Se̿ng-géng/Mǎ-tuo̿i Hŭ-éng/5

From Wikisource
Jump to navigation Jump to search

[ 12 ]

Di̿ 5 Cióng.

  1. Iǎ-Sú chū-gi̿ng iŏ̤ng cèng cāi nêng, ciū ióng súing: cō-diū làu, hă-sáing dú hā gṳ̀-di̿ lâ̤:
  2. Iǎ-Sú kṳé chṳ̿ háu gṳ̀, uā,
  3. Séng-dǐ kéng-hṳ́ gâ̤ nêng sī iǔ hŭ-ki̿; éng-ṳē tíng gŏ sī gṳ̀ gâ̤ gŏ.
  4. Sióng-séng gâ̤ nêng sī iǔ hŭ-ki̿: éng-ṳē cǒng ŏ̤ kúing gṳ̀ gâ̤ séng.
  5. Uǎ-ki̿ gâ̤ nêng sī iǔ hŭ-ki̿: éng-ṳē gṳ̀ ŏ̤ dă̤-diō̤ si̿-ga̿i ca̿ sú-ngiè.
  6. Cèng siǒng ngī gâ̤ dī su̿-siōng bŭ-gṳě, su̿-siōng chṳ̿-diǎu, iŏ̤ng gâ̤ nêng sī iǔ hŭ-ki̿: éng-ṳē gṳ̀ cǒng ŏ̤ bǎu.
  7. Ta̿i nêng kǒ̤-lǐng, iŏ̤ng gâ̤ nêng sī iǔ hŭ-ki̿: éng-ṳe̿ cǒng ŏ̤ kǒ̤-lǐng gṳ̀.
  8. Séng-dǐ chéng-giĕ gâ̤ nêng sī iǔ hŭ-ki̿: éng-ṳē gṳ̀ ŏ̤ gi̿ng-dă̤ Ciōng-Di̿ diō̤.
  9. Ca̿ uǎ-sĭ gâ̤ nêng sī iǔ hŭ-ki̿: éng-ṳē ŏ̤ hǎng gṳ̀ ca̿ Ciōng-Di̿ gâ̤ gṳ̌ing.
  10. Éng-ṳē ngī gâ̤ dī nă nêng huōi, iŏ̤ng gâ̤ nêng sī iǔ hŭ-ki̿: éng-ṳē tíng gŏ sī gṳ̀ gâ̤ gŏ.
  11. Nêng lâ̤ éng-ṳē uòi diĕ nì, bĭ-là̤ nì, cù-càu gŏ̤ iōng gâ̤ làing dī lūing-uā nì, nì sī iǔ hŭ-ki̿.
  12. Niōng ka̿u-uòi, lŏ̤ dă̤-hǎing: éng-ṳē tíng ciōng siǒng nì gâ̤ dī sī duōi gâ̤: ṳ̆ piāng nì gu̿ sáing gâ̤ síng-dí iǎ sī iŏ̤ng-gă̤-sĭ nă nêng bĭ-là̤. [ 13 ]
  13. Nì sī si̿-gáing gâ̤ îng: îng lâ̤ mǎu mī-dàu tiāu, nī-di̿ gu̿ ŏ̤ gěng nī? hē-mṳě mǎu-sǎ̤, lâ̤ hǎu diú da̿u ngṳē-bíng, nă nêng nŏ̤-tiāu.
  14. sī si̿-gáing gâ̤ guáng. Sêng kṳé da̿u súing ciōng cǒng mài ko̤̿ng-dă̤-diū.
  15. Nêng bo̿ng dáing, iǎ ēng sī ga̿ da̿u mì-dě à, dú sī ga̿ da̿u dáing-dǒ ciōng-bíng-di̿, ciū cia̿u-dă̤ cì chio̤̿ gâ̤ nêng.
  16. Iŏ̤ng-gă̤-sĭ iǎ niōng nà nì gâ̤ guáng cia̿u da̿u nêng mīng-chîng, nă gṳ̀ chū-gi̿ng nì ciáng gâ̤ ǎing-gēng, ciū gṳ́ ě̤ng-iāu nă nì tíng ciōng gâ̤ Dá.
  17. Ēng niōng siǒng uòi lâ̤, sī niōng miè-tiāu lṳ̆-huă iáu síng-dí gâ̤ sṳ́: uòi lâ̤, ēng sī niōng miè-tiāu iŏ̤ng sṳ́, sī niōng iŏ̤ng sṳ́ iǔ gi̿ng-hāu.
  18. Uòi ì-cài iáu nì uā, Tíng dī gu̿ ēng-nǎing sáing hi̿-tiāu, lṳ̆-huă cì dǎng cì uà cǒng mài hi̿-tiāu, dú ŏ̤ gi̿ng-hāu.
