Jv/Kakawin Arjunawiwāha/Pupuh 12

From Wikisource
Jump to navigation Jump to search
Kakawin Arjunawiwāha by Mpu Kanwa
Pupuh 12

Pupuh 12 – Nardataka 100%.png

1.

  • a. stutinira tan tulus sinahuran paramārtha śiwa
  • b. anaku huwus katon abhimatān katĕmunta kabeh
  • c. hana panganugrahangkwa caduśakti winimba śara
  • d. paśupati śastrakāstu pangaranya nihan wulati

2.

  • a. wuwusira sang hyang īśwara mijil tang apuy ri tangan
  • b. wawang aśarīra kātara mangiṇḍitakĕn warayang
  • c. tinarima sang Dhanañjaya tikāng śara sūkṣma tikā
  • d. ng anala śarīra sātmaka lawan warayang wĕkasan

3

  • a. kṛtawara sang Dhanañjaya manambah atipraṇata
  • b. pinisalinan laras makuṭa tan hana kālah-alah
  • c. winara-warah sirêng aji dhanurdharaśāstra kabeh
  • d. kṛtasamaya ng prayoga dadi sūkṣma bhaṭāra śiwa

4

  • a. saha surasiddhacāraṇa parĕng kṣana śūṇya muwah
  • b. rasa tan i rāt hiḍĕp nṛpatiputra katonanira
  • c. kadi masalin śarīra suka tanpa balik prihati
  • d. satiru-tirun kṛtārtha sira deni kadhīranira

5

  • a. hana mara janma tanpa pihutang brats yoga tapa
  • b. angĕdul aminta wīryya sukaning widhi sāhasikā
  • c. binalikakĕn purihnika lĕwih tinĕmunya lara
  • d. sinakitaning rajah tamah inaṇḍĕhaning prihatin

6

  • a. kadi hana pūrwwa karmma dinalih sang akaryya hayu
  • b. ulah apegĕh magĕgwana rasāgama buddhi tĕpĕt
  • c. ya juga sudhīra munggu ri manahnira sang nipuṇa
  • d. karaṇanikāng sukābhyudaya niṣkala yan katĕmu

7

  • a. syapa kari tan tĕmu ng hayu masādhana sarwwa hayu
  • b. niyata katĕmwaning hala masādhana sarwwa hala
  • c. tĕwas alisuh manangśaya purākṛta tāpa tinūt
  • d. sakaharĕpĕn kasiddha makadarśana Paṇḍusuta

8

  • a. atha ri huwusnirān tĕmu kinaryyanikāng hṛdaya
  • b. suka rumaras-raras hatinirān pakirê muliha
  • c. gumuṇita harṣacitta sang anungsunga yan ḍatĕnga
  • d. angawaśa mānuṣatwanira rāga lulut sumaput

9

  • a. ri sĕḍĕngirān samangkana hanāpsara wāhu ḍatĕng
  • b. ahalĕp alihsikīnutus umiñjĕma supraṇata
  • c. amawa kalambi kambala mapāduka ratnamaya
  • d. tulus acĕlĕk surādhipa pasungnya ginangsalira

10

  • a. tulis i bapanta māsku ḍatĕngāmuharā sih agöng
  • b. ri kita tulung pwa tāku katĕkan bhaya niśśaraṇa
  • c. pĕjahanikāng Niwātakawacāsura karyya mami
  • d. ubhayahitātĕhĕr pamapasanta warāstra śara

11

  • a. rasani tulis hyang Indra panganugraha yogya dahat
  • b. ndan asuma sang hinundang awĕlas ri kakārinira
  • c. lararing inaryyakĕn paḍani kūngning aninggalakĕn
  • d. karananirān hĕnĕng rudita śoka sumöng ri mata

12

  • a. muwah awuwus tikā sang inutus bapa kāsihana
  • b. anĕlanga śakti kīrtinira sang suranātha laki
  • c. pahayun ikang surālaya layanya magöng biṣama
  • d. kadi saphalanta tāśrayanikān saphalān tulungĕn

13

  • a. ya marika hetuning kapihĕnĕng kṣama tan wihanga
  • b. laraning inambwakĕn kadi mawīrya lawan maguṇa
  • c. maka dadahā ng hurip tuwi yayā tika kêrang irang
  • d. guṇani kadewatānira jugākṛta kṛtya hĕlĕm


14

  • a. papa mangalap kasor pangucaping paḍa wāgmimaya
  • b. krama mangadĕg ta sang nṛpatiputra sĕḍĕng tumihang
  • c. tĕlas akalambi kambala mapāduka sādhananing
  • d. gaganacarāngiring ta sirs sang rwa mawāstranira