Jv/Alkitab/Pangentasan/18

^18:1 ꧊ꦪꦶꦠꦿꦺꦴꦩꦫꦱꦼꦥꦸꦃꦲꦺ꧊ꦩꦸꦱ꧈​ꦲꦶꦩꦩ꧀ꦲꦶꦁ꧊ꦩꦶꦢꦶꦪꦤ꧀꧈​ꦩꦶꦉꦁꦧꦧ꧀ꦱꦩꦸꦧꦫꦁꦱꦶꦁꦢꦶꦠꦤ꧀ꦢꦸꦏ꧀ꦏꦏꦺꦢꦺꦤꦶꦁꦄꦭ꧀ꦭꦃꦩꦫꦁ꧊ꦩꦸꦱꦭꦤ꧀ꦧꦁꦱ꧊ꦆꦱꦿꦲꦺꦭ꧀꧈​ꦤꦭꦶꦏꦥꦚ꧀ꦗꦼꦤꦼꦁꦔꦤ꧀ꦤꦺꦔꦶꦫꦶꦢ꧀ꦧꦁꦱ꧊ꦆꦱꦿꦲꦺꦭ꧀ꦩꦼꦠꦸꦱꦏꦲꦶꦁꦠꦤꦃ꧊ꦩꦺꦱꦶꦂ꧉​

^18:2 ꧊ꦪꦶꦠꦿꦺꦴꦧꦚ꧀ꦗꦸꦂꦩꦁꦏꦠ꧀ꦤꦶꦭꦶꦏ꧀ꦏꦶ꧊ꦩꦸꦱ꧈​ꦔꦱ꧀ꦠ꧊ꦗ꦳ꦶꦥꦺꦴꦫ꧈​ꦒꦂꦮꦤꦺ꧊ꦩꦸꦱꦱꦶꦁꦲꦶꦱꦶꦃꦏꦺꦫꦶꦲꦤꦲꦶꦁꦠꦤꦃ꧊ꦩꦶꦢꦶꦪꦤ꧀꧈​

^18:3 ꦩꦼꦁꦏꦺꦴꦤꦺꦴꦲꦸꦒꦥꦸꦠꦿꦤꦺꦏꦏꦸꦁꦭꦺꦴꦫꦺꦴ꧈​꧊ꦒꦺꦂꦱꦺꦴꦩ꧀ꦭꦤ꧀꧊ꦌꦭꦶꦪꦺꦗ꦳ꦺꦂ꧉​ꦱꦶꦁꦩ꧀ꦧꦉꦥ꧀ꦤꦩ꧊ꦒꦺꦂꦱꦺꦴꦩ꧀꧈​ꦱꦼꦧꦧ꧀꧊ꦩꦸꦱꦔꦤ꧀ꦢꦶꦏ꧈​"ꦲꦏꦸꦲꦶꦏꦶꦮꦺꦴꦁꦤꦼꦤꦼꦏꦲꦶꦁꦤꦼꦒꦫꦩꦚ꧀ꦕ꧈"​

^18:4 ꦢꦺꦤꦺꦥꦸꦠꦿꦱꦶꦁꦤꦺꦴꦩꦼꦂꦭꦺꦴꦫꦺꦴꦤꦩ꧊ꦌꦭꦶꦪꦺꦗ꦳ꦺꦂ꧈​ꦲꦮꦶꦠ꧀꧊ꦩꦸꦱꦔꦤ꧀ꦢꦶꦏ꧈​"ꦲꦭ꧀ꦭꦃꦲꦺꦊꦭꦸꦲꦸꦂꦏꦸꦮꦶꦱ꧀ꦤꦸꦭꦸꦁꦱꦂꦠꦚ꧀ꦭꦩꦼꦠ꧀ꦠꦏꦺꦲꦏꦸꦔꦤ꧀ꦠꦶꦲꦺꦴꦫꦢꦶꦥꦠꦺꦤ꧀ꦤꦶꦢꦺꦤꦶꦁꦫꦗꦲꦶꦁ꧊ꦩꦺꦱꦶꦂ꧉"​

^18:5 ꧊ꦪꦶꦠꦿꦺꦴ꧈​ꦧꦼꦧꦉꦁꦔꦤ꧀ꦏꦫꦺꦴꦒꦂꦮꦭꦤ꧀ꦥꦸꦠꦿꦤꦺ꧊ꦩꦸꦱꦭꦺꦴꦫꦺꦴꦠꦼꦏꦤ꧀ꦲꦶꦁꦲꦫꦲꦫꦱꦩꦸꦤ꧀ꦥꦁꦒꦺꦴꦤ꧀ꦤꦤ꧀ꦤꦺ꧊ꦩꦸꦱꦔꦼꦢꦼꦒꦏꦺꦏꦺꦩꦃꦲꦤꦲꦶꦁꦒꦸꦤꦸꦁꦱꦸꦕꦶ꧉​

^18:6 ꧊ꦪꦶꦠꦿꦺꦴꦲꦸꦠꦸꦱ꧀ꦱꦤ꧀ꦔꦧꦂꦫꦶꦪꦺꦤ꧀ꦲꦉꦥ꧀ꦫꦮꦸꦃ꧉​

^18:7 ꦩꦸꦭꦤꦺ꧊ꦩꦸꦱꦩꦼꦠꦸꦩꦼꦛꦸꦏ꧀ꦏꦏꦺ꧈​ꦱꦂꦠꦱꦸꦁꦏꦼꦩ꧀ꦲꦶꦁꦔꦂꦱꦤꦺ꧊ꦪꦶꦠꦿꦺꦴ꧈​ꦭꦤ꧀ꦔꦫꦱ꧀ꦥꦚ꧀ꦗꦼꦤꦼꦁꦔꦤ꧀ꦤꦺ꧉​ꦱꦮꦶꦱ꧀ꦱꦺꦥꦝꦧꦒꦺꦧꦶꦤꦒꦺꦧꦧ꧀ꦏꦼꦱ꧀ꦭꦩꦼꦠ꧀ꦠꦤ꧀ꦤꦺ꧈​ꦧꦚ꧀ꦗꦸꦂꦥꦝꦩ꧀ꦭꦼꦧꦼꦠ꧀ꦲꦶꦁꦏꦺꦩꦃꦲꦺ꧊ꦩꦸꦱ꧉​

^18:8 ꧊ꦩꦸꦱꦚꦫꦶꦪꦺꦴꦱ꧀ꦱꦏꦺꦩꦫꦁꦩꦫꦱꦼꦥꦸꦃꦲꦺꦲꦥꦱꦶꦁꦮꦶꦱ꧀ꦢꦶꦠꦤ꧀ꦢꦸꦏ꧀ꦏꦏꦺꦢꦺꦤꦶꦁꦄꦭ꧀ꦭꦃꦩꦫꦁꦫꦗꦭꦤ꧀ꦧꦁꦱ꧊ꦩꦺꦱꦶꦂ꧈​ꦏꦁꦒꦺꦴꦔ꧀ꦭꦸꦮꦂꦫꦶꦮꦺꦴꦁ꧊ꦆꦱꦿꦲꦺꦭ꧀꧉​꧊ꦩꦸꦱꦲꦶꦪꦚꦫꦶꦪꦺꦴꦱ꧀ꦱꦏꦺꦱꦏꦺꦃꦲꦶꦁꦔꦽꦏꦱꦤꦺꦲꦶꦁꦱꦼꦢꦭꦤ꧀ꦢꦭꦤ꧀꧈​ꦱꦂꦠꦏꦼꦥꦿꦶꦪꦺꦲꦼꦁꦒꦺꦴꦤꦺꦥꦝꦢꦶꦠꦸꦭꦸꦁꦔꦶꦢꦺꦤꦶꦁꦄꦭ꧀ꦭꦃ꧉​

