Page:Fluors alpinas.djvu/81

From Wikisource
Jump to navigation Jump to search
This page has been proofread.



E cur stüzzeda ais la bram' arsainta
E l'uond' as calma, spievla cler serain,
La volunted in nus as fo preschainta
Dad aquister richezza, bain terrain;
Possauntamaing il cour voul suggerir:
»Tü stoust agir!«

Cur vain la saira d'la vit' allura
Tuot svampa, sfüma forza, volunted!
Nel cour rimbomb' in solitaria ura:
»Est staungel? Posa! Tira liber fled!«
Fidand in Dieu, la spraunz' at voul sorrir:
»Ais dutsch morir!«


1 Avrigl 1860.

A mia amia.

T'ingrazch, amia, amabl' amia,
O quaunt ais cher e dutsch tieu chaunt,
Sonor e zart sco l'armonia
Dels asters bels in firmamaint!

Sincer el tschauntsch' all' orma mia
In dschand a quella: »nun crider!
Sch'in terra eau nun sun la tia,
Sperain in tschel da'ns rechatter.«