Biblia/Nove Testamento/Romanos/Romanos 14

←Romanos 13

Le Biblia in Interlingua Romanos

Romanos 15→

Romanos

14

Exhortation al longanimitate

¹Accepta ille qui es debile in le fide, ma non pro discuter^[1] su opiniones^[2]. ²Un persona crede poter mangiar de toto^[3], ma le persona con un fide debile mangia solmente verduras. ³Qui mangia de toto non debe dispreciar qui non lo face^[4], e qui non lo face non debe judicar qui mangia de toto, proque Deo le acceptava le mesmo. ⁴Qui es tu pro judicar le servo de un altere? Si ille sta in pede o cade isto concerne solmente su domino, e ille stara firme proque le Senior es potente pro sustener le.

⁵Un persona considera un certe die plus sancte que un altere, e un altere considera tote le dies equal. Cata uno debe esser plenmente convincite in su proprie sentimento^[5]. ⁶Qui observa un certe die lo face pro le Senior. Qui mangia [omne sorta de alimentos] mangia [de illos] pro le Senior, pois que ille regratia Deo. In le mesme maniera, qui se abstine de mangiar [certe alimentos], se abstine [de illos] pro le Senior, e ille regratia Deo. ⁷Necuno de nos, de facto, vive pro se mesme, e necuno mori pro se mesme. ⁸Si nos vive, nos vive pro le Senior; si nos mori, nos mori pro le Senior. Ergo, sia que nos vive sia que nos mori, nos pertine al Senior. ⁹¹Pro iste ration Christo moriva e resuscitava^[6]: a que ille pote esser le Senior tanto del mortos como del viventes.

¹⁰Tu, tamen, qui mangia solmente alimentos vegetal - proque tu judica tu fratre o tu soror? Pois que nos omnes comparera ante le tribunal^[7] de Deo, ¹¹pois que il es scribite: “Assi como io vive - dice le Senior - omne geniculo se flectara ante me e omne lingua laudara Deo^[8]”. ¹²Ergo, cata uno de nos rendera conto de se mesme a Deo.

Exhortation al forte de non destruer le debile

¹³Ergo, vamos non judicar plus le unes le alteres, al contrario, vamos esser determinate in jammais esser un obstaculo o un petra de scandalo ante un fratre o un soror. ¹⁴Io sape e es persuadite in le Senior Jesus que nulle cosa es impur in se ipse; ma pro qui lo considera impur illo es impur. ¹⁵De facto, si tu fratre o tu soror es contristate^[9] a causa de lo que tu mangia, tu non te comporta plus con^[10] amor. Non vulnera^[11] per tu alimento alicuno pro le qual Christo moriva. ¹⁶Ergo, non permitte que se parla mal^[12] de lo que pro vos es bon. ¹⁷Proque le regno de Deo non consiste in alimentos o bibitura, ma in justitia, pace, e gaudio in le Spirito Sancte. ¹⁸Qui servi Christo in iste maniera es agradabile^[13] a Deo e gaude del approbation^[14] del homines.

¹⁹Vamos assi persequer lo que contribue al pace e al edification mutual. ²⁰Non destrue le obra de Deo a causa de alimentos. In realitate, tote le cosas es munde, ma il es mal causar un scandalo a causa de lo que tu mangia. ²¹Il es bon non mangiar carne o biber vino o facer un qualcunque altere cosa que scandalisa tu fratre. ²²Le fide que tu ha, mantene lo pro te ipse ante a Deo. Beate es qui non condemna se ipse in lo que ille approba. ²³Qui dubita, tamen, es condemnate si ille mangia, proque ille non lo face per fide. De facto, quecunque non procede del fide es peccato.

Notas

1. O “judicar”.
2. O “pro debatter sur opiniones differente”.
3. O “omne sorta de nutrimento”.
4. O “qui se absteni”.
5. O “mente”.
6. O “retornava al vita”.
7. O “sede del judicamento”.
8. Citation de Isaia 45:23.
9. O “afflicte”, “angustiate”.
10. O “secundo”.
11. O “destrue”.
12. O “sia diffamate”.
13. O “acceptabile”.
14. O “es approbate”.