Libro de Mormon - Alma - Capitulo 18
Rege Lamoni suppone que Ammon es le Grande Spirito - Ammon instrue le rege re le creation, re le relationes de Deo con le homines e re le redemption que venira per medio de Christo - Lamoni crede e cade a terra como morto. Circa 90 a.C.
Alma 18:1 E adveniva que rege Lamoni ordinava a su servitores de presentar se e attestar tote le cosas que illes habeva vidite concernente al facto.
Alma 18:2 E quando illes habeva tote attestate le cosas que illes habeva vidite e le rege habeva sapite del fidelitate de Ammon in proteger su greges, e anque de su grande poter in le lucta contra les qui cercava de occider le, esseva grandemente stupite e diceva: securmente iste es plus que un homine. Non essera forsan le Grande Spirito que manda tal grande punitiones supra iste populo a causa de su homicidios?
Alma 18:3 e illes respondeva al rege e diceva: Si ille es le Grande Spirito o un homine, nos non lo sape; ma nos sape solmente isto: que ille non pote esser occidite per le inimicos del rege, ni illes pote dispersar le greges del rege quando ille es con nos, a motivo de su habilitate e grande fortia; nos sape dunque que ille es amico del rege. E nunc, oh rege, nos non crede que un homine ha un assi grande poter, perque nos sape que ille non pote esser occidite.
Alma 18:4 Alora, quando le rege habeva audite iste parolas, ille diceva: Nunc io sape que ille es le Grande Spirito; e ille ha descendite in iste occasion pro preservar vostre vita, a fin que io non vos occideva como io faceva con vostre fratres. Nunc, iste es le Grande Spirito del qual ha parlate nostre patres.
Alma 18:5 Nunc, iste esseva le tradition de Lamoni, que ille habeva recipite de su patre: que existeva un Grande Spirito. Nonobstante illes credeva in un Grande Spirito, illes supponeva que qualcunque cosa illes faceva esseva juste; nonobstante Lamoni comenciava a timer grandemente, per timor de haber facite mal a occider su servos;
Alma 18:6 perque le rege habeva occidite multos perque lor fratres habeva dispersate le greges in le abiberatorio; e perque le greges habeva essite dispersate, illes esseva occidite.
Alma 18:7 Nunc, esseva consuetude de iste Lamanitas esser apud le Aquas de Sebus pro dispersar le greges del populo, pro poter in tal modo portar verso lor terras multe de illos que se dispersava, essente iste un practica de saccheo inter illes.
Alma 18:8 E adveniva que rege Lamoni demandava a su servitores: Ubi es iste homine que ha un assi grande poter?
Alma 18:9 e illes diceva al rege: ille sta a nutrir tu cavallos. Nunc, le rege habeva commandate a su servitores, ante que illes vadeva a abiberar le greges, de preparar le cavallos e le carros e de conducer le al pais de Nephi; perque un grande festa habeva essite preparate in le pais de Nephi per le patre de Lamoni, que esseva rege sur tote le pais.
Alma 18:10 Nunc, quando rege Lamoni audiva que Ammon stava a preparar le cavallos e le carros, ille esseva ancora plus stupite a motivo del fidelitate de Ammon, e ille diceva: securmente non ha existite necuno servo inter tote mi servos tan fidel quanto iste homine; perque ille recorda tote mi ordines pro exequer los.
Alma 18:11 Nunc io sape con certitude que iste es le Grande Spirito, e io volerea vider le, ma io non osa facer lo.
Alma 18:12 E adveniva que quando Ammon habeva preparate le cavallos e le carros pro le rege e su servos, ille entrava al presentia del rege e videva que le rege habeva cambiate expression; ille stava dunque pro retirar se de su presentia.
Alma 18:13 E un del servos del rege le diceva: Rabbanah, que interpretate significa potente o grande rege; perque illes considerava le rege potente; e assi ille le diceva: Rabbanah, le rege desidera que tu remane.
Alma 18:14 ergo Ammon se tornava verso le rege e le diceva: Que vole que io face pro te, oh rege? E le rege non le respondeva per le spatio de un hora secundo lor tempore, perque ille non sapeva que dicer.
Alma 18:15 E adveniva que Ammon le diceva de nove: Que desidera tu de me? Ma le rege non le respondeva.
Alma 18:16 E adveniva que Ammon, essente plen del Spirito de Deo, percipeva dunque le pensamentos del rege. E le diceva: forsan tu ha audite que io defendeva tu servos e tu greges, e occideva con le funda e con le spada septe de lor fratres, e taliava le bracios de altere, pro defender tu greges e tu servos; es dunque isto que causa tu meravilia?
Alma 18:17 Perque te meravilia tanto? io es un homine, e io es tu servo; ergo qualcunque cosa tu desidera, essente juste, io lo facera pro te.
Alma 18:18 Nunc, quando le rege habeva audite iste parolas, ille se meraviliava de nove, perque ille videva que Ammon poteva discerner su pensamentos; ma nonobstante le rege Lamoni aperiva le bucca e le diceva: qui es tu? es tu celle Grande Spirito que cognosce omne cosa?
Alma 18:19 Ammon respondeva e le diceva: No.
Alma 18:20 E le rege diceva: como cognosce tu le pensamentos de mi corde? Tu pote parlar liberemente e dicer me iste cosas; e dicer me tamben per medio de qual poter ha tu occidite e taliate le bracios de mi fratres que dispersava mi greges --
Alma 18:21 e nunc, si tu mi parlara de iste cosas, io te dara qualcunque cosa tu desidera; e si esseva necessari, io te protegerea con mi armeas; ma io sape que tu es plus potente de tote illes; nonobstante io te accordara qualcunque cosa tu desidera de me.
Alma 18:22 Nunc Ammon, con astutia, ma innocentemente, diceva a Lamoni: Ascoltara tu mi parolas, si io te dice per medio de qual poter io faceva iste cosas? Isto es lo que io desidera de te.
Alma 18:23 E le rege le respondeva, e diceva: Si, io credera a tote tu parolas. E assi le rege esseva prendite con le astutia.
Alma 18:24 E Ammon comenciava a parlar con hardimento, dicente: Crede tu que existe un Deo?
Alma 18:25 e le rege respondeva: Io non comprende que significa isto.
Alma 18:26 E alora Ammon diceva: Crede tu que existe un Grande Spirito?
Alma 18:27 e ille diceva: Si.
Alma 18:28 E Ammon diceva: iste Grande Spirito es Deo. E Ammon le diceva de nove: Crede tu que iste Grande Spirito, que es Deo, ha create tote le cosas que es in celo e in terra?
Alma 18:29 e ille diceva: Si, io crede que ille ha create tote le cosas que es in terra; ma io non cognosce le celo.
Alma 18:30 E Ammon le diceva: le celo es le loco ubi habita Deo e tote su sancte angelos.
Alma 18:31 E rege Lamoni diceva: Es le celo supra le terra?
Alma 18:32 E Ammon diceva: Si, e Deo reguarda desde le alte tote le filios del homines; e Ille cognosce tote le pensamentos e le intentiones del corde; perque tote illes esseva create per su mano desde le principio.
Alma 18:33 E rege Lamoni diceva: Io crede a tote iste cosas que tu ha dicite. Es tu mandate per Deo?
Alma 18:34 Ammon le diceva: Io es un homine, e le homine in le principio esseva create a imagine de Deo; e io esseva appellate per su Sancte Spirito a inseniar iste cosas a isto populo, a fin que ille pote cognoscer lo que es juste e ver.
Alma 18:35 E un portion de isto Spirito habita in me, e me da cognoscimento e anque poter, secundo mi fide e mi desiderios que es in Deo.
Alma 18:36 Nunc, post haber Ammon declarate iste parolas, ille comenciava le narration del creation del mundo e anque del creation de Adam, e le diceva omne cosa circa le cadita del homine, e ille illustrava e exponeva ante al rege le registros e le Sacre Scripturas del populo, que habeva essite declarate per le prophetas usque al tempore quando lor patre, Lehi lassava Jerusalem.
Alma 18:37 E Ammon les narrava tamben (perque Ammon parlava al rege e a su servos) tote le viages de lor patres in le deserto, tote lor suffrentias per fame e sete, lor tribulationes, etc.
Alma 18:38 E ille les narrava tamben le rebelliones de Laman e Lemuel e del filios de Ismael, si, Ammon les parlava de tote lor rebelliones; e ille exponeva tote le registros e le Scripturas, desde quando Lehi lassava Jerusalem usque alora.
Alma 18:39 Ma isto non es toto; perque ille les exponeva le plano de redemption, que esseva preparate desde le fundation del mundo; e ille les faceva cognoscer anque le venita de Christo, e ille les faceva cognoscer tote le operas del Senior.
Alma 18:40 E adveniva, post haber Ammon declarate e exponite tote iste cosas al rege, que le rege credeva a tote su parolas.
Alma 18:41 E le rege comenciava a clamar al Senior, dicente: O Senior, ha misericordia; secundo tu grande misericordia que tu habeva per le populo de Nephi. Ha tu misericordia anque pro me e pro mi populo!
Alma 18:42 e nunc, post haber le rege dicite isto, ille cadeva a terra como morto.
Alma 18:43 E adveniva que su servos le prendeva e le portava a su uxor, e illes le cubava supra un lecto; e ille jaceva como morto per le spatio de duo jornos e duo noctes; e su uxor, su filios e su filias le lugeva secundo le uso del Lamanitas, e illes lamentava grandemente su perdita.
Capitulos:
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni