Jv/Alkitab/Wilangan/17

^17:1 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦩꦸꦱ꧈​

^17:2 "ꦧꦁꦱ​꧊ꦆꦱꦿꦲꦺꦭ꧀ꦏꦺꦴꦤ꧀ꦤꦼꦤ꧀ꦩꦱꦿꦃꦲꦏꦺꦠꦼꦏꦼꦤ꧀ꦫꦺꦴꦭꦱ꧀ꦩꦫꦁꦏꦺꦴꦮꦺ;ꦱꦧꦼꦤ꧀ꦥꦼꦁꦒꦼꦝꦺꦤꦺꦠꦊꦂꦩꦱꦿꦃꦤꦠꦼꦏꦼꦤ꧀ꦱꦶꦗꦶ꧉​ꦗꦼꦤꦼꦁꦔꦺꦱꦧꦼꦤ꧀ꦥꦼꦁꦒꦼꦝꦺꦩꦲꦸꦠꦸꦭꦶꦱ꧀ꦱꦼꦤ꧀ꦲꦶꦁꦠꦼꦏꦼꦤꦺꦝꦺꦮꦺꦝꦺꦮꦺ꧉​

^17:3 ꦗꦼꦤꦼꦁꦔꦺꦲꦫꦸꦤ꧀ꦠꦸꦭꦶꦱ꧀ꦱꦼꦤ꧀ꦲꦶꦁꦠꦼꦏꦼꦤ꧀ꦱꦶꦁꦱꦏꦠꦊꦂ​꧊ꦭꦺꦮꦶ꧉​ꦱꦧꦼꦤ꧀ꦥꦼꦁꦒꦼꦝꦺꦠꦊꦂꦏꦸꦢꦸꦲꦤꦠꦼꦏꦼꦤꦺ꧉​

^17:4 ꦠꦼꦏꦼꦤ꧀ꦠꦼꦏꦼꦤ꧀ꦩꦲꦸꦒꦮꦤꦼꦤ꧀ꦩꦼꦚꦁꦏꦺꦩꦃꦱꦸꦕꦶ꧈​ꦱꦺꦭꦺꦃꦤꦲꦶꦁꦔꦉꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀꧉​ꦲꦤꦲꦶꦁꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦲꦼꦁꦒꦺꦴꦤ꧀ꦏꦸꦧꦏꦭ꧀ꦤꦼꦩꦺꦴꦤ꧀ꦤꦶꦏꦺꦴꦮꦺ꧉​

^17:5 ꦠꦼꦏꦼꦤꦺꦮꦺꦴꦁꦱꦶꦁꦢꦏ꧀ꦥꦶꦭꦶꦃ꧈​ꦩꦼꦁꦏꦺꦴꦧꦏꦭ꧀ꦱꦼꦩꦶ꧉​ꦔꦁꦒꦺꦴꦕꦫꦩꦼꦁꦏꦺꦴꦤꦺꦴꦲꦏꦸꦧꦏꦭ꧀ꦚꦶꦉꦥ꧀ꦱ꧀ꦮꦫꦤꦺꦮꦺꦴꦁꦮꦺꦴꦁꦱꦶꦁꦲꦺꦴꦫꦭꦺꦫꦺꦤ꧀ꦭꦺꦫꦺꦤ꧀ꦔ꧀ꦒꦸꦤ꧀ꦢꦼꦭ꧀ꦭꦶꦏꦺꦴꦮꦺ꧉"​

^17:6 ꦥꦽꦏꦫꦏꦸꦮꦶꦢꦶꦲꦸꦩꦸꦩ꧀ꦩꦏꦺꦢꦺꦤꦶꦁ​꧊ꦩꦸꦱꦩꦫꦁꦮꦺꦴꦁ​꧊ꦆꦱꦿꦲꦺꦭ꧀ꦏꦧꦺꦃ꧉​ꦥꦫꦥꦼꦁꦒꦼꦝꦺꦧꦚ꧀ꦗꦸꦂꦥꦝꦩꦱꦿꦃꦲꦏꦺꦠꦼꦏꦼꦤꦺꦝꦺꦮꦺꦝꦺꦮꦺꦩꦫꦁ​꧊ꦩꦸꦱ;ꦱꦧꦼꦤ꧀ꦥꦼꦁꦒꦼꦝꦺꦩꦱꦿꦃꦲꦏꦺꦠꦼꦏꦼꦤ꧀ꦱꦶꦗꦶ꧉​ꦕꦕꦃꦲꦺꦏꦧꦺꦃꦲꦤꦫꦺꦴꦭꦱ꧀꧉​ꦠꦼꦏꦼꦤꦺꦲꦫꦸꦤ꧀ꦲꦸꦒꦲꦤꦲꦶꦁꦲꦤ꧀ꦠꦫꦤꦺꦠꦼꦏꦼꦤ꧀ꦠꦼꦏꦼꦤ꧀ꦩꦲꦸ꧉​

