ꧀ꦱꦼꦠꦸꦁꦒꦭ꧀ꦭꦶꦁꦧꦁꦱꦝꦠꦼꦁꦱꦏꦶꦁ​꧊ꦩꦺꦱꦶꦂ꧈​ꦠꦶꦪꦁꦠꦶꦪꦁꦔꦶꦥꦸꦤ꧀ꦱꦸꦩꦼꦧꦂꦲꦶꦁꦤꦼꦒꦫꦶ​꧊ꦩꦺꦴꦮꦧ꧀ꦔꦿꦶꦏꦸ꧉​ꦫꦗ​꧊ꦧꦭꦏ꧀ꦔꦼꦂꦱꦏ꧀ꦏꦏꦼꦤ꧀ꦱꦸꦥꦢꦺꦴꦱ꧀ꦏꦸꦭꦔꦶꦥꦠ꧀ꦲꦶꦥꦠꦶꦧꦁꦱꦲꦶꦁꦏꦁꦝꦠꦼꦁꦱꦏꦶꦁ​꧊ꦩꦺꦱꦶꦂꦮꦲꦸ꧈​ꦱꦸꦥꦢꦺꦴꦱ꧀ꦱꦒꦼꦢ꧀ꦢꦶꦥꦸꦤ꧀ꦏꦮꦺꦴꦤ꧀ꦤꦏꦼꦤ꧀ꦭꦤ꧀ꦢꦶꦥꦸꦤ꧀ꦠꦸꦤ꧀ꦝꦸꦁꦱꦏꦶꦁꦔꦿꦶꦏꦸ꧉"​

^22:12 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ​꧊ꦧꦶꦭꦺꦪꦩ꧀꧈​"ꦏꦺꦴꦮꦺꦲꦗꦩꦺꦭꦸꦩꦿꦤꦭꦤ꧀ꦲꦗꦔꦶꦥꦠ꧀ꦲꦶꦥꦠꦶꦮꦺꦴꦁ​꧊ꦆꦱꦿꦲꦺꦭ꧀꧈​ꦩꦼꦂꦒꦧꦁꦱꦏꦸꦮꦶꦮꦶꦱ꧀ꦢꦏ꧀ꦧꦼꦂꦏꦃꦲꦶ꧉"​

^22:13 ꦲꦺꦱꦸꦏ꧀ꦏꦺ​꧊ꦧꦶꦭꦺꦪꦩ꧀ꦏꦼꦠꦼꦩꦸꦩꦼꦤꦺꦃꦏꦫꦺꦴꦥꦫꦲꦸꦠꦸꦱ꧀ꦱꦤ꧀ꦤꦺ​꧊ꦧꦭꦏ꧀꧈​ꦧꦚ꧀ꦗꦸꦂꦏꦤ꧀ꦝ꧈​"ꦥꦚ꧀ꦗꦼꦤꦼꦁꦔꦤ꧀ꦱꦩꦶꦮꦁꦱꦸꦭ꧀ꦏꦺꦩꦮꦺꦴꦤ꧀꧈​ꦒꦸꦱ꧀ꦠꦶꦄꦭ꧀ꦭꦃꦩ꧀ꦧꦺꦴꦠꦼꦤ꧀ꦩꦉꦁꦔꦏꦼꦤ꧀ꦏꦸꦭꦠꦸꦩꦸꦠ꧀ꦩꦿꦶꦏꦏꦭꦶꦪꦤ꧀ꦥꦚ꧀ꦗꦼꦤꦼꦁꦔꦤ꧀꧉"​

^22:14 ꦥꦫꦲꦸꦠꦸꦱ꧀ꦱꦤ꧀ꦧꦚ꧀ꦗꦸꦂꦥꦝꦩꦸꦭꦶꦃ꧈​ꦩꦠꦸꦂꦩꦫꦁ​꧊ꦧꦭꦏ꧀꧈​ꦪꦺꦤ꧀​꧊ꦧꦶꦭꦺꦪꦩ꧀ꦲꦺꦴꦫꦒꦼꦊꦩ꧀ꦩꦺꦭꦸꦩꦁꦏꦠ꧀ꦧꦼꦧꦉꦁꦔꦤ꧀ꦏꦫꦺꦴꦥꦫꦲꦸꦠꦸꦱ꧀ꦱꦤ꧀꧉​

^22:15 ​꧊ꦧꦭꦏ꧀ꦤꦸꦭꦶꦏꦺꦴꦁꦏꦺꦴꦤ꧀ꦤꦤ꧀ꦲꦸꦠꦸꦱ꧀ꦱꦤ꧀ꦭꦶꦪꦤꦺ꧈​ꦕꦕꦃꦲꦺꦭꦸꦮꦶꦃꦲꦏꦺꦃ꧈​ꦭꦤ꧀ꦥꦁꦏꦠ꧀ꦠꦺꦭꦸꦮꦶꦃꦝꦸꦮꦸꦂꦏꦼꦠꦶꦩ꧀ꦧꦁꦏꦫꦺꦴꦲꦸꦠꦸꦱ꧀ꦱꦤ꧀ꦱꦶꦁꦝꦶꦱꦶꦏ꧀꧉​

^22:16 ꦥꦫꦲꦸꦠꦸꦱ꧀ꦱꦤ꧀ꦩꦲꦸꦧꦚ꧀ꦗꦸꦂꦥꦝꦩꦁꦏꦠ꧀ꦤꦼꦩꦺꦴꦤ꧀ꦤꦶ​꧊ꦧꦶꦭꦺꦪꦩ꧀꧈​ꦔ꧀ꦒꦮꦥꦶꦮꦼꦭꦶꦁꦔꦺ​꧊ꦧꦭꦏ꧀ꦩꦼꦁꦏꦺꦤꦺ꧈​"ꦏꦸꦭꦱꦸꦮꦸꦤ꧀ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦤꦩ꧀ꦥꦶꦏ꧀ꦥꦚꦸꦮꦸꦤ꧀ꦏꦸꦭꦫꦮꦸꦃꦲꦶꦁ​꧊ꦩꦺꦴꦮꦧ꧀꧉​

^22:17 ꦥꦚ꧀ꦗꦼꦤꦼꦁꦔꦤ꧀ꦧꦝꦺꦏꦸꦭꦕꦲꦺꦴꦱ꧀ꦱꦶꦲꦺꦥꦃꦏꦛꦃꦱꦔꦼꦠ꧀꧈​ꦭꦤ꧀ꦏꦸꦭꦧꦝꦺꦔꦺꦱ꧀ꦠꦺꦴꦏ꧀ꦏꦏꦼꦤ꧀ꦱꦼꦢꦪꦝꦮꦸꦃꦥꦚ꧀ꦗꦼꦤꦼꦁꦔꦤ꧀꧉​ꦩꦁꦒꦏꦸꦭꦲꦠꦸꦂꦫꦶꦫꦮꦸꦃꦭꦤ꧀ꦔꦶꦥꦠ꧀ꦲꦶꦥꦠꦶꦧꦁꦱꦩꦼꦤꦶꦏ꧉"​

^22:18 ꦤꦁꦔꦶꦁ​꧊ꦧꦶꦭꦺꦪꦩ꧀ꦩꦁꦱꦸꦭ꧀ꦭꦶ꧈​"ꦱꦼꦤꦗꦤ꧀ꦏꦸꦭꦢꦶꦥꦸꦤ꧀ꦧꦪꦂꦩꦮꦶꦥꦺꦫꦏ꧀ꦭꦤ꧀ꦲꦼꦩꦱ꧀ꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦏꦼꦝꦠꦺꦴꦤꦶꦥꦸꦤ꧀​꧊ꦧꦭꦏ꧀ꦱꦼꦢꦪ꧈​ꦏꦸꦭꦩ꧀ꦧꦺꦴꦠꦼꦤ꧀ꦧꦝꦺꦔ꧀ꦭꦮꦤ꧀ꦝꦮꦸꦃꦲꦶꦥꦸꦤ꧀ꦄꦭ꧀ꦭꦃ꧈​ꦱꦼꦱꦼꦩ꧀ꦧ꧀ꦧꦃꦲꦤ꧀ꦏꦸꦭ꧉​ꦱꦼꦤꦗꦤ꧀ꦲꦶꦁꦥꦽꦏꦮꦶꦱ꧀ꦲꦶꦁꦏꦁꦱꦼꦥꦺꦭꦺꦥꦶꦱꦤ꧀꧈​ꦏꦸꦭꦩ꧀ꦧꦺꦴꦠꦼꦤ꧀ꦏꦼꦕꦺꦴꦁꦒꦃꦔ꧀ꦭꦮꦤ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀꧉​

^22:19 ꦤꦁꦔꦶꦁꦥꦿꦪꦺꦴꦒꦶꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦱꦩꦶꦔꦱꦺꦴꦲꦶꦁꦔꦿꦶꦏꦶꦱꦲꦸꦤ꧀ꦠꦮꦶꦱ꧀꧈​ꦏꦢꦺꦴꦱ꧀ꦥꦫꦲꦸꦠꦸꦱ꧀ꦱꦤ꧀ꦲꦶꦁꦏꦁꦫꦸꦩꦶꦪꦶꦤ꧀꧉​ꦏꦸꦭꦏꦼꦥꦺꦔꦶꦤ꧀ꦱꦸꦩꦼꦉꦥ꧀ꦩꦼꦤꦥꦄꦭ꧀ꦭꦃꦏꦒꦸꦁꦔꦤ꧀ꦝꦮꦸꦃꦱꦤꦺꦱ꧀ꦱꦶꦥꦸꦤ꧀ꦩꦭꦶꦃꦝꦠꦼꦁꦏꦸꦭ꧉"​

^22:20 ꦧꦼꦔꦶꦤꦺꦒꦸꦱ꧀ꦠꦶꦄꦭ꧀ꦭꦃꦔꦿꦮꦸꦃꦲꦶ​꧊ꦧꦶꦭꦺꦪꦩ꧀ꦭꦤ꧀ꦔꦤ꧀ꦢꦶꦏ꧈​"ꦮꦺꦴꦁꦮꦺꦴꦁꦏꦸꦮꦶꦔꦗꦏ꧀ꦏꦺꦴꦮꦺꦭꦸꦔ꧉​ꦮꦶꦱ꧀ꦩꦺꦭꦸꦮ꧉​ꦩꦸꦁꦮꦲꦺ꧈​ꦏꦺꦴꦮꦺꦲꦗꦤꦶꦤ꧀ꦢꦏ꧀ꦏꦏꦺꦲꦥꦲꦥꦏꦼꦗꦧꦱꦶꦁꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧉"​

^22:21 ꦲꦺꦱꦸꦏ꧀ꦏꦺ​꧊ꦧꦶꦭꦺꦪꦩ꧀ꦔꦧꦃꦲꦧꦃꦲꦶꦏꦸꦭ꧀ꦢꦶꦤꦺ꧈​ꦧꦚ꧀ꦗꦸꦂꦧꦸꦝꦭ꧀ꦏꦫꦺꦴꦥꦫꦲꦸꦠꦸꦱ꧀ꦱꦤ꧀ꦩꦼꦚꦁ​꧊ꦩꦺꦴꦮꦧ꧀꧉​

^22:22 ꦧꦉꦁ​꧊ꦧꦶꦭꦺꦪꦩ꧀ꦧꦸꦝꦭ꧀꧈​ꦒꦸꦱ꧀ꦠꦶꦄꦭ꧀ꦭꦃꦢꦸꦏꦧꦔꦼꦠ꧀꧉​ꦤꦭꦶꦏ​꧊ꦧꦶꦭꦺꦪꦩ꧀ꦭꦒꦶꦤꦸꦁꦒꦁꦏꦸꦭ꧀ꦢꦶꦤꦺ꧈​ꦢꦶꦠꦸꦠ꧀ꦠꦏꦺꦧꦠꦸꦂꦫꦺꦭꦺꦴꦫꦺꦴ꧈​ꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦗꦸꦩꦼꦤꦼꦁ꧈​ꦔꦝꦁ​꧊ꦧꦶꦭꦺꦪꦩ꧀ꦲꦶꦁꦠꦼꦔꦃꦢꦭꦤ꧀꧉​

^22:23 ꦧꦉꦁꦮꦼꦫꦸꦃꦩꦭꦲꦺꦏꦠ꧀ꦗꦸꦩꦼꦤꦼꦁꦲꦶꦁꦔꦉꦥ꧀ꦥꦺꦏꦫꦺꦴꦔꦱ꧀ꦠꦥꦼꦝꦁꦭꦶꦒꦤ꧀꧈​ꦏꦸꦭ꧀ꦢꦶꦩꦲꦸꦏꦉꦥ꧀ꦥꦺꦲꦉꦥ꧀ꦚꦶꦁꦏꦶꦂꦫꦶ꧈​ꦩꦸꦭꦤꦺꦧꦚ꧀ꦗꦸꦂꦚꦶꦩ꧀ꦥꦁꦩꦼꦠꦸꦠꦼꦒꦭ꧀ꦭꦤ꧀꧉​ꦤꦁꦔꦶꦁꦧꦚ꧀ꦗꦸꦂꦢꦶꦒꦼꦧꦸꦒꦢꦺꦤꦶꦁ​꧊ꦧꦶꦭꦺꦪꦩ꧀꧈​ꦱꦸꦥꦪꦧꦭꦶꦩꦼꦤꦺꦃꦲꦶꦁꦢꦭꦤ꧀꧉​

^22:24 ꦤꦁꦔꦶꦁꦩꦭꦲꦺꦏꦠ꧀ꦩꦲꦸꦧꦚ꧀ꦗꦸꦂꦗꦸꦩꦼꦤꦼꦁꦲꦶꦁꦢꦭꦤ꧀ꦱꦶꦁꦕꦶꦪꦸꦠ꧀꧈​ꦱꦶꦁꦏꦶꦮꦠꦼꦔꦼꦤ꧀ꦤꦺꦲꦤꦠꦺꦩ꧀ꦧꦺꦴꦏ꧀ꦏꦺꦮꦠꦸ꧈​ꦲꦶꦁꦲꦤ꧀ꦠꦫꦤꦺꦏꦼꦧꦺꦴꦤ꧀ꦲꦁꦒꦸꦂ꧉​

^22:25 ꦤꦭꦶꦏꦏꦸꦭ꧀ꦢꦶꦩꦲꦸꦮꦼꦫꦸꦃꦩꦭꦲꦺꦏꦠ꧀ꦠꦺꦥꦔꦺꦫꦤ꧀꧈​ꦧꦚ꧀ꦗꦸꦂꦩ꧀ꦭꦏꦸꦩꦺꦥꦺꦠ꧀ꦲꦶꦁꦠꦺꦩ꧀ꦧꦺꦴꦏ꧀ꦮꦠꦸ꧈​ꦔꦤ꧀ꦠꦶꦱꦶꦏꦶꦭ꧀ꦭꦺ​꧊ꦧꦶꦭꦺꦪꦩ꧀ꦏꦼꦧꦫꦸꦠ꧀꧉​ꦏꦸꦭ꧀ꦢꦶꦤꦺꦤꦸꦭꦶꦢꦶꦒꦼꦧꦸꦒꦩꦼꦤꦺꦃ꧉​

^22:26 ꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦧꦚ꧀ꦗꦸꦂꦱꦪꦚꦼꦝꦏ꧀꧈​ꦭꦤ꧀ꦗꦸꦩꦼꦤꦼꦁꦲꦶꦁꦥꦁꦒꦺꦴꦤ꧀ꦤꦤ꧀ꦱꦶꦁꦭꦸꦮꦶꦃꦕꦶꦪꦸꦠ꧀ꦧꦔꦼꦠ꧀꧈​ꦔꦤ꧀ꦠꦶꦮꦺꦴꦁꦭꦶꦮꦠ꧀ꦲꦺꦴꦫꦧꦶꦱꦚꦶꦩ꧀ꦥꦁꦔꦶꦮꦲꦸꦠꦮꦤꦼꦔꦼꦤ꧀꧉​

^22:27 ꦧꦉꦁꦮꦼꦫꦸꦃꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦗꦸꦩꦼꦤꦼꦁꦲꦤꦲꦶꦁꦔꦉꦥ꧀ꦥꦺ꧈​ꦏꦸꦭ꧀ꦢꦶꦩꦲꦸꦧꦚ꧀ꦗꦸꦂꦤ꧀ꦝꦺꦥꦿꦺꦴꦏ꧀꧉​​꧊ꦧꦶꦭꦺꦪꦩ꧀ꦤꦼꦥ꧀ꦱꦸꦧꦔꦼꦠ꧀꧉​ꦏꦸꦭ꧀ꦢꦶꦤꦺꦤꦸꦭꦶꦢꦶꦒꦼꦧꦸꦒꦩꦼꦤꦺꦃꦔꦁꦒꦺꦴꦠꦼꦏꦼꦤꦺ꧉​

