Святое Евангелие (эрзянь)/В/Лукань/01
Лукань сёрмадовт Евангелія.
Глава 1.
1Кода ламо ломать кармасть сёрмадомо не тевтнеде, конатнень минек ютксто эрьва-ки содасынзе, 2кода сынст ёвтнизь миненек эсь сельмесэст неицятне, да Валстень служицятне, 3сестэ монь-гак превезэнь сась сёрмадомс тенть, шнамо ломанем Ѳеофил, весемень рядс, мезе мондень икеле ульнесь, сень-гак парьсте содазь. 4Сёрмадан тенть секс, штобу тон парьсте содавлек, мезес васня тонавтозь ульнить.
5Іудеянь Ирод инязоронь пиҥгстэ Авіянь черётсо ульнесь Захарія лемсэ поп, сонзэ низэ ульнесь Аарононь родсто, лемзэ сонзэ Елизаветаль. 6Сынь кавонест ульнесть Паз икеле видеть ломать, эрясть Пазонь закононь кувалт, да Сонзэ заповетьнень кулсонозь. 7Сынст арасельть эйкакшост, Елизавета ульнесь ашачниця, а сыньсь кавонест уш сыретельть. 8Весть, кода Захарія служась эсь рядсонзо Паз икеле, 9попнень койсэ сатотсь тензэ совамс Пазонь церькува потс кадямо. 10Сонзэ кадямо шкастонть ламо ломать озность ушосо. 11Сестэ неявсь [ 138 ]тензэ Пазонь ангел, кона аштесь кадямо жертвенниксть вить пеле. 12Сонзэ неезь, Захарія тандадозевсь, да срасть сонзэ саизе. 13Ангелсь мерьсь тензэ: иля пельть, Захарія: марявсь тонть осксот: тонть нить Елизавета шачты тенть цёра, лем тензэ путат Іоанн. 14Ули тенть эргелима да весёлгалима: ліят-как ламо сонзэ шачмозонзо эргедить. 15Ведь сон ули покш Паз икеле, а карми симме а винадо, а сикерадо, аванзо потсо оштё пешкеди Святой Духто. 16Сон ломанень цёратнень ютксто ламотьнень эсь Нишке Пазост ёнов мурдавцынзе. 17Сы сон Сонзэ икеле Иліянь оймесэ, да війсэ, штобу Пазосьтень анокстамс парт ломать, тетятьнень седеест велявтсынзе эйкакшост ёнов, акулсоныцятненень максы паро ломанень превть. 18Захарія мерьсь ангелстень: мезень кувалт мон тень содаса? Ведь монсь сыреян, нинь-гак ламо іензэ. 19Ангелсь мерьсь каршонзо: мон Пазонть икеле аштиця Гавріилан, кучозян тонть маро кортамо, тонеть те паро кулянть ёвтамо. 20Вана тон секс, мейс эзить кемть монь эсь шкастост топодиця валтнэнень, кармат чатьменьме, а кармат кортавмо се шкастень, знярдо весе те топоди. 21А народсь учось Захаріянь эснэ, да дивась, мейс сон куватьс майси церькувасонть. 22А сон, тосто лисезь, эзь кортавт уш ломатьне маро. Сынь чаркотсть, што сонензэ церькувасонть неявмо ульнесь. Сон, невтлезь, кортась марост да ліятьсь истяк акортавицякс. 23Кода прядовсть сонзэ служамо чинзэ, сон мурдась эсь кудозонзо.
24Не читьнеде мейле пекіясь сонзэ низэ [ 139 ]Елизавета, да вете ковт салава кирьдсь да кортась: 25неть читьнестэ Пазось истя тейсь монень, конатьнестэ вачтась лаҥгозон, штобу саемс лаҥгстон ломанень пеедьматьнень.
26Котоце ковсто Ангел Гавріил кучозь ульнесь Пазонь пельде Назарет лемсэ Галилеень ошос, 27тейтерьнень, коната чіязель Давидэнь родонь Іосиф лемсэ ломаньнень. Тейтерьсть лемзэ Марія. 28Тензэ совазь, Ангелсь мерьсь: эрьгеть Благодатной, тонть маро Паз! Тон весе аватьнень ютксто баславазят. 29Марія, сонзэ неезь, тандадозевсь валдонзо да арцесь: мезе ули те шумбракшнимась? 30Ангелсь мерьсь тензэ: иля пельть, Марія: тон муить благодать Пазоньть пельде. 31Вана тон пекіят да шачтат цёра, лем Тензэ путат Іисус. 32Сон ули покш. Вере Пазонь Цёра кармить Тензэ мерьме. Нишке Пазось макссазо Тензэ тетянзо престолонзо. 33Сон Іаковонь кудонзо лаҥгсо пиҥгень пиҥгс инязорокс ули; Сонзэ инязорокс чинзэ пезэ а ули. 34Марія мерьсь Ангелстень: кода те истя ули, кода мон мирьде а содан? 35Ангелсь мерьсь каршозонзо: Святой Духсь валги лаҥгозот, да весемеде Вереценть віезэ вельтятанзат. Секс пельдеть шачозесь-как Святой ули. Кармить Тензэ Пазонь Цёра мерьме. 36Вана, тонть раськеть Елизавета-як, кона васьня а шачниця ульнесь, ней котоце ков, кода сон-гак сыре чисэнзэ пекіясь. 37Ведь Пазонь кодамо-як валзо апак топоть а ліядкшны. 38Сестэ Марія мерьсь: мон Пазонь кулсоныцяян, улезэ тень тонть валот кувалма. Теде мейле Ангел тусь вакстонзо.
[ 140 ] 39Сеть читьнестэ стясь Марія да капшазь тусь пандо лаҥгонь масторс, Іудань ошос. 40Совась Захаріянь кудос да шумбракшнось Елизавета маро. 41Кодак Елизавета маризе Маріянь шумбракшнуманть, кармась налкамо потсонзо эйкакшозо: Елизаветась пешкедсь Святой Духто 42да, покш вайгельсэ, мерьсь: тон весе аватьнень ютксто баславазят, тонть пеке потсо кандумат-как баславазь. 43Косто истя те монень ульсь: сась тень монсинь Пазонть Авазо? 44Кодак пачкодсь монь пилезэнь тонть шумбракшнума вайгелеть, пеке потсон эйкакшом, эрьгедезь, кармась налкамо. 45Таланов кемицясь: Ведь Пазонь пельде тензэ ёвтазесь топоди. 46Марія мерьсь: оймем Пазонть эснэ шны, 47седеем-гак моньсинь Идиця Пазонть кис эрьгедсь. 48Ведь Сон вачтась эсь ломанензэ сэтьме чинзэ лаҥгс. Ведь теде мейле кармить монь шнамон весе ломатьне. 49Ведь Віевсь монень покш чи тейсь, Сонзэ лемзэ — Святой. 50Сонзэ милостезэ Эстэдензэ пелицятненень племадо племас моли. 51Сон эсь инязорокс чинзэ эсь кедь війзэнзэ теизе; Эсь пачкаст пряст покшокс теиця седейтьнень стравлинзе. 52Віевтьнень престолост лаҥгсто каинзе; сэтьметьнень — кепединзе. 53Вачотьнень, народо пештинзе, а пряст сюпавкс теицятнень амезефтеме нолдынзе. 54Милостеньть, 55конадо Сон кортакшнось минек тетятненень: Авраамнэнь, да весе сондензэ шачозетьненень пиҥгень—пиҥгс ульме, (ней) мелезэнзэ ледьстизе да эсь Израилень эйкакшонзо эстензэ мекев примизе. 56Марія эрясь маронзо колмо ковшка да мурдась эсь кудозонзо. 57Елизаветань сась шачтамо шказо да [ 141 ]шачтась цёра. 58Кода марясть раськензэ да перьканзо эрицятне, кода Пазось покшолгавтызе тензэ милостезэ, радувакшность маронзо. 59Кавксоце чистэ састь эйкакшонть керявтомонзо да арсекшнэсть тензэ тетянзо лементь, Захарія, путомс. 60Авазо тень каршо мерьсь: арась; сонзэ лемзэ улезэ Іоанн. 61Сонензэ мерьсть: тонть раськесэть-как кіяк арась, конань бу истямо лемезэ улевель. 62Невтлезь, кевстизь тетянзо, сон кодамо лем максоволь бу тензэ. 63Сон вейш лазнэ да сёрмадсь: сонзэ лемзэ Іоанн. Весе дивасть. 64Сеске панжтотсь сонзэ кургозо, келезэ да, Пазоньть шназь, кармась кортамо. 65Весе перькаст эрицятнень саинзе срасть да ёвтлесть теде весе Іудеянь пандо лаҥгонь масторсть келес. 66Весе марицятьне, тень седеезэст путозь, кортасть: мезе ули те эйкакшось? Пазонть кедезэ-як ульнесь маронзо. 67Сонзэ тетязо Захарія пешкедсь Святой Духто да пророчась, мерезь: 68Израилень Нишке Пазось баславась, — Сон вачиньзе Эсь ломанензэ да тейсь тенст идямо. 69Давид цёранзо кудос идимань сюровт[1] стявсь, 70кода Соньсь ёвтась икеле улезь Святойть Пророкнэнь вельде, 71што Сон идисамизь минек душмандонок да весе анеицянок кедьстэ. 72Теи милость минек тетятьненень, мелезэнзэ ледьстясазо сонсинзэ святой кортамонзо, 73да божамонзо, конайсэ Авраам тетянок туртов божась: максомс миненек, 74душмандонок кедьстэ идимадонок мейле, апак пельть 75весе эрямонок перьк служамо Тензэ видьстэ да парьсте. 76Тон-гак, [ 142 ]эйкакшось, весемеде Вереценть пророк улят: ведь сат тон Пазость шачонзо икеле, Сонензэ кинь анокстамо, 77да ломатьненень чаркодьмань максомо, што сынь пежетест кадозь идевить. 78Минек Пазость паро потмонзо да милостливой седеензэ кувалт сась тенек верьде валдо 79чопуда таркасо да куломонь сулейсэ аштицятьнень валдомтомо, да минекь пильгенекь сэтьме ки лаҥкс ававтомо. 80Эйкакшось кайсь да оймсэнзэ кемекстась. Израиль юткс лисьме чизэнзэ эрясь Сон чаво паксясо.
- ↑ рога.