Jv/Alkitab/Kaimaman/13

^13:1 ꦒꦸꦱ꧀ꦠꦶꦄꦭ꧀ꦭꦃꦩꦫꦶꦁꦔꦏꦺꦥꦽꦤꦠꦤ꧀ꦩꦫꦁ​꧊ꦩꦸꦱꦭꦤ꧀ꦲꦫꦸꦤ꧀ꦩꦼꦁꦏꦺꦤꦺ:

^13:2 ꦪꦺꦤ꧀ꦲꦤꦮꦺꦴꦁꦱꦶꦁꦏꦸꦭꦶꦠ꧀ꦠꦺꦩ꧀ꦭꦼꦤ꧀ꦛꦸꦁ꧈​ꦧꦺꦴꦫꦺꦴꦏ꧀ꦏꦼꦤ꧀꧈​ꦲꦸꦠꦮꦩꦼꦠꦸꦧ꧀ꦭꦼꦤ꧀ꦠꦺꦴꦁꦧ꧀ꦭꦼꦤ꧀ꦠꦺꦴꦁꦔꦺꦥꦸꦠꦶꦃ꧈​ꦧꦶꦱꦲꦸꦒꦢꦢꦶꦮꦶꦤꦶꦃꦲꦺꦊꦭꦫꦏꦸꦱ꧀ꦠ꧉​ꦮꦺꦴꦁꦩꦲꦸꦏꦸꦢꦸꦢꦶꦱꦺꦴꦮꦤ꧀ꦤꦏꦺꦲꦶꦩꦩ꧀꧈​ꦲꦤꦏ꧀ꦠꦸꦫꦸꦤꦺꦲꦫꦸꦤ꧀꧈​

^13:3 ꦱꦸꦥꦪꦏꦸꦭꦶꦠ꧀ꦠꦺꦱꦶꦁꦭꦫꦩꦲꦸꦢꦶꦥꦿꦶꦏ꧀ꦱ꧉​ꦪꦺꦤ꧀ꦮꦸꦭꦸꦲꦶꦁꦏꦸꦭꦶꦠ꧀ꦠꦺꦱꦶꦁꦭꦫꦩꦲꦸꦩꦭꦶꦃꦢꦢꦶꦥꦸꦠꦶꦃ꧈​ꦭꦤ꧀ꦏꦸꦭꦶꦠ꧀ꦏꦠꦺꦴꦤꦺꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦏꦸꦮꦶꦠꦤ꧀ꦝꦪꦺꦤ꧀ꦮꦺꦴꦁꦩꦲꦸꦭꦫꦏꦸꦱ꧀ꦠ꧉​ꦲꦶꦩꦩ꧀ꦧꦚ꧀ꦗꦸꦂꦤꦼꦠꦼꦥ꧀ꦥꦏꦺꦪꦺꦤ꧀ꦮꦺꦴꦁꦏꦸꦮꦶꦤꦗꦶꦱ꧀꧉​

^13:4 ꦤꦁꦔꦶꦁꦪꦺꦤ꧀ꦥꦺꦫꦁꦔꦤ꧀ꦤꦺꦏꦸꦭꦶꦠ꧀ꦱꦶꦁꦥꦸꦠꦶꦃꦩꦲꦸꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺꦭꦤ꧀ꦮꦸꦭꦸꦤꦺꦲꦺꦴꦫꦩꦭꦶꦃꦢꦢꦶꦥꦸꦠꦶꦃ꧈​ꦮꦺꦴꦁꦩꦲꦸꦏꦸꦢꦸꦢꦶꦥꦶꦱꦃꦭꦮꦱ꧀ꦱꦺꦥꦶꦠꦸꦁꦢꦶꦤ꧉​

^13:5 ꦱꦮꦶꦱ꧀ꦱꦺꦥꦶꦠꦸꦁꦢꦶꦤꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦮꦺꦴꦁꦩꦲꦸꦩꦼꦤꦺꦃ꧉​ꦪꦺꦤ꧀ꦩꦶꦠꦸꦫꦸꦠ꧀ꦥꦤꦼꦩꦸꦤꦺꦏꦸꦭꦶꦠ꧀ꦱꦶꦁꦭꦫꦩꦲꦸꦫꦸꦥꦤꦺꦲꦗꦼꦒ꧀ꦮꦲꦺ꧈​ꦢꦢꦶꦲꦺꦴꦫꦩꦿꦺꦩꦺꦤ꧀꧈​ꦮꦺꦴꦁꦏꦸꦮꦶꦏꦸꦢꦸꦢꦶꦥꦶꦱꦃꦥꦶꦠꦸꦁꦢꦶꦤꦩꦼꦤꦺꦃ꧉​

