Святое Евангелие (эрзянь)/В/Лукань/04

[ 148 ]

Глава 4.

¹Іисус, Святой Духто пешкедезь, мурдась Іордан лаҥгсто, да Духсь саизе Сонзэ чаво паксяс. ²Тосо ниленьгемень чи снартлесь Эснэнзэ амазысь; не читьнестэ мезде-як Сон эзь ярсак, а меельсь пелев, не читьнень ютазь, вачсь Сонзэ пекезь. ³Амазысь мерьсь Тензэ: улиньдерят Тон Пазонь Цёра, мерьть те кевстень кшекс теевмеде. ⁴Іисус мерьсь каршозонзо: сёрмадозь ули: ломань аволь аньсяк ве кшесэ эри, а эрьва Паз валсо. ⁵Мейле амазысь кустизе Сонзэ сэрей пандо пряс, [ 149 ]нацяс невтинзе Тензэ весе мастор лаҥгонь инязорокс читьнень, ⁶да мерьсь Тензэ амазысь: максса Тенть сынст лаҥгсо олясть да сынст славаст, ведь лаҥгсост олясь монень максозь, мон, кинень мелем, максса сонзэ. ⁷Вана Тон сюкунятдеряй тень, весе улить Тонть. ⁸Іисус мерьсь каршозонзо: азё вакстон, сатана: сёрмадозь: Эсь Нишке Пазотень сюкунякшнок, да ве Сонензэ служак. ⁹Мейле саизе Сонзэ Іерусалимс, аравтызе церькува пряньть чирес да мерьсь Тензэ: улиньндерят Тон Пазонь Цёра, ёртовт тестэ алов. ¹⁰Ведь сёрмадозь: эсь Ангелэнзэ туртов кармавты Тонть ванмо: ¹¹сынь кедь лаҥгсост канттадызь Тонть, штобу пильгеть кевс илязо пупорьдявт. ¹²Каршонзо Іисус мерьсь: мерезь, эсь Нишке Пазот эснэ иля снартле. ¹³Кода весе снартлиматьне прядовсть, амазысь шказонзо тусь вакстонзо. ¹⁴Іисус духонть війсэ кемекстазь, мурдась Галилейс. Эстэдензэ срадьсть валт весе перька мастортнэнь келес. ¹⁵Сон тонавтсь эснэст синагогасост да весемень пельде шназь ульнесь.

¹⁶Сась Сон Назаретс, косто трязель-ванозель. Субута чине совась эсь койсэнзэ синагогас, да стясь ловномо. ¹⁷Максть Тензэ Исаія пророконь книга. Сон книгасть панжозь, муизе се тарканть, косо сёрмадозель: ¹⁸Пазонть Духсо Мон лаҥгсон, Сон ведь Монь ваднимем ништёйтьненень паро кулянь ёвтлеме, да кучимем седейень каладозетьнень пичкавтомо, полонс поҥгозетьненень нолдамодо ёвтлеме, сокортнэнень неймань максомо, пиштевтицятнень оляс нолдамо, ¹⁹Пазоньть паро шкадонзо ёвтлеме. ²⁰Мейле, книгасть пекстазь, максызе сторожнэнь да [ 150 ]озась. Синагогасонть весемень сельмест Сонзэ лаҥгс каязь ульнесть. ²¹Сон кармась тенст кортамо: ней топодсь те сёрмадовксось, конань тынь мариҥк. ²²Сынь весе Сонзэ валтнэнь видекс путызь да дивасть куркстонзо лисезь парт валтнэде, да кортасть: аволь Іосифень-ли те цёрась? ²³Сон мерьсь тенст: знама тынь Монень васнят-как мерьдядо: лекарь, шумбралгавтык эсь прят; тейть тесэ-як эсь шачмо масторсот сень, мезе, минь маринек, ульнесь Капернаумсо. ²⁴Сон мерьсь: видестэ мерян теҥк: кодамо-як пророк эсь шачмо масторсонзо примазь а эри. ²⁵Видестэ мерян теҥк: ламо доват ульнесть Израильсэ Иліянь эрямо пиҥгстэ, кода менельсь пекстазь ульнесь колмо іеть да кото ковт, да весе мастор лаҥгсонть теевкшнэсть вачо іеть, ²⁶аньсяк вейкенень-гак эстэдест Илія эзь ульне кучозь, аньсяк дова аванень Сидонской Сарептас. ²⁷Ламо истяжо ульнесть прокаженнойть-как пророк Елисеень пиҥгстэ, да вейке-як эстэдест Сиріянь Неемандо башка эзь ванськат. ²⁸Тень марязь, синагогасонть весемень кеж саиньзе ²⁹да стязь панизь Сонзэ ошостонть ушов да кустизь пандо прястень, кона лаҥгсо строязель ошост, штобу каямс Сонзэ тосто. ³⁰А Сон, ютковаст ютазь, тусь вакстост.

³¹Сась Капернаумс, Галлилеень ошос, да субута чине тонавтсь эснэст. ³²Дивасть Сонзэ тонавтуманзо лаҥгс, ведь Сонзэ валонзо вій марто ульнесть. ³³Синагогасонть ульнесь ломань, конайсэ ульнесь амазынь аванькс дух. Сон серьгедьсь покш вальгейсэ: ³⁴кадымизь! мезе Тенть минек пельде [ 151 ]эряви, Назаретэнь Іисус? Тон сыть минек ёмавтомонок. Содатан кіят Тон, Тон Пазонть Святоезэ. ³⁵Іисус кардызе сонзэ, мерезь: лоткак, да листь эйстэнзэ. Амазысь, ломаньсть синагоганть кунчкас тувтозь лись эйстэнзэ, мень-гак тензэ берянень апак тейть. ³⁶Весемень срасть саинзе, да кортасть эсь ютковаст: мезе те истя ули: Сон эсь покш чисэнзэ да війсэнзэ амазытненень кармавты, да сынь лисить?

³⁷Весе перька мастортнэнь келес срадсть Эстэдензэ кулят. ³⁸Синагогасто лисезь, Сон совась Симононь кудос. Симононь тёштязо сэредсь віев эсь ормасо. Сонзэ кис инялдсть Тензэ. ³⁹Ваксозонзо молезь, Сон лоткавтызе эсь орманть; (эсь ормась) кадызе сонзэ, сон сеск стясь да мельгаст якась^[1]. ⁴⁰Чинь валгума шкане, весе, кинь ульнесть эрьва мень ормасо сэредицяст вецесьть эснэст Сонензэ. Сон, эрьва конань лаҥгс кедензэ путозь, шумбралгавтсь эснэст. ⁴¹Ламонь эйстэ лиснесть истяжо амазыть-как, пижнезь да кортазь: Тон Пазоньть Цёразо Христозат. Сон кардась эснэст ёвтлемеде, што сынь содасызь, што Сон Христос. ⁴²Кода чизэ валдомсь, Сон тосто лисезь, тусь чаво таркас. Народсь вешнесь Эснэнзэ да, ваксозонзо сазь, кирьдьсть Эснэнзэ, аволь туйть бу вакстост. ⁴³Сон мерьсь тенст: Монень ліят ошнэнень-гак эряви Пазонь Инязорокс чиденть ёвтлемс, Мон ведь секс кучозян. ⁴⁴Мейле тонавтсь Галилеень синагогатьнесэ-як.

---

1. служась тенст, каванясь эснэст.