Biblia/Vetule Testamento/Reges/2Reges 3

←2 Reges 2

Le Biblia in Interlingua Reges

2 Reges 4→

2 Reges

3

Moab combatte contra Israel

¹In le anno dece-octo del regno de Rege Jehoshaphat super le Judea, le filio de Achab, Jehoram, deveniva rege super Israel. Ille regnava per dece-duo annos. ²Ille faceva lo que es mal al oculos del Senior, ma non in le mesme grado de su patre e matre. Ille removeva le palos sacre de Baal que su patre habeva erigite. ³Ille, tamem, persisteva committer le peccatos de Jeroboam, filio de Nebat, le qual faceva peccar Israel: ille non se repentiva^[1] de illos.

⁴Ora, Rege Mesha de Moab esseva un elevator de oves. Ille habeva le costume de pagar al rege de Israel un tributo annual de cento-milles agnos e le lana de cento-milles arietes. ⁵Ma, depost le morte de Achab, le rege de Moab non plus honorava le pacto que esseva establite^[2] con le rege de Israel. ⁶Ergo tosto Rege Jehoram sortiva de Samaria e appellava tote Israel a pugnar contra Moab.

⁷Ille mandava iste message a rege Jehoshaphat de Judea: “Le Rege de Moab infringeva le pacto que ille habeva con me. Esque tu vole venir con me a facer guerra contra Moab?”. Josaphat le replicava: “Vamos! Mi truppas es tu truppas, e mi cavallos es tu cavallos”. ⁸Deinde ille peteva: “Per qual via nos va ascender contra Moab?”. Jehoram respondeva: “Per le deserto del Idumea”. ⁹Assi, le reges de Israel, del Judea e de Edom se poneva in marcha con lor armeas. Illes girava per septe dies errante in le deserto e finalmente illes exhauriva le aqua pro le homines e le animales que habeva con illes. ¹⁰Le rege de Israel diceva: “Oh no! Certemente le Senior congregava iste tre reges ut poner les in le manos del rege de Moab!”. ¹¹Jehoshaphat alora diceva: “Esque il ha con nos ulle propheta del Senior, ut nos pote interrogar le Senior per ille e saper que facer?”. Un del officeros del rege de Israel replicava: “Eliseo, filio de Shapath. Ille esseva un vice al servicio de Elia”. ¹²Jehoshaphat diceva: “Si, ille recipe le messages del Senior”. Assi le rege de Israel e Jehoshaphat, e le rege de Edom descendeva a visitar le.

¹³Eliseo diceva al rege de Israel: “Quare veni tu hic a me? Vade plus tosto a consultar le prophetas pagan de tu patre o de tu matre!”. Le rege de Israel le replicava: “No, proque il esseva le Senior a congregar iste tres reges ut poner les in le manos de Moab”. ¹⁴Eliseo diceva: “Tanto certemente quanto le Senior del universo vive, le qual io serve, si io non respectava Rege Jehoshaphat de Giudea, io non prestarea ulle attention a te o te recognoscerea. ¹⁵Ma nunc apporta me alicuno que sape sonar le harpa!”. Quando ille musico sonava, le potestate del Senior veniva super Eliseo, ¹⁶e ille diceva: “Isto es lo que le Senior ha dicite: ‘Excava multe fossas in iste vallea,’ ¹⁷quia isto es lo que ha dicite le Senior: ‘Vos non sentira ulle vento o videra ulle pluvia, ma iste vallea essera reimplite de aqua, e vos omnes e vostre oves e bestial bibera’, ¹⁸Isto es un carga facile pro le Senior; ille ponera alsi Moab in vostre manos. ¹⁹Vos disfacera omne citate fortificate e omne citate importante. Vos debe abatter con hachas omne arbore fructifere, obturar omne fonte de aqua, e coperir con lapides tote le terras cultivate”.

²⁰Le die sequente circa in le tempore quando se offereva le sacrificios del matino, le aqua subito appareva! Illo flueva ab le direction de Edom, e tosto il habeva aqua ubicunque! ²¹Intertanto, quando le population de Moab audiva in re le tres armeas que marchava contra illes, illes mobilisava cata un homine que esseva habile a pugnar e illes se disponeva longe lor frontiera. ²²Ma quando illes se levava le proxime matino, le sol se reflecteva super le acquas faciente lo parer al Moabita de color rubie como sanguine. ²³“Il es sanguine!”, exclamava le Moabitas. “Le tres armeas certo se attaccava e se occideva le un le alteres! Vamos, homines de Moab, a colliger le piliage!”. ²⁴Quando, tamen, le Moabitas arrivava al campamento israelita, le armea de Israel se pressava a attaccar les donec le Moabitas se reverteva e fugiva. Le armea de Israel les chassava in le territorio ipse de Moab, destruente tote lo que illes incontrava durante le action. ²⁵Illes destrueva le citates, coperiva lor bon terrenos con lapides, e abatteva tote le bon arbores con hachas. Finalmente, somente Kir-hareseth e su muros remaneva, ma homines con fundas lo circumfereva e lo aggredeva.

²⁶Quando le rege de Moab comprendeva que lor inimicos prevaleva, ille conduceva septe-centos de su homines con gladios in un desperate tentativa de irrumper in le lineas inimic apud le rege de Edom, ma illes non successava. ²⁷Alora le rege de Moab prendeva su filio plus vetule, que haberea essite su successor, e le sacrificava qua holocausto super le muralias. Il habeva un grande indignation^[3] contra Israel, e le le Israelita recedeva e retornava a lor proprie terra.

Notas

1. O “recedeva”.
2. O “se rebellava”.
3. O “ira”. Le texto non es clar qui es le subjecto de iste ira o indignation. Un possibilitate de traduction es “Alora un profunde horror se appropriava del Israelitas”.