Se̿ng-géng/Mǎ-tuo̿i Hŭ-éng/4
[ 10 ]
Di̿ 4 Cióng.
- Ŭ-cì-sî Se̿ng-Sěng ciū duo̿i Iǎ-Sú ko̤̿ ko̿ng-iǎ nă mǒ̤-gṳ̌ chi̿ gṳ̀.
- Si̿-sī góng, si̿-sī mâng dú ēng-nǎing iè mî-dī, hē-mṳě ciū bŭ-gṳě.
- Chi̿ gṳ̀ gâ̤ mǒ̤-gṳ̌ giǎng-ce̿ng lâ̤ iáu gṳ̀ uā, Nì lâ̤-sī Ciōng-Di̿ gâ̤ Gṳ̌ing, ciū gáu-dō iŏ̤ng ciō̤ niōng bi̿ng ca̿ biǎng.
- Iǎ-Sú a̿ing uā, Se̿ng-géng gi̿-diū uā, Nêng ēng-ò̤-cǐ sī ka̿u-diū iè gâ̤ mî-dī ŏ̤ sáng, sī ka̿u-diū Ciōng-Di̿ chṳ̿-di̿ cǒng-bǎ uā gâ̤ dī.
- Mǒ̤-gṳ̌ ciū iáu Iǎ-Sú ko̤̿ se̿ng gâ̤ géng-sêng, hǎng gṳ̀ gṳè hā dāing gâ̤ dǎing-dǎing-ciě,
- Iáu gṳ̀ uā, Nì lâ̤-sī Ciōng-Di̿ gâ̤ Gṳ̌ing, ciū diǎu à ko̤̿, éng-ṳē se̿ng-géng gi̿-diū uā, Cṳ̌ ŏ̤ gáu-dō gṳ̀ sǎ̤-chṳ̿ gâ̤ bǎu-hū nì: gṳ̀ ŏ̤ sǎ̤ siǔ tŏ̤-diū nì, sǎng-dă̤ nì gâ̤ káu che̤̿ng hā ciō̤-di̿.
- Iǎ-Sú uā, Se̿ng-géng ǐ gi̿-diū uā, Ēng gǒ̤ng chi̿ Cṳ̌ nì gâ̤ Ciōng-Di̿.
- Mǒ̤-gṳ̌ ǐ iáu Iǎ-Sú iòng děng ǎu gâ̤ súing, nà tíng-à gâ̤ gŏ, iáu iŏ̤ng gŏ gâ̤ ě̤ng-iāu dú háu gṳ̀ chū.
- Iáu gṳ̀ uā, Nì lâ̤ pŭ-diū ba̿i uòi, uòi ciū nà iŏ̤ng lǒng-cǒng gâ̤ mî-dī dú nă nì. [ 11 ]
- Iǎ-Sú uā, Să-dàng gua̿-kṳé ko̤̿, éng-ṳē se̿ng-géng gi̿-diū uā, Niōng ba̿i Cṳ̌ nì gâ̤ Ciōng-Di̿, cǒng-lâ̤ niōng hū-sū gṳ̀.
- Mǒ̤-gṳ̌ ciū piĕ-tiāu Iǎ-Sú, ko̤̿-tia̿u; Cṳ̌ sǎ̤-chṳ̿ gâ̤ lâ̤ hū-sū gṳ̀.
- ¶ Iǎ-Sú tia̿ng-nī-gi̿ng Iŏ̤-hu̿ing sū da̿u lâu-di̿, ciū pī-kṳé ko̤̿ Gá-lī-lī.
- Chṳ̆ Nà-să-là̤, da̿u Gá-bă-nǒng gṳè-diū, iŏ̤ng Gá-bă-nǒng níng-diū huǒi, da̿u Sái-bu̿-lě̤ng, Nà-duōi-lī gă-ga̿i gâ̤ sù-cài.
- Iŏ̤ng-gă̤-sĭ niōng gi̿ng-hāu síng-dí Ì-so̿-ngā tê-chîng uā-gua̿ gâ̤ dī,
- Gō̤-uā, Sái-bu̿-lě̤ng, Nà-duōi-lī gâ̤ dī-huó̤ng, ciū-sī gṳ̄ing huǒi gâ̤ dī-huó̤ng, da̿u Iŏ̤-dàng ŭ-bíng kái, biē-gŏ-nêng gâ̤ Gá-lī-lī,
- Diū da̿u ú-o̤̿ng gâ̤ bă-sia̿ng chū-gi̿ng duōi guáng làu, diū da̿u gā-lā-ú sĭ gâ̤ sù-cài gâ̤ nêng iǎ iǔ guáng chṳ̆ lâ̤ cia̿u gṳ̀.
- Giǎng iŏ̤ng sî-hē kǐ Iǎ-Sú gǒ̤ng-dàu, uā, Tíng gŏ tǎu da̿u, nì niōng gǎi-ŏ̤ cě̤ng-sīng.
- Iǎ-Sú dāi Gá-lī-lī huǒi-bíng-di̿ giǎng, chū-gi̿ng liōng nêng, cì-ciă sī Sái-mô̤ng, ǐ hǎng ca̿ Bǐ-dă̤, iáu gṳ̀ hiáng-dī Úing-dă̤-liĕ, da̿u huǒi-di̿ suŏi mòng; éng-ṳē gṳ̀ sī nà-ngṳ̂ gâ̤ nêng.
- Iǎ-Sú iáu gṳ̀ uā, Lâ̤ gáing uòi; uòi ciū ŏ̤ háu nì dă̤-diō̤ nêng su̿-siōng nà ngṳ̂ ĭ-búing.
- Gṳ̀ liōng nêng dāi-diū ciū diú-tiāu mòng, gáing Iǎ-Sú ko̤̿.
- Giǎng ŭ-di̿ cuo̿i iòng ko̤̿ mī-cie̿ ǐ chū-gi̿ng liōng nêng, ciū-sī Sái-bǐ-tuo̿i gâ̤ gṳ̌ing, Ngǎ-gŏ̤, gìng gṳ̀ hiáng-dī Iŏ̤-hu̿ing, iáu gṳ̀ dá Sái-bǐ-tuo̿i câi da̿u ṳ̌ing-di̿ biǒ̤ mòng, Iǎ-Sú hǎng gṳ̀ lâ̤.
- Gṳ̀ liōng nêng ciū à ṳ̌ing piĕ-tiāu dá, gáing Iǎ-Sú ko̤̿.
- Iǎ-Sú ko̤̿ Gá-lī-lī mǔing-si̿-tī, da̿u gŏ̤ sù-cài gâ̤ lǐ[ 12 ]ba̿i-dǒ̤ng háu nêng, gǒ̤ng tíng gŏ gâ̤ hǎu se̿ng-sĭ, í bă-sia̿ng gŏ̤ iōng gâ̤ bāng.
- Iǎ-Sú gâ̤ miâng-siáng dṳ̌ing da̿u tóng Sṳ̄-lī-ngā dī-huó̤ng: ŭ-di̿ gâ̤ nêng iáu-diū gŏ̤ iōng bāng iáu kǔ-chǔ gâ̤ nêng, nă gṳ̌ mî-diū gâ̤, buǒi kṳ̌-ma̿-hêng, bāng-hóng gâ̤, dú iáu hā Iǎ-Sú mīng-chîng-di̿ lâ̤; Iǎ-Sú ciū ta̿i gṳ̀ í hǎu.
- Iǔ cèng cāi nêng giǎng Gá-lī-lī, Dǐ-gá-bó̤-lī, Iǎ-lū-să-lǎing, Iǔ-tuo̿i, Iŏ̤-dàng ŭ-bíng kái, lâ̤ gáing Iǎ-Sú.