Святое Евангелие (эрзянь)/В/Матфеень/15

[ 40 ]

Глава 15.

¹Сестэ Іисус вакс састь Іерусалимень книжникне да фарисейтьне да мерьсть: ²Мейсь Тонть тонавтницят а кирьдить атятьнень койтьнесэ: сынь кшеде ярцамодо икеле кедест а шлякшносызь? ³Сон каршост мерьсь: мейсь тынь-гак атятьнень коест кирьдимань кис а тейтядо Пазонь заповедьтьнень коряс? ⁴Пазось мерьсь: тетять, авать мелест ванок: кона тетянстэнь эли аванстэнь терьги берянь вал, се кулозо. ⁵А тынь кортатадо: ки мериньдеряй тетянстэнь, эли аванстэнь: мезе тонеть максумаль, сень мон Пазостень алтыя, ⁶се мейле тетянзо, аванзо мель-гак а ваныдеряй паро ули. Истя теезь, тынь атятьнень коест кирьдимань кис Пазонь заповедьтьнень колатадо. ⁷Эсь пряҥк парокс тейницят! парьсте кортась тыҥк кувалма Исаія пророк: ⁸не ломатьне кургсост Монь малав сакшныть, кельсэст-как Монь Эснэ шныть, а седеест Монь эйстэ васоло ашти. ⁹Стяко сынь шныть Монь эснэ, ломанень заповедьтьнень да тонавтуматьненень тонавтозь. ¹⁰Мейле народсть тердезь, мерьсь тенст: кулцонодо да чарькодеде: ¹¹Аволь се, мезе кургс сови, ломаньсть эснэ гади, а мезе кургсто лиси, се ломаньсть эснэ гади.

¹²Сестэ тонавтницянзо, ваксозонзо молезь, мерьсть Тензэ: содат-ли, фарисейтьне, Тонть валот марязь, пежетс совасть? ¹³Сон каршост мерьсь: эрь чувтось, конань аволь Монь менельсэ Тетям озавтызе — ёми. ¹⁴ [ 41 ]Кадыҥк сынст: сынь сокоронь вецицят сокорт; ветиньдеряй ведь сокорсо сокор, сынь кавонест латкс прыть. ¹⁵Петр каршонзо мерьсь: чарькодевтик тенек те притчанть. ¹⁶Іисус мерьсь: тыҥк-как ара те шкас превезэҥк а саеви? ¹⁷Ара ачарькодтядо, — весе, мезе кургова сови, пекс моли, венелев молезь, ушов лиси. ¹⁸А кургсто лисицятьне — седейстэ лисить, сетьне ломаньсть эснэ гадить. ¹⁹Ведь седейстэ лисить апарт арсимат, ломанень маштумат, ломань ава мельга чійнимат, ава ломанень вечкимат, саламот, ломань лаҥгс кеҥгелезь невтимат, сялдумат. ²⁰Весе неватеть ломаньсть эснэ гадить, а кедень апак шляк ярцамось ломаньсть эснэ а гади.

²¹Тосто лисезь, Іисус Тир маро Сидононь масторс сась. ²²Тесэ ве хананеень ава, сеть ёнкснэстэ лисезь, сеересь Тензэ: Давидэнь Цёра, Тонавтыця, ванумак монь! Монь тейтерем, амазысэ колазь, пек майси. ²³Іисус каршонзо ве вал-гак эзь пшкать: Тонавтницянзо, ваксозонзо молезь, инялдсть Тензэ: нолдык сонзэ, сон пижни мельганок. ²⁴Сон каршост мерьсь: Мон ансяк Израилень кудонь ёмазь реветьненень кучозян. ²⁵Авась, ваксозонзо молезь, сюкунякшнось Тензэ да кортась: Тонавтыця, тейть тень лезэ! ²⁶Сон каршонзо мерьсь: аволь паро кшенть эйкакшонь кедьстэ саемс да кисканень каямс. ²⁷Авась мерьсь: (те) истя, Тонавтыця! Ансяк кискатьне-як ведь ярсыть азорост столаҥсто певериця паморькснэде. ²⁸Сестэ Іисус мерьсь каршонзо: вай, ава, Тонть кемимат покш. Улезэ тенть мелеть коряс. Секе частонть пичкась сонзэ тейтерзэ.

[ 42 ] ²⁹Тосто туезь, Іисус мольсь Галилейской моря чирес, да, пандо пряс кузезь озась тозо. ³⁰Ваксозонзо мольсть ламо ломать, сынь марост туизь хромойтьнень, сокортнэнь, немойтьнень, убогойтьнень, да ліят-как ламо сэредицятьнень, да путызь сынст Іисусонь пильгензэ вакс. Сон сынст віемтинзе. ³¹Ломатьне, немойтьнень кортамост, сэредицятьнень віеммест, хромойтьнень якамост, сокоротнэнь неймаст неезь, дивасть да шнасть израилень Пазонть эснэ.

³²Іисус, тонавтницянзо терьдезь, мерьсь тенст: жаль маряви Монень народсь, — сынь уж колмо чить аштить Монь вакснэ, а ярцамс тенст а мезьде, вачо нолдамс мелем арась, ки лаҥгсо авольть лавчомт-бу. ³³Тонавтницянзо мерьсть Тензэ: косто сайдянок минь чаво таркасо зняро народонь андомс кшеть? ³⁴Іисус мерьсь тенст: зняро тыҥк кшеҥк: Сынь мерьсть: сисемь, да аламошка калнэть улить. ³⁵Сон мерьсь ломатьненень масторов ойсемеде. ³⁶Сонсь, сисемь кшетьнень да калтнэнь саезь, шнызе Пазонть, мейле синтринзе да максынзе тонавтницянстэнь, а тонавтницятьне — ломатьненень. ³⁷Весе ярцасть да пешкедьсть, да кадовозь сускомотьнеде пурнасть сисемь кептереть пешксеть. ³⁸Ярсыцятнеде ульнесть, аватьнеде да экакшнэде башка, ниле тыстят ломань. ³⁹Ломатьнень нолдамодо мейле Іисус совась венчес да тусь Магдалинской масторс.