  19. Iŏ̤ng gáu-dō nêng gâ̤ dī, lâ̤ iǔ nêng nà cì-iōng děng siǎu gâ̤ do̤̿ng mǎu iàu-gěng tiāu, ǐ iŏ̤ng-gă̤-sĭ háu nêng, da̿u tíng gŏ ǒ̤ hǎng gṳ̀ ca̿ děng siǎu gâ̤: lâ̤ iǔ nêng í-diū iǒ̤ng gáu-dō gâ̤ dī ǐ iŏ̤ng-gă-sĭ háu nêng, da̿u tíng gŏ ŏ̤ hǎng gṳ̀ ca̿ duōi gâ̤.
  20. Uòi iáu nì uā, Nì ngī gâ̤ ǎing-gēng lâ̤ mài iâng-gua̿ nāng-sṳ́ nêng, iáu Huă-lī-so̿ nêng ngī gâ̤ ǎing-gēng, nì cǒng mài nì tíng gŏ.
  21. Nì tia̿ng-nī-gi̿ng iǔ gáu-dō gǔ-sî-hē nêng gâ̤ dī, gō̤-uā, Ēng gǒ̤ng huōi-sǐ nêng: huōi-sǐ nêng gâ̤ mài mǐng-tiāu bāing-cò:
  22. Lâ̤-sī uòi iáu nì uā, lâ̤ iǔ nêng hǒ-lă hiáng-dī, iǎ mài mǐng-tiāu bāing-cò, lâ̤ iǔ nêng mā hiáng-dī, Kiáng gŏ-tê, mài mǐng-tiāu nă nêng so̿ng da̿u gúing-dǒ̤ng, mā hiáng-dī Háng pó, mài mǐng-tiāu dī-ngṳ̀ gâ̤ hǒ.
  23. Gu̿-chu̿ nì da̿u ci̿-dǔing hṳ̿ing mî-dī, séng-di̿ gi̿ kǐ lâ̤ hiáng-dī iáu nì iǔ iǔ-ki̿,
  24. Ciū nà nì gâ̤ mî-dī ga̿ hā dǔing mīng-chîng, sáing ko̤̿ iáu hiáng-dī uǎ-tiāu, hē-mṳě cuo̿i lâ̤ hṳ̿ing nì gâ̤ mî-dī.
  25. Iǔ nêng niōng ga̿u nì, gu̿ da̿u diō̤-di̿ iáu nì câi giǎng, [ 14 ]nì niōng kṳe̿-kṳe̿ iáu gṳ̀ uǎ-tiāu: giáng gṳ̀ nà nì so̿ng gúing, gúing nà nì gáu nă chái-ià, ciū nà nì sū da̿u lâu-di̿.
  26. Uòi ì-cài iáu nì uā, Nì cì ǎu cì lî gu̿ ēng-nǎing hi̿ng chéng-chǔ, cǒng ēng bo̿ng nì chṳ̆ lâ̤.
  27. Nì tia̿ng-nī-gi̿ng iǔ nêng uā-gua̿, Ēng gǒ̤ng tóng-gáing.
  28. Lâ̤-sī uòi iáu nì uā, Iǔ nêng chū-gi̿ng á-niông-nêng, séng-dǐ ciū táng-du̿ iŏ̤ng á-niông-nêng, séng-dǐ ciū so̤̿ng iáu gṳ̀ tóng-gáing làu.
  29. Lâ̤-sī iū-bíng mì-ciú huōi nì iǔ gua̿-ngāi gâ̤ dī, ciū niōng lé chṳ̆ lâ̤, diú tiāu: nì ngù-gúing miè-tiāu cì-iōng gu̿ iǔ ĭ nì, sǎng-dă̤ nà nì tóng séng diú hā dī-ngṳ̀-di̿.
  30. Lâ̤-sī iū-siǔ huōi nì iǔ gua̿-ngāi gâ̤ dī, ciū niōng dǔ à lâ̤, diú tiāu: nì siǔ miè-tiāu cì-ciă gu̿ iǔ ĭ nì, sǎng-dă̤ nà nì tóng séng diú hā dī-ngṳ̀-di̿.
  31. Gu̿ iǔ dī uā, Nêng lâ̤ chṳ̆-tiāu sē-mǎ, niōng siǎ chṳ̆-tiāu sē-mǎ gâ̤ cī nă gṳ̀;
  32. Lâ̤-sī uòi iáu nì uā, Ēng-sī éng-ṳē tóng-gáing gâ̤ dī chṳ̆-tiāu sē-mǎ, ciū-sī huōi gṳ̀ te̿ng nêng, nêng lâ̤ tǎu ŭ ciă chṳ̆-tiāu gâ̤ á-niông-nêng iǎ sī tóng-gáing.
  33. Nì ǐ tia̿ng-nī-gi̿ng iǔ gáu-dō gǔ-sî-hē nêng gâ̤ dī, gō̤-uā, Ciu̿-chṳ̿ ēng gǒ̤ng huǎing-séng, da̿u Ciōng-Di̿ mīng-chîng ciu̿-gua̿-chṳ̿ gâ̤ dī cǒng niōng í.
  34. Lâ̤-sī uòi iáu nì uā, Dú ēng gǒ̤ng ciu̿-chṳ̿, ēng gǒ̤ng nà tíng lâ̤ ciṳ̿-chṳ̿, éng-ṳē tíng sī Ciōng-Di̿ cō gâ̤ ṳ̄.
  35. Iǎ ēng gǒ̤ng nà si̿-gáing lâ̤ ciu̿-chṳ̄, éng-ṳē si̿-gáing sī Ciōng-Di̿ gâ̤ káu-dā; iǎ ēng gǒ̤ng nà Iǎ-lū-să-lǎing lâ̤ ciu̿-chṳ̿, éng-ṳē Iǎ-lū-să-lǎing sī duōi Uǎng-Di̿ gâ̤ géng-sêng.
  36. Iǎ ēng gǒ̤ng nà nì gâ̤ tê lâ̤ ciu̿-chṳ̄, éng-ṳē nì mǎu-nǎing-ge̿ nà nì cì-ǎng tê-mâu bi̿ng ú bi̿ng bā.
  37. Nì uā dī, Sī, ciū uā sī; Ēng sī, ciū uā ēng sī; lâ̤ cuo̿i gá uā ciū-sī giǎng ŭ ciă ŏ̤ gṳ̌-di̿ lâ̤.
  38. Nì tia̤̿ng-nī-gi̿ng iǔ nêng uā-gua̿, Mì-ciú niōng bô mì-ciú, ngâ-chǐ niōng bô ngâ-chǐ.
  39. Lâ̤-sī uòi iáu nì uā, Ēng niōng iáu ŏ̤ nêng ca̿ do̿-tê: [ 15 ]iǔ nêng mà nì iū-bíng mīng-gǎi, lîng cǒ̤-bíng gâ̤ mīng-gǎi iǎ chiá gua̿ lâ̤ hio̿ng nă gṳ̀.
  40. Iǔ nêng siǒng ga̿u nì, nà ko̤̿ nì séng-dǐ gâ̤ í-ciông, lîng séng-ngṳē gâ̤ í-ciông iǎ běng gṳ̀ nà ko̤̿.
  41. Iǔ nêng gáng nì duo̿i gṳ̀ giǎng cì lǐ diō̤, nì ciū duo̿i gṳ̀ giǎng liòng lǐ.
  42. Iǔ mōng nì tǎu gâ̤, ciū nă gṳ̀: iǔ o̿ iáu nì ciŏ̤ gâ̤ ēng gǒ̤ng cǔ gṳ̀:
  43. Nì tia̿ng-nī-gi̿ng iǔ nêng uā-gua̿, Nêng iáu nì gŏ̤-dă̤-diō̤, ciū o̤̿ gṳ̀, nêng iáu nì ca̿ do̿-tê, ciū hāing gṳ̀:
  44. Lâ̤-sī uòi iáu nì uā, Nêng iáu nì ca̿ do̿-tê, ciū niōng o̿ gṳ̀, nêng huōi nì, ciū niōng ta̿i gṳ̀ gǐ-dǎu:
  45. Iŏ̤ng-gă̤-sĭ ciū ŏ̤ ca̿ nì tíng ciōng gâ̤ Dá gâ̤ gṳ̌ing: éng-ṳē gṳ̀ hǎng mì-tê chṳ̆ lâ̤ cia̿u làing gâ̤ nêng iǎ cia̿u hǎu gâ̤ nêng, lò̤ hṳ̄ nă ngī-nêng iǎ nă bŭ-ngī gâ̤ nêng.
  46. Nì lâ̤ o̿ ŭ ciă o̿ nì gâ̤ nêng, iǔ sū-mū dī siǒng nì nī? siú-sṳe̿ gâ̤ nêng iǎ sī iŏ̤ng-gă̤-sĭ ca̿.
  47. Nì guáng-guáng iáu hiáng-dī chiǎng-úing, iǔ sū-mū dī iâng-gua̿ biē-nêng ni? siú-sṳe̿ gâ̤ nêng iǎ sī iŏ̤ng-gă̤-sĭ ca̿.
  48. Gu̿-chu̿ nì niōng sí-huó̤ng hǎu, su̿-siōng nì tíng ciōng gâ̤ Dá sí-huó̤ng hǎu ĭ-búing.


← · Di̿ 4 Cióng · Di̿ 6 Cióng

«Se̿ng-géng» gâ̤ mù-lṳ̀