Epistola al Philippenses Capitulo 1
1 Paulo e Timotheo, servitores de Christo Jesus, a tote le sanctos in Christo Jesus qui es in Philippo, con le episcopos e le diaconos, 2 gratia a vos e pace ab Deo nostre Patre e del Senior Jesus Christo. 3 Io da gratias a mi Deo de tote le memoria que io ha de vos; 4 e sempre, in omne mi oration, io ora pro tote vos con allegressa 5 a causa del vostre participation al progresso del Evangelo, desde le prime die usque nunc; 6 habente fiducia in isto: que ille qui ha comenciate in vos le opera bon, lo conducera a complimento usque al die de Christo Jesus. 7 E il es juste que io me sente assi de tote vos; perque io vos ha in le corde, tote vos qui, tanto in mi catenas quanto in le defensa e in le confirma del Evangelo, vos es participe con me del gratia. 8 Pois que Deo mi es teste como io suspira pro tote vos con affecto in Christo Jesus. 9 E mi oration es que vostre amor sempre plus abunda in cognoscentia e in omne discernimento, 10 a fin que vos pote seliger le cosas excellente, e que vos sia sincer e irreprehensibile pro le die de Christo, 11 plenate de fructos del justitia que on ha per medio de Jesus Christo, pro le gloria e laude de Deo. 12 Fratres, io vole que vos sape que le cosas que me eveniva ha contribuite al progresso del Evangelo; 13 de modo que a tote le guarda pretorian e a tote le alteres deveniva note que io es in catenas pro Christo; 14 e le major parte del fratres in le Senior, incoragiate per mi prision, ha initiate con major hardir a annunciar sin pavor le Parola de Deo. 15 Il es ver que alcunos predica Christo anque per invidia e per contention; sed il ha etiam alteres qui le predica de bon animo. 16 Istes lo face pro amor, sapente que io es stabilite in defensa del Evangelo; 17 sed, celles annuncia Christo, in modo insincer, credente causar me affliction in mi catenas. 18 Que importa? Comocunque sia, o per pretexto o in sinceritate, Christo es annunciate; e io in isto gaude, e gaudera ancora, 19 perque io sape que isto tornara a mi salvation, mediante vostre supplicationes e le subministration del Spirito de Jesus Christo, 20 secundo mi ardente expectative e sperantia de non esser avergoniate in nihil; sed que con omne fiducia, nunc como sempre Christo essera magnificate in mi corpore, sia con le vita, sia con le morte. 21 Perque per me viver es Christo, e morir es lucro. 22 Sed si continuar a viver in le carne resulta in fructo al opera io non saperea que seliger. 23 Io es astringite per duo lateres: io ha le desiderio de partir e de esser con Christo, perque isto es cosa melior; 24 totevia remaner in le carne es plus necessari pro vos. 25 E io ha le firme fiducia que io remanera e demorara con tote vos pro vostre progresso e pro le gaudio de vostre fide; 26 a fin que vostre gaudio abunda in Christo Jesus a motivo de me, per mi presentia de nove in medio a vos. 27 Solmente, conduce vos in modo digne del Evangelo de Christo, a fin que si io veni a vider vos, e si io es absente que audi que vos es firme in uno mesme spirito, combattente insimul con un mesme animo pro le fide del Evangelo, 28 e que in nihil vos es espaventate per le adversarios: lo que pro illes es un proba evidente de perdition; sed pro vos, de salvation; e isto ab le parte de Deo. 29 Pois que vos esseva concedite per Christo, non solmente de creder in ille, sed etiam de suffrer pro ille, 30 sustene vos le mesme lucta que vos me ha vidite sustener, e in le qual nunc vos audi que io me trova.
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud