Jv/Alkitab/Pangentasan/34

^34:1 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦤꦠꦃꦲꦥꦥꦤ꧀ꦮꦠꦸꦭꦺꦴꦫꦺꦴꦏꦪꦱꦶꦁꦝꦶꦱꦶꦏ꧀꧈​ꦭꦤ꧀ꦲꦏꦸꦧꦏꦭ꧀ꦚꦼꦫꦠ꧀ꦥꦔꦤ꧀ꦢꦶꦏꦱꦶꦁꦏꦠꦸꦭꦶꦱ꧀ꦲꦶꦁꦮꦠꦸꦱꦶꦁꦮꦶꦱ꧀ꦏꦺꦴꦏ꧀ꦉꦩꦸꦏ꧀꧉​

^34:2 ꦱꦺꦱꦸꦏ꧀ꦲꦺꦱꦸꦏ꧀ꦏꦺꦴꦮꦺꦏꦸꦢꦸꦮꦶꦱ꧀ꦕꦼꦕꦮꦶꦱ꧀ꦩꦸꦁꦒꦃꦲꦶꦁꦒꦸꦤꦸꦁ꧊ꦱꦶꦤꦲꦶ꧈​ꦭꦤ꧀ꦱꦺꦴꦮꦤ꧀ꦩꦫꦁꦲꦏꦸꦲꦶꦁꦥꦸꦕꦏ꧀ꦏꦶꦁꦒꦸꦤꦸꦁꦏꦺꦴꦤꦺꦴ꧉​

^34:3 ꦲꦺꦴꦫꦲꦤꦮꦺꦴꦁꦱꦶꦗꦶꦮꦲꦺꦱꦶꦁꦏꦼꦤꦩꦺꦭꦸꦏꦺꦴꦮꦺꦲꦸꦠꦮꦏꦸꦩ꧀ꦭꦶꦮꦼꦂꦲꦤꦲꦶꦁꦒꦸꦤꦸꦁꦲꦶꦏꦸ꧉​ꦱꦼꦤꦗꦤ꧀ꦮꦼꦝꦸꦱ꧀ꦲꦸꦠꦮꦱꦥꦶꦲꦸꦒꦲꦺꦴꦫꦏꦼꦤꦚꦼꦁꦒꦸꦠ꧀ꦲꦶꦁꦱꦶꦏꦶꦭ꧀ꦭꦶꦁꦒꦸꦤꦸꦁ꧉"​

^34:4 ꧊ꦩꦸꦱꦤꦠꦃꦥꦥꦤ꧀ꦮꦠꦸꦭꦺꦴꦫꦺꦴꦩꦼꦤꦺꦃ꧈​ꦭꦤ꧀ꦲꦺꦱꦸꦏ꧀ꦏꦺ꧈​ꦲꦸꦩꦸꦤ꧀ꦲꦸꦩꦸꦤ꧀꧈​ꦮꦠꦸꦩꦲꦸꦢꦶꦲꦱ꧀ꦠꦩꦸꦁꦒꦃꦲꦶꦁꦒꦸꦤꦸꦁ꧊ꦱꦶꦤꦲꦶ꧈​ꦏꦪꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧉​

^34:5 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦫꦮꦸꦃꦲꦶꦁꦱꦗꦿꦺꦴꦤꦶꦁꦩꦺꦒ:ꦥꦚ꧀ꦗꦼꦤꦼꦁꦔꦤ꧀ꦤꦺꦗꦸꦩꦼꦤꦼꦁꦲꦤꦲꦶꦁꦱꦕꦼꦝꦏ꧀ꦏꦺ꧊ꦩꦸꦱ꧈​ꦱꦂꦠꦚꦼꦧꦸꦠ꧀ꦲꦱ꧀ꦩꦤꦺꦱꦶꦁꦱꦸꦕꦶ꧈​ꦪꦏꦸꦮꦶꦄꦭ꧀ꦭꦃ꧉​

