Biblia/Nove Testamento/Romanos/Romanos 4

←Romanos 3

Le Biblia in Interlingua Romanos

Romanos 5→

Romanos

4

Illustration del justification

¹Que, alora, poterea nos dicer que Abraham, nostre progenitor secundo le carne, discoperiva a tal proposito? ²Pois que si Abraham esseva declarate juste^[1] proque ille compliva le obras que le Lege require, ille haberea alique de que vantar se - ma non coram Deo. ³De facto, que dice le Scriptura? “Abraham credeva a Deo e isto le esseva creditate^[2] qua justitia^[3]”. ⁴Ora, le salario de un obrero non es considerate un gratia^[4] ma un remuneration debite^[5]. ⁵A qui non opera, tamen, ma crede in Deo^[6], le qual declara juste^[7] le impie, su fide le es creditate^[8] qua justitia^[9].

⁶Assi, mesmo David parla concernente le benediction que recipe le persona al qual Deo credita le justitia a parte del obras: ⁷Benedicite^[10] es illes cuje iniquitates esseva pardonate e cuje peccatos esseva coperite; ⁸benedicite es le persona al qual le Senior non imputa^[11] peccato^[12].

⁹Esque iste benediction pertine solmente al circumcision o anque al incircumcision? Pois que nos dice: Le fide esseva creditate a Abraham como justitia^[13]. ¹⁰In qual maniera alora le esseva creditate? Esseva ille circumcidite in ille tempore, o no? No, ille non esseva circumcise ma incircumcise! ¹¹E ille recipeva le signo del circumcision como sigillo del justitia que ille habeva per medio del fide durante que ille esseva incircumcise, a que ille haberea devenite le patre de qui crede sin esser circumcise, al fin que a illes alsi le justitia sia creditate. ¹²Abraham es anque le patre del circumcises, le quales non solmente es circumcise, ma seque le passos del fide que ille habeva quando ancora non circumcise.

¹³In effecto, le promissa facite a Abraham o a su descendentes, que ille haberea hereditate le mundo, non se compliva per medio del observantia del lege, ma per medio del justification que veni del fide. ¹⁴Nam si illes deveniva heredes per medio de lor observantia del lege, le fide esserea van e le promissa esserea nullificate^[14]. ¹⁵De facto le lege produce ira, proque ubi il non ha lege il non ha mesmo transgressiones^[15]. ¹⁶Pro iste ration, le justification se obtene per le medio del fide, proque illo sia secundo le gratia, con le resultato que le promissa es certe^[16] pro tote le descendentes - non solmente pro illes qui es subjecte al Lege, ma alsi pro illes qui ha le mesme fide de Abraham, le qual es le patre de nos omnes ¹⁷(como il es scribite, “Io te rendeva patre de multe nationes^[17]”). Ille es nostre patre coram le Deo in le qual ille credeva - le Deo qui da vita al mortos e appella al existentia le cosas que ancora non existe como si illos existeva. ¹⁸Abraham credeva in sperantia contra sperantia, con le resultato que ille deveniva le patre de multe nationes^[18] secundo lo que ille habeva dicite: “assi essera tu descendentes^[19]”. ¹⁹Su fide non diminueva quando ille considerava su proprie corpore como jam morte (proque ille esseva jam de quasi 100 annos) e le sterilitate del utero de Sara. ²⁰Ille non hesitava incredule ante le promissa de Deo, ma su fide deveniva plus forte e in isto ille glorificava Deo. ²¹Abraham esseva plenmente convincite de lo que Deo le habeva promittite e que Deo esseva potente^[20] a realisar lo. ²²Indubitabilemente tote isto esseva creditate a Abraham como justitia.

²³In ultra, non solmente pro ille il es scribite que su fide le esseva creditate, ²⁴ma alsi pro nos, al quales nostre fide essera similemente creditate, nos qui crede in ille qui resuscitava del mortos nostre Senior Jesus Christo, ²⁵le qual esseva livrate al judicio a causa de nostre transgressiones e resuscitate pro nostre justification.

Notas

1. O “esseva justificate”.
2. O “attribuite”.
3. Citation de Genesis 15:6.
4. O “un favor”
5. O “un obligation”.
6. O “in ille”.
7. O “justifica”.
8. O “considerate”.
9. O “un favor”.
10. O “beate”, “felice”.
11. Le verbo “imputar” traduce hic le greco logizomai, que alteremente nos traduceva con “creditar”. Nos non usava hic “creditar” proque normalmente isto hodie ha un accento positive. On lo poterea traducer anque “attribuer” ma in le contexto illo non esserea bastante clar.
12. Citation del Psalmo 32:1-2
13. Citation de Genesis 15:6.
14. O “rendite inoperative”.
15. O “violation”.
16. O “firme”.
17. Citation de Genesis 17:5.
18. Citation de Genesis 17:5.
19. Citation de Genesis 15:5.
20. O “capabile”.