Epistola de Jacobo Capitulo 5

1  E vos riccos, plora e luge per le disgratias que sta pro venir supra vos.

2  Vostre ricchessas es marcescite, e vostre vestes es corrupte per le tinea.

3  Vostre auro e argento deveniva ferruginose; e lor ferrugine essera un teste contra vos, e  
   devorara vostre carne como le foco. Vos ha accumulate thesauros per le ultime dies.

4  Ecce, le laboratores qui ha recoltate vostre campos, a qui vos ha fraudate, crita: e le critos 
   de illes qui ha recoltate vostre campos arrivava al aures del Senior del Hostes.

5  Vos ha vivite in placeres e in delicias sur le terra; vos ha nutrite vostre cordes, como in le 
   die del macellation.

6  Vos ha condemnate e occidite le justo; e ille non vos resisteva.

7  Sia dunque vos patiente, fratres, usque le venita del Senior. Ecce, le agricultor expecta 
   patientemente le preciose fructo del terra, usque illo recipe le prime e le ultime pluvia del 
   saison.

8  Sia vos alsi patiente; tranquillisa vostre cordes: pois que le venita del Senior es proxime.

9  Non murmurar le unes contra le alteres, fratres, a fin que vos non sia condemnate: ecce, le 
   judice sta ante le porta.

10 Mi fratres, tene como exemplo de patientia e suffrentia del prophetas, qui ha parlate in le 
   nomine del Senior.

11 Ecce, nos voca beate illes qui ha suffrite patientemente. Vos ha audite del patientia de Job, e 
   vos videva le fin que le Senior le reservava; perque le Senior es plen de compassion, e 
   misericordia.

12 Mais supertoto, mi fratres, non jurar, ni per le celo, ni per le terra, ni necun altere 
   juramento: mais sia vostre si, si e vostre no, no; a fin que vos non cade in         
   condemnation.

13 Si ha alicuno inter vos affligite, que ille preca. Si ha alicuno felice, que ille canta psalmos.

14 Si ha alicuno malade inter vos, que vos appella le ancianos del ecclesia; e que illes ora super 
   ille, e que le ungue con oleo in le nomine del Senior:

15 E le oration de fide salvara le malade, e le Senior le restabilira; e si ille ha committite 
   peccatos, illos le essera perdonate.

16 Confessa vostre faltas le unes al alteres, e ora le unes pro le alteres, a fin que vos sia 
   sanate. Le fervente oration del homines juste pote esser multo efficace.

17 Elia esseva un homine subjecte al mesme passiones que nos, e ille orava ferventemente pro non 
   pluver: e de facto non pluveva sur le terra per le spatio de tres annos e sex menses.

18 E ille orava de nove, e le celos dava pluvia, e le terra produceva su fructo.

19 Fratres, si alicuno de vos si disvia del veritate, e uno le converte;

20 Sape que qui converte le peccator del error de su via salvara un anima del morte, e coperira un 
   multitude de peccatos.

---

1 2 3 4 5

---

Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev