Cronica de San Chuan d'a Peña: Capetulo I

Segvnt qve hauemos leydo en muytos liuros, el primo hombre que se pobló en Espanya, hauía nombre Tubal, del qual yxió la generacion de los ibers. Asi como aquesto dizen Isidoro et Jerónimo et fueron nombrados por el nombre de Tubal, cetubals. Et depues por vna estrela que ha nombre Esperus, ques pone cerca el Sol et la ora es tarde, fué metido nombre á la tierra Speria. Et aquestos cetubals se poblaron en la ribera Debro. Et por la dita poblacion lexaron el nombre de Tubal et prendieron el nombre de dito rio, el qual dizen Ebro, et auieron nombre celtiberos: Et y's dita Celtiberia, la tierra que yes entre los montes Pyreneos et el rio Debro. Et depues de aquesta nacion, vino Ercules por senoryar Espanya, et aqui huuo batalla con vn grant princep que hauia nombre Girion, el qual senoryaua tres regnos, que oy son nombrados, Gallicia, Lusitania et Bética. Et á Gallicia puso nombre por tal como la pobló de las gentes que aduzía de Gallacia. Et por el rio que ha nombre Ana, clama el otro regno, Lusytana. Et por el poblo que aduxo de Cicia por cultiuar la tierra, et por el rio que ha nombre Beti, nombra el otro regno, Bética: et la maior ciudat d'aquella prouincia Ispalis, la qual hoy á nombre Siulia. Et tantost entró por la provincia de Carpentanya, et vinció al Rey de Carpintanya, el qual auya nombre Caci, qui era de muyt estraña et orrible figura, en el mont de Carpentanya, en el qual fazía su habitacion, et por su nombre fuéle mudado el nombre Moncicati, el qual hoy á nombre Moncayo: et vencido el dito rey Caci, hedificó el dito Hércules al pié del dito mont, de las gents que vinieron con él de Tirus et de Ausonia, vna ciudad que clamó Tirasona. Et tantost, entró en la prouincia, de Celtiberia, et aquí basteció vna tierra la qual clamó Vrgel: Et tantost pobló vna ciudad de la gent Dausona, la qual nombro Osona por la dita razon, et hoy es clamada Vich: et despues él partió de aquí et trobó la vna de las IX barcas, de las quales las ocho ribaron en Gallicia, et la nouena en el ribage de Celtiberia do él edificó vna ciudad, la qual clamó Barchanona, et hoi es clamada Barcelona; por tal como fué poblada de las gents de la dita nouena barcha: et por aquesta manera tollió toda España á los celtíberos, qui las oras la senoriauan; las quales gents, por luenga paz oblidoron el vso de las armas, et non se sabieron ni podieron defender; et retuuo á la suya senyoría España et á la seruitud de los griegos; et feito aquesto fuesse et lexóles por gouernador vn su nodrido, el qual hauía nombre Ispan, por el nombre del qual la tierra vuo nombre Espanya; el qual Ispan apres dias de Ercules fué rey de España, et pobló muytos lugares en Espanya, entre los quales pobló Segouia.