Jv/Kakawin Arjunawiwāha/Pupuh 13

From Wikisource
Jump to navigation Jump to search
Kakawin Arjunawiwāha by Mpu Kanwa
Pupuh 13

Pupuh 13 – Indrawangśa 100%.png

1.

  • a. amwit narendrâtmaja ring tapowana
  • b. mangañjali ry agraning Indraparwata
  • c. tan wismṛtî sangkanikang hayun ḍatĕng
  • d. swābhawa sang sajjana rakwa mangkana

2.

  • mangkat ḍatĕng tolih arūm wulatnira
  • sīnambaying camara sangka ring gĕgĕr
  • pānawwang ing mrak panangisnikung alas
  • erang tininggal masaput-saput hima

3.

  • lunghânglĕngit lampahirângawetana
  • lāwan sang Erāwana Bajra naryama
  • tan warṇanĕn deśanikang katungkulan
  • āpan lĕyĕp mukṣa sahīnganing mulat

4.

  • bhāwiṣyati meh ḍatĕngêng surālaya
  • grāhādi nakṣatra kabeh paḍâkrama
  • tejomayâpūrwa kaḍatwaning langit
  • pamuktyaning janma sudhīra subrata

5.

  • tārangganâditya śaśangkamaṇḍala
  • ālit katonanya sakêng swamānuṣa
  • āgĕngnikang mangkana deni dohnika
  • kāton sakêng madhyapadânghulap-ulap

6.

  • lintang lĕwih litnya lĕyĕp tininghalan
  • rūhurnya sangkêng śaśiwimba kāraṇa
  • sādohnikâditya sakêngni śāngkara
  • yâdohnikang bhūmi sakêng diwangkara

7.

  • tingkahnikang swarga lawan halĕpnika
  • wātangnikâlālana goṣṭy atūt hawan
  • pājar sang Erāwaṇa ring nṛpâtmaja
  • kādî pangipyan tan i rāt hiḍĕpnira

8.

  • kāton tikang Indrapada prabhāswara
  • wetan sakêng Meru marĕp mangambara
  • kūṭanya malwā gupuranya pat maṇik
  • kerangning āditya śaśangka nityaśa

9.

  • sāmar dinārātrinikang surālaya
  • dening maṇik nityaśa sarwabhāswara
  • anghing sĕkarning kumudâjar ing kulĕm
  • mwang cakrawāka n papasah lawan priya

10.

  • a. tan ngeh ikang kārya wiśeṣa wastunĕn
  • b. tan warṇanĕn lwirnya tinon sang Arjuna
  • c. ḍatang sirâdan makire manambaha
  • d. ginyâkĕn ing caraka kon umañjinga