Epistola al Philippenses Capitulo 3

 1 Del resto, fratres mie, gaude in le Senior. Pro me non es grave scriber vos 
   le mesme cosas e pro vos es necessari.

 2 Guarda vos ab canes, guarda vos ab perverse obreros, guarda vos ab illes del circumcision;

 3 perque le ver circumcise es nos, qui serve Deo in spirito, e nos glorifica in 
   Christo Jesus, e non confide in le carne;

 4 ben que io poterea confider in le carne. Si alcun pensa poter confider in le carne, 
   io pote facer lo multe de plus;

 5 io, circumcise al octave die, del lineage de Israel, del tribo de Benjamin, hebreo 
   de hebreos; quanto al lege, Phariseo; 

 6 quanto al zelo, persecutor del Ecclesia; quanto al justitia que es in le lege, irreprehensibile.
 
 7 Sed le cosas que me esseva lucro, io los ha reputate detrimento a causa de Christo. 

 8 In veritate, io reputa etiam omne cosa esser un detrimento ante le excellentia
   del cognoscentia de Christo Jesus, mi Senior, per le qual io ha renunciate 
   a tote iste cosas e los reputa stercore pro ganiar Christo,

 9 e de esser trovate in ille habente non un justitia mie, derivante del lege, 
   sed illo que on ha mediante le fide in Christo; le justitia que veni ab Deo per le fide;

10 a fin que io pote cognoscer Christo, e le potentia de su resurrection, e le 
   communion de su suffrentias, deveniente conforme a ille in su morte, 

11 pro attinger in alcun modo le resurrection del mortos.

12 Non que io ha jam obtenite le premio o que io  sia jam arrivate al perfection; 
   sed io proseque con le sperantia de poter obtener le premio; pois que io etiam 
   esseva prendite per Christo Jesus.

13 Fratres, io non reputa de haber ancora obtenite le premio; sed una cosa io face: 
   oblidante le cosas que sta retro io vade verso illos que sta avante,

14 prosequente verso le objectivo pro obtener le premio del supreme vocation 
   de Deo in Christo Jesus.

15 Sia iste dunque le sentimento de qui es matur; e si in alcun cosa vos senti in
   differente modo, Deo vos lo revelara etiam.

16 Solmente, ab le puncto al qual nos es arrivate, vamos continuar a camminar per le mesme via.

17 Sia vos mi imitator, fratres, e guarda illes qui cammina secundo le exemplo que vos ha in nos.

18 Perque multos cammina (io vos lo ha dicite subinde e vos lo dice etiam nunc plangente), 
   como inimicos del cruce de Christo;

19 le fin del quales es le perdition, cuje deo es le ventre, e cuje gloria es in
   lo que torna a illes vergonia; gente que ha le animo al cosas del terra.

20 Quanto a nos, nostre citatania es in celo, ab ubi etiam nos spera como Salvator 
   le Senior Jesus Christo,

21 le qual transformara le corpore de nostre humiliation facente lo conforme al corpore 
   de su gloria, in virtute del potentia per le qual ille pote etiam subjugar omne cosa.

1 2 3 4

---

Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev