Jv/Alkitab/Wilangan/19

From Wikisource
Jump to navigation Jump to search

19:1 ꦒꦸꦱ꧀ꦠꦶꦄꦭ꧀ꦭꦃꦥꦫꦶꦁꦝꦮꦸꦃꦩꦫꦁ​꧊ꦩꦸꦱꦭꦤ꧀ꦲꦫꦸꦤ꧀
19:2 ꦱꦸꦥꦪꦒꦮꦺꦥꦽꦤꦠꦤ꧀ꦏꦁꦒꦺꦴꦧꦁꦱ​꧊ꦆꦱꦿꦲꦺꦭ꧀ꦩꦼꦁꦏꦺꦤꦺ:ꦚ꧀ꦗꦸꦥꦸꦏ꧀ꦏꦱꦥꦶꦱꦶꦁꦲꦸꦊꦱ꧀ꦱꦺꦲꦧꦁ꧈​ꦠꦤ꧀ꦥꦕꦕꦢ꧀ꦭꦤ꧀ꦱꦶꦁꦢꦸꦫꦸꦁꦠꦲꦸꦢꦶꦠꦸꦩ꧀ꦥꦁꦔꦶꦥꦱꦁꦔꦤ꧀꧉​
19:3 ꦏꦸꦮꦶꦥꦱꦿꦃꦤꦲꦶꦩꦩ꧀​꧊ꦌꦭꦺꦪꦗ꦳ꦂ꧉​ꦱꦥꦶꦩꦲꦸꦏꦸꦢꦸꦢꦶꦒꦮꦩꦼꦠꦸꦱꦏꦲꦶꦁꦏꦺꦩꦃ꧈​ꦧꦚ꧀ꦗꦸꦂꦢꦶꦱꦼꦩ꧀ꦧꦼꦭꦺꦃꦲꦲꦶꦁꦔꦉꦥ꧀ꦥꦺꦲꦶꦩꦩ꧀​꧊ꦌꦭꦺꦪꦗ꦳ꦂ꧉​
19:4 ꦲꦶꦩꦩ꧀​꧊ꦌꦭꦺꦪꦗ꦳ꦂꦧꦚ꧀ꦗꦸꦂꦏꦸꦢꦸꦚ꧀ꦗꦸꦥꦸꦏ꧀ꦒꦼꦠꦶꦃꦲꦺꦏꦺꦮꦤ꧀ꦩꦲꦸꦱꦼꦛꦶꦛꦶꦏ꧀ꦭꦤ꧀ꦢꦶꦏꦼꦥꦾꦸꦂꦏꦼꦥꦾꦸꦂꦫꦏꦺꦲꦶꦁꦏꦺꦩꦃꦱꦸꦕꦶꦔꦤ꧀ꦠꦶꦥꦶꦁꦥꦶꦠꦸ꧉​
19:5 ꦏꦺꦮꦤ꧀ꦩꦲꦸꦮꦸꦠꦸꦃ꧈​ꦢꦢꦶꦏ꧀ꦭꦼꦧꦸꦏꦸꦭꦶꦠ꧀꧈​ꦢꦒꦶꦁ꧈​ꦒꦼꦠꦶꦃꦭꦤ꧀ꦗꦼꦫꦺꦴꦮꦤ꧀ꦤꦺꦏꦸꦢꦸꦢꦶꦲꦺꦴꦧꦺꦴꦁꦲꦶꦁꦔꦉꦥ꧀ꦥꦺꦲꦶꦩꦩ꧀​꧊ꦌꦭꦺꦪꦗ꦳ꦂ꧉​
19:6 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦲꦶꦩꦩ꧀ꦩꦲꦸꦏꦸꦢꦸꦚꦼꦩ꧀ꦥ꧀ꦭꦸꦁꦔꦏꦺꦲꦶꦁꦒꦼꦤꦶꦏꦪꦸꦲꦫꦱ꧀ꦱꦼꦭꦺꦴꦚ꧀ꦗꦺꦴꦂ꧈​ꦕꦫꦁꦲꦶꦱꦺꦴꦥ꧀ꦱꦶꦗꦶ꧈​ꦠꦭꦶꦱꦶꦁꦫꦸꦥꦤꦺꦲꦧꦁꦱꦲꦼꦊꦂ꧉​
19:7 ꦲꦶꦩꦩ꧀ꦧꦚ꧀ꦗꦸꦂꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦲꦢꦸꦱ꧀ꦝꦶꦱꦶꦏ꧀ꦱꦢꦸꦫꦸꦁꦔꦺꦩ꧀ꦭꦼꦧꦸꦲꦶꦁꦏꦺꦩꦃ꧈​ꦲꦺꦮꦱꦼꦩꦺꦴꦤꦺꦴꦝꦺꦮꦺꦏ꧀ꦏꦺꦲꦶꦱꦶꦃꦤꦗꦶꦱ꧀ꦠꦼꦏꦤ꧀ꦮꦪꦃꦱꦸꦫꦸꦥ꧀꧉​
19:8 ꦮꦺꦴꦁꦱꦶꦁꦔꦺꦴꦧꦺꦴꦁꦱꦥꦶꦩꦲꦸꦲꦶꦪꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦲꦢꦸꦱ꧀;ꦲꦮꦶꦠ꧀ꦮꦺꦴꦁꦩꦲꦸꦤꦗꦶꦱ꧀ꦠꦼꦏꦤ꧀ꦱꦸꦫꦸꦥ꧀꧉​
19:9 ꦧꦚ꧀ꦗꦸꦂꦏꦸꦢꦸꦲꦤꦮꦺꦴꦁꦱꦶꦁꦉꦱꦶꦏ꧀ꦩꦶꦠꦸꦫꦸꦠ꧀ꦥꦽꦤꦠꦤ꧀ꦲꦒꦩ꧈​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦮꦸꦤꦺꦱꦥꦶꦲꦧꦁꦩꦲꦸ꧈​ꦢꦶꦢꦺꦴꦏꦺꦴꦏ꧀ꦏꦏꦺꦲꦶꦁꦥꦁꦒꦺꦴꦤ꧀ꦤꦤ꧀ꦱꦶꦁꦉꦱꦶꦏ꧀ꦩꦶꦠꦸꦫꦸꦠ꧀ꦥꦽꦤꦠꦤꦺꦲꦒꦩ꧈​ꦲꦶꦁꦱꦚ꧀ꦗꦧꦤꦺꦏꦺꦩꦃ꧉​ꦲꦮꦸꦤꦺꦱꦥꦶꦲꦧꦁꦩꦲꦸꦢꦶꦱꦶꦩ꧀ꦥꦼꦤ꧀ꦲꦤꦲꦶꦁꦏꦺꦴꦤꦺꦴ꧈​ꦢꦶꦱꦼꦝꦶꦪꦏ꧀ꦏꦏꦺꦏꦫꦺꦴꦧꦚꦸꦥꦱꦸꦕꦺꦤ꧀꧈​ꦏꦁꦒꦺꦴꦤꦺꦱꦩꦱꦲꦸꦩꦠ꧀​꧊ꦆꦱꦿꦲꦺꦭ꧀ꦔꦤꦏ꧀ꦏꦏꦺꦲꦸꦥꦕꦫꦥꦔꦿꦸꦮꦠ꧀ꦠꦶꦁꦢꦺꦴꦱ꧉​
19:10 ꦮꦺꦴꦁꦱꦶꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦮꦸꦤꦺꦱꦥꦶꦩꦲꦸꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺ꧈​ꦲꦺꦮꦱꦼꦩꦺꦴꦤꦺꦴꦮꦺꦴꦁꦩꦲꦸꦠꦼꦏꦤ꧀ꦱꦸꦫꦸꦥ꧀ꦠꦼꦠꦼꦥ꧀ꦤꦗꦶꦱ꧀꧉​ꦥꦽꦤꦠꦤ꧀ꦲꦶꦏꦶꦏꦁꦒꦺꦴꦲꦶꦁꦱꦼꦭꦮꦱ꧀ꦭꦮꦱ꧀ꦱꦺ꧈​ꦲꦶꦪꦏꦁꦒꦺꦴꦮꦺꦴꦁ​꧊ꦆꦱꦿꦲꦺꦭ꧀꧈​ꦲꦸꦠꦮꦏꦁꦒꦺꦴꦮꦺꦴꦁꦩꦚ꧀ꦕꦱꦶꦁꦧꦼꦧꦉꦁꦔꦤ꧀ꦩꦁꦒꦺꦴꦤ꧀ꦲꦤꦲꦶꦁꦏꦺꦴꦤꦺꦴ꧉​
19:11 ꦱꦶꦁꦱꦥꦔ꧀ꦒꦼꦥꦺꦴꦏ꧀ꦩꦪꦶꦠ꧀꧈​ꦢꦢꦶꦤꦗꦶꦱ꧀ꦔꦤ꧀ꦠꦶꦥꦶꦠꦸꦁꦢꦶꦤ꧉​
19:12 ꦲꦶꦁꦢꦶꦤꦏꦠꦼꦭꦸꦭꦤ꧀ꦏꦥꦶꦠꦸꦤꦺꦮꦺꦴꦁꦩꦲꦸꦏꦸꦢꦸꦔꦽꦱꦶꦏ꧀ꦏꦶꦲꦮꦏ꧀ꦏꦺꦔꦁꦒꦺꦴꦧꦚꦸꦱꦸꦕꦶ꧈​ꦱꦸꦥꦪꦉꦱꦶꦏ꧀ꦩꦶꦠꦸꦫꦸꦠ꧀ꦥꦽꦤꦠꦤꦺꦲꦒꦩ꧉​ꦪꦺꦤ꧀ꦲꦺꦴꦫꦔꦽꦱꦶꦏ꧀ꦏꦶꦲꦮꦏ꧀ꦏꦺꦲꦶꦁꦢꦶꦤꦏꦠꦼꦭꦸꦭꦤ꧀ꦏꦥꦶꦠꦸꦮꦺꦴꦁꦩꦲꦸꦠꦼꦠꦼꦥ꧀ꦤꦗꦶꦱ꧀꧉​
19:13 ꦱꦶꦁꦱꦥꦔ꧀ꦒꦼꦥꦺꦴꦏ꧀ꦩꦪꦶꦠ꧀꧈​ꦩꦁꦏꦲꦺꦴꦫꦔꦽꦱꦶꦏ꧀ꦏꦶꦲꦮꦏ꧀ꦏꦺꦔꦁꦒꦺꦴꦧꦚꦸꦱꦸꦕꦶ꧈​ꦏꦸꦮꦶꦮꦺꦴꦁꦤꦗꦶꦱ꧀꧉​ꦮꦺꦴꦁꦩꦲꦸꦒꦮꦺꦤꦗꦶꦱ꧀ꦱꦺꦏꦺꦩꦃꦱꦸꦕꦶ꧈​ꦩꦸꦭꦤꦺꦏꦸꦢꦸꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉​
19:14 ꦪꦺꦤ꧀ꦲꦤꦮꦺꦴꦁꦱꦶꦁꦠꦶꦁꦒꦭ꧀ꦢꦺꦴꦚꦲꦤꦲꦶꦁꦏꦺꦩꦃ꧈​ꦏꦧꦺꦃꦮꦺꦴꦁꦱꦶꦁꦲꦤꦲꦶꦁꦏꦺꦩꦃꦏꦺꦴꦤꦺꦴ꧈​ꦭꦤ꧀ꦱꦥꦱꦶꦁꦩ꧀ꦭꦼꦧꦸꦩꦿꦺꦴꦤꦺꦴ꧈​ꦢꦢꦶꦤꦗꦶꦱ꧀꧉​
19:15 ꦏꦼꦤ꧀ꦝꦶꦭꦤ꧀ꦏꦸꦮꦭꦶꦱꦶꦁꦲꦤꦲꦶꦁꦏꦺꦩꦃꦏꦺꦴꦤꦺꦴꦱꦶꦁꦲꦺꦴꦫꦢꦶꦠꦸꦠꦸꦥ꧀ꦥꦶ꧈​ꦲꦶꦪꦢꦢꦶꦤꦗꦶꦱ꧀꧉​
19:16 ꦮꦺꦴꦁꦱꦶꦁꦔ꧀ꦒꦼꦥꦺꦴꦏ꧀ꦩꦪꦶꦠ꧀ꦠꦺꦮꦺꦴꦁꦱꦶꦁꦢꦶꦥꦠꦺꦤ꧀ꦤꦶꦲꦸꦠꦮꦱꦶꦁꦩꦠꦶꦭꦸꦩꦿꦃꦲꦶꦁꦥꦠꦼꦒꦭ꧀ꦭꦤ꧀꧈​ꦲꦸꦠꦮꦪꦺꦤ꧀ꦔ꧀ꦒꦼꦥꦺꦴꦏ꧀ꦏꦶꦗꦶꦁꦔꦺꦮꦺꦴꦁꦩꦠꦶꦲꦶꦁꦏꦸꦧꦸꦂꦫꦤ꧀꧈​ꦲꦸꦠꦮꦧꦭꦸꦁꦔꦺꦮꦺꦴꦁꦩꦠꦶ꧈​ꦮꦺꦴꦁꦩꦲꦸꦤꦗꦶꦱ꧀ꦥꦶꦠꦸꦁꦢꦶꦤ꧉​
19:17 ꦏꦁꦒꦺꦴꦔꦽꦱꦶꦏ꧀ꦏꦶꦲꦮꦏ꧀ꦏꦺ꧈​ꦮꦺꦴꦁꦩꦲꦸꦏꦸꦢꦸꦚ꧀ꦗꦸꦥꦸꦏ꧀ꦲꦮꦸꦤꦺꦱꦥꦶꦲꦧꦁ꧈​ꦱꦶꦁꦮꦶꦱ꧀ꦢꦶꦲꦺꦴꦧꦺꦴꦁꦏꦁꦒꦺꦴꦥꦔꦿꦸꦮꦠ꧀ꦠꦶꦁꦢꦺꦴꦱ꧈​ꦢꦶꦊꦧꦺꦴꦏ꧀ꦏꦏꦺꦲꦶꦁꦏꦼꦤ꧀ꦝꦶ꧈​ꦢꦶꦲꦶꦱꦺꦤ꧀ꦤꦶꦧꦚꦸꦲꦚꦂ꧉​
19:18 ꦪꦺꦤ꧀ꦔ꧀ꦒꦼꦥꦺꦴꦏ꧀ꦩꦪꦶꦠ꧀ꦠꦺꦮꦺꦴꦁꦱꦶꦁꦩꦠꦶꦲꦶꦁꦱꦗꦿꦺꦴꦤꦶꦁꦏꦺꦩꦃꦏꦸꦮꦶꦕꦫꦤꦺꦩꦼꦁꦏꦺꦤꦺ:ꦏꦸꦢꦸꦲꦤꦮꦺꦴꦁꦱꦶꦁꦉꦱꦶꦏ꧀꧈​ꦩꦶꦠꦸꦫꦸꦠ꧀ꦥꦽꦤꦠꦤꦶꦁꦲꦒꦩ꧈​ꦚ꧀ꦗꦸꦥꦸꦏ꧀ꦕꦫꦁꦲꦶꦱꦺꦴꦥ꧀ꦱꦶꦗꦶ;ꦕꦫꦁꦩꦲꦸꦢꦶꦕꦼꦭꦸꦥ꧀ꦥꦏꦺꦲꦶꦁꦧꦚꦸꦱꦸꦕꦶꦱꦶꦁꦲꦤꦲꦶꦁꦏꦼꦤ꧀ꦝꦶꦩꦲꦸ꧈​ꦧꦚ꧀ꦗꦸꦂꦢꦶꦕꦶꦥꦿꦠ꧀ꦕꦶꦥꦿꦠ꧀ꦠꦏꦺꦔꦁꦒꦺꦴꦲꦶꦱꦺꦴꦥ꧀ꦩꦲꦸꦲꦶꦁꦏꦺꦩꦃꦭꦤ꧀ꦮꦺꦴꦁꦏꦧꦺꦃꦱꦶꦁꦲꦤꦲꦶꦁꦏꦺꦩꦃꦏꦺꦴꦤꦺꦴ꧉​ꦪꦺꦤ꧀ꦱꦶꦁꦢꦶꦒꦼꦥꦺꦴꦏ꧀ꦩꦲꦸꦩꦪꦶꦠ꧀ꦠꦺꦮꦺꦴꦁꦱꦶꦁꦢꦶꦥꦠꦺꦤ꧀ꦤꦶꦲꦸꦠꦮꦱꦶꦁꦩꦠꦶꦤꦺꦲꦤꦲꦶꦁꦠꦼꦒꦭ꧀ꦭꦤ꧀ꦲꦸꦠꦮꦪꦺꦤ꧀ꦔ꧀ꦒꦼꦥꦺꦴꦏ꧀ꦏꦶꦗꦶꦁꦲꦸꦠꦮꦧꦭꦸꦁꦔꦺꦮꦺꦴꦁꦩꦠꦶ꧈​ꦏꦸꦢꦸꦲꦤꦮꦺꦴꦁꦱꦶꦁꦉꦱꦶꦏ꧀ꦩꦶꦠꦸꦫꦸꦠ꧀ꦥꦽꦤꦠꦤꦶꦁꦲꦒꦩꦚꦶꦥꦿꦠ꧀ꦚꦶꦥꦿꦠ꧀ꦠꦏꦺꦧꦚꦸꦱꦸꦕꦶꦩꦲꦸꦩꦫꦁꦱꦶꦁꦥꦝꦤꦗꦶꦱ꧀꧉​
19:19 ꦏꦸꦮꦶꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦩꦼꦤꦺꦃꦲꦶꦁꦢꦶꦤꦏꦠꦼꦭꦸꦭꦤ꧀ꦏꦥꦶꦠꦸꦤꦺ꧉​ꦭꦒꦶꦱꦮꦶꦱ꧀ꦱꦺꦢꦶꦤꦱꦶꦁꦏꦥꦶꦠꦸꦲꦸꦥꦕꦫꦥꦱꦸꦕꦺꦤ꧀ꦩꦲꦸꦫꦩ꧀ꦥꦸꦁ꧉​ꦮꦺꦴꦁꦮꦺꦴꦁꦱꦶꦁꦥꦝꦤꦗꦶꦱ꧀ꦩꦲꦸꦏꦸꦢꦸꦥꦝꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦲꦢꦸꦱ꧀꧉​ꦱꦮꦶꦱ꧀ꦱꦺꦮꦪꦃꦱꦸꦫꦸꦥ꧀ꦮꦺꦴꦁꦮꦺꦴꦁꦩꦲꦸꦮꦶꦱ꧀ꦉꦱꦶꦏ꧀ꦩꦼꦤꦺꦃ꧉​
19:20 ꦱꦥꦱꦶꦁꦢꦢꦶꦤꦗꦶꦱ꧀꧈​ꦩꦁꦏꦲꦺꦴꦫꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦥꦱꦸꦕꦺꦤ꧀꧈​ꦏꦸꦮꦶꦠꦼꦠꦼꦥ꧀ꦤꦗꦶꦱ꧀꧈​ꦩꦼꦂꦒꦢꦸꦫꦸꦁꦢꦶꦕꦶꦥꦿꦠ꧀ꦠꦶꦧꦚꦸꦱꦸꦕꦶꦩꦲꦸ꧉​ꦮꦺꦴꦁꦏꦸꦮꦶꦒꦮꦺꦉꦒꦼꦢ꧀ꦢꦺꦏꦺꦩꦃꦱꦸꦕꦶ꧈​ꦩꦸꦭꦤꦺꦏꦸꦢꦸꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉​
19:21 ꦥꦽꦤꦠꦤ꧀ꦲꦶꦏꦶꦏꦸꦢꦸꦏꦺꦴꦏ꧀ꦠꦼꦠꦼꦥ꧀ꦥꦶꦲꦶꦁꦱꦼꦭꦮꦱ꧀ꦭꦮꦱ꧀ꦱꦺ꧉​ꦮꦺꦴꦁꦱꦶꦁꦚꦶꦥꦿꦠ꧀ꦚꦶꦥꦿꦠ꧀ꦠꦏꦺꦧꦚꦸꦱꦸꦕꦶꦩꦲꦸꦢꦢꦶꦤꦗꦶꦱ꧀ꦔꦤ꧀ꦠꦶꦱꦸꦫꦸꦥ꧀꧉​
19:22 ꦧꦫꦁꦱꦶꦁꦢꦶꦒꦼꦥꦺꦴꦏ꧀ꦢꦺꦤꦶꦁꦮꦺꦴꦁꦱꦶꦁꦤꦗꦶꦱ꧀꧈​ꦱꦼꦩꦺꦴꦤꦺꦴꦲꦸꦒꦮꦺꦴꦁꦭꦶꦪꦱꦶꦁꦔ꧀ꦒꦼꦥꦺꦴꦏ꧀ꦧꦫꦁꦩꦲꦸ꧈​ꦲꦶꦪꦢꦢꦶꦤꦗꦶꦱ꧀ꦠꦼꦏꦤ꧀ꦱꦸꦫꦸꦥ꧀꧉​