^13:6 ꦱꦮꦶꦱ꧀ꦱꦺꦥꦶꦠꦸꦁꦢꦶꦤ꧈​ꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦮꦺꦴꦁꦩꦲꦸꦩꦼꦤꦺꦃ꧉​ꦢꦺꦤꦺꦪꦺꦤ꧀ꦭꦫꦤꦺꦱꦸꦢ꧈​ꦭꦤ꧀ꦲꦺꦴꦫꦩꦿꦺꦩꦺꦤ꧀꧈​ꦮꦺꦴꦁꦔꦺꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀ꦢꦺꦤꦶꦁꦲꦶꦩꦩ꧀꧈​ꦠꦼꦒꦼꦱ꧀ꦱꦺꦭꦫꦏꦸꦭꦶꦠ꧀ꦩꦲꦸꦲꦺꦴꦫꦩ꧀ꦧꦼꦧꦪꦤꦶ꧉​ꦮꦺꦴꦁꦩꦲꦸꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺꦭꦤ꧀ꦢꦶꦲꦁꦒꦼꦥ꧀ꦉꦱꦶꦏ꧀꧉​

^13:7 ꦤꦁꦔꦶꦁꦪꦺꦤ꧀ꦱꦮꦶꦱ꧀ꦱꦺꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀ꦢꦺꦤꦶꦁꦲꦶꦩꦩ꧀꧈​ꦭꦫꦤꦺꦏꦸꦭꦶꦠ꧀ꦩꦲꦸꦩ꧀ꦧꦧꦿꦃ꧈​ꦮꦺꦴꦁꦔꦺꦏꦸꦢꦸꦩꦿꦶꦏ꧀ꦱꦏ꧀ꦏꦏꦺꦩꦼꦤꦺꦃꦩꦫꦁꦲꦶꦩꦩ꧀꧉​

^13:8 ꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦩꦼꦤꦺꦃ꧈​ꦭꦤ꧀ꦪꦺꦤ꧀ꦭꦫꦤꦺꦩ꧀ꦧꦧꦿꦃꦠꦼꦩꦼꦤ꧀ꦤꦤ꧀꧈​ꦮꦺꦴꦁꦔꦺꦏꦸꦢꦸꦢꦶꦠꦼꦠꦼꦥ꧀ꦥꦏꦺꦤꦗꦶꦱ꧀꧈​ꦭꦤ꧀ꦕꦼꦛꦪꦺꦤ꧀ꦭꦫꦏꦸꦱ꧀ꦠ꧉​

^13:9 ꦮꦺꦴꦁꦱꦶꦁꦤꦤ꧀ꦝꦁꦭꦫꦏꦸꦱ꧀ꦠ꧈​ꦏꦸꦢꦸꦢꦶꦱꦺꦴꦮꦤ꧀ꦤꦏꦺꦲꦶꦩꦩ꧀꧉​

^13:10 ꦲꦶꦩꦩ꧀ꦧꦚ꧀ꦗꦸꦂꦩꦿꦶꦏ꧀ꦱ꧉​ꦪꦺꦤ꧀ꦏꦸꦭꦶꦠ꧀ꦱꦶꦁꦭꦫꦩꦲꦸꦩꦭꦶꦃꦥꦸꦠꦶꦃ꧈​ꦭꦤ꧀ꦮꦸꦭꦸꦤꦺꦲꦸꦒꦢꦢꦶꦥꦸꦠꦶꦃꦱꦂꦠꦩꦼꦠꦸꦏꦺꦴꦫꦺꦁꦔꦺ꧈​

^13:11 ꦏꦸꦮꦶꦤꦺꦭꦏ꧀ꦏꦏꦺꦪꦺꦤ꧀ꦮꦺꦴꦁꦔꦺꦭꦫꦏꦸꦭꦶꦠ꧀꧉​ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦩꦲꦸꦤꦗꦶꦱ꧀꧉​ꦮꦺꦴꦁꦔꦺꦲꦺꦴꦫꦥꦽꦭꦸꦢꦶꦥꦶꦱꦃꦲꦏꦺ꧌ꦢꦶꦏꦸꦫꦸꦁ꧍꧈​ꦲꦮꦶꦠ꧀ꦮꦶꦱ꧀ꦕꦼꦛꦪꦺꦤ꧀ꦤꦗꦶꦱ꧀꧉​

^13:12 ꦪꦺꦤ꧀ꦏꦸꦭꦶꦠ꧀ꦱꦶꦁꦏꦠꦺꦴꦤ꧀ꦥꦸꦠꦶꦃꦩꦲꦸꦩ꧀ꦧꦧꦿꦃꦱꦲꦮꦏ꧀ꦱꦼꦏꦺꦴꦗꦸꦂ꧈​

^13:13 ꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦮꦺꦴꦁꦩꦲꦸꦩꦼꦤꦺꦃ꧉​ꦪꦺꦤ꧀ꦭꦫꦤꦺꦩꦲꦸꦮꦶꦱ꧀ꦩꦿꦺꦩꦺꦤ꧀ꦔꦼꦧꦼꦏ꧀ꦏꦶꦲꦮꦏ꧀ꦱꦼꦏꦺꦴꦗꦸꦂꦭꦤ꧀ꦏꦸꦭꦶꦠ꧀ꦠꦺꦮꦶꦱ꧀ꦫꦠꦥꦸꦠꦶꦃꦏꦧꦺꦃ꧈​ꦮꦺꦴꦁꦔꦺꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀꧉​

^13:14 (13:14-15)ꦤꦁꦔꦶꦁꦪꦺꦤ꧀ꦩꦼꦠꦸꦏꦺꦴꦫꦺꦁꦔꦺ꧈​ꦲꦶꦩꦩ꧀ꦧꦚ꧀ꦗꦸꦂꦏꦸꦢꦸꦩꦿꦶꦏ꧀ꦱꦩꦼꦤꦺꦃ꧉​ꦭꦤ꧀ꦪꦺꦤ꧀ꦥꦚ꧀ꦕꦺꦤ꧀ꦏꦺꦴꦫꦺꦁ꧈​ꦮꦺꦴꦁꦔꦺꦏꦸꦢꦸꦢꦶꦠꦼꦠꦼꦥ꧀ꦥꦏꦺꦤꦗꦶꦱ꧀꧈​ꦩꦼꦂꦒꦏꦺꦴꦫꦺꦁꦏꦸꦮꦶꦤꦺꦭꦏ꧀ꦏꦏꦺꦪꦺꦤ꧀ꦮꦺꦴꦁꦔꦺꦭꦫꦏꦸꦱ꧀ꦠ꧉​

^13:15 (13:14)

^13:16 ꦤꦁꦔꦶꦁꦪꦺꦤ꧀ꦏꦺꦴꦫꦺꦁꦔꦺꦩꦫꦶ꧈​ꦭꦤ꧀ꦢꦢꦶꦥꦸꦠꦶꦃꦩꦼꦤꦺꦃ꧈​ꦮꦺꦴꦁꦔꦺꦏꦸꦢꦸꦔꦝꦼꦥ꧀ꦩꦫꦁꦲꦶꦩꦩ꧀ꦩꦼꦤꦺꦃ꧈​

^13:17 ꦱꦸꦥꦪꦢꦶꦥꦿꦶꦏ꧀ꦱ꧉​ꦪꦺꦤ꧀ꦠꦼꦠꦺꦭꦏꦺꦴꦫꦺꦁꦔꦺꦮꦶꦱ꧀ꦢꦢꦶꦥꦸꦠꦶꦃ꧈​ꦲꦶꦩꦩ꧀ꦧꦚ꧀ꦗꦸꦂꦤꦼꦠꦼꦥ꧀ꦥꦏꦺꦮꦺꦴꦁꦔꦺꦩꦲꦸꦉꦱꦶꦏ꧀꧉​

^13:18 ꦪꦺꦤ꧀ꦲꦤꦮꦺꦴꦁꦮꦸꦢꦸꦤꦼꦤ꧀꧈​ꦮꦶꦱ꧀ꦩꦫꦶ꧈​

^13:19 ꦤꦁꦔꦶꦁꦠꦶꦭꦱ꧀ꦱꦺꦮꦸꦢꦸꦤ꧀ꦩꦲꦸꦲꦧꦸꦃ꧈​ꦭꦤ꧀ꦫꦸꦥꦤꦺꦥꦸꦠꦶꦃ꧈​ꦲꦸꦠꦮꦥꦸꦠꦶꦃꦱꦼꦩꦸꦲꦧꦁ꧈​ꦮꦺꦴꦁꦩꦲꦸꦏꦸꦢꦸꦲꦺꦁꦒꦭ꧀ꦲꦺꦁꦒꦭ꧀ꦱꦺꦴꦮꦤ꧀ꦲꦶꦩꦩ꧀꧈​

^13:20 ꦱꦸꦥꦪꦢꦶꦥꦿꦶꦏ꧀ꦱ꧉​ꦪꦺꦤ꧀ꦏꦸꦭꦶꦠ꧀ꦱꦶꦁꦭꦫꦩꦲꦸꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦱꦏꦶꦮꦠꦼꦔꦼꦤ꧀ꦤꦺ꧈​ꦱꦂꦠꦮꦸꦭꦸꦱꦶꦁꦲꦤꦲꦶꦁꦏꦺꦴꦤꦺꦴꦩꦭꦶꦃꦢꦢꦶꦥꦸꦠꦶꦃ꧈​ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦩꦲꦸꦤꦗꦶꦱ꧀꧉​ꦮꦸꦢꦸꦤ꧀ꦏꦸꦮꦶꦠꦤ꧀ꦝꦤꦺꦪꦺꦤ꧀ꦮꦺꦴꦁꦩꦲꦸꦭꦫꦏꦸꦱ꧀ꦠ꧉​

^13:21 ꦤꦁꦔꦶꦁꦪꦺꦤ꧀ꦩꦤꦸꦠ꧀ꦥꦼꦥꦿꦶꦏ꧀ꦱꦤ꧀꧈​ꦮꦸꦭꦸꦱꦶꦁꦲꦤꦲꦶꦁꦏꦺꦴꦤꦺꦴꦲꦺꦴꦫꦩꦭꦶꦃꦥꦸꦠꦶꦃ꧈​ꦭꦤ꧀ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦤꦁꦔꦶꦁꦏꦠꦺꦴꦤ꧀ꦭꦸꦮꦶꦃꦥꦸꦠꦶꦃ꧈​ꦮꦺꦴꦁꦩꦲꦸꦏꦸꦢꦸꦢꦶꦥꦶꦱꦃꦲꦏꦺꦭꦮꦱ꧀ꦱꦺꦥꦶꦠꦸꦁꦢꦶꦤ꧉​

^13:22 ꦪꦺꦤ꧀ꦩꦭꦤꦺꦩꦿꦺꦩꦺꦤ꧀꧈​ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦩꦲꦸꦤꦗꦶꦱ꧀꧈​ꦩꦼꦂꦒꦭꦫꦏꦸꦱ꧀ꦠ꧉​

^13:23 ꦤꦁꦔꦶꦁꦪꦺꦤ꧀ꦠꦶꦭꦱ꧀ꦱꦺꦮꦸꦢꦸꦤ꧀ꦩꦲꦸꦲꦺꦴꦫꦩꦿꦺꦩꦺꦤ꧀꧈​ꦮꦺꦴꦁꦏꦸꦮꦶꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀꧉​

^13:24 ꦪꦺꦤ꧀ꦮꦺꦴꦁꦏꦸꦭꦶꦠ꧀ꦠꦺꦏꦺꦴꦧꦺꦴꦁ꧈​ꦭꦤ꧀ꦠꦠꦸꦤꦺꦏꦸꦭꦶꦠ꧀ꦩꦲꦸꦏꦠꦺꦴꦤ꧀ꦥꦸꦠꦶꦃꦲꦸꦠꦮꦥꦸꦠꦶꦃꦱꦼꦩꦸꦲꦧꦁ꧈​

^13:25 ꦮꦺꦴꦁꦔꦺꦏꦸꦢꦸꦢꦶꦥꦿꦶꦏ꧀ꦱꦢꦺꦤꦶꦁꦲꦶꦩꦩ꧀꧉​ꦪꦺꦤ꧀ꦮꦸꦭꦸꦲꦶꦁꦠꦠꦸꦩꦲꦸꦢꦢꦶꦥꦸꦠꦶꦃ꧈​ꦭꦤ꧀ꦠꦠꦸꦤꦺꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦏꦸꦮꦶꦠꦤ꧀ꦝꦪꦺꦤ꧀ꦠꦠꦸꦱꦶꦁꦩꦼꦂꦒꦱꦏꦏꦺꦴꦧꦺꦴꦁꦩꦲꦸꦱꦲꦶꦏꦶꦢꦢꦶꦊꦭꦫꦏꦸꦱ꧀ꦠ꧉​ꦩꦸꦭꦤꦺꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦏꦸꦮꦶꦤꦗꦶꦱ꧀꧉​

^13:26 ꦤꦁꦔꦶꦁꦪꦺꦤ꧀ꦮꦸꦭꦸꦲꦶꦁꦠꦠꦸꦩꦲꦸꦩꦭꦶꦃꦢꦢꦶꦥꦸꦠꦶꦃ꧈​ꦭꦤ꧀ꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦮꦺꦴꦁꦩꦲꦸꦏꦸꦢꦸꦢꦶꦥꦶꦱꦃꦲꦏꦺꦭꦮꦱ꧀ꦱꦺꦥꦶꦠꦸꦁꦢꦶꦤ꧉​

^13:27 ꦊꦠ꧀ꦥꦶꦠꦸꦁꦢꦶꦤꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦮꦺꦴꦁꦩꦲꦸꦩꦼꦤꦺꦃ꧈​ꦭꦤ꧀ꦪꦺꦤ꧀ꦭꦫꦤꦺꦥꦚ꧀ꦕꦺꦤ꧀ꦩꦿꦺꦩꦺꦤ꧀ꦠꦼꦩꦼꦤ꧀ꦤꦤ꧀꧈​ꦏꦸꦮꦶꦠꦤ꧀ꦝꦪꦺꦤ꧀ꦮꦺꦴꦁꦩꦲꦸꦭꦫꦏꦸꦱ꧀ꦠ꧉​ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦩꦲꦸꦤꦗꦶꦱ꧀꧉​

^13:28 ꦤꦁꦔꦶꦁꦪꦺꦤ꧀ꦲꦗꦼꦒ꧀ꦮꦲꦺꦭꦤ꧀ꦲꦺꦴꦫꦩꦿꦺꦩꦺꦤ꧀꧈​ꦭꦤ꧀ꦩꦸꦁꦧꦼꦭꦁ꧈​ꦠꦤ꧀ꦝꦪꦺꦤ꧀ꦢꦸꦢꦸꦭꦫꦏꦸꦱ꧀ꦠ꧉​ꦲꦶꦩꦩ꧀ꦧꦚ꧀ꦗꦸꦂꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦩꦲꦸꦉꦱꦶꦏ꧀꧈​ꦲꦮꦶꦠ꧀ꦩꦭꦤꦺꦩꦲꦸꦩꦸꦁꦠꦠꦸꦩꦼꦂꦒꦒꦺꦴꦱꦺꦴꦁ꧉​

^13:29 ꦪꦺꦤ꧀ꦲꦤꦮꦺꦴꦁꦭꦤꦁꦲꦸꦠꦮꦮꦢꦺꦴꦤ꧀ꦭꦫꦏꦸꦭꦶꦠ꧀ꦲꦶꦁꦱꦶꦫꦃꦲꦸꦠꦮꦒꦸꦭꦸ꧈​

^13:30 ꦮꦺꦴꦁꦔꦺꦏꦸꦢꦸꦢꦶꦥꦿꦶꦏ꧀ꦱꦏ꧀ꦏꦏꦺꦲꦶꦩꦩ꧀꧉​ꦪꦺꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦭꦫꦩꦲꦸꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦭꦤ꧀ꦫꦩ꧀ꦧꦸꦠ꧀ꦱꦶꦁꦲꦤꦲꦶꦁꦏꦺꦴꦤꦺꦴꦩꦭꦶꦃꦢꦢꦶꦏꦸꦤꦶꦁꦱꦂꦠꦫꦺꦴꦤ꧀ꦠꦺꦴꦒ꧀꧈​ꦏꦸꦮꦶꦠꦤ꧀ꦝꦪꦺꦤ꧀ꦮꦺꦴꦁꦔꦺꦭꦫꦏꦸꦱ꧀ꦠ꧉​ꦮꦺꦴꦁꦔꦺꦩꦲꦸꦏꦸꦢꦸꦢꦶꦠꦼꦠꦼꦥ꧀ꦥꦏꦺꦤꦗꦶꦱ꧀꧉​

^13:31 ꦪꦺꦤ꧀ꦩꦶꦠꦸꦫꦸꦠ꧀ꦥꦼꦥꦿꦶꦏ꧀ꦱꦤꦺꦲꦶꦩꦩ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦭꦫꦩꦲꦸꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦶꦮꦠꦼꦔꦼꦤ꧀ꦤꦺ꧈​ꦤꦁꦔꦶꦁꦫꦩ꧀ꦧꦸꦠ꧀ꦠꦺꦲꦺꦴꦫꦱꦸꦧꦸꦂ꧈​ꦮꦺꦴꦁꦔꦺꦏꦸꦢꦸꦢꦶꦥꦶꦱꦃꦲꦏꦺꦥꦶꦠꦸꦁꦢꦶꦤ꧉​

^13:32 ꦱꦮꦶꦱ꧀ꦱꦺꦥꦶꦠꦸꦁꦢꦶꦤꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦥꦁꦒꦺꦴꦤ꧀ꦤꦤ꧀ꦱꦶꦁꦭꦫꦩꦲꦸꦩꦼꦤꦺꦃ꧉​ꦪꦺꦤ꧀ꦭꦫꦤꦺꦲꦺꦴꦫꦩꦿꦺꦩꦺꦤ꧀ꦭꦤ꧀ꦫꦩ꧀ꦧꦸꦠ꧀ꦠꦺꦲꦺꦴꦫꦩꦭꦶꦃꦱꦼꦩꦸꦏꦸꦤꦶꦁ꧈​ꦲꦥꦩꦼꦤꦺꦃꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​

^13:33 ꦮꦺꦴꦁꦩꦲꦸꦏꦸꦢꦸꦢꦶꦕꦸꦏꦸꦂꦫꦩ꧀ꦧꦸꦠ꧀ꦠꦺꦱꦶꦁꦲꦤꦲꦶꦁꦏꦶꦮꦠꦼꦔꦼꦤ꧀ꦤꦺꦥꦁꦒꦺꦴꦤ꧀ꦤꦤ꧀ꦱꦶꦁꦭꦫꦩꦲꦸ꧈​ꦭꦤ꧀ꦏꦸꦢꦸꦢꦶꦥꦶꦱꦃꦲꦏꦺꦩꦼꦤꦺꦃꦥꦶꦠꦸꦁꦢꦶꦤ꧉​

^13:34 ꦲꦶꦁꦢꦶꦤꦏꦥꦶꦠꦸꦤꦺ꧈​ꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦩꦼꦤꦺꦃ꧉​ꦪꦺꦤ꧀ꦭꦫꦤꦺꦲꦺꦴꦫꦩꦿꦺꦩꦺꦤ꧀ꦭꦤ꧀ꦏꦸꦭꦶꦠ꧀ꦠꦺꦲꦶꦁꦏꦺꦴꦤꦺꦴꦲꦺꦴꦫꦊꦏꦺꦴꦏ꧀ꦏꦼꦠꦶꦩ꧀ꦧꦁꦏꦫꦺꦴꦏꦸꦭꦶꦠ꧀ꦲꦶꦁꦏꦶꦮꦠꦼꦔꦼꦤ꧀ꦤꦺ꧈​ꦮꦺꦴꦁꦩꦲꦸꦢꦶꦠꦼꦠꦼꦥ꧀ꦤꦉꦱꦶꦏ꧀꧉​ꦮꦺꦴꦁꦔꦺꦧꦚ꧀ꦗꦸꦂꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺ꧉​

^13:35 ꦤꦁꦔꦶꦁꦪꦺꦤ꧀ꦭꦫꦤꦺꦩꦿꦺꦩꦺꦤ꧀ꦱꦮꦶꦱ꧀ꦱꦺꦮꦺꦴꦁꦩꦲꦸꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀꧈​

^13:36 ꦲꦶꦩꦩ꧀ꦮꦶꦱ꧀ꦲꦺꦴꦫꦥꦽꦭꦸꦩꦿꦶꦏ꧀ꦱꦲꦥꦫꦩ꧀ꦧꦸꦠ꧀ꦠꦺꦮꦺꦴꦁꦩꦲꦸꦩꦭꦶꦃꦱꦼꦩꦸꦏꦸꦤꦶꦁꦲꦥꦲꦺꦴꦫ꧈​ꦩꦼꦂꦒꦮꦶꦱ꧀ꦕꦼꦛꦪꦺꦤ꧀ꦮꦺꦴꦁꦏꦸꦮꦶꦤꦗꦶꦱ꧀꧉​

^13:37 ꦤꦁꦔꦶꦁꦪꦺꦤ꧀ꦩꦤꦸꦠ꧀ꦥꦼꦤꦼꦩꦸꦤꦺꦲꦶꦩꦩ꧀꧈​ꦭꦫꦤꦺꦲꦺꦴꦫꦩꦿꦺꦩꦺꦤ꧀꧈​ꦭꦤ꧀ꦫꦩ꧀ꦧꦸꦠ꧀ꦲꦶꦁꦏꦺꦴꦤꦺꦴꦱꦸꦧꦸꦂ꧈​ꦏꦸꦮꦶꦠꦤ꧀ꦝꦪꦺꦤ꧀ꦭꦫꦤꦺꦮꦶꦱ꧀ꦩꦫꦶ꧈​ꦭꦤ꧀ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦏꦸꦮꦶꦉꦱꦶꦏ꧀꧉​

^13:38 ꦪꦺꦤ꧀ꦲꦤꦮꦺꦴꦁꦭꦤꦁꦲꦸꦠꦮꦮꦢꦺꦴꦤ꧀ꦱꦶꦁꦏꦸꦭꦶꦠ꧀ꦠꦺꦥꦠꦶꦁꦧ꧀ꦭꦼꦤ꧀ꦠꦺꦴꦁ꧈​

^13:39 ꦮꦺꦴꦁꦩꦲꦸꦏꦸꦢꦸꦢꦶꦥꦿꦶꦏ꧀ꦱꦏ꧀ꦏꦏꦺꦲꦶꦩꦩ꧀꧉​ꦪꦺꦤ꧀ꦧ꧀ꦭꦼꦤ꧀ꦠꦺꦴꦁꦔꦺꦩꦸꦁꦱꦼꦩꦸꦥꦸꦠꦶꦃ꧈​ꦏꦸꦮꦶꦩꦸꦁꦥꦤꦸ꧈​ꦭꦤ꧀ꦮꦺꦴꦁꦔꦺꦢꦶꦠꦼꦠꦼꦥ꧀ꦥꦏꦺꦉꦱꦶꦏ꧀꧉​

^13:40 (13:40-41)ꦪꦺꦤ꧀ꦮꦺꦴꦁꦭꦤꦁꦱꦶꦫꦃꦲꦺꦧꦸꦛꦏ꧀꧈​ꦱꦶꦱꦶꦃꦔꦉꦥ꧀ꦲꦸꦠꦮꦩ꧀ꦧꦸꦫꦶ꧈​ꦮꦺꦴꦁꦩꦲꦸꦲꦺꦴꦫꦤꦗꦶꦱ꧀ꦩꦼꦂꦒꦱꦏꦲꦼꦁꦒꦺꦴꦤꦺꦧꦸꦛꦏ꧀꧉​

^13:41 (13:40)

^13:42 ꦤꦁꦔꦶꦁꦪꦺꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦧꦸꦛꦏ꧀ꦩꦲꦸꦲꦤꦠꦠꦸꦤꦺꦥꦸꦠꦶꦃꦱꦼꦩꦸꦲꦧꦁ꧈​ꦮꦺꦴꦁꦏꦸꦮꦶꦭꦫꦏꦸꦱ꧀ꦠ꧉​