^34:6 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦭꦁꦏꦸꦁꦲꦶꦁꦔꦉꦥ꧀ꦥꦺ꧊ꦩꦸꦱꦭꦤ꧀ꦔꦤ꧀ꦢꦶꦏꦱꦺꦴꦫ꧈​"ꦲꦏꦸꦲꦶꦏꦶꦄꦭ꧀ꦭꦃ꧈​ꦱꦶꦁꦲꦱꦶꦥꦠ꧀ꦮꦼꦭꦱ꧀ꦭꦤ꧀ꦲꦱꦶꦃ꧈​ꦒꦼꦝꦺꦱꦧꦂꦫꦺ꧈​ꦏꦩꦶꦫꦃꦲꦤ꧀ꦭꦤ꧀ꦏꦱꦼꦠꦾꦤꦺ꧉​

^34:7 ꦲꦏꦸꦤꦼꦠꦼꦥ꧀ꦥꦶꦗꦚ꧀ꦗꦶꦏꦸꦩꦫꦁꦮꦺꦴꦁꦲꦺꦮꦺꦴꦤ꧀ꦲꦺꦮꦺꦴꦤ꧀ꦱꦂꦠꦔꦥꦸꦫꦏꦭꦸꦥꦸꦠ꧀ꦠꦤ꧀꧈​ꦥꦤꦼꦫꦏ꧀ꦭꦤ꧀ꦢꦺꦴꦱ;ꦤꦁꦔꦶꦁꦔꦸꦏꦸꦩ꧀ꦩꦊꦱ꧀ꦱꦏꦺꦏꦭꦸꦥꦸꦠ꧀ꦠꦤ꧀ꦤꦺꦧꦥꦏ꧀ꦩꦫꦁꦲꦤꦏ꧀ꦥꦸꦠꦸꦤꦺꦔꦤ꧀ꦠꦶꦠꦸꦫꦸꦤ꧀ꦥꦶꦁꦠꦼꦭꦸꦭꦤ꧀ꦥꦶꦁꦥꦠ꧀꧉"​

^34:8 ꧊ꦩꦸꦱꦲꦺꦁꦒꦭ꧀ꦲꦺꦁꦒꦭ꧀ꦱꦸꦗꦸꦢ꧀ꦭꦤ꧀ꦚꦼꦩ꧀ꦧꦃ꧉​

^34:9 ꦲꦠꦸꦂꦫꦺ꧈​"ꦒꦸꦱ꧀ꦠꦶ!ꦩꦼꦤꦮꦶꦥꦢꦸꦏꦱꦲꦺꦱ꧀ꦠꦸꦤꦽꦱ꧀ꦤꦤꦶꦏꦮꦸꦭ꧈​ꦏꦮꦸꦭꦚꦸꦮꦸꦤ꧀꧈​ꦩꦸꦒꦶꦏꦼꦂꦱꦲꦚꦉꦁꦔꦶꦏꦮꦸꦭ꧉​ꦧꦁꦱꦩꦼꦤꦶꦏꦥꦚ꧀ꦕꦺꦤ꧀ꦮꦁꦏꦺꦴꦠ꧀ꦩꦤꦃꦲꦶꦥꦸꦤ꧀꧈​ꦤꦁꦔꦶꦁꦩꦸꦒꦶꦏꦼꦂꦱꦔꦥꦸꦤ꧀ꦠꦼꦤ꧀ꦢꦺꦴꦱꦭꦤ꧀ꦢꦸꦫꦏꦏꦮꦸꦭꦱꦼꦢꦪ꧈​ꦱꦲꦩꦸꦒꦶꦏꦼꦂꦱꦩꦸꦤ꧀ꦝꦸꦠ꧀ꦏꦮꦸꦭꦱꦩꦶꦢꦢꦺꦴꦱ꧀ꦏꦒꦸꦁꦔꦤ꧀ꦥꦢꦸꦏꦥꦶꦪꦩ꧀ꦧꦏ꧀꧉"​

^34:10 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​"ꦱꦲꦶꦏꦶꦲꦏꦸꦒꦮꦺꦥꦽꦗꦚ꧀ꦗꦶꦪꦤ꧀ꦏꦫꦺꦴꦧꦁꦱ꧊ꦆꦱꦿꦲꦺꦭ꧀꧉​ꦲꦶꦁꦔꦉꦥ꧀ꦥꦺꦮꦺꦴꦁꦮꦺꦴꦁꦩꦲꦸꦲꦏꦸꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦏꦲꦺꦭꦺꦴꦏꦤ꧀ꦏꦲꦺꦭꦺꦴꦏꦤ꧀ꦱꦶꦁꦢꦸꦫꦸꦁꦠꦲꦸꦢꦏ꧀ꦠꦶꦤ꧀ꦢꦏ꧀ꦏꦏꦺꦲꦶꦁꦲꦤ꧀ꦠꦫꦤꦺꦧꦁꦱꦔꦼꦤ꧀ꦢꦶꦮꦲꦺ꧉​ꦱꦏꦺꦃꦲꦶꦁꦧꦁꦱꦧꦏꦭ꧀ꦮꦼꦫꦸꦃꦏꦲꦺꦭꦺꦴꦏ꧀ꦏꦤ꧀ꦱꦶꦁꦢꦏ꧀ꦠꦶꦤ꧀ꦢꦏ꧀ꦏꦏꦺ꧈​ꦱꦼꦧꦧ꧀ꦲꦏꦸ꧈​ꦄꦭ꧀ꦭꦃꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦥꦽꦏꦫꦏꦁꦔ꧀ꦒꦼꦒꦶꦫꦶꦱꦶꦠꦸꦩꦿꦥ꧀ꦏꦺꦴꦮꦺꦏꦧꦺꦃ꧉​

^34:11 ꦩꦸꦭꦤꦺꦝꦮꦸꦃꦝꦮꦸꦃꦏꦁꦧꦏꦭ꧀ꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺꦲꦶꦁꦢꦶꦤꦲꦶꦏꦶꦭꦏꦺꦴꦤ꧀ꦤꦤ꧉​ꦲꦏꦸꦧꦏꦭ꧀ꦤꦸꦤ꧀ꦝꦸꦁꦧꦁꦱꦧꦁꦱ꧊ꦄꦩꦺꦴꦫꦶ꧈​꧊ꦏꦺꦤꦲꦤ꧀꧈​꧊ꦲꦺꦠ꧀꧈​꧊ꦥ꦳ꦺꦫꦶꦱ꧀꧈​꧊ꦲꦺꦮꦶꦭꦤ꧀꧊ꦪꦺꦧꦸꦱ꧀꧈​ꦱꦩꦱꦏꦺꦴꦮꦺꦥꦝꦩꦗꦸ꧉​

^34:12 ꦲꦗꦥꦝꦒꦮꦺꦥꦽꦗꦚ꧀ꦗꦶꦪꦤ꧀ꦏꦫꦺꦴꦮꦺꦴꦁꦮꦺꦴꦁꦲꦶꦁꦤꦼꦒꦫꦱꦶꦁꦏꦺꦴꦏ꧀ꦠꦼꦏꦤꦶ꧈​ꦱꦼꦧꦧ꧀ꦥꦽꦏꦫꦩꦲꦸꦧꦏꦭ꧀ꦧꦶꦱꦚ꧀ꦗꦶꦉꦠ꧀ꦏꦺꦴꦮꦺꦝꦺꦮꦺ꧉​

^34:13 ꦢꦢꦶ꧈​ꦲꦗꦥꦝꦔ꧀ꦭꦏꦺꦴꦤ꧀ꦤꦶꦩꦼꦁꦏꦺꦴꦤꦺꦴ꧈​ꦤꦁꦔꦶꦁꦩꦼꦱ꧀ꦧꦺꦃꦩꦼꦱ꧀ꦧꦺꦃꦲꦺꦒꦼꦩ꧀ꦥꦸꦂꦫꦼꦤ꧀꧈​ꦠꦸꦒꦸꦠꦸꦒꦸꦤꦺꦉꦩꦸꦏ꧀ꦏꦼꦤ꧀꧈​ꦭꦤ꧀ꦕꦒꦏ꧀ꦕꦒꦏ꧀ꦏꦺꦧꦿꦲꦭ꧊ꦄꦱꦾꦺꦫꦢꦸꦮꦺꦏ꧀ꦏꦺꦮꦺꦴꦁꦮꦺꦴꦁꦩꦲꦸꦫꦸꦧꦸꦃꦤ꧉​

^34:14 ꦲꦗꦥꦝꦚꦼꦩ꧀ꦧꦃꦲꦭ꧀ꦭꦃꦭꦶꦪꦤꦺ꧈​ꦱꦼꦧꦧ꧀ꦲꦏꦸꦲꦶꦏꦶꦄꦭ꧀ꦭꦃꦱꦶꦁꦱꦸꦗꦤꦤ꧀;ꦲꦏꦸꦲꦺꦴꦫꦩꦉꦁꦔꦏꦺꦪꦺꦤ꧀ꦲꦤꦮꦺꦴꦁꦚꦼꦩ꧀ꦧꦃꦩꦫꦁꦲꦭ꧀ꦭꦃꦭꦶꦪꦤꦺ꧉​

^34:15 ꦲꦗꦥꦝꦒꦮꦺꦥꦽꦗꦚ꧀ꦗꦶꦪꦤ꧀ꦏꦫꦺꦴꦧꦁꦱꦲꦶꦁꦤꦼꦒꦫꦩꦲꦸ꧈​ꦱꦼꦧꦧ꧀ꦩꦼꦤꦮꦮꦺꦴꦁꦮꦺꦴꦁꦩꦲꦸꦥꦝꦚꦼꦩ꧀ꦧꦃꦲꦭ꧀ꦭꦃꦲꦭ꧀ꦭꦃꦲꦺꦭꦤ꧀ꦒꦮꦺꦏꦸꦂꦧꦤ꧀꧈​ꦩꦼꦱ꧀ꦛꦶꦧꦏꦭ꧀ꦥꦝꦔꦸꦊꦩ꧀ꦩꦶꦏꦺꦴꦮꦺꦱꦸꦥꦪꦩꦺꦭꦸꦩꦁꦔꦤ꧀ꦏꦸꦂꦧꦤ꧀ꦤꦺ꧉​

^34:16 ꦩꦼꦤꦮꦲꦤꦏ꧀ꦲꦤꦏ꧀ꦩꦸꦩ꧀ꦧꦺꦱꦸꦏ꧀ꦏꦮꦶꦤ꧀ꦏꦫꦺꦴꦮꦺꦴꦁꦮꦢꦺꦴꦤ꧀ꦲꦶꦁꦏꦺꦴꦤꦺꦴ꧈​ꦮꦺꦴꦁꦮꦺꦴꦁꦩꦲꦸꦧꦏꦭ꧀ꦥꦝꦩ꧀ꦧꦸꦗꦸꦏ꧀ꦲꦤꦏ꧀ꦲꦤꦏ꧀ꦩꦸꦤꦶꦁꦒꦭ꧀ꦲꦏꦸ꧈​ꦢꦶꦲꦗꦏ꧀ꦚꦼꦩ꧀ꦧꦃꦢꦺꦮꦢꦺꦮꦤꦺ꧉​

^34:17 ꦲꦗꦥꦝꦒꦮꦺꦭꦤ꧀ꦚꦼꦩ꧀ꦧꦃꦩꦫꦁꦲꦭ꧀ꦭꦃꦲꦭ꧀ꦭꦃꦱꦏꦧꦫꦁꦥꦼꦭꦶꦏꦤ꧀꧉​

^34:18 ꦥꦝꦔꦤꦏ꧀ꦤꦫꦶꦪꦪꦥꦺꦱ꧀ꦠꦫꦺꦴꦠꦶꦠꦤ꧀ꦥꦫꦒꦶ꧈​ꦏꦪꦱꦶꦁꦮꦶꦱ꧀ꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧉​ꦏꦺꦴꦮꦺꦏꦸꦢꦸꦥꦝꦩꦁꦔꦤ꧀ꦫꦺꦴꦠꦶꦠꦤ꧀ꦥꦫꦒꦶꦱꦗꦿꦺꦴꦤꦺꦥꦶꦠꦸꦁꦢꦶꦤꦲꦶꦁꦱꦱꦶ꧊ꦄꦧꦶꦧ꧀꧈​ꦱꦼꦧꦧ꧀ꦲꦶꦁꦱꦱꦶꦏꦸꦮꦶꦏꦺꦴꦮꦺꦏꦧꦺꦃꦥꦝꦭꦸꦔꦱꦏꦲꦶꦁꦠꦤꦃ꧊ꦩꦺꦱꦶꦂ꧉​

^34:19 ꦱꦧꦼꦤ꧀ꦲꦤꦏ꧀ꦭꦤꦁꦩ꧀ꦧꦉꦥ꧀ꦱꦂꦠꦏꦺꦮꦤ꧀ꦭꦤꦁꦱꦶꦁꦭꦲꦶꦂꦏꦮꦶꦠ꧀ꦠꦤ꧀ꦏꦸꦮꦶꦏꦒꦸꦁꦔꦤ꧀ꦏꦸ꧈​

^34:20 ꦤꦁꦔꦶꦁꦏꦸꦭ꧀ꦢꦶꦱꦶꦁꦭꦲꦶꦂꦏꦮꦶꦠ꧀ꦠꦤ꧀ꦲꦶꦏꦸꦏꦸꦢꦸꦏꦺꦴꦏ꧀ꦠꦼꦧꦸꦱ꧀ꦔꦁꦒꦺꦴꦕꦼꦩ꧀ꦥꦺꦤꦶꦁꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦱꦶꦗꦶꦩꦶꦤꦁꦏꦲꦶꦗꦺꦴꦭ꧀ꦭꦺ꧉​ꦪꦺꦤ꧀ꦏꦺꦴꦮꦺꦥꦝꦲꦺꦴꦫꦒꦼꦊꦩ꧀ꦤꦼꦧꦸꦱ꧀꧈​ꦒꦸꦭꦸꦤꦺꦏꦺꦮꦤ꧀ꦩꦲꦸꦏꦸꦢꦸꦏꦺꦴꦏ꧀ꦥꦸꦠꦸꦁ꧉​ꦱꦧꦼꦤ꧀ꦲꦤꦏ꧀ꦭꦤꦁꦩ꧀ꦧꦉꦥ꧀ꦏꦸꦢꦸꦏꦺꦴꦏ꧀ꦠꦼꦧꦸꦱ꧀꧉​ꦱꦶꦁꦱꦥꦱꦺꦴꦮꦤ꧀ꦩꦫꦁꦲꦏꦸꦏꦸꦢꦸꦔ꧀ꦒꦮꦥꦶꦱꦸꦁꦱꦸꦁ꧉​

^34:21 ꦤꦼꦩ꧀ꦢꦶꦤꦏꦺꦴꦮꦺꦥꦝꦚꦩ꧀ꦧꦸꦠꦒꦮꦺ;ꦤꦁꦔꦶꦁꦲꦶꦁꦢꦶꦤꦏꦥꦶꦠꦸꦥꦝꦭꦺꦫꦺꦤ꧀ꦤ꧈​ꦱꦼꦤꦗꦤ꧀ꦲꦶꦁꦩꦁꦱꦩ꧀ꦭꦸꦏꦸꦲꦸꦠꦮꦲꦶꦁꦩꦁꦱꦥꦤꦺꦤ꧀꧉​

^34:22 ꦩꦼꦤꦮꦏꦺꦴꦮꦺꦥꦝꦔꦼꦤꦺꦤ꧀ꦤꦶꦒꦤ꧀ꦢꦸꦩ꧀ꦏꦁꦏꦮꦶꦠ꧀ꦠꦤ꧀꧈​ꦥꦝꦔꦤꦏ꧀ꦤꦥꦺꦱ꧀ꦠꦥꦤꦺꦤ꧀꧉​ꦫꦶꦪꦪꦏ꧀ꦤꦲꦸꦒꦫꦶꦪꦪꦠꦫꦸꦧ꧀ꦒꦺꦴꦝꦺꦴꦁꦲꦶꦁꦥꦸꦁꦏꦱ꧀ꦱꦤ꧀ꦤꦶꦁꦠꦲꦸꦤ꧀꧈​ꦱꦩꦱꦏꦺꦴꦮꦺꦥꦝꦔꦸꦤ꧀ꦝꦸꦃꦲꦶꦮꦺꦴꦃꦮꦺꦴꦃꦲꦤ꧀꧉​

^34:23 ꦱꦼꦠꦲꦸꦤ꧀ꦏꦥꦶꦁꦠꦼꦭꦸꦮꦺꦴꦁꦮꦺꦴꦁꦭꦤꦁꦏꦧꦺꦃꦏꦸꦢꦸꦥꦝꦱꦺꦧꦩꦫꦁꦲꦏꦸ꧈​ꦲꦭ꧀ꦭꦃꦲꦺ꧊ꦆꦱꦿꦲꦺꦭ꧀꧉​

^34:24 ꦱꦮꦶꦱ꧀ꦱꦺꦧꦁꦱꦧꦁꦱꦢꦏ꧀ꦠꦸꦤ꧀ꦝꦸꦁ꧈​ꦱꦂꦠꦮꦶꦭꦪꦃꦩꦸꦢꦏ꧀ꦲꦼꦭꦂ꧈​ꦲꦺꦴꦫꦲꦤꦮꦺꦴꦁꦱꦶꦁꦧꦏꦭ꧀ꦮꦤꦶꦔꦽꦧꦸꦠ꧀ꦤꦼꦒꦫꦩꦸ꧈​ꦲꦁꦒꦼꦂꦏꦺꦴꦮꦺꦥꦝꦠꦼꦠꦼꦥ꧀ꦱꦺꦧꦩꦫꦁꦲꦏꦸꦱꦼꦠꦲꦸꦤ꧀ꦫꦩ꧀ꦧꦃꦏꦥꦶꦁꦠꦼꦭꦸ꧈​ꦪꦲꦶꦏꦸꦲꦶꦁꦫꦶꦪꦪꦫꦺꦴꦠꦶꦠꦤ꧀ꦥꦫꦒꦶ꧈​ꦫꦶꦪꦪꦥꦤꦺꦤ꧀ꦭꦤ꧀ꦫꦶꦪꦪꦲꦸꦤ꧀ꦝꦸꦃꦲꦸꦤ꧀ꦝꦸꦃ꧉​

^34:25 ꦲꦗꦥꦝꦩꦶꦱꦸꦁꦱꦸꦁꦔꦏꦺꦫꦺꦴꦠꦶꦱꦶꦁꦢꦶꦒꦮꦺꦔꦁꦒꦺꦴꦫꦒꦶꦱꦩꦱꦏꦺꦴꦮꦺꦩꦶꦱꦸꦁꦱꦸꦁꦔꦏꦺꦏꦸꦂꦧꦤ꧀ꦏꦺꦮꦤ꧀ꦩꦫꦁꦲꦏꦸ꧉​ꦏꦺꦮꦤ꧀ꦱꦶꦁꦢꦶꦱꦼꦩ꧀ꦧꦼꦭꦺꦃꦏꦁꦒꦺꦴꦏꦸꦂꦧꦤ꧀ꦫꦶꦪꦪ꧊ꦥꦱ꧀ꦏꦃꦲꦺꦴꦫꦏꦼꦤꦔꦶꦤꦼꦥ꧀ꦠꦼꦏꦤ꧀ꦢꦶꦤꦲꦺꦱꦸꦏ꧀ꦏꦺ꧉​

^34:26 ꦒꦤ꧀ꦢꦸꦩ꧀ꦏꦮꦶꦠ꧀ꦠꦤ꧀ꦥꦩꦼꦠꦸꦤꦺꦊꦩꦃꦩꦸꦱꦶꦁꦲꦥꦶꦏ꧀ꦝꦺꦮꦺꦏꦸꦢꦸꦏꦺꦴꦏ꧀ꦒꦮꦩꦼꦚꦁꦥꦼꦢꦊꦩ꧀ꦩꦤ꧀ꦤꦺꦄꦭ꧀ꦭꦃ꧉​ꦢꦒꦶꦁꦔꦺꦕꦼꦩ꧀ꦥꦺꦲꦗꦏꦺꦴꦏ꧀ꦩꦱꦏ꧀ꦔꦁꦒꦺꦴꦧꦚꦸꦱꦸꦱꦸꦤꦺꦲꦼꦩ꧀ꦧꦺꦴꦏ꧀ꦏꦺ꧉"​

