Se̿ng-géng/Mǎ-tuo̿i Hŭ-éng/6
[ 15 ]
Di̿ 6 Cióng.
- Nì niōng siǎu-séng ēng gǒ̤ng hā nêng mīng-chîng ca̿ nì gâ̤ ciáng dī, cì-ge̿ng-ge̿ng nă nêng chū, lâ̤-sī iŏ̤ng-gă̤-sĭ ca̿, nì tíng ciōng gâ̤ Dá ciū mǎu mî-dī siǒng nì.
- Gu̿-chu̿ nì siǎ nă nêng gâ̤ sî-hē, ēng gǒ̤ng chṳé hāu-dông da̿u nì mīng-chîng, su̿-siōng ŭ gǎ-hǎu gâ̤ nêng; gṳ̀ hā lǐ-ba̿i-dǒ̤ng iáu gái-diō̤-di̿ iŏ̤ng-gă̤-sĭ ca̿, o̿ nêng uā gṳ̀ hǎu; Uòi ì-cài iáu nì uā, Siǒng gṳ̀ gâ̤ dī gṳ̀ dă̤-diō̤ làu.
- Nì siǎ nă nêng gâ̤ sî-hē, iū-siǔ ca̿ gâ̤ dī, ēng niōng nă cǒ̤-siǔ dă̤-dí.
- Iŏ̤ng-gă̤-sĭ nì siǎ nă nêng gâ̤ dī ciū ŏ̤ mà̤-să̤: nì Dá chū mà̤-să̤ gâ̤ dī ŏ̤ ba̿u-e̿ng nì. [ 16 ]
- ¶ Nì gǐ-dǎu gâ̤ sî-hē, ēng gǒ̤ng ò̤ ŭ gǎ-hǎu gâ̤ nêng: éng-ṳē gṳ̀ cèng o̿ gṳè hā lǐ-ba̿i-dǒ̤ng, iáu sí-cī gái-tê gǐ-dǎu, cì-ge̿ng-ge̿ng nă nêng chū, Uòi ì-cài iáu nì uā, Siŏng gṳ̀ gâ̤ dī gṳ̀ dă̤-diō̤ làu.
- Nì gǐ-dǎu gâ̤ sî-hē, niōng ko̤̿ bǒng-gáing, mô̤ng gṳ́ing-diū, giǔ nì da̿u mà̤-să̤ sù-cài gâ̤ Dá, nì gâ̤ Dá chū mà̤-să̤ gâ̤ dī, gṳ̀ cǒng ŏ̤ ba̿u-e̿ng nì.
- Nì gǐ-dǎu, ēng gǒ̤ng su̿-siōng biē-gŏ-nêng uā cèng cāi sṳ̿-táu gâ̤ dī, gṳ̀ siǒng dī uā-dă̤ cāi cǒng ŏ̤ tia̿ng-nī gṳ̀.
- Nì ēng gǒ̤ng ò̤ gṳ̀; éng-ṳē gu̿ ēng-nǎing giǔ, nì niōng sǎ̤ gâ̤ mî-dī nì Dá sáing dă̤-dí làu.
- Gu̿-chu̿ nì gǐ-dǎu niōng iŏ̤ng-gă̤-sĭ uā,
Uòi-gŏ̤-nêng gâ̤ Dá da̿u tíng ciōng,
Ngṳ̿ing nì gâ̤ miâng nă nêng có̤ng ca̿ se̿ng, - Ngṳ̿ing nì gâ̤ gŏ ŏ̤ da̿u. Ngṳ̿ing nì gâ̤ séng-i̿ ca̿-chěng da̿u si̿-gáing, su̿-siōng da̿u tíng ciōng ca̿-chěng ĭ-búing.
- Uòi-gŏ̤-nêng nì-nì gâ̤ liông-chǎu géng-diáu nă uòi.
- Mǐng-tiāu uòi-gŏ̤-nêng ki̿ng gâ̤ ca̿i, su̿-siōng uòi iǎ mǐng-tiāu nêng ki̿ng uòi gâ̤ ca̿i ĭ-búing.
- Ēng niōng nă uòi-gŏ̤-nêng pōng-diō̤ chi̿ uòi gâ̤ dī, niōng giù uòi pī-tiāu ŭ ciă ŏ̤ gṳ̌: Éng-ṳē gŏ lò̤, gṳ̌ing-ba̿ng, ě̤ng-iāu, dú sī nì gâ̤, cì-dā̤ da̿u diǎu-diǎu dō-dō. Chěng séng sù ngṳ̄ing.
- Nì lâ̤ niâu nêng gâ̤ gua̿-sĭ, nì tíng ciōng gâ̤ Dá iǎ ŏ̤ niâu nì.
- Nì lâ̤ ēng niâu nêng gâ̤ gua̿-sĭ, nì tíng ciōng gâ̤ Dá iǎ ēng niâu nì gâ̤ gua̿-sĭ.
- ¶ Nì ge̿ng-diū ēng iè gâ̤ sî-hē, ēng gǒ̤ng ò̤ ŭ gǎ-hǎu gâ̤ nêng: gṳ̀ mīng-să̤ cèng ki̿, mīng-gǎi bi̿ng-dă̤ cèng giáng nêng, cì-ge̿ng-ge̿ng o̿ nà gṳ̀ ge̿ng-diū ēng iè hīng nă nêng chū. Uòi ì-cài iáu nì uā, Siǒng gṳ̀ gâ̤ dī gṳ̀ dă̤-diō̤ làu.
- Nì ge̿ng-diū ēng iè gâ̤ sî-hē, ga̿ing niōng sú tê sǎi mīng;
- Iŏ̤ng-gă̤-sĭ sǎng-dă̤ nà nì ge̿ng-diū ēng iè hīng nă [ 17 ]nêng chū, lâ̤ hīng nă nì Dá da̿u mà̤-să̤ gâ̤ sù-cài chū; nì Dá chū mà̤-să̤ gâ̤ dī, cǒng ŏ̤ ba̿u-e̿ng nì.
- ¶ Ēng niōng ko̤̿ng-diū ngê̤ng-cîng da̿u si̿-gáing, si̿-gáing iǔ cṳ̿-tông ŏ̤ cṳ̿, iǎ ŏ̤ sáng-siu̿, ǐ iǔ chā̤ mà-dōng lâ̤ té:
- Lâ̤ niōng ko̤̿ng diū ngê̤ng-cîng da̿u tíng ciōng, tíng ciōng mǎu cṳ̿-tông, iǎ mài sáng-siu̿, ǐ mǎu chā̤ mà-dōng lâ̤ té:
- Éng-ṳē nì ngê̤ng-cîng da̿u nī-di̿, nì gâ̤ séng iǎ ŏ̤ da̿u nī-di̿.
- Séng-di̿ gâ̤ dáing ciū-sī mì-ciú; gu̿-chu̿ nì mì-ciú lâ̤ měng-liōng, tóng séng dú sī guáng.
- Mì-ciú lâ̤ mà-mū, tóng séng dú sī ú-o̤̿ng. Nì séng-dǐ gâ̤ guáng lâ̤ ú-o̤̿ng-tiāu, iŏ̤ng ú-o̤̿ng dú ēng dă̤-dí iǔ gǐ-duói.
- Cì-ciă nêng mǎu-nǎing-ge̿ hū-sū liòng-ciă cṳ̌: mǎu-lō̤ng nǔ iŏ̤ng cì-ciă, o̿ ŭ cì-ciă; mǎu-lō̤ng chū-dōng iŏ̤ng cì-ciă, chū-kiáng ŭ cì ciă. Nì mǎu-nǎing-ge̿ ǐ hū-sū Ciōng-Di̿, ǐ hū-sū ngê̤ng-cîng.
- Gu̿-chu̿ uòi iáu nì uā, Ēng niōng ta̿i sáng-miāng huáng-iě, iè sū-mū dī, chṳĕ sū-mū dī, iǎ ēng niōng ta̿i séng-tǐ huáng-iě, cē̤ng sū-mū-dī. Sáng-miāng cǒng piāng iè-sī ga̿ing iàu-gěng, séng-tǐ cǒng piāng í-ciông ga̿ing iàu-gěng.
- Nì chū bu̿ing-tíng gâ̤ ciā-ciě, iǎ ēng niōng cá̤-ce̤̿ng, iǎ ēng niōng cāi-cǎu, iǎ ēng niōng nà mî-dī ko̤̿ng hā chó̤ng-di̿; nì tíng ciōng gâ̤ Dá dú iǔ-dă̤ nă gṳ̀ iè. Nì cǒng piāng ciā-ciě ga̿ing dì-cîng dă̤ cāi.
- Nì dǐ-bíng sū nêng éng-ṳē huáng-iě iǔ nǎing-ge̿ nà séng-tǐ gá ǎu cì chiŏ̤ kǐ lâ̤?
- Nì ca̿-sū-dī éng-ṳē í-ciông huáng-iě nī? Nì siǒng siǒng hā, súing-di̿ gâ̤ bă-hō̤-huá, gōng-ciōng ŏ̤ duōi kǐ lâ̤, iŏ̤ng huá iǎ ēng niōng lṳ̄, iǎ ēng niōng cĭ-bio̤̿.
- Lâ̤-sī uòi iáu nì uā, Ciū-sī Sǔ-lô̤-mô̤ng iǔ duōi ě̤ng-iāu gâ̤ sî-hē, gṳ̀ có̤ng-sŭ gu̿ mǎu iŏ̤ng huá hǎu chū.
- Iŏ̤ng súing-di̿ gâ̤ chǎu, géng-diáu dō̤-di̿, mêng-diáu ciū diú hā hǒ-di̿, Ciōng Di̿ gu̿ nă gṳ̀ có̤ng-dă̤ ŭ ngǎ-sĭ, nì [ 18 ]iŏ̤ng mài chéng se̿ng gâ̤ nêng, Ciōng-Di̿ ga̿ing ŏ̤ nà í-ciông nă nì cē̤ng.
- Gu̿-chu̿ ēng niōng huáng-iě, gō̤-uā, Iè sū-mū dī? Chṳĕ sū-mū dī? Cē̤ng sū-mū dī?
- Éng-ṳē iŏ̤ng dú sī biē-gŏ-nêng séng-di̿ hio̿ng gâ̤ dī, nì niōng sǎ̤ iŏ̤ng duói mî-dī, nì tíng ciōng gâ̤ Dá dú dă̤-dí làu.
- Nì séng-di̿ niōng sáing hio̿ng Ciōng-Di̿ gâ̤ gŏ, iáu gṳ̀ ngī gâ̤ dī; iŏ̤ng duói mî-dī ciū ŏ̤ lēng-ngṳē tíng nì.
- Gu̿-chu̿ nì ēng niōng ta̿i mêng-diáu huáng-iě: mêng-diáu ŏ̤ ta̿i cù-cī huáng-iě. Cì góng iǔ cì góng gâ̤ kǔ, ciū kāu-lāu.