Pitla Storia bibia/11

←10

Pitla Storia bibia Abram uel sacrifiché si fi Isach

12→

Abram uel sacrifiché si fi Isach.

Canche Abram fova 100 ani vedl, àl giatà n fi. L i à metù inuem Isach y ti à dat otodì do la zircunzijion.

Canche chësc mut ie deventà majer, à Idie metù Abram a prova. De nuet ti àl dit: "Abram, tue ti fi sëul, che tu es gën, ti mut Isach, y va limpea sul mont de Moria y iló brujel per sacrifize." Da duman abenëura ie levà Abram y à sfendù la lënia per fé chësc sacrifize. La lënia po' ti àl metù a si fi Isach sula sciables. Ël nstës purtova na ola cul fuech y l curtel te la man.

Sun streda dijova po' Isach: "Mi pere!" – Abram à respundù:

"Cie ues, mi fi?" – Isach à po' dit: "Cëla tlo iel fuech y lënia, ma ulà i é pa l tier, che dëssa unì mazà per sacrifize?"

Abram à respundù: "Dl tier per l sacrifize se tol pa bën Chël Bel Die festide."

Nscila jivi deberieda su sul mont. Canche i ie ruei su sul mont, à Abram fat n autere, à metù lënia lessù; śën al lià si fi Isach y l à metù su sëura la lënia via. Po' al pià tl curtel, à stendù ora la man a mazé si fi per sacrifize. Śën sveia te n iede n angiul dal ciel y disc: "Tën ite, Abram, y ne ti fé nia de mel a ti mut! Śën cunësci, che tu tëmes Idie y che tu ne n'ësses nianca sparanià ti unich fi per amor de Die."

Abram à śën auzà i uedli y à udù dlongia n bagot ntravaià cui corni te na siena. Abram à po' tëut ca chësc bagot y l à mazà; po' l al brujà per sacrifize mpo de si mut. Da neuf à śën cherdà l'angiul de Die dal ciel y à dit: "Nscila disc Chël Bel Die: Jache tu es fat chësc y ne n'es sparanià ti unich fi, uei ie te benedì y multipliché ti descendënc sche la stëiles dl ciel. Y te un de ti descendënc sarà benedides duta la nazions dla tiera."

Po' se n ie Abram cun si fi inò dat ëuta a cësa.

"Chël Bel Die à tan amà l mond, che l à dat via si fi."