Jv/Alkitab/Kaimaman/12

From Wikisource
Jump to navigation Jump to search

12:1 ꦒꦸꦱ꧀ꦠꦶꦄꦭ꧀ꦭꦃꦩꦫꦶꦁꦔꦏꦺꦥꦽꦤꦠꦤ꧀ꦩꦫꦁ​꧊ꦩꦸꦱ
12:2 ꦏꦁꦒꦺꦴꦧꦁꦱ​꧊ꦆꦱꦿꦲꦺꦭ꧀ꦩꦼꦁꦏꦺꦤꦺ:ꦪꦺꦤ꧀ꦲꦤꦮꦺꦴꦁꦮꦢꦺꦴꦤ꧀ꦢꦸꦮꦺꦲꦤꦏ꧀꧈​ꦩꦁꦏꦩꦼꦠꦸꦭꦤꦁ꧈​ꦮꦺꦴꦁꦏꦸꦮꦶꦤꦗꦶꦱ꧀꧈​ꦥꦝꦏꦫꦺꦴꦪꦺꦤ꧀ꦔ꧀ꦒꦫꦥ꧀ꦱꦫꦶ꧈​ꦭꦮꦱ꧀ꦱꦺꦥꦶꦠꦸꦁꦢꦶꦤ꧉​
12:3 ꦲꦶꦁꦢꦶꦤꦏꦥꦶꦁꦮꦺꦴꦭꦸꦤꦺꦧꦪꦶꦩꦲꦸꦏꦸꦢꦸꦢꦶꦠꦼꦠꦏ꧀ꦏꦶ꧉​
12:4 ꦱꦧꦸꦧꦂꦫꦺꦢꦸꦮꦺꦲꦤꦏ꧀ꦮꦺꦴꦁꦩꦲꦸꦢꦶꦲꦁꦒꦼꦥ꧀ꦤꦗꦶꦱ꧀ꦭꦮꦱ꧀ꦱꦺꦠꦼꦭꦸꦁꦥꦸꦭꦸꦃꦠꦼꦭꦸꦢꦶꦤ꧈​ꦩꦼꦂꦒꦔꦼꦠꦺꦴꦏ꧀ꦏꦏꦺꦒꦼꦠꦶꦃ꧉​ꦱꦮꦶꦱ꧀ꦱꦺꦩꦩ꧀ꦥꦼꦠ꧀ꦲꦼꦁꦒꦺꦴꦤꦺꦔꦼꦠꦺꦴꦏ꧀ꦏꦏꦺꦒꦼꦠꦶꦃ꧈​ꦮꦺꦴꦁꦮꦢꦺꦴꦤ꧀ꦩꦲꦸꦭꦒꦶꦢꦢꦶꦉꦱꦶꦏ꧀꧉​ꦱꦢꦸꦫꦸꦁꦔꦺꦉꦱꦶꦏ꧀꧈​ꦲꦺꦴꦫꦏꦼꦤꦔ꧀ꦒꦼꦥꦺꦴꦏ꧀ꦧꦫꦁꦱꦶꦁꦏꦁꦒꦺꦴꦲꦶꦁꦥꦔꦶꦧꦢꦃ꧈​ꦭꦤ꧀ꦲꦺꦴꦫꦏꦼꦤꦩ꧀ꦭꦼꦧꦸꦲꦶꦁꦏꦺꦩꦃꦱꦸꦕꦶ꧉​
12:5 ꦪꦺꦤ꧀ꦧꦪꦶꦤꦺꦮꦢꦺꦴꦤ꧀꧈​ꦮꦺꦴꦁꦏꦸꦮꦶꦤꦗꦶꦱ꧀꧈​ꦏꦪꦪꦺꦤ꧀ꦭꦒꦶꦔ꧀ꦒꦫꦥ꧀ꦱꦫꦶ꧈​ꦭꦮꦱ꧀ꦱꦺꦥꦠ꧀ꦧꦼꦭꦱ꧀ꦢꦶꦤ꧉​ꦱꦮꦶꦱ꧀ꦱꦺꦧꦪꦺꦤ꧀ꦮꦺꦴꦁꦮꦢꦺꦴꦤ꧀ꦩꦲꦸꦢꦶꦲꦁꦒꦼꦥ꧀ꦤꦗꦶꦱ꧀꧈​ꦭꦮꦱ꧀ꦱꦺꦱꦼꦮꦶꦢꦏ꧀ꦢꦶꦤ꧈​ꦩꦼꦂꦒꦔꦼꦠꦺꦴꦏ꧀ꦏꦏꦺꦒꦼꦠꦶꦃ;ꦱꦮꦶꦱ꧀ꦱꦺꦏꦸꦮꦶꦭꦒꦶꦢꦶꦲꦁꦒꦼꦥ꧀ꦉꦱꦶꦏ꧀꧉​
12:6 ꦪꦺꦤ꧀ꦲꦸꦥꦕꦫꦥꦱꦸꦕꦺꦤ꧀ꦤꦺꦮꦶꦱ꧀ꦫꦩ꧀ꦥꦸꦁ꧈​ꦢꦢꦶꦪꦲꦤꦏ꧀ꦏꦺꦭꦤꦁꦲꦸꦠꦮꦮꦢꦺꦴꦤ꧀꧈​ꦮꦺꦴꦁꦮꦢꦺꦴꦤ꧀ꦩꦲꦸꦏꦸꦢꦸꦱꦲꦺꦴꦱ꧀ꦥꦶꦱꦸꦁꦱꦸꦁꦩꦫꦁꦲꦶꦩꦩ꧀ꦲꦶꦁꦭꦮꦁꦔꦶꦁꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧉​ꦥꦶꦱꦸꦁꦱꦸꦁꦩꦲꦸꦫꦸꦥꦕꦼꦩ꧀ꦥꦺ꧈​ꦲꦸꦩꦸꦂꦱꦼꦠꦲꦸꦤ꧀꧈​ꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧈​ꦭꦤ꧀ꦩꦤꦸꦏ꧀ꦢꦫꦲꦸꦠꦮꦩꦤꦸꦏ꧀ꦢꦼꦫꦸꦏ꧀ꦱꦶꦗꦶꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧉​
12:7 ꦲꦶꦩꦩ꧀ꦏꦸꦢꦸꦚꦲꦺꦴꦱ꧀ꦱꦏꦺꦥꦶꦱꦸꦁꦱꦸꦁꦏꦸꦮꦶꦩꦫꦁꦄꦭ꧀ꦭꦃꦭꦤ꧀ꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦥꦩ꧀ꦧꦶꦫꦠ꧀ꦠꦶꦁꦤꦗꦶꦱ꧀ꦱꦺꦮꦺꦴꦁꦮꦢꦺꦴꦤ꧀ꦩꦲꦸ꧈​ꦱꦸꦥꦪꦢꦢꦶꦉꦱꦶꦏ꧀ꦩꦤꦸꦠ꧀ꦥꦽꦤꦠꦤꦶꦁꦲꦒꦩ꧉​ꦩꦼꦁꦏꦺꦴꦤꦺꦴꦱꦶꦁꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦢꦺꦤꦶꦁꦮꦺꦴꦁꦮꦢꦺꦴꦤ꧀ꦱꦮꦶꦱ꧀ꦱꦺꦢꦸꦮꦺꦲꦤꦏ꧀꧉​
12:8 ꦪꦺꦤ꧀ꦮꦺꦴꦁꦮꦢꦺꦴꦤ꧀ꦩꦲꦸꦲꦺꦴꦫꦢꦸꦮꦺꦫꦒꦢ꧀ꦏꦁꦒꦺꦴꦔꦤꦏ꧀ꦏꦏꦺꦕꦼꦩ꧀ꦥꦺ꧈​ꦏꦸꦢꦸꦔ꧀ꦒꦮꦩꦤꦸꦏ꧀ꦢꦫꦲꦸꦠꦮꦩꦤꦸꦏ꧀ꦢꦽꦏꦸꦏꦸꦭꦺꦴꦫꦺꦴ;ꦱꦶꦁꦱꦶꦗꦶꦏꦁꦒꦺꦴꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧈​ꦱꦶꦗꦶꦤꦺꦏꦁꦒꦺꦴꦏꦸꦂꦧꦤ꧀ꦥꦔꦿꦸꦮꦠ꧀ꦠꦶꦁꦢꦺꦴꦱ꧉​ꦲꦶꦩꦩ꧀ꦏꦸꦢꦸꦤꦶꦤ꧀ꦢꦏ꧀ꦏꦏꦺꦲꦸꦥꦕꦫꦥꦩ꧀ꦧꦶꦫꦠ꧀ꦠꦶꦁꦤꦗꦶꦱ꧀ꦱꦺꦮꦺꦴꦁꦮꦢꦺꦴꦤ꧀ꦩꦲꦸ꧈​ꦱꦸꦥꦪꦢꦢꦶꦉꦱꦶꦏ꧀꧉​