Biblia/Nove Testamento/Romanos/Romanos 2

←Romanos 1

Le Biblia in Interlingua Romanos

Romanos 3→

Romanos

2

Le condemnation del moralistas

¹Ergo, tu es inexcusabile^[1], quicunque tu es^[2], quando tu judica altere personas. Pois que, quando tu judica un altere^[3], tu condemna te ipse, proque tu qui judica face le mesmo. ²Ora nos sape que le judicamento de Deo contra illes qui practica tal cosas es conforme al veritate^[4]. ³E esque tu pensa, quicunque tu es, quando tu condemna^[5] illes qui face tal cosas, que tu potera escappar al judicamento de Deo? ⁴O tu minusprecia le ricchessa de su bontate, patientia, e longanimitate, e, nonobstante isto, tu ignora que le bontate de Deo te deberea conducer te al repententia? ⁵De facto, a causa de tu obstination^[6] e de tu corde impenitente, tu solmente accumula^[7] ira pro te ipse in le Die del ira, quando le juste judicamento de Deo essera revelate. ⁶Ille pagara^[8] cata uno secundo su obras^[9]: ⁷vita eterne a illes que, per perseverar in bon obras perseque gloria e honor e immortalitate, ⁸ma ira e indignation a illes qui vive in ambitiones egoistic e non obedi al veritate, ma seque^[10] le injustitia. ⁹Il habera affliction e angustia pro quicunque^[11] face le mal, le judeo primo e alsi le greco, ¹⁰ma gloria, honor, e pace pro omnes qui face le ben, le judeo primo e alsi le greco. ¹¹Pois que il ha nulle partialitate^[12] con Deo. ¹²Proque tote illes qui peccava sin le Lege alsi perira sin le Lege, e tote illes qui peccava sub le Lege, essera judicate per le Lege. ¹³De facto, justos ante Deo non es le auditores del Lege, ma illes qui compli le Lege: illes essera declarate juste^[13]. ¹⁴Pois que quandocunque le Gentiles, qui non ha le Lege, face per instincto^[14] le cosas requirite per le Lege, istes qui non ha le Lege es un lege a se ipse. ¹⁵Illes demonstra que le obra del Lege es scribite in lor cordes - lor conscientia da testimonio de isto - e lor pensamentos un vice les accusa e un altere vice les defende^[15], ¹⁶in le die in le qual, secundo mi Evangelio, Deo judicara le secretos del cordes human mediante Jesus Christo.

Le condemnation del judeos

¹⁷Ma si tu, qui porta le nomine de judeo, te appoia al Lege, te vanta de tu relation con Deo^[16], ¹⁸cognosce su voluntate e discerne^[17] le cosas que es essential proque tu es instruite per le Lege; ¹⁹e tu te reputa esser guida pro le cecos, lumine pro illes qui es in le tenebras, ²⁰educator^[18] de personas insensate, magistro del infantes^[19], proque tu trova in le Lege le expression ipse^[20] del cognoscentia e del veritate - ²¹ergo, tu qui insenia a alteres, proque tu non insenia a te mesme? Tu qui predica que non se debe robar, tu roba? ²²Tu qui dice a alteres que non se debe committer adulterio, tu committe adulterio? Tu qui abomina le idolos, tu committe sacrilegios? ²³Tu qui te vanta in le Lege, dishonora Deo per transgreder le Lege! ²⁴Proque, como il es scribite, le nomine de Deo es blasphemiate inter le Gentiles a causa de vos^[21].

²⁵De facto, le circumcision ha valor si tu practica le Lege, ma si tu transgrede le Lege, tu circumcision deveniva incircumcision. ²⁶Ergo, si le homine non circumcidite compli le juste requirimentos del Lege, esque su incircumcision non essera considerate como circumcision? ²⁷E si ille qui es physicamente incircumcise compli le lege, esque ille non judicara te que, in despecto del codice scribite^[22] e del circumcision, transgrede le Lege? ²⁸Le ver judeo, de facto, non es ille que lo es exteriormente, ni le circumcision es lo que se face exteriormente in le carne, ²⁹ma pote dicer se judeo ille qui lo es interiormente, e le circumcision es primo del corde^[23], per le Spirito, e non per le codice scribite. Un tal persona essera laudate, non per le homines, ma per Deo.

Notas

1. O “vos non ha nihil a dicer in vostre defensa”.
2. Litt. “Oh homine”.
3. O “qualcunque sia le base sur le qual tu judica un altere”.
4. O “es fundate sur le veritate”.
5. O “judica”.
6. O “duressa”.
7. O “thesaurisa”.
8. O “recompensara”.
9. Citation de Psalmo 62:12; Proverbios 24:12; simile a Mattheo 16:27.
10. O “obedi”.
11. O litt. “cata anima de homine”.
12. O “exception”.
13. O “justificate”.
14. O “per natura”, “naturalmente”.
15. O “excusa”.
16. O “te gloria in Deo”.
17. O “approba”.
18. O “instructor”.
19. O “immatur”.
20. O “le caracteristicas essential”.
21. Citation de Isaia 52:5.
22. O “littera”.
23. Vide Levitico 26:41; Deuteronomio 10:16; Jeremia 4:4; Ezechiel 44:9.