^18:9 ꦧꦉꦁ꧊ꦪꦶꦠꦿꦺꦴꦩꦶꦉꦁꦧꦧ꧀ꦏꦸꦮꦶꦏꦧꦺꦃꦥꦼꦁꦒꦭꦶꦃꦲꦺꦧꦸꦔꦃꦧꦔꦼꦠ꧀꧈​

^18:10 ꦧꦚ꧀ꦗꦸꦂꦔꦤ꧀ꦢꦶꦏ꧈​"ꦥꦶꦤꦸꦗꦶꦪꦄꦭ꧀ꦭꦃꦱꦶꦁꦮꦶꦱ꧀ꦔ꧀ꦭꦸꦮꦂꦫꦶꦏꦺꦴꦮꦺꦏꦧꦺꦃꦱꦏꦲꦶꦁꦲꦱ꧀ꦠꦤꦺꦫꦗꦭꦤ꧀ꦧꦁꦱ꧊ꦩꦺꦱꦶꦂ!ꦥꦶꦤꦸꦗꦶꦪꦄꦭ꧀ꦭꦃꦱꦶꦁꦮꦶꦱ꧀ꦔ꧀ꦭꦸꦮꦂꦫꦶꦲꦸꦩꦠ꧀ꦠꦺꦱꦏꦲꦼꦁꦒꦺꦴꦤꦺꦢꦢꦶꦧꦠꦸꦂꦠꦸꦏꦺꦴꦤ꧀꧉​

^18:11 ꦱꦲꦶꦏꦶꦲꦏꦸꦔꦼꦂꦠꦶ꧈​ꦪꦺꦤ꧀ꦄꦭ꧀ꦭꦃꦏꦸꦮꦶꦭꦸꦮꦶꦃꦭꦸꦲꦸꦂꦠꦶꦤꦶꦩ꧀ꦧꦁꦏꦫꦺꦴꦱꦏꦺꦃꦲꦶꦁꦢꦺꦮ꧈​ꦱꦼꦧꦧ꧀ꦏꦧꦺꦃꦩꦲꦸꦢꦶꦠꦶꦤ꧀ꦢꦏ꧀ꦏꦏꦺꦤꦭꦶꦏꦮꦺꦴꦁ꧊ꦩꦺꦱꦶꦂꦠꦸꦩꦶꦤ꧀ꦢꦏ꧀ꦱꦮꦼꦤꦁꦮꦼꦤꦁꦩꦫꦁꦧꦁꦱꦲꦶꦏꦶ꧉"​

^18:12 ꧊ꦪꦶꦠꦿꦺꦴꦧꦚ꧀ꦗꦸꦂꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦱꦂꦠꦏꦸꦂꦧꦤ꧀ꦱꦼꦩ꧀ꦧꦼꦭꦺꦃꦲꦤ꧀ꦱꦮꦼꦠꦫꦏꦠꦸꦂꦩꦫꦁꦄꦭ꧀ꦭꦃ꧉​ꦲꦫꦸꦤ꧀ꦱꦂꦠꦥꦫꦠꦸꦮꦠꦸꦮꦤꦺꦧꦁꦱ꧊ꦆꦱꦿꦲꦺꦭ꧀ꦏꦧꦺꦃꦩꦺꦭꦸꦝꦲꦂꦧꦼꦧꦉꦁꦔꦤ꧀ꦩꦶꦤꦁꦏꦥꦔꦶꦧꦢꦃꦩꦫꦁꦄꦭ꧀ꦭꦃ꧉​

^18:13 ꦲꦺꦱꦸꦏ꧀ꦏꦺ꧊ꦩꦸꦱꦔꦢꦶꦭ꧀ꦭꦶꦥꦽꦏꦫꦥꦱꦸꦭꦪꦤ꧀ꦤꦺꦮꦺꦴꦁ꧊ꦆꦱꦿꦲꦺꦭ꧀꧉​ꦥꦼꦒꦮꦺꦪꦤ꧀ꦏꦸꦏꦸꦮꦶꦒꦮꦺꦫꦺꦥꦺꦴꦠ꧀ꦠꦺ꧊ꦩꦸꦱꦮꦶꦮꦶꦠ꧀ꦲꦺꦱꦸꦏ꧀ꦠꦼꦏꦤ꧀ꦧꦼꦔꦶ꧉​

^18:14 ꦤꦭꦶꦏ꧊ꦪꦶꦠꦿꦺꦴꦥꦶꦂꦱꦲꦥꦮꦲꦺꦱꦶꦁꦢꦶꦠꦶꦤ꧀ꦢꦏ꧀ꦏꦏꦺ꧊ꦩꦸꦱ꧈​ꦧꦚ꧀ꦗꦸꦂꦤ꧀ꦢꦔꦸ꧈​"ꦲꦥꦮꦲꦺꦱꦶꦁꦏꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦏꦁꦒꦺꦴꦧꦁꦱꦲꦶꦏꦶ?ꦪꦒꦺꦤꦺꦏꦧꦺꦃꦩꦲꦸꦏꦺꦴꦏ꧀ꦠꦤ꧀ꦢꦁꦔꦶꦝꦺꦮꦺ꧈​ꦔꦤ꧀ꦠꦶꦧꦧ꧀ꦚ꧀ꦗꦭꦸꦏ꧀ꦥꦶꦠꦸꦠꦸꦂꦮꦲꦺꦏꦸꦢꦸꦥꦝꦔꦢꦼꦒ꧀ꦮꦶꦮꦶꦠ꧀ꦲꦺꦱꦸꦏ꧀ꦠꦼꦏꦤ꧀ꦧꦼꦔꦶ?"

^18:15 ꦮꦁꦱꦸꦭ꧀ꦭꦤ꧀ꦤꦺ꧊ꦩꦸꦱ꧈​"ꦩꦼꦤꦶꦏꦏꦼꦢꦃꦏꦸꦭꦭꦩ꧀ꦥꦃꦲꦶ꧈​ꦩꦼꦂꦒꦶꦠꦶꦪꦁꦠꦶꦪꦁꦲꦶꦁꦏꦁꦏꦼꦥꦺꦔꦶꦤ꧀ꦔꦼꦂꦠꦺꦴꦱ꧀ꦏꦼꦂꦱꦤꦶꦥꦸꦤ꧀ꦄꦭ꧀ꦭꦃꦩꦼꦤꦶꦏꦱꦩꦶꦠꦏꦺꦤ꧀ꦝꦠꦼꦁꦏꦸꦭ꧉​

^18:16 ꦩꦼꦤꦮꦶꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦱꦩꦶꦉꦒꦼꦗꦼꦒꦤ꧀꧈​ꦏꦸꦭꦲꦶꦁꦏꦁꦏꦼꦢꦃꦚꦸꦏꦤꦶꦥꦸꦠꦸꦱ꧀ꦱꦤ꧀ꦱꦶꦤ꧀ꦠꦼꦤ꧀ꦲꦶꦁꦏꦁꦊꦉꦱ꧀꧈​ꦩꦮꦶꦏꦸꦭꦱꦸꦩꦼꦉꦥ꧀ꦥꦏꦼꦤ꧀ꦝꦠꦼꦁꦥꦽꦤꦠꦤ꧀ꦱꦲꦲꦁꦒꦼꦂꦲꦁꦒꦼꦂꦫꦶꦁꦄꦭ꧀ꦭꦃ꧉"​

^18:17 ꧊ꦪꦶꦠꦿꦺꦴꦧꦚ꧀ꦗꦸꦂꦔꦤ꧀ꦢꦶꦏ꧈​"ꦕꦫꦱꦶꦁꦩꦼꦁꦏꦺꦴꦤꦺꦴꦏꦸꦮꦶꦏꦸꦫꦁꦥꦿꦪꦺꦴꦒ꧉​

^18:18 ꦏꦺꦴꦮꦺꦩꦸꦁꦒꦮꦺꦏꦼꦱꦼꦭ꧀ꦲꦮꦏ꧀ꦩꦸꦝꦺꦮꦺꦭꦤ꧀ꦮꦺꦴꦁꦮꦺꦴꦁꦏꦸꦮꦶ꧉​ꦥꦼꦒꦮꦺꦪꦤ꧀ꦏꦸꦲꦶꦏꦶꦏꦏꦺꦃꦲꦼꦤ꧀ꦪꦺꦤ꧀ꦩꦸꦁꦢꦶꦠꦶꦤ꧀ꦢꦏ꧀ꦏꦏꦺꦢꦺꦤꦶꦁꦮꦺꦴꦁꦱꦶꦗꦶ꧉​

^18:19 ꦕꦺꦴꦧꦥꦶꦠꦸꦠꦸꦂꦏꦸꦲꦶꦏꦶꦭꦏꦺꦴꦤ꧀ꦤꦤ꧉​ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦤꦸꦁꦒꦶꦭ꧀ꦏꦫꦺꦴꦏꦺꦴꦮꦺ꧉​ꦥꦚ꧀ꦕꦺꦤ꧀ꦧꦼꦕꦶꦏ꧀ꦩꦏꦶꦭ꧀ꦭꦶꦧꦁꦱꦲꦶꦏꦶꦲꦶꦁꦔꦂꦱꦤꦺꦄꦭ꧀ꦭꦃꦱꦂꦠꦔ꧀ꦭꦤ꧀ꦠꦂꦫꦏꦺꦱꦫꦸꦥꦤꦶꦁꦥꦽꦏꦫꦩꦫꦁꦥꦚ꧀ꦗꦼꦤꦼꦁꦔꦤ꧀ꦤꦺ꧉​

^18:20 ꦤꦁꦔꦶꦁꦏꦺꦴꦮꦺꦲꦸꦒꦏꦸꦢꦸꦩꦸꦭꦁꦮꦺꦴꦁꦮꦺꦴꦁꦏꦸꦮꦶꦧꦧ꧀ꦥꦽꦤꦠꦤꦶꦁꦄꦭ꧀ꦭꦃꦱꦂꦠꦤꦸꦠꦸꦂꦫꦶꦕꦫꦤꦺꦲꦸꦫꦶꦥ꧀ꦱꦶꦁꦧꦼꦕꦶꦏ꧀ꦱꦂꦠꦤꦶꦤ꧀ꦢꦏ꧀ꦏꦏꦺꦥꦼꦒꦮꦺꦪꦤ꧀ꦏꦸꦱꦶꦁꦥꦿꦪꦺꦴꦒ꧉​

^18:21 ꦏꦼꦗꦧꦏꦸꦮꦶꦏꦺꦴꦮꦺꦏꦸꦢꦸꦩꦶꦭꦶꦃꦮꦺꦴꦁꦭꦤꦁꦱꦮꦼꦠꦫꦱꦶꦁꦱꦼꦩ꧀ꦧꦢ꧈​ꦲꦶꦏꦸꦢꦢꦺꦏ꧀ꦤꦲꦏꦶꦩ꧀ꦱꦶꦁꦔ꧀ꦭꦸꦫꦃꦲꦶꦮꦺꦴꦁꦱꦺꦮꦸ꧈​ꦮꦺꦴꦁꦱꦠꦸꦱ꧀꧈​ꦮꦺꦴꦁꦱꦺꦏꦼꦠ꧀ꦭꦤ꧀ꦮꦺꦴꦁꦱꦼꦥꦸꦭꦸꦃ꧉​ꦮꦺꦴꦁꦮꦺꦴꦁꦩꦲꦸꦏꦸꦢꦸꦱꦶꦁꦔꦧꦼꦏ꧀ꦠꦶꦩꦫꦁꦄꦭ꧀ꦭꦃ꧈​ꦏꦼꦤꦢꦶꦥꦽꦕꦪꦱꦂꦠꦲꦺꦴꦫꦒꦼꦊꦩ꧀ꦤꦩ꧀ꦥꦤꦶꦧꦼꦱꦼꦭ꧀꧌ꦱꦸꦮꦥ꧀꧍꧉​

^18:22 ꦮꦺꦴꦁꦮꦺꦴꦁꦩꦲꦸꦏꦁꦏꦸꦢꦸꦔꦢꦶꦭ꧀ꦭꦶꦲꦸꦩꦠ꧀ꦲꦶꦁꦱꦩꦁꦱꦩꦁꦱ꧉​ꦥꦽꦏꦫꦥꦽꦏꦫꦱꦶꦁꦒꦼꦝꦺꦒꦼꦝꦺꦏꦼꦤꦢꦶꦲꦠꦸꦂꦫꦏꦺꦩꦫꦁꦏꦺꦴꦮꦺ꧈​ꦤꦁꦔꦶꦁꦥꦽꦏꦫꦱꦶꦁꦕꦶꦭꦶꦏ꧀ꦕꦶꦭꦶꦏ꧀ꦏꦉꦧꦺꦤ꧀ꦢꦶꦫꦩ꧀ꦥꦸꦁꦔꦶꦥꦫꦲꦏꦶꦩ꧀ꦝꦺꦮꦺ꧉​ꦪꦺꦤ꧀ꦩꦼꦁꦏꦺꦴꦤꦺꦴꦧꦶꦱꦔꦺꦤ꧀ꦛꦺꦁꦔꦏꦺꦲꦪꦃꦲꦤ꧀ꦩꦸ꧈​ꦱꦼꦧꦧ꧀ꦮꦺꦴꦁꦮꦺꦴꦁꦩꦲꦸꦥꦝꦩꦺꦭꦸꦩꦶꦏꦸꦭ꧀ꦠꦁꦒꦸꦁꦗꦮꦧ꧀ꦩꦸ꧉​

^18:23 ꦪꦺꦤ꧀ꦲꦼꦁꦒꦺꦴꦤ꧀ꦩꦸꦤꦶꦤ꧀ꦢꦏ꧀ꦏꦏꦺꦝꦮꦸꦃꦲꦺꦄꦭ꧀ꦭꦃꦏꦪꦩꦼꦁꦏꦺꦴꦤꦺꦴ꧈​ꦏꦺꦴꦮꦺꦧꦏꦭ꧀ꦲꦺꦴꦫꦏꦼꦏꦼꦱꦼꦊꦤ꧀;ꦠꦸꦂꦮꦺꦴꦁꦮꦺꦴꦁꦥꦝꦩꦸꦭꦶꦃꦏꦤ꧀ꦛꦶꦊꦒꦲꦠꦶꦤꦺ꧈​ꦩꦼꦂꦒꦥꦽꦏꦫꦤꦺꦮꦶꦱ꧀ꦥꦸꦠꦸꦱ꧀꧉"​

^18:24 ꧊ꦩꦸꦱꦤ꧀ꦝꦺꦫꦺꦏ꧀ꦩꦫꦁꦝꦮꦸꦃꦲꦺ꧊ꦪꦶꦠꦿꦺꦴ꧈​

^18:25 ꦧꦚ꧀ꦗꦸꦂꦩꦶꦭꦶꦃꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦱꦶꦁꦱꦼꦩ꧀ꦧꦢ꧈​ꦭꦤ꧀ꦢꦶꦲꦁꦏꦠ꧀ꦢꦢꦶꦥꦫꦲꦏꦶꦩ꧀ꦩꦺꦧꦁꦱ꧈​ꦲꦤꦱꦶꦁꦩꦶꦩ꧀ꦥꦶꦤ꧀ꦮꦺꦴꦁꦱꦺꦮꦸ꧈​ꦮꦺꦴꦁꦱꦠꦸꦱ꧀꧈​ꦮꦺꦴꦁꦱꦺꦏꦼꦠ꧀ꦭꦤ꧀ꦮꦺꦴꦁꦱꦼꦥꦸꦭꦸꦃ꧉​

^18:26 ꦮꦺꦴꦁꦮꦺꦴꦁꦩꦲꦸꦢꦢꦶꦲꦏꦶꦩ꧀ꦒꦼꦩꦛꦺꦴꦏ꧀꧈​ꦏꦁꦔꦢꦶꦭ꧀ꦭꦶꦮꦺꦴꦁꦮꦺꦴꦁꦱꦶꦁꦥꦝꦥꦽꦏꦫꦤ꧀꧉​ꦥꦽꦏꦫꦱꦶꦁꦲꦔꦺꦭ꧀ꦢꦶꦲꦠꦸꦂꦫꦏꦺꦩꦫꦁ꧊ꦩꦸꦱ꧈​ꦢꦺꦤꦺꦱꦶꦁꦒꦩ꧀ꦥꦁꦢꦶꦫꦩ꧀ꦥꦸꦁꦔꦏꦺꦝꦺꦮꦺ꧉​

^18:27 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ꧊ꦩꦸꦱꦤꦸꦭꦶꦔꦸꦤ꧀ꦠꦥ꧀ꦥꦏꦺ꧊ꦪꦶꦠꦿꦺꦴꦏꦺꦴꦤ꧀ꦢꦸꦂꦩꦼꦚꦁꦤꦼꦒꦫꦤꦺ꧉​