^22:28 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦩ꧀ꦧꦶꦏꦏ꧀ꦕꦁꦏꦼꦩ꧀ꦩꦺꦏꦸꦭ꧀ꦢꦶꦩꦲꦸ꧈​ꦮꦸꦱꦤꦏꦸꦭ꧀ꦢꦶꦩꦲꦸꦧꦶꦱꦕꦠꦸꦂꦫꦤ꧀꧉​ꦕ꧀ꦭꦛꦸꦤꦺꦏꦸꦭ꧀ꦢꦶꦩꦲꦸꦩꦫꦁ​꧊ꦧꦶꦭꦺꦪꦩ꧀꧈​"ꦏꦸꦭꦔ꧀ꦭꦩ꧀ꦥꦃꦲꦶꦩꦼꦤꦥꦢꦺꦤꦺꦥꦚ꧀ꦗꦼꦤꦼꦁꦔꦤ꧀ꦒꦼꦧꦒꦔꦤ꧀ꦠꦺꦴꦱ꧀ꦫꦩ꧀ꦧꦃꦥꦶꦁꦠꦶꦒ?"

^22:29 ꦮꦁꦱꦸꦭ꧀ꦭꦤ꧀ꦤꦺ​꧊ꦧꦶꦭꦺꦪꦩ꧀꧈​"ꦩꦼꦂꦒꦲꦏꦸꦮꦶꦱ꧀ꦏꦺꦴꦏ꧀ꦒꦮꦺꦒꦼꦒꦸꦪꦺꦴꦤ꧀!ꦲꦸꦥꦩꦲꦏꦸꦚꦼꦏꦼꦭ꧀ꦥꦼꦝꦁ꧈​ꦏꦺꦴꦮꦺꦩꦼꦱ꧀ꦛꦶꦮꦶꦱ꧀ꦢꦏ꧀ꦥꦠꦺꦤ꧀ꦤꦶ!"

^22:30 ꦮꦁꦱꦸꦭ꧀ꦭꦤ꧀ꦤꦺꦏꦸꦭ꧀ꦢꦶ꧈​"ꦩꦼꦤꦥꦩ꧀ꦧꦺꦴꦠꦼꦤ꧀ꦱꦩ꧀ꦥꦸꦤ꧀ꦢꦔꦸꦲꦼꦁꦒꦺꦤ꧀ꦏꦸꦭꦔꦧ꧀ꦢꦶꦢꦢꦺꦴꦱ꧀ꦏꦸꦭ꧀ꦢꦶꦠꦶꦠꦶꦃꦲꦤ꧀ꦥꦚ꧀ꦗꦼꦤꦼꦁꦔꦤ꧀?ꦩꦼꦤꦥꦤꦠꦺꦏꦸꦭꦩ꧀ꦧꦁꦏꦁꦝꦠꦼꦁꦥꦚ꧀ꦗꦼꦤꦼꦁꦔꦤ꧀?""ꦲꦺꦴꦫꦠꦲꦸ꧈"​ꦮꦁꦱꦸꦭ꧀ꦭꦤ꧀ꦤꦺ​꧊ꦧꦶꦭꦺꦪꦩ꧀꧉​

^22:31 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦩ꧀ꦧꦶꦏꦏ꧀ꦩꦿꦶꦥꦠ꧀ꦠꦺ​꧊ꦧꦶꦭꦺꦪꦩ꧀꧈​ꦩꦸꦭꦮꦼꦫꦸꦃꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦗꦸꦩꦼꦤꦼꦁꦲꦶꦁꦔꦉꦥ꧀ꦥꦺꦔꦱ꧀ꦠꦥꦼꦝꦁꦭꦶꦒꦤ꧀꧉​​꧊ꦧꦶꦭꦺꦪꦩ꧀ꦧꦚ꧀ꦗꦸꦂꦱꦸꦗꦸꦢ꧀ꦱꦸꦩꦸꦁꦏꦼꦩ꧀ꦲꦶꦁꦧꦸꦩꦶ꧉​

^22:32 ꦥꦔꦤ꧀ꦢꦶꦏꦤꦺꦩꦭꦲꦺꦏꦠ꧀ꦩꦲꦸ꧈​"ꦪꦒꦺꦤꦺꦏꦸꦭ꧀ꦢꦶꦩꦸꦏꦺꦴꦏ꧀ꦒꦼꦧꦸꦒꦔꦤ꧀ꦠꦶꦥꦶꦁꦠꦼꦭꦸ?ꦠꦼꦏꦏꦸꦲꦉꦥ꧀ꦚꦼꦒꦃ꧈​ꦱꦸꦥꦪꦏꦺꦴꦮꦺꦲꦗꦱꦶꦢꦭꦸꦔ꧉​

^22:33 ꦧꦼꦒ꧀ꦗꦢꦺꦤꦺꦏꦸꦭ꧀ꦢꦶꦩꦸꦮꦼꦫꦸꦃꦲꦏꦸꦭꦤ꧀ꦩꦶꦁꦒꦶꦂꦔꦤ꧀ꦠꦶꦥꦶꦁꦠꦼꦭꦸ꧉​ꦪꦺꦤ꧀ꦲꦺꦴꦫꦏꦺꦴꦮꦺꦩꦼꦱ꧀ꦛꦶꦮꦶꦱ꧀ꦢꦏ꧀ꦥꦠꦺꦤ꧀ꦤꦶ꧈​ꦭꦤ꧀ꦏꦸꦭ꧀ꦢꦶꦩꦸꦢꦏ꧀ꦱ꧀ꦭꦩꦼꦠ꧀ꦠꦏꦺ!"

^22:34 ꦲꦠꦸꦂꦮꦁꦱꦸꦭ꧀ꦭꦤ꧀ꦤꦺ​꧊ꦧꦶꦭꦺꦪꦩ꧀꧈​"ꦏꦸꦭꦱꦩ꧀ꦥꦸꦤ꧀ꦔ꧀ꦭꦩ꧀ꦥꦃꦲꦶꦢꦺꦴꦱ꧉​ꦏꦸꦭꦩ꧀ꦧꦺꦴꦠꦼꦤ꧀ꦩꦔꦼꦂꦠꦺꦴꦱ꧀꧈​ꦧꦶꦭꦶꦃꦥꦢꦸꦏꦗꦸꦩꦼꦤꦼꦁꦮꦺꦴꦤ꧀ꦠꦼꦤ꧀ꦲꦶꦁꦠꦼꦔꦃꦩꦼꦂꦒꦶ꧈​ꦚꦼꦒꦠ꧀ꦠꦶꦭꦩ꧀ꦥꦃꦏꦸꦭ꧉​ꦩꦼꦤꦮꦶꦏꦸꦭꦩ꧀ꦧꦺꦴꦠꦼꦤ꧀ꦏꦼꦥꦉꦁꦏꦺꦱꦃ꧈​ꦏꦸꦭꦧꦝꦺꦮꦁꦱꦸꦭ꧀ꦏꦺꦩꦮꦺꦴꦤ꧀꧉"​

^22:35 ꦤꦁꦔꦶꦁꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦔꦤ꧀ꦢꦶꦏ꧈​"ꦠꦼꦫꦸꦱ꧀ꦤꦭꦏꦸꦩꦸ꧈​ꦩꦺꦭꦸꦮꦮꦺꦴꦁꦮꦺꦴꦁꦏꦸꦮꦶ꧉​ꦤꦁꦔꦶꦁꦥꦺꦴꦩ꧈​ꦏꦺꦴꦮꦺꦲꦺꦴꦫꦏꦼꦤꦒꦸꦤꦼꦩ꧀ꦩꦤ꧀ꦪꦺꦤ꧀ꦲꦺꦴꦫꦢꦏ꧀ꦝꦮꦸꦃꦲꦶ꧉"​​꧊ꦧꦶꦭꦺꦪꦩ꧀ꦤꦸꦭꦶꦤꦼꦫꦸꦱ꧀ꦱꦏꦺꦭꦏꦸꦤꦺꦏꦫꦺꦴꦥꦫꦲꦸꦠꦸꦱ꧀ꦱꦤ꧀ꦤꦺ​꧊ꦧꦭꦏ꧀꧉​

^22:36 ꦧꦉꦁ​꧊ꦧꦭꦏ꧀ꦏꦿꦸꦔꦸꦪꦺꦤ꧀​꧊ꦧꦶꦭꦺꦪꦩ꧀ꦲꦉꦥ꧀ꦠꦼꦏ꧈​ꦧꦚ꧀ꦗꦸꦂꦩꦁꦏꦠ꧀ꦩꦼꦛꦸꦏ꧀ꦏꦏꦺꦲꦶꦁ​꧊ꦄꦂ꧈​ꦪꦏꦸꦮꦶꦱꦮꦶꦗꦶꦤꦶꦁꦏꦸꦛꦲꦶꦁꦱꦥꦶꦁꦒꦶꦂꦫꦺꦏꦭꦶ​꧊ꦄꦂꦤꦺꦴꦤ꧀꧈​ꦲꦶꦁꦠꦥꦼꦭ꧀ꦮꦠꦼꦱ꧀ꦱꦺ​꧊ꦩꦺꦴꦮꦧ꧀꧉​

^22:37 ꦥꦔꦸꦕꦥ꧀ꦥꦺ​꧊ꦧꦭꦏ꧀ꦩꦫꦁ​꧊ꦧꦶꦭꦺꦪꦩ꧀꧈​"ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦫꦮꦸꦃꦤꦭꦶꦏꦏꦸꦭꦲꦠꦸꦂꦫꦶꦲꦶꦁꦏꦁꦱꦼꦥꦶꦱ꧀ꦱꦤ꧀?ꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦔꦶꦤ꧀ꦠꦼꦤ꧀ꦧꦶꦭꦶꦃꦏꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦚꦲꦺꦴꦱ꧀ꦱꦶꦲꦺꦥꦃꦲꦶꦁꦏꦁꦩꦸꦂꦮꦠ꧀?"

^22:38 ꦮꦁꦱꦸꦭ꧀ꦭꦤ꧀ꦤꦺ​꧊ꦧꦶꦭꦺꦪꦩ꧀꧈​"ꦩꦼꦤꦶꦏꦩ꧀ꦧꦺꦴꦠꦼꦤ꧀ꦱꦶꦱꦃꦢꦶꦥꦸꦤ꧀ꦉꦩ꧀ꦧꦒ꧀꧉​ꦕꦼꦏꦏ꧀ꦏꦶꦥꦸꦤ꧀ꦏꦸꦭꦱꦩ꧀ꦥꦸꦤ꧀ꦢꦸꦩꦸꦒꦶꦔꦿꦶꦏꦶ꧉​ꦤꦁꦔꦶꦁꦏꦸꦭꦩ꧀ꦧꦺꦴꦠꦼꦤ꧀ꦏꦼꦥꦉꦁꦒꦶꦤꦼꦩ꧀ꦩꦤ꧀ꦱꦏꦼꦕꦥ꧀ꦏꦼꦕꦥ꧀ꦥ꧈​ꦩꦼꦤꦮꦶꦩ꧀ꦧꦺꦴꦠꦼꦤ꧀ꦲꦁꦱꦭ꧀ꦝꦮꦸꦃꦱꦏꦶꦁꦒꦸꦱ꧀ꦠꦶꦄꦭ꧀ꦭꦃ꧉"​

^22:39 ​꧊ꦧꦶꦭꦺꦪꦩ꧀ꦧꦚ꧀ꦗꦸꦂꦢꦶꦲꦗꦏ꧀ꦩꦼꦚꦁꦏꦸꦛ​꧊ꦲꦸꦗ꦳ꦺꦴꦠ꧀꧉​

^22:40 ꦲꦤꦲꦶꦁꦏꦤ​꧊ꦧꦭꦏ꧀ꦚꦼꦩ꧀ꦧꦼꦭꦺꦃꦱꦥꦶꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀;ꦢꦒꦶꦁꦔꦺꦱꦭꦺꦴꦁꦲꦤꦱꦶꦁꦢꦶꦮꦺꦤꦺꦃꦲꦏꦺ​꧊ꦧꦶꦭꦺꦪꦩ꧀ꦭꦤ꧀ꦥꦫꦥꦼꦁꦒꦼꦝꦺꦱꦶꦁꦢꦢꦶꦏꦚ꧀ꦕꦤꦺ꧉​

^22:41 ꦲꦺꦱꦸꦏ꧀ꦏꦺ​꧊ꦧꦶꦭꦺꦪꦩ꧀ꦢꦶꦒꦮ​꧊ꦧꦭꦏ꧀ꦩꦼꦚꦁꦒꦸꦤꦸꦁ​꧊ꦧꦩꦺꦴꦠ꧀​꧊ꦧꦲꦭ꧀꧉​ꦱꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧊ꦧꦶꦭꦺꦪꦩ꧀ꦧꦶꦱꦮꦼꦫꦸꦃꦧꦁꦱ​꧊ꦆꦱꦿꦲꦺꦭ꧀ꦱꦥꦺꦫꦁꦔꦤ꧀꧉​