Pitla Storia bibia/N35

←N34

Pitla Storia bibia Gejù mët Piere per l majer paster

N36→

Gejù mët Piere per l majer paster.

Do la ressurezion ie restà nosc Seniëur Gejù Crist mo caranta dis sun chësc mond. A plu manieres al mustrà ai apostuli, che l ie vif y à rujenà cun ëi dl rëni de Die. Nce ad autri de si sculeies ie cumparì Gejù, n iede nchinamei à plu de cincënt te un iede.

N di fovel set sculeies de Gejù adum dlongia l lech de Genesaret, danter chisc Piere, Giacobe y Giuani. Te n iede stajova menadrë Gejù dlongia ad ëi sun ëur dl lech. Ël rujenova y maiova cun ëi.

Po' à dit Gejù a Scimon Piere: "Scimon, fi de Giona, m'ames tu mé plu che chisc?" Scimon Piere à respundù: "Sci, Seniëur, tu ses, che ie t'ame." Gejù à po' dit: "Verda mi aniei!"

Po' à dit Gejù l segondo iede: "Scimon, fi de Giona, m'amesa tu mé?" Scimon à respundù: "Sci, Seniëur, tu ses , che ie t'ame." Gejù à po' dit: "Verda mi aniei!"

Per l terzo iede à damandà Gejù: "Scimon, fi de Giona, m'amesa tu mé?" Śën à Scimon Piere scumencià a unì gram y desconsulà y à dit: "Seniëur, tu ses dut ; tu ses nce, che ie t'ame." Sun chësta à dit Gejù: "Verda mi biesces!"