^13:43 ꦩꦸꦭꦤꦺꦏꦸꦢꦸꦢꦶꦥꦿꦶꦏ꧀ꦱꦏ꧀ꦏꦏꦺꦲꦶꦩꦩ꧀꧈​ꦭꦤ꧀ꦪꦺꦤ꧀ꦏꦼꦠꦶꦠꦶꦏ꧀ꦲꦤꦠꦠꦸꦤꦺꦥꦸꦠꦶꦃꦱꦼꦩꦸꦲꦧꦁ꧈​

^13:44 ꦲꦶꦩꦩ꧀ꦏꦸꦢꦸꦤꦼꦠꦼꦥ꧀ꦥꦏꦺꦮꦺꦴꦁꦏꦸꦮꦶꦤꦗꦶꦱ꧀꧈​ꦩꦼꦂꦒꦤꦤ꧀ꦝꦁꦭꦫꦏꦸꦱ꧀ꦠꦲꦶꦁꦱꦶꦫꦃꦲꦺ꧉​

^13:45 ꦮꦺꦴꦁꦱꦶꦁꦭꦫꦏꦸꦱ꧀ꦠ꧈​ꦏꦸꦢꦸꦔꦁꦒꦺꦴꦱꦤ꧀ꦝꦁꦔꦤ꧀ꦱꦶꦁꦥꦠꦶꦁꦱꦽꦩ꧀ꦥꦭ꧀꧈​ꦭꦤ꧀ꦲꦺꦴꦫꦏꦼꦤꦚ꧀ꦗꦸꦁꦏꦠ꧀ꦠꦶꦫꦩ꧀ꦧꦸꦠ꧀ꦠꦺ꧉​ꦫꦲꦶꦤꦺꦱꦶꦁꦔꦶꦱꦺꦴꦂꦏꦸꦢꦸꦢꦶꦠꦸꦠꦸꦥ꧀ꦥꦶ꧈​ꦱꦂꦠꦲꦭꦺꦴꦏ꧀ꦲꦭꦺꦴꦏ꧀꧈​"ꦤꦗꦶꦱ꧀!ꦤꦗꦶꦱ꧀!"

^13:46 ꦱꦼꦭꦮꦱ꧀ꦱꦺꦤꦤ꧀ꦝꦁꦊꦭꦫꦩꦲꦸ꧈​ꦮꦺꦴꦁꦏꦸꦮꦶꦤꦗꦶꦱ꧀꧈​ꦮꦺꦴꦁꦔꦺꦏꦸꦢꦸꦩꦁꦒꦺꦴꦤ꧀ꦲꦶꦁꦚ꧀ꦗꦧꦤ꧀ꦢꦺꦱ꧈​ꦲꦢꦺꦴꦃꦱꦏꦮꦺꦴꦁꦭꦶꦪꦭꦶꦪꦤꦺ꧉​

^13:47 ꦪꦺꦤ꧀ꦲꦤꦱꦤ꧀ꦝꦁꦔꦤ꧀ꦱꦶꦁꦲꦩꦺꦴꦃꦲꦸꦠꦮꦱꦸꦮꦺꦏ꧀꧈​ꦢꦢꦶꦪꦱꦶꦁꦢꦶꦒꦮꦺꦱꦏꦮꦺꦴꦭ꧀ꦲꦸꦠꦮꦭꦺꦤ꧈​

^13:48 ꦧꦼꦤꦁꦠꦼꦤꦸꦤ꧀ꦲꦸꦠꦮꦏꦸꦭꦶꦠ꧀꧈​

^13:49 ꦪꦺꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦲꦩꦺꦴꦃꦩꦲꦸꦫꦸꦥꦤꦺꦱꦼꦩꦸꦲꦶꦗꦺꦴꦲꦸꦠꦮꦱꦼꦩꦸꦲꦧꦁ꧈​ꦏꦸꦮꦶꦲꦠꦼꦒꦼꦱ꧀ꦲꦤꦧꦸꦝꦸꦒꦱꦶꦁꦮꦶꦱ꧀ꦩꦿꦺꦩꦺꦤ꧀;ꦏꦸꦢꦸꦢꦶꦥꦿꦶꦏ꧀ꦱꦏ꧀ꦏꦏꦺꦲꦶꦩꦩ꧀꧉​

^13:50 ꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦧꦫꦁꦩꦲꦸꦭꦤ꧀ꦚꦶꦁꦏꦶꦂꦫꦏꦺꦥꦶꦠꦸꦁꦢꦶꦤ꧉​

^13:51 ꦊꦠ꧀ꦥꦶꦠꦸꦁꦢꦶꦤꦏꦸꦢꦸꦢꦶꦥꦿꦶꦏ꧀ꦱꦩꦼꦤꦺꦃ꧈​ꦭꦤ꧀ꦪꦺꦤ꧀ꦫꦸꦱꦏ꧀ꦏꦺꦮꦶꦱ꧀ꦱꦼꦩꦿꦩ꧀ꦧꦃ꧈​ꦧꦫꦁꦩꦲꦸꦏꦸꦢꦸꦢꦶꦲꦁꦒꦼꦥ꧀ꦤꦗꦶꦱ꧀꧉​

^13:52 ꦪꦺꦤ꧀ꦮꦶꦱ꧀ꦏꦪꦔꦺꦴꦤꦺꦴꦩꦸꦁꦏꦸꦢꦸꦢꦶꦲꦺꦴꦧꦺꦴꦁ꧉​

^13:53 ꦤꦁꦔꦶꦁꦪꦺꦤ꧀ꦩꦤꦸꦠ꧀ꦥꦼꦩꦿꦶꦏ꧀ꦱꦤꦺꦲꦶꦩꦩ꧀ꦫꦸꦱꦏ꧀ꦏꦺꦲꦺꦴꦫꦱꦼꦩꦿꦩ꧀ꦧꦃ꧈​

^13:54 ꦲꦶꦩꦩ꧀ꦏꦸꦢꦸꦏꦺꦴꦁꦏꦺꦴꦤ꧀ꦤꦤ꧀ꦔꦸꦩ꧀ꦧꦃꦧꦫꦁꦩꦲꦸꦭꦤ꧀ꦚꦶꦁꦏꦶꦂꦫꦏꦺꦭꦮꦱ꧀ꦱꦺꦥꦶꦠꦸꦁꦢꦶꦤ꧉​

^13:55 ꦱꦮꦶꦱ꧀ꦱꦺꦏꦸꦮꦶꦲꦶꦩꦩ꧀ꦏꦸꦢꦸꦩꦿꦶꦏ꧀ꦱꦩꦼꦤꦺꦃ꧉​ꦪꦺꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦫꦸꦱꦏ꧀ꦮꦼꦂꦤꦤꦺꦲꦺꦴꦫꦩꦭꦶꦃ꧈​ꦱꦼꦤꦗꦤ꧀ꦫꦸꦱꦏ꧀ꦏꦺꦲꦺꦴꦫꦩꦿꦺꦩꦺꦤ꧀꧈​ꦧꦫꦁꦩꦲꦸꦲꦶꦱꦶꦃꦤꦗꦶꦱ꧀꧈​ꦢꦢꦶꦏꦸꦢꦸꦢꦶꦲꦺꦴꦧꦺꦴꦁ꧈​ꦲꦺꦴꦫꦥꦽꦢꦸꦭꦶꦱꦶꦁꦫꦸꦱꦏ꧀ꦩꦲꦸꦥꦺꦫꦁꦔꦤ꧀ꦱꦶꦁꦔꦉꦥ꧀ꦲꦥꦱꦶꦁꦩ꧀ꦧꦸꦫꦶ꧉​

^13:56 ꦤꦁꦔꦶꦁꦪꦺꦤ꧀ꦩꦤꦸꦠ꧀ꦥꦼꦩꦿꦶꦏ꧀ꦱꦤꦺꦲꦶꦩꦩ꧀ꦫꦸꦱꦏ꧀ꦏꦺꦲꦗꦼꦒ꧀꧈​ꦲꦶꦩꦩ꧀ꦏꦸꦢꦸꦚꦸꦮꦺꦏ꧀ꦥꦺꦫꦁꦔꦤ꧀ꦱꦶꦁꦫꦸꦱꦏ꧀ꦩꦲꦸ꧈​ꦢꦢꦶꦪꦧꦫꦁꦔꦺꦱꦏꦠꦼꦤꦸꦤ꧀ꦲꦸꦠꦮꦱꦏꦏꦸꦭꦶꦠ꧀꧉​

^13:57 ꦪꦺꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦱꦸꦮꦺꦏ꧀ꦩꦲꦸꦏꦠꦺꦴꦤ꧀ꦫꦸꦱꦏ꧀ꦩꦼꦤꦺꦃ꧈​ꦏꦸꦮꦶꦠꦤ꧀ꦝꦪꦺꦤ꧀ꦫꦸꦱꦏ꧀ꦏꦺꦩꦿꦺꦩꦺꦤ꧀꧉​ꦧꦫꦁꦩꦲꦸꦏꦸꦢꦸꦢꦶꦲꦺꦴꦧꦺꦴꦁꦢꦺꦤꦶꦁꦱꦶꦁꦢꦸꦮꦺ꧉​

^13:58 ꦪꦺꦤ꧀ꦱꦮꦶꦱ꧀ꦱꦺꦢꦶꦏꦸꦩ꧀ꦧꦃꦫꦸꦱꦏ꧀ꦏꦺꦲꦶꦭꦁ꧈​ꦧꦫꦁꦩꦲꦸꦏꦸꦢꦸꦢꦶꦏꦸꦩ꧀ꦧꦃꦩꦼꦤꦺꦃ꧉​ꦱꦮꦶꦱ꧀ꦱꦺꦏꦸꦮꦶꦭꦒꦶꦢꦶꦲꦁꦒꦼꦥ꧀ꦉꦱꦶꦏ꧀ꦠꦼꦩꦼꦤ꧀ꦤꦤ꧀꧉​

^13:59 ꦩꦼꦁꦏꦺꦴꦤꦺꦴꦥꦽꦤꦠꦤ꧀ꦧꦧ꧀ꦱꦤ꧀ꦝꦁꦔꦤ꧀ꦱꦶꦁꦩꦼꦥꦽꦭ꧀꧈​ꦱꦶꦁꦢꦶꦒꦮꦺꦱꦏꦭꦺꦤꦲꦸꦠꦮꦱꦏꦮꦺꦴꦭ꧀ꦭꦤ꧀ꦱꦼꦝꦺꦔꦃꦧꦫꦁꦱꦶꦁꦢꦶꦒꦮꦺꦱꦏꦏꦸꦭꦶꦠ꧀꧉​