Biblia/Nove Testamento/Romanos/Romanos 3

←Romanos 2

Le Biblia in Interlingua Romanos

Romanos 4→

Romanos

3

¹Qual es, alora, le avantage del judeo o qual es le beneficio del circumcision? ²Grande, in omne manieras. In prime loco, al judeos esseva confidite le parola^[1] de Deo. ³Que importa si alicun de illes esseva infidel^[2]? Esque lor incredulitate annihilara le fidelitate de Deo? ⁴Absolutemente no! Que Deo, al contrario, sia recognoscite verace e tote le homines mendace, como il es scribite: “ut tu sia justificate in tu parolas e tu vince quando tu es judicate^[3]”.

⁵Ma si nostre injustitia demonstra^[4] le justitia de Deo, que dicera nos? Per aventura Deo es injuste quando ille manifesta^[5] su ira? - Io parla in terminos human^[6]. ⁶Absolutemente no! Proque, alteremente, como poterea Deo judicar le mundo? ⁷Pois que si per mi mentita le veritate de Deo abunda pro su gloria, proque ancora io de facto es judicate como un peccator? ⁸E proque non dicer alsi (como alicun calumniatores assere que nos dice): “Vamos facer le mal a que le ben pote venir”? Le condemnation de tal personas es juste.

Le condemnation del mundo

⁹Que poterea ancora nos dicer? Esque nos es melior que illes? Certemente no, proque nos jam demonstrava que^[7] le peccato subjecta sia le judeos sia le grecos ¹⁰exactemente como il es scribite: “Il non ha alicun justo, non mesmo uno. ¹¹Il non ha alicuno qui ha intelligentia, il non ha alicuno qui cerca Deo. ¹²Totes se disviava, insimul illes deveniva sin valor; il non ha alicuno qui face le ben, non mesmo uno^[8]. ¹³Lor gurgite es un sepulcro aperte, illes decipe con lor linguas, veneno de serpentes es sub lor labios. ¹⁴Lor buccas es plen de malediction e amaritude^[9]. ¹⁵Lor pedes es veloce in versar sanguine, ¹⁶Ruina e miseria es sur lor sentieros, ¹⁷e le via del pace illes non ha cognoscite^[10]. ¹⁸Il non ha timor de Deo ante lor oculos^[11].

¹⁹Ora nos sape que quecunque le Lege dice, illo lo dice pro illes que es subjecte al Lege, de sorta que omne bucca sia facite tacer e le integre mundo sia rendite responsabile coram Deo. ²⁰Pois que nemo^[12] essera declarate juste^[13] coram ille^[14] per le medio del obras requirite del Lege, proque per le medio del Lege veni le cognoscentia del peccato. ²¹Ora, tamen, a parte del Lege, le justitia de Deo esseva manifestate (Isto es testificate per le Lege e le Prophetas), ²²illo es, le justitia de Deo per le medio del fidelitate de Jesus Christo pro tote illes qui crede, proque il non ha differentia. ²³De facto, omnes peccava e es destituite^[15] del gloria de Deo, ²⁴ma illes es justificate gratuitemente per su gratia per le medio del redemption que es in Christo Jesus. ²⁵Deo le exhibeva publicamente in su morte^[16] como le propitiatorio^[17] accessibile per le fide^[18]. Isto eveniva pro demonstrar su justitia, proque Deo, in su tolerantia, ultrapassava le peccatos committite anteriormente. ²⁶Isto eveniva alsi pro demonstrar su justitia in iste tempore, a que ille sia juste e, in le mesme tempore, le justificator de illes qui vive a causa del fidelitate de Jesus^[19].

²⁷Ubi es, alora, le vanteria? Illo es excludite. Per qual sorta de Lege? Del obras? No, ma per le lege^[20] del fide. ²⁸Proque nos considera que un persona es declarate juste per fide, a parte del obras requirite per le Lege. ²⁹An Deo es le Deo del judeos solmente? Esque ille non es alsi le Deo del gentiles? Si, alsi del gentiles! ³⁰Pois que Deo indubitabilemente es un e ille justificara le circumcise per le medio del fide, e le incircumcise per le medio del fide. ³¹Esque nos, ergo, nullifica^[21] le Lege per le fide? Absolutemente no! Al contrario, nos confirma^[22] le Lege!

Notas

1. O “oraculos”.
2. O “non credeva”.
3. Citation de Psalmo 51:4.
4. O “monstra clarmente”.
5. O “inflige”, o “discatena”.
6. O “in le maniera del homines”.
7. O “denunciava”, “accusava”.
8. Versos 10-12 es un citation del Psalmo 14:1-3.
9. Citation del Psalmo 10:7.
10. Romanos 3:15-17 es un citation de Isaia 59:7-8.
11. Citation del Psalmo 36:1.
12. O “nulle carne”.
13. O “justificate”.
14. Allusion a Psalmo 143:2.
15. O “private”.
16. O “in su sanguine”.
17. O “loco del propitiation”.
18. O “effective per le fide”.
19. O “de qui ha fide in Jesus”.
20. O “doctrina”, "inseniamento", "principio".
21. O “rende inoperative”.
22. O “establi”.