Epistola I al Thessalonicenses Capitulo 4

 1 In fin fratres, como vos ha apprendite ab nos le modo de conducer vos pro placer a Deo, 
   nos vos implora e vos exhorta in le Senior Jesus Christo a progreder semper plus.

 2 Pois que vos sape qual commandamentos nos vos ha date per le gratia del Senior Jesus.

 3 Perque iste es le voluntate de Deo: que vos sanctifica, que vos abstine del fornication,

 4 que cata un de vos sape posseder le proprie corpore in sanctitate e honor, 

 5 e non dar se a passiones de concupiscentia como face le paganos qui non cognosce Deo;

 6 e que nemo opprime le fratre ni le defrauda; perque le Senior es vindice in tote iste 
   cosas, e como etiam nos vos habeva jam predicite e vos testificava.

 7 Pois que Deo nos ha vocate non a impuritate, sed a sanctification.

 8 Qui dunque minusprecia iste preceptos, non rejecta le homine, sed Deo, 
   qui vos da etiam le dono de su Sancte Spirito.

 9 E circa le caritate vos non necessita que io vos scribe, pois que vos ipse
   esseva instruite per Deo a amar vos le unes le alteres;

10 e in veritate, vos assi face con omne fratres, qui es in tote le Macedonia. 
   Sed nos vos exhorta, fratres, que vos abunda semper plus in illo, 

11 e que vos cerca de viver in pace, de facer vostre affaceres e laborar
   con vostre manos, como nos vos ordinava de facer,

12 pro conducer vos honestemente verso illes de foras, e non haber necessitate de nihil.

13 Nunc, fratres, nos non vole que vos sia in ignorantia circa illes qui dormi, 
   a fin que vos non sia contristate como qui non ha sperantia.

14 Pois que, si nos crede que Jesus moriva e resuscitava, assi etiam, illes 
   qui se addormiva, Deo les reportara, per medio de Jesus.

15 Pois que isto nos vos dice como parola del Senior: que nos viventes, 
   qui essera restate usque al advento del Senior, non precedera illes qui dormi; 

16 perque le Senior ipse, con potente voce, con voce de archangelo e con le trompa de Deo, 
   descendera ab le celo, e le mortos in Christo resuscitara prime;

17 postea nos viventes, qui essera restate, venera insimul con illes portate sur
   le nubes, a incontrar le Senior in le aere; e assi nos essera sempre con le Senior.

18 Consola vos dunque le unes le alteres con iste parolas.
1 2 3 4 5
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud
Rev