កម្ពុជសុរិយា/ឆ្នាំទី១/1
| ←មាតិការឿង | កម្ពុជសុរិយា, ឆ្នាំទី១ (១៩២៦-២៧) ព្រះបន្ទូលក្រុមព្រះនរោត្ដម ភាណុវង្ស ពន្យល់អំពីបង្កើតទស្សនាវដ្ដី ដោយព្រះនរោត្ដម ភាណុវង្ស |
កាលាមសូត្រ ព្រះវិមលធម្ម ថោង ប្រែ-រៀបរៀង→ |
ព្រះបន្ទូលក្រុមព្រះ នរោត្ដមភាណុវង្ស[1]
ទីអគ្គមហាសេនា ធិបតីសមុហនាយកសេនាបតីក្រសួងមហាថៃ (ផ្ទៃ)
និងធម្មការ នៃព្រះនគរក្រុងកម្ពុជាធិបតី
ទ្រង់ពន្យល់អំពី បង្កើតទស្សនាវដ្ដី សៀវភៅបោះពុម្ព
ព្រះរាជបណ្ណាល័យកម្ពុជា ។
ព្រះរាជបណ្ណាល័យក្នុងក្រុងភ្នំពេញ ដែលមានព្រះរាជប្រកាសពីថ្ងៃ ᧶ ២ ឆ្នាំជូតឆស័កត្រូវនិងថ្ងៃ១៥ ហ្សងវិយ៉េ ឆ្នាំ១៩២៥ បង្កើតឡើងសម្រាប់តម្កល់សាស្ត្រាបាលី គ្រឿងប្រដាប់សម្រាប់គោរពព្រះពុទ្ធសាសនា និងលិខិតក្បួនខ្នាតក្នុងក្រៅរាជការខេមរៈគ្រប់ជំពូក បានធ្វើការសម្រេចដោយមាំមួនគួរឲ្យសរសើរជាប្រាកដ ព្រោះមានប្រយោជន៍ច្រើនជាន់ដល់រាជការ និងព្រះសង្ឃ និងអ្នកទាំងពួង ទៅមកចូលមើលឬខ្ចីសាស្ត្រាសៀវភៅ និងសំបុត្រ កាសែតនិងរឿងរ៉ាវផ្សេងៗ យកទៅមើលឬចម្លងបានតែអ្នកដែលនៅឆ្ងាយខ្លះ មិនស្គាល់មន្ទីរនេះ ខ្លះពិបាកទៅមកដោយឥតបច្ច័យ ឬឥតឱកាសបានជារាជការទើបបង្កើតឲ្យមានទស្សនាវដ្ដី ហៅ « កម្ពុជសុរិយា» បោះពុម្ព១ខែម្ដងអស់ទាំងសេចក្ដីដែលមានស្រាប់ ឬកើតឡើងថ្មី ពីក្នុងឬក្រៅព្រះរាជបណ្ណាល័យ ជាដំណឹងមានប្រយោជន៍ដល់អ្នកទាំង [ 2 ]ឡាយ ហើយដើម្បីឲ្យអ្នកដែលមានចំណេះផ្សេងៗ បើចង់សុំផ្សាយដំណឹងការអ្វីៗ នឹងជូនសេចក្ដីមកបោះពុម្ពក្នុងព្រះរាជបណ្ណាល័យកម្ពុជានោះបានដោយងាយ ហើយនិងមានសេចក្ដីគាប់ប្រសើរផង ឯអ្នកទាំងពួងគួរឲ្យមានចិត្តចង់ទិញកម្ពុជសុរិយា ទុកមើលជារបស់ខ្លួនតទៅឲ្យគ្រប់គ្នា គំនិតធ្វើទស្សនាវដ្ដីនេះជាវិសេសណាស់ ទ្រង់សូមបញ្ចូលចិត្តអ្នកទាំងឡាយឲ្យទិញមើល និងរិះគិតតែងសេចក្ដីផ្សេងៗ ជាប្រយោជន៍ខាងព្រះពុទ្ធសាសនាឬខាងចំណេះអក្សរ និងការរបរផ្សេងៗ និងគ្រឿងគ្រប់មុខ គួរគប្បីឲ្យអ្នកទាំងពួងដឹងយកតម្រាប់តាមនោះ ឲ្យបញ្ជូនមកសុំបោះពុម្ពក្នុងព្រះរាជបណ្ណាល័យកម្ពុជាឲ្យរាល់ខែ ដូចនគរធំឯទៀតៗគេចូលចិត្តថ្លែងសេចក្ដីដំណឹងពីប្រយោជន៍ការទាំងពួងឲ្យស្គាល់យល់ភ្លឺជាប្រយោជន៍សាធារណ៍ ឲ្យបានចំរើនគ្រប់ប្រការក្នុងព្រះនគរ ។
ក្នុងឱកាសនេះ យើងសូមឧទ្ទិសប្រាថ្នាឲ្យព្រះរាជបណ្ណាល័យកម្ពុជាប្រកបដោយសេចក្ដីបរិបូណ៌ និងស្ថិតស្ថេរតទៅ ។
ក្រុមព្រះ នរោត្ដម ភាណុវង្ស័ ទីអគ្គមហាសេនាធិបតី
- ↑ អត្ថបទនេះ មានចុះនៅកម្ពុជសុរិយា ក្បាលទី១ ឆ្នាំ១៩២៦ – ២៧ ។