Giover, amer, agir, morir
Giover, amer, agir, morir.
All' alba, cur l'umaun cumainza quia
Sa gita quaida, sco feliz' infaunt;
Cur el co crida innozaint e ria
E led, dolur el smauncha sül momaint,
Allur' giavüsch nell' orma soul favler:
»Laschè'm giover!«
Cur il solagl d'la vita pü s'eleva
E muoss' il muond a nus in sia splendur;
Il cour dalöntsoh da quaista povra greva,
In tschercha vo dad incontschainta flur;
Nel fop del pet bain sainta resuner:
»Tü stoust amer!«
E cur stüzzeda ais la bram' arsainta
E l'uond' as calma, spievla cler serain,
La volunted in nus as fo preschainta
Dad aquister richezza, bain terrain;
Possauntamaing il cour voul suggerir:
»Tü stoust agir!«
Cur vain la saira d'la vit' allura
Tuot svampa, sfüma forza, volunted!
Nel cour rimbomb' in solitaria ura:
»Est staungel? Posa! Tira liber fled!«
Fidand in Dieu, la spraunz' at voul sorrir:
»Ais dutsch morir!«
1 Avrigl 1860.