Jv/Kakawin Arjunawiwāha/Pupuh 14

From Wikisource
Jump to navigation Jump to search
Kakawin Arjunawiwāha by Mpu Kanwa
Pupuh 14

Pupuh 14 - Kāmamāla 100%.png

1.

  • a. kadi harṣaning taru latângĕlih angayam-ayam labuh kapat
  • b. sukhaning sakendran i ḍatang nṛpasuta kadi tambay ing hudan
  • c. nguniweh tikang surawadhū dumadak asĕmi kungnya denira
  • d. kĕtĕr ing patĕr paḍani wṛttanira lagi rinĕngwa-rĕngwakĕn

2.

  • a. ri sĕḍĕngnira-n tama sinanggraha ta sira tĕkapning apsarī
  • b. amapag sakêng pangungangan makapasaji manisnikang mata
  • c. hinuwusnya ring cṛmin ikang liring aluru binangkitan guyu
  • d. asĕgĕh manahnya tamuyan wĕnang asiliha ring samrāgama

3.

  • a. surakanyakā sahana ning kararan atiki tan hanângungang
  • b. kadi tan pamātra turidanya linaca-lacaning kakânghyasi
  • c. awingit-wingit sinuruyan dali-dalihana ringrang ing hati
  • d. agĕlĕm ta yâñalukakĕn sahaja cala tinagwatagwakĕn

4.

  • a. hana tâpi tan wruh i ḍatang nṛpasuta maha manghade-hade
  • b. ndan atĕn tuminghali susunya manguwahi tapihnya tan lukar
  • c. ana lā1ananya ginawenya madana hĕlar ing madhubrata
  • d. anasar tĕkapnya magawe hinamĕr-amĕr alaṇḍĕsan kuku

5.

  • a. mwang ikang pitung siki tikāna kadalurung ulahnya ring giha
  • b. kataman wirang paḍa mapet silib acatu hanâgĕlar nita
  • c. angikĕt sĕkar taji waneh titir anguwahi mogha tan tulus
  • d. apa tan wurung rĕngĕ-rĕngĕn pati rĕngu-rĕngu yan hanângucap

6.

  • a. angĕnĕs waneh mapi turū mapi lara mapupuk wulan-wulan
  • b. anganam wilāsa ri hatinya ta kunang anung endahâraras
  • c. ulahanya lawan ujaranya hĕlĕm i sira sang hañar ḍatang
  • d. aturu matêki wĕkasan kadi-kadi mangipîpi rakwa ya

7.

  • a. mangucap waneh sama-samitra haguñĕpan awarṇa gopita
  • b. lalitâharĕp-harĕpan ahya s atĕhĕr atawĕng-tawĕng cṛmin
  • c. asalin ginoṣṭinika yan kadurugan agawe lihat dudu
  • d. ahirit swaranya karĕngö tinuna-tuna tinungtungan halis

8.

  • a. adawā-n kathākěna raras-raras i hati nikang surāngganā
  • b. sira sang Dhanañjaya ḍatang dumunung i kahanan Surādhipa
  • c. kahaḍang gumopita-ng upāya gawayira lawan Wṛhaspati
  • d. hana dewatā milu tuhun makěḍika ta ya dumpil-dumpilan

9.

  • a. ararěm sang Arjuna sěḍěng praṇata winuwusan Surādhipa
  • b. śiwam astu śāśwata wěkangku śaraṇaning anātha digjaya
  • c. t-asilêng patāraṇa sabhāgya ta kita tika tan kagiṇḍala
  • d. Bapa kāryakāraṇa mata nghulun i kita manungsungêng bhaya

10.

  • a. iki hetuninghulun ahěm pralayabhaya tuwi-n mapadgata
  • b. hana detya śakti si Niwātakawaca subhagêng jagattraya
  • c. kṛtakṛtya tan pějaha de ning asura-ṛṣi-dewa-dānawa
  • d. kunang antakanya laki mānuṣa juga pawěkas hyang Īśwara

11.

  • a. karĕngö pwa wṛtta mami miñjĕm i kita tumulus pakāśraya
  • b. angutus ta yâsura wiśeṣa pĕjahana kitêng tapowana
  • c. ya tikā warāha tĕmahanya pinarĕnganira hyang Īśwara
  • d. makaliśya tang maburu ngūni sĕḍangira manugrahêng kita

12.

  • a. nda huwus katon kṛtawaranta tĕkapika pakāśrayan mami
  • b. tumihang ta rakwa ya śumīrṇa sahana-hana ring kadewatan
  • c. alawas harĕp rumuruha-ng surapada madalĕm galaknika
  • d. kita têki rakṣaka hanakku pakayaśani sanghulun kabeh

13.

  • a. na wuwus hyang Indra sumahur nṛpatanaya huwus kṛtāñjali
  • b. apa yan tahan kari tĕkapning angutusa saling Surādhipa
  • c. inanugrahan ngaran iki-n winadal i liḍah ing huwus wibhuh
  • d. ring apan paniṣphala-ng acāmana rarab i lĕbūni jĕng prabhu

14.

  • a. aparan tikāng ulaha yan makaputusanikang alapkĕna
  • b. warahĕn patik Surapati ndya ta wĕkas ing upāyasādhana
  • c. taña sang nṛpātmaja pagĕhni manahira kumon Surādhipa
  • d. bhagawān Wṛhaspati marah sira ri putusikang alapkĕna

15.

  • a. laki kumwa pĕh ri hati sang Wiwudhapati lawan watĕk ṛṣi
  • b. alĕmĕh tĕkāna niyata-ng surapada ya wiśīrṇa kambaha
  • c. anĕkāna kapwa kita śatru parĕpĕkana tan tahĕn hati
  • d. warawīrya śaktining bapangku juga laki hiner pakaśrayan

16.

  • a. mwang ikang Niwātakawacâtiśaya nipuṇa śakti nītiman
  • b. śatajarjarīkṛta ta rakwa ya ta juga hurip mawah sukha
  • c. ri luputnikang paramaśakti hana ta ya wĕkasnikang warah
  • d. kahananya têki winikāna wiphala-ng alagânghawag-awag

17.

  • a. hana tāpsarī pinalakunya malawas i Surendra tan kaweh
  • b. kinirim waneh juga ya lāgi salahasa titir harĕp-harĕp
  • c. rinasan katuhwan atiki-n tan ika wĕnanga marwanî Ratih
  • d. ya tikā mangunggahana jātyanika gĕrĕmĕ tan panangśaya

18.

  • a. palarĕn ta yâjara hĕlĕm sigi-siginĕn ikāng anugraha
  • b. makahīngana-ng kagamĕlâtiki sang inarananta Suprabhā
  • c. usĕnâta yâwaraha yan pawarahang asurādhipêriya
  • d. atĕhĕr ta yângirasa lampah i kita t-adulur harânaku

19.

  • a. anu bhāra dona ni bapangku wulatana sabhā nikang musuh
  • b. kaya-durga ning kuṭa lawan pagĕlarana dĕlāha kawruhi
  • c. t-akalambi kambala t-apāduka t-acĕlĕk adṛśyasādhana.
  • d. kami parcayânaku kapāna kita bapa kasambya denika

20.

  • a. ndan ararya-raryana matânaku labuhana de Sureśwara
  • b. ana ta-n pananggraha kamîng atithi juga bapangku tasyasih
  • c. palarĕn watĕk ṛṣi kabeh malĕsa kita ring ambĕk uttama
  • d. pangutus Wṛhaspati sinambahakĕn ika sang arya Phālguna