Biblia/Nove Testamento/Corinthios/2Corinthios 3

←2 Corinthios 2

Le Biblia in Interlingua Litteras al Corinthios

2 Corinthios 4→

2 Corinthios

3

Un littera vivente

¹Esque nos comencia recommendar nos mesme un altere vice? Nos non necessita litteras de recommendation a vos o ab vos como certe alteres. Nonne? ²Nostre littera es vos, scribite sur nostre cordes, cognoscite e legite per omnes, ³revelante que vos es un littera de Christo, livrate per nos, scribite non con tinta, ma per le Spirito del Deo vivente, non sur tablettas de petra^[1] ma super tablettas de cordes human^[2].

⁴Ora nos ha tal confidentia in Deo mediante Christo. ⁵Non que nos es adequate^[3] in nos mesme e pensa que alicun cosa pote venir de nos mesme, ma nostre competentia veni de Deo, ⁶le qual qualificava nos pro esser ministros de un nove pacto^[4] non fundate sur le littera ma sur le Spirito, pois que le littera occide, ma le Spirito vivifica.

Le major gloria del ministerio del Spirito

⁷Ma si le ministerio que produceva morte - gravate con litteras sur tablettas de petra - esseva gloriose, tanto que le israelitas^[5] non poteva tener lor oculos fixe sur le facie de Moses a causa del gloria de su facie (un gloria transitori^[6]), ⁸quanto plus gloriose essera le ministerio del Spirito? ⁹Pois que si il habeva gloria in un ministerio que produceva condemnation, quanto plus excelle in gloria le ministerio que produce justitia! ¹⁰Sin dubita, lo que antea esseva gloriose, nunc ha nulle gloria, a causa del gloria multo plus grande que illo que lo reimplaciava. ¹¹Si lo que esseva transitori^[6] esseva gloriose, quanto plus gloriose es lo que es permanente! ¹²Ergo, nam nos ha un tal sperantia, nos comporta^[7] nos con grande harditessa. ¹³De facto nos non es como Moses qui poneva un velo sur su facie a que le israelitas^[5] non fixarea lor oculos sur le termino de lo que esseva transitori. ¹⁴Lor mentes, tamen, esseva claudite^[8], proque usque al die de hodie, al lectura del vetule pacto^[9] le mesme velo remane sur lor facie. Illo non esseva removite proque solmente in Christo illo es levate^[10]. ¹⁵Usque hodie, quandocunque se lege le libros de Moses, un velo jace super lor mentes^[11]. ¹⁶Ma quandocunque un persona se reverte^[12] al Senior, le velo es removite^[13]. ¹⁷Ora le Senior es le Spirito, e ubi le Spirito del Senior es presente, ibi es libertate. ¹⁸E nos omnes, con facies disvelate, reflectente le gloria del Senior, es transformate in le mesme imagine ab gloria a gloria: isto perveni del Senior, le Spirito.

Notas

1. Allusion a Exodo 24:12; 31:18; 34:1; Deuteronomio 9:10-11.
2. O “de carne”.
3. O “sufficiente”.”competente”.
4. Iste nove pacto es promittite in Jeremia 31:31-34; 32:40.
5. O “le filios de Israel”.
6. O “inefficace”.
7. O “procede”.
8. O “esseva indurate”.
9. O “testamento”.
10. O “eliminate”.
11. O “lor cordes”.
12. O “Quando le persona, etc.".
13. Un allusion a Exodo 34:34.