^34:27 "ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ꧊ꦩꦸꦱ꧈​ꦥꦔꦤ꧀ꦢꦶꦏꦏꦸ ꦠꦸꦭꦶꦱ꧀ꦱꦼꦤ꧀꧈​ꦱꦼꦧꦧ꧀ꦥꦔꦤ꧀ꦢꦶꦏꦲꦶꦏꦶꦧꦏꦭ꧀ꦢꦏ꧀ꦒꦮꦺꦥꦽꦗꦚ꧀ꦗꦶꦪꦤ꧀ꦏꦫꦺꦴꦏꦺꦴꦮꦺꦱꦂꦠꦏꦫꦺꦴꦧꦁꦱ꧊ꦆꦱꦿꦲꦺꦭ꧀꧉"​

^34:28 ꧊ꦩꦸꦱꦲꦤꦲꦶꦁꦏꦺꦴꦤꦺꦴꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦱꦸꦮꦺꦤꦺꦥꦠꦁꦥꦸꦭꦸꦃꦢꦶꦤꦥꦠꦁꦥꦸꦭꦸꦃꦧꦼꦔꦶ꧈​ꦲꦺꦴꦫꦝꦲꦂꦭꦤ꧀ꦲꦺꦴꦫꦔꦸꦚ꧀ꦗꦸꦏ꧀꧉​ꦢꦺꦤꦺꦥꦽꦗꦚ꧀ꦗꦶꦪꦤ꧀ꦩꦲꦸꦪꦲꦶꦏꦸꦲꦁꦒꦼꦂꦲꦁꦒꦼꦂꦫꦶꦁꦄꦭ꧀ꦭꦃꦱꦼꦥꦸꦭꦸꦃꦥꦽꦏꦫ꧈​ꦏꦁꦏꦠꦸꦭꦶꦱ꧀ꦲꦤꦲꦶꦁꦥꦥꦤ꧀ꦮꦠꦸ꧉​

^34:29 ꦤꦭꦶꦏ꧊ꦩꦸꦱꦩꦤ꧀ꦝꦥ꧀ꦱꦏꦲꦶꦁꦒꦸꦤꦸꦁ꧊ꦱꦶꦤꦲꦶꦔꦱ꧀ꦠꦲꦁꦒꦼꦂꦲꦁꦒꦼꦂꦱꦼꦥꦸꦭꦸꦃꦩꦲꦸ꧈​ꦥꦱꦸꦂꦪꦤꦺꦩꦼꦚ꧀ꦕꦺꦴꦫꦺꦴꦁꦲꦮꦶꦠ꧀ꦮꦶꦱ꧀ꦲꦧꦼꦤ꧀ꦲꦗꦼꦁꦏꦫꦺꦴꦄꦭ꧀ꦭꦃ;ꦤꦁꦔꦶꦁ꧊ꦩꦸꦱꦝꦺꦮꦺꦲꦺꦴꦫꦥꦶꦂꦱ꧉​

^34:30 ꦧꦉꦁꦲꦫꦸꦤ꧀ꦭꦤ꧀ꦥꦫꦲꦸꦩꦠ꧀ꦚꦮꦁ꧊ꦩꦸꦱꦥꦝꦮꦼꦫꦸꦃꦪꦺꦤ꧀ꦥꦱꦸꦂꦪꦤꦺ꧊ꦩꦸꦱꦩꦼꦚ꧀ꦕꦺꦴꦫꦺꦴꦁ꧈​ꦠꦼꦩꦃꦥꦝꦮꦼꦢꦶꦚꦼꦝꦏ꧀ꦏꦶ꧉​

^34:31 ꧊ꦩꦸꦱꦧꦚ꧀ꦗꦸꦂꦤꦶꦩ꧀ꦧꦭ꧀ꦭꦶꦮꦺꦴꦁꦮꦺꦴꦁꦩꦲꦸ꧉​ꦲꦫꦸꦤ꧀ꦭꦤ꧀ꦥꦫꦠꦸꦮꦠꦸꦮꦤꦺꦲꦸꦩꦠ꧀ꦏꦧꦺꦃꦤꦸꦭꦶꦲꦶꦪꦥꦝꦚꦼꦝꦏ꧀ꦏꦶ꧊ꦩꦸꦱ꧉​꧊ꦩꦸꦱꦧꦚ꧀ꦗꦸꦂꦔꦤ꧀ꦢꦶꦏꦤꦶꦮꦺꦴꦁꦮꦺꦴꦁꦩꦲꦸ꧉​

^34:32 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦏꦧꦺꦃꦲꦸꦒꦧꦚ꧀ꦗꦸꦂꦥꦝꦏꦸꦩ꧀ꦥꦸꦭ꧀ꦚꦼꦝꦏ꧀ꦏꦶꦱꦂꦠꦥꦝꦢꦶꦥꦔꦤ꧀ꦢꦶꦏꦤꦶꦧꦧ꧀ꦲꦥꦏꦁꦮꦸꦱ꧀ꦏꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃꦲꦶꦁꦒꦸꦤꦸꦁ꧊ꦱꦶꦤꦲꦶ꧉​

^34:33 ꦱꦗꦿꦺꦴꦤꦺꦔꦤ꧀ꦢꦶꦏꦤ꧀ꦏꦫꦺꦴꦮꦺꦴꦁꦮꦺꦴꦁꦩꦲꦸ꧈​꧊ꦩꦸꦱꦤꦸꦠꦸꦥ꧀ꦥꦶꦥꦱꦸꦂꦪꦤꦺꦔꦁꦒꦺꦴꦏꦕꦸ꧉​

^34:34 ꦱꦩꦱꦩ꧀ꦭꦼꦧꦼꦠ꧀ꦲꦶꦁꦏꦺꦩꦃꦥꦊꦁꦒꦃꦲꦤ꧀ꦤꦶꦁꦄꦭ꧀ꦭꦃꦥꦽꦭꦸꦱꦺꦴꦮꦤ꧀ꦲꦶꦁꦔꦂꦱꦤꦺꦒꦸꦱ꧀ꦠꦶꦄꦭ꧀ꦭꦃ꧈​ꦏꦕꦸꦩꦲꦸꦢꦶꦧꦸꦏꦏ꧀꧉​ꦱꦮꦶꦱ꧀ꦱꦺꦩꦼꦠꦸ꧈​ꦱꦏꦺꦃꦲꦶꦁꦥꦔꦤ꧀ꦢꦶꦏꦤꦺꦄꦭ꧀ꦭꦃꦤꦸꦭꦶꦢꦶꦝꦮꦸꦃꦲꦏꦺꦩꦫꦁꦧꦁꦱ꧊ꦆꦱꦿꦲꦺꦭ꧀꧈​

^34:35 ꦢꦺꦤꦺꦮꦺꦴꦁꦮꦺꦴꦁꦲꦶꦪꦥꦝꦮꦼꦫꦸꦃꦪꦺꦤ꧀ꦥꦱꦸꦂꦪꦤꦺ꧊ꦩꦸꦱꦩꦼꦚ꧀ꦕꦺꦴꦫꦺꦴꦁ꧉​ꦱꦧꦼꦤ꧀ꦱꦧꦼꦤ꧀ꦧꦭꦶꦱꦏꦱꦺꦴꦮꦤ꧀ꦲꦤꦲꦶꦁꦔꦂꦱꦤꦺꦄꦭ꧀ꦭꦃ꧈​꧊ꦩꦸꦱꦤꦸꦠꦸꦥ꧀ꦥꦶꦥꦱꦸꦂꦪꦤꦺꦔꦁꦒꦺꦴꦏꦕꦸ꧉​