^17:7 ꦠꦼꦏꦼꦤ꧀ꦠꦼꦏꦼꦤ꧀ꦩꦲꦸꦏꦧꦺꦃꦤꦸꦭꦶꦢꦶꦱꦺꦭꦺꦃꦲꦏꦺꦢꦺꦤꦶꦁ​꧊ꦩꦸꦱꦲꦶꦁꦔꦉꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀꧉​

^17:8 ꦲꦺꦱꦸꦏ꧀ꦏꦺꦤꦭꦶꦏ​꧊ꦩꦸꦱꦩ꧀ꦭꦼꦧꦸꦲꦶꦁꦏꦺꦩꦃꦱꦸꦕꦶ꧈​ꦮꦼꦫꦸꦃꦠꦼꦏꦼꦤꦺꦲꦫꦸꦤ꧀ꦱꦶꦁꦩꦏꦶꦭ꧀ꦭꦶꦠꦊꦂ​꧊ꦭꦺꦮꦶ꧈​ꦮꦶꦱ꧀ꦱꦼꦩꦶ꧉​ꦩꦭꦃꦮꦶꦱ꧀ꦩꦼꦠꦸꦏꦼꦩ꧀ꦧꦁꦔꦺꦲꦶꦪꦧꦚ꧀ꦗꦸꦂꦩꦼꦒꦂꦭꦤ꧀ꦩꦼꦠꦺꦴꦏ꧀ꦏꦏꦺꦮꦺꦴꦃꦏꦼꦠꦥꦁꦱꦶꦁꦮꦶꦱ꧀ꦩꦠꦼꦁ꧉​

^17:9 ​꧊ꦩꦸꦱꦧꦚ꧀ꦗꦸꦂꦔ꧀ꦭꦸꦩ꧀ꦥꦸꦏ꧀ꦏꦏꦺꦠꦼꦏꦼꦤ꧀ꦠꦼꦏꦼꦤ꧀ꦩꦲꦸ꧈​ꦭꦤ꧀ꦢꦶꦠꦸꦢꦸꦃꦲꦏꦺꦩꦫꦁꦲꦸꦩꦠ꧀​꧊ꦆꦱꦿꦲꦺꦭ꧀꧉​ꦏꦧꦺꦃꦥꦝꦮꦼꦫꦸꦃꦊꦭꦏꦺꦴꦤ꧀ꦩꦲꦸ꧈​ꦤꦸꦭꦶꦱꦧꦼꦤ꧀ꦥꦼꦁꦒꦼꦝꦺꦚ꧀ꦗꦸꦥꦸꦏ꧀ꦧꦭꦶꦠꦼꦏꦼꦤꦺꦝꦺꦮꦺꦝꦺꦮꦺ꧉​

^17:10 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦩꦸꦱ꧈​"ꦠꦼꦏꦼꦤꦺꦲꦫꦸꦤ꧀ꦧꦭꦺꦏ꧀ꦤꦲꦶꦁꦔꦉꦥ꧀ꦥꦺꦥꦼꦛꦶꦥꦽꦗꦚ꧀ꦗꦶꦪꦤ꧀꧉​ꦠꦼꦏꦼꦤ꧀ꦏꦸꦮꦶꦏꦸꦢꦸꦢꦶꦱꦶꦩ꧀ꦥꦼꦤ꧀ꦏꦁꦒꦺꦴꦥꦼꦔꦺꦭꦶꦁꦲꦺꦭꦶꦁꦠꦸꦩꦿꦥ꧀ꦮꦺꦴꦁ​꧊ꦆꦱꦿꦲꦺꦭ꧀ꦱꦶꦁꦱꦼꦤꦼꦁꦔꦤ꧀ꦤꦺꦩ꧀ꦧꦿꦺꦴꦤ꧀ꦠꦏ꧀ꦭꦤ꧀ꦱꦶꦁꦱꦥꦲꦺꦴꦫꦩꦫꦺꦤ꧀ꦤꦶꦥꦁꦒꦸꦤ꧀ꦢꦼꦭ꧀ꦭꦺꦧꦏꦭ꧀ꦩꦠꦶ꧉"​

^17:11 ​꧊ꦩꦸꦱꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦏꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧉​

^17:12 ꦧꦁꦱ​꧊ꦆꦱꦿꦲꦺꦭ꧀ꦤꦸꦭꦶꦏꦤ꧀ꦝꦏꦫꦺꦴ​꧊ꦩꦸꦱ꧈​"ꦪꦺꦤ꧀ꦩꦼꦁꦏꦺꦴꦤꦺꦴꦫꦏ꧀ꦕꦶꦭꦏꦏꦶꦠꦏꦧꦺꦃꦲꦶꦏꦶ!

^17:13 ꦪꦺꦤ꧀ꦮꦺꦴꦁꦱꦶꦁꦚꦼꦝꦏ꧀ꦏꦶꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃꦩꦼꦱ꧀ꦛꦶꦏꦲꦸꦏꦸꦩ꧀ꦥꦠꦶ;ꦲꦶꦏꦶꦲꦠꦼꦒꦼꦱ꧀ꦪꦺꦤ꧀ꦏꦶꦠꦏꦧꦺꦃꦧꦏꦭ꧀ꦥꦝꦏꦱꦶꦂꦤꦏ꧀ꦏꦏꦺ꧉"​