Johannes Capitulo 3

1  Habeva inter le Phariseos un homine, appellate Nicodemo, un del principales 
   del Judeos.

2  Ille veniva de nocte a Jesus, e le diceva: Rabbi, nos sape que tu es 
   un maestro que veni de Deo; perque‚ nemo pote facer iste miraculos 
   que tu face, si Deo non es con ille.

3  Jesus le respondeva dicente: In veritate, in veritate io te dice que 
   si uno non es nascite de nove, non pote vider le regno de Deo.

4  Nicodemo le diceva: como pote un homine nascer quando ille es vetere? 
   Pote forsan ille entrar un secunde vice in le sino de sua matre e nascer?

5  Jesus respondeva: In veritate, in veritate io te dice que si uno non 
   es nascite de aqua e de Spirito, non pote entrar in le regno de Deo.

6  Qui es nascite del carne, es carne; e qui es nascite del Spirito,
   es spirito.

7  Non te meraviliar perque io te ha dicite: Es necessari que vos nasce 
   de nove.

8  Le vento suffla ubi vole, e tu audi su rumor, ma tu non sape ni‚ de ubi 
   illo veni, ni ubi illo vade; assi es quicunque es nascite del Spirito.

9  Nicodemo replicava e le diceva: como pote advenir iste cosas?

10 Jesus le respondeva: Tu es maestro in Israel e tu non sape iste cosas?

11 In veritate, in veritate io te dice que nos parla de lo que nos sape, e nos 
   testimonia de lo que nos ha vidite; ma vos non recipe nostre testimonio.

12 Si io vos parla de cosas terren e vos non crede, como credera vos si 
   io vos parlara de cosas celestial?

13 E nemo ha ascendite al celo, salvo ille qui ha descendite ab le celo: 
   le Filio del Homine qui es in le celo.

14 E como Moses altiava le serpente in le deserto, assi es necessari que 
   le Filio del Homine sia altiate,

15 a fin que‚ quicunque crede in ille ha vita eternal.

16 Perque‚ Deo ha tanto amate le mundo, que ille ha date su unigenite Filio, 
   a fin que‚ quicunque crede in ille non peri, ma ha vita eternal.

17 De facto Deo non ha mandate su Filio al mundo pro judicar le mundo, ma
   proque le mundo sia salvate per medio de ille.

18 qui crede in ille non es judicate; qui non crede in ille es judicate, 
   perque non ha credite in le nomine del unigenite Filio de Deo.

19 E le judicio es iste: le luce ha venite al mundo, e le homines ha amate 
   le tenebras plus que le luce, perque lor operas esseva perverse.

20 Perque quicunque face cosas perverse odia le luce e non veni al luce, 
   a fin que su operas non sia reprobate;

21 ma qui mitte in practica la veritate veni al luce, a fin que su operas 
   sia manifestate, perque illos es facite in Deo.

22 Post iste cosas, Jesus vadeva con su discipulos verso le terras de Judea; 
   e ibi ille demorava con illes e baptisava.

23 E Johannes etiam baptisava a Enon, juxta Salim, perque ibi habeva multe 
   aqua; e le populo veniva e esseva baptisate.

24 Perque Johannes non habeva essite ancora imprisionate.

25 Nasceva dunque un discussion inter le discipulos de Johannes e le 
   Judeos circa le purification.

26 E illes veniva a Johannes e le diceva: Rabbi, ille qui esseva con te de 
   illac del Jordan, e del qual tu dava testimonio, ecce que ille baptisa, 
   e totos vade a ille.

27 Johannes les respondeva: Un homine non pote reciper alicun cosa, si non 
   le es date ab le celo.

28 Vos ipse me es testes de lo que io ha dicite: Io non es le Christo; 
   ma io ha essite inviate ante ille.

29 Ille qui ha le sposa es le sposo; ma le amico del sposo, qui es presente 
   e le ascolta, se allegra grandemente al voce del sposo; iste allegressa 
   que es le mie es dunque complete.

30 Il es opportun que ille cresce, e que io diminue.

31 Ille qui veni del alto es supra totos; ille qui veni del terra es del 
   terra e parla como qui es del terra; ille qui veni del celo es supra totos.

32 Ille da testimonio de lo que ha vidite e audite, ma nemo recipe 
   su testimonio.

33 qui accepta su testimonio confirma que Deo es verace.

34 Perque ille qui Deo ha inviate, parla le parolas de Deo; perque Deo non 
   le da le Spirito per mensura.

35 Le Patre ama le Filio, e le ha date tote le cosas in su manos.

36 qui crede in le Filio ha vita eternal; ma qui refusa de creder al Filio 
   non videra le vita, ma le ira de Deo resta supra ille.
1 2 3 4 5 6 7 8 9 10 11 12 13 14 15 16 17 18 19 20 21
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev