Ичкиздень масторхня/04

From Wikisource
Jump to navigation Jump to search
Ичкиздень масторхня  (1933)  by Гайдар, Аркадий Петрович, edited by Кочетков А., translated by Аф содаф (аноним)
4-це главась
Арк. Гайдар. Ичкиздень масторхня. — ОГИЗ Молодая гвардия, Москва, 1933. — стр. 22—27

[ 22 ]

4.

Ветешка шида меля, сяда меля кода ласьконцть цёратьня Алёшинав, абетта меля синь тусть Тихай ляйть ланкс, штоба варжамс, изь пов-ли синь нерятанязост кал.

Пачкоцть ся вастти, синь куваць вешенцть крюкса потмакстонза, лиякс азомс аф оцю якорьса, мянтф эскста. Цють изезь сязь пикокять, кундазь кечказса стака нерятать. Таргасть берякть ланкс целай мар валазя, тинань духу веца касыкст (водорослят). А нерата ашель.

— Сонь Серёжкась сявозя! — аварьгаць Васькась. — Мон тейть корхтань, што сон сонць ванонцямязь. Вов сон и няймязь, Мон тейть корхтань: давай лия васц ёрдасаськ, а тон изийть тий станя.

— Тк вдь тяни лия васць. — Кяжиясь Петькась. — Тон тонць тя вастть кочкайть, а тяни сембонь лангозон кайсесак. Да дят авардь тон пажалуйста. Эсьтеенгя ужаль, а мон аф авардян.

Васькась лоткась, но аф куваць.

А Петькась мярксь:

— Ляди мялезт, кода минь Алёшинав ласькондемя, то Серёжкать ляйть тейса палф тумоть тейса няеськ? Адя тов да вешсаськ. Пади сонь нерятанянц таргасаськ. Сон — минь, а минь — сонь. Адя Васька. Да дят, авардь тон, пажалуйста.

Тяфтама оцю и ечкя, а аварди. Мес мон мзярдонга аф авардян? Ляди мялезт, мзярда монь фкя пингоня колма мешт кяпя пилькт сускомязь, и то мон изень авардь.

— Вот-тк изеть авардь! — нолдаф нярхть пшкяць Васькась. — Кда паразевоть эста, мон мянь лукошказень ксти мархта эводьма пачк прафтые.

— Вохси изень паразев. Парайхть — тя мзярда сельмя ветьня шюдийхть. А мон ювадень, сяс мес эводень, да и сяряць. Ювадень колма секундат и лоткань. А вохси мзярнява изень пара и изень авардь. Ласьктяма, Васька!

Пачкоцть беректь тейс, конац улсь палф тумоть тейса, синь куваць вешенцть потмаксть эса.

[ 23 ]Шарсть-шарсть, сизесть, валондовсть, но аф синцень аф Серёжкать нерятаснон изезь му.

Эста абижафт, синь озасть бугорня ланкс кальня алу, кона нолдазень эсь верванзон и фкя фкянь мархта корхтазь думондасть вандыень шиня уйфтемс Серёжкать хитрай ванманц меля, штоба мумос ся вастт, ков сон якай кафцкя нерататьнень ёряма.

Кинь бди аськолманза афкукс ненгя ичкизя, кошардозь цёратьнень кулхцондома, и синь праворнаста жопафцть сидя калхнень ёткс.

Тя улсь аф Серёжкась. Кинять эзга Алёшинаста валомне молсть кафта сокай ломатть. Фкясь — аф содаф и кодабта аф тястонь. Омбоцесь Серафим дядяц — аф козя алёшинскай аля, конань ланкс сидеста пракшнесть несчастьят: то сонь алашац урац, то сонь розенц алашатьня тапазь, то сарай лапазоц калац и люпштазя пурхценц да мацинзон. И тяфта эрь кизоня мезя нябуть тиеви Серафим дядянц мархта.

Ульсь сон пяк трудящай, но неудачнай и эвотьф неудачаса аля.

Серафим дядясь канц раз’езду рыжай охотничай кямотт, конатнень ланкс путнесь панкст кафта целковойда, конатнень тейнза надияфтозень Васькать аляц.

Кафкця молсть и наругазь Данила Егоравичть. Наругазя сонь ся, кона улсь аф содаф, аф алёшинскай, а Серафим дядясь кулхцонц и аф весяласта дакондась.

Мезенкса аф содаф ломанць наругазя Данил Егоровичть, тянь цёратьня толком изезь шархкодь. Лисенц кода-бта тяфта, што Данил Егоровичсь мезя-бди рамась алять кяцта уцезста и надияфнесь аляти максомс долкс колма мешокт пинем, а мзярда алясь сась, то Данил Егоровичсь пуць тяфтама питьня, кодама и ошса базарса аш и корхтай, тя ненгя шкаень питьня, сяс мес видьмати пинемс кеподи ненгя сяда вяри.

Мзярда кафцкя аф весяла сокай ломатьня ётасть вакска, цёранятьне листть кальхнень ёткста и танга озасть лямбя пижя бугорнять пряс. Шись илядь малати арсесь. Ляйть эзда молсь начка шиня и ляй трвань ракитнеконь шиня. Кукась кукунясь, и шить якстеря лучса шарсть марняса ёмбланят, кода пуль, аф маряви тундань мушкарат.

Но вов тишинать ёткса вася ичкиздень и тихай, кода мешень [ 24 ]роень быйняма, кулевсь алови облакнень фталда апак кульнть увнама.

Тоса, сязевсь круглай эчкя дуцять эзда, пиндолгоць менелть эса валда, кода сиянь точка. Сон сембя кассь. Вовни сонь няевсть кафта пархт келемф пацят... Вов-ни кырвязсть пацятнень ланкса кафта ветя пе мархта звезданят...

И сембя аэропланц, оцю и мази, сяда вишкя, клёк вишкя паровозть коряс, но сяда тёждя клёк вишкя степной арелть коряс, весяла рокот мархта вишкя моторхнень эзда, аф шерхкозь ётась шовда вирть вельф, пустыннай раз’ездь вельф и Тихай ляйть вельф, конань берекса ащесть цёранятьня.

— Ичкизи лии! — валомня мярксь Петькась, сонць ваны ичкизи туй аэропланть меля.

— Ичкиздень масторхненди! — мярксь Васькась и ляць мялезонза аф кунартень пяк цебярь оноц. — Синь, аэроплатня, валда лиихть аньцек ичкиздень масторхненди. Маластотненди мезя? Маластотненди и алашаса можна пачкодьмос. Аэроплатня — ичкиздетненди. Минь, мзярда кастам, Петька, мингя — ичкиздетненди. Тоса улийхть ошт, и пяк оцю завотт, и пяк оцю вакзалхт. А миннь аш.

— Миннь аш, — согласиндась Петькась.

— Миннь аньцек раз’езць, да Алёшинась, да сяда лама мезнява аш.

Цёранятьня лоткасть и, дивандазь и пичодезь кеподезь пряснон. Гулс тангя вишкомшнесь. Вишка стальной нармонць мрцесь, валгонць сембя сяда алу. Тяни-ни няевсть ёмбла калесанятьня и валда пиндолдыкссь, конац пиндолць шить инголя.

Кода-бта налхкозь, машинась уйсь кержи пацянц ланкс веляндезь, шаркстась и тийсь кели, лама кели крукт вирть велккса, алёшинскай лятьфнень велксса, Тихай ляйть велккса конань берякса ащесть муцяф и кеняньтьф цёранятьня.

— А тон... а тон корхтать: аньцек ичкизденетненди, — и ляпиякшнезь и кенордазь, мярксь Петькась. — Рази минь ичкизденнетяма?

Машинась танга куцсь вяри и курок юмась, аньцек шуроста няевсь ечкя алови дуцятьнень ёткса.

«И мес сон велкксонок шары?» думондасть цёратьня,

[ 25 ]
Ичкиздень масторхня (А. П. Гайдар, 1933) p29.jpg
кенордазь молсть раз’ездть шири, штоба куроконя азондомс, мезя синь няйсть.

Синь улсть заняфт содамаса, местема сашонць аэропланць и мезя сон ванць, и пцти исть ван одинокай ляцемать ланкс, глухойста коса-бди ичкизя марявсь синнь фталост.

Састь куду, Васькась ненгя сатозя Серафим дядянц, конань каванязь чайда.

Серафим дядяц азонць алёшинскай тефнень колга. Колхозу сувась пяля веля. Сувась и сойнгя хозяйствац. Лядыкс пялесь учсь, мезя ули. Кочкасть паень взность и колма тёжятть [ 26 ]Трактороцентрань акциянди. Но видьма тя кизонда кармайхть кажнайсь сонць эсь умасонза, сяс мес модась колхозти фкя васць ненгя апак явштт.

Кенерсть явштомс аньцек лятфнень Тихай ляйть беряккса.

Сембя сяка и тясанга лиссь аф ладна. Петунин мельникть сязевсь платинац, и вець сембя мянць, изь ту керши беректь шюдерьксонзон эзга. Тянь эзда тишесь ули осал, сяс мес ваяф лятьфня и цебярь урожайсь синь ланксост эряй аньцек оцю ветта меля.

— Петунинть сязевсь? — аф верондазь кизефтезя аляць. — Мес сонь сяда инголя изь сязендев?

— А кия сонь содасы, — аф ванозь ся ширети отвецясь Серафим дядяць.

— Пади, вець сязезя, а пади, и ненгя кода.

— Жулик тя Петунинць, — мярксь аляць. — Што сон, што Данил Егоровичсь, што Загрёбин Семёнц — фкя кампаниясна. Ну, кода синь, кяжиякшнийхть?

— Да кода мярьгомс, — отвецясь Серафим дядяць. — Данилась — ся якай кода-бта соньтеенза не касается. Тиннь, корхтай, тевсь. Кельктяд — калхозу, кельктяд — совхозу. Мон тяса нипричем. Петунинць — мельниксь — ся афкукс кяжиясь. Кяшенцы, а няеви што кяжиясь. Колхознай лятьфненди и сойнгя участкаць повсь. А кодама сонь участкаць? Ц-це-е-бярь участька! Ну, а Загребинць? Тонць содасак Загрёбинть. Тянь сембя шутканенза да прибаутканянза. Аф кунара почтать вельдя плакатт кучсть да всякай лозункт. Ну вов Бочарофсь, сторожсь, тусь синнь, петфнемость велеть ланга. Коса пирьфс, коса стенас петфтасы. Ётни сон Загрёбинть кудонц ваккска и аф содасы: пондамс или аф пондамс? Кода-ба азорсь афоль сялгад. А Загрёбинць лиссь воротанява и рахай: «Месна аф пондат? Эх, тон колхознай пря. Лиятненди празник, а теень стакши штоли?» Сявсь кафта клёк оцю плакатт да и пондазень.

— Ну, а Егор Михайловичсь кода? — кизефтезя аляць.

— Егор Михайловичсь? — отвецясь Серафим дядяць, сонць сяряфнесы шава стаканть.

— Егорсь — кемя ломанць, да мезя-бди аф ладнай колганза ашкодыйхть.

— Мезя ашкодыйхть?

— Вов, кепотьксонди, корхтайхть, што мзярда кафта кизот куца ашель, кода-бта сонь панезь осал тевонкса коста-бди. [ 27 ]Кода-бта цють суц изь пов. Кати сонь ярмакнень мархта мезя-бди аф ладнай лиссь, кати ненгя кода.

— Изеря ашкодыйхть, — увереннайста пшкяць Васькать аляць.

— Эряволь-ба думондамс, што изеря. А ненгя ашкодыйхть — тяса Серафим дядяць варжакссь касой сельмот Васькать маманць ланкс и Васькать ланкс, — бта ошса мезец ули... Ну, невестац, штоли, — пшкяць сон заминкада меля.

— Ну и мезя кда, кда невестаць? Катк ирвяяй. Сон ыдавой. Пашкати ды Машкати мама ули.

— Ошса эряй, — рахсезь пшкяць Серафим дядяць. — Стирь тоса или ненгя кода. Теенза козя эряви, а сонь кодама жалвоньяц? Ну, мон туян, — мярьксь Серафим дядяць, сонць стякшни васстонза. — Спасиба каванямода.

— Пади, удома лядат? — мярьксть теенза. — А ту, ватт, кодама шовда. Просёлкать эзга сай молемс. Аф оцю кинять эзга вирьса ненгя эрьгодят.

— Аф эрьгодян, — пшкяць Серафим дядяць. — Тя кинять эзга комсть кизоть пинкста партизатнень мархта, ух мзяра улсь якаф! — Сон щачфтозя нефтьф шужярень шляпанц оцю ашкотьф пакся мархта и, мяндевсь вальмяти, лезць:

— Эх, тяштта мзяра валяф, да и ковсь курок лиси валда ули!