Biblia/Vetule Testamento/Psalmos/Psalmos 119

←Psalmos 118

Le Biblia in Interlingua Psalmos

Psalmos 120→

Psalmos

119. Beate es illes cuje via es immaculate

In iste Psalmo, le psalmista celebra le Lege de Deo e le guida que illo provide a su populo. Ille exprime su desiro de cognoscer le Lege de Deo tanto completemente que ille pote facer experientia del benedictiones que veni super qui lo observa. Le ossatura de iste Psalmo es acrostic, cata section comencia con un littera del alphabeto hebraic in su sequentia.

א (Alef) 1-8

¹Beate es illes cuje via es immaculate, qui se comporta^[1] secundo le Lege del Senior. ²Beate es illes qui observa su prescriptiones^[2] e le quere con tote lor corde, ³qui non face alcun compromisso con le iniquitate e cammina in su vias. ⁴Tu require que tu commandamentos sia diligentemente observate. ⁵Que mi actiones reflecte constantemente tu statutos! ⁶Alora io non esserea avergoniate quando io comparara mi vita con tu commandamentos. ⁷Io te rendera gratias sincere con un recte corde quando io apprendera le judicios de tu justitia. ⁸Io obedira a tu decretos. Non abandonar me completemente.

ב (Bet) 9-16

⁹Como pote un persona juvene servar le puressa de su conducta? Per le obedientia a tu parola. ¹⁰Io te quere de tote corde: non permitte que io erra lontan de tu preceptos. ¹¹In mi corde io servava tu parolas de instruction pro non peccar contra te. ¹²Io te benedice, oh mi Senior; doce me tu statutos. ¹³Io recitava in alte voce tote le regulas que tu nos dava. ¹⁴Io me allegra del stilo de vita prescribite in tu Lege sicut ricchessas de omne sortas. 1¹⁵Io meditara super tu commandamentos e reflectera super le conducta que tu require^[3]. ¹⁶Tu statutos me delecta: io nunquam oblidera tu parolas de instruction.

ג (Gimel) 17-24

¹⁷Sia benevolente verso tu servitor ut io vive e observa tu parola. ¹⁸Aperi mi oculos ut io vide le meraviliose veritates de tu Lege. ¹⁹Io es solmente un estraniero in iste pais. Non cela ab me tu preceptos. ²⁰Mi anima desidera ardentemente cognoscer in omne tempores tu regulas de vita. ²¹Tu reprimenda le personas arrogante. Qui erra ab tu preceptos es maledicite. ²²Sparnia me vergonia e contempto, quia io observa tu regulas de vita. ²³Memo si princes sederea e parlarea adverso me, io medita super tu parola. ²⁴Si, io me delecta de tu regulas de vita: illos es un guida pro me.

ד (Dalet) 25-32

²⁵Io jace in le pulvere: vivifica me secundo tu parola. ²⁶Io te diceva quales es mi planos e tu me respondeva. Nunc doce me tu statutos. ²⁷Face me comprender le significato de tu commandamentos, ut io medita super tu meraviliose inseniamentos. ²⁸Mi anima afflicte plora amarmente: sustene me per tu parola. ²⁹Averte me ab le via del mendacios e gratiosemente da me tu Lege. ³⁰Io seligeva le via del veritate. Io me ingagiava sequer tu regulas de vita. ³¹Io adhere strictemente a tu regulas de vita. Oh Senior, que io non sia avergoniate. ³²Io curre in le via de tu commandos, quia tu me habilita facer lo.

ה (He) 33-40

³³Doce me tu statutos, oh Senior; io los observara pro sempre. ³⁴Da me intellecto e io observara tu leges de tote corde. ³⁵Duce me in le semitas de tu preceptos, quia in illos io trova mi gaudio. ³⁶inclina mi corde a appreciar tu regulas de vita, plus tosto que a ricchessas aquirite injustemente. ³⁷Averte mi oculos ut io non vide lo que es sin valor. Vivifica me con tu parola. ³⁸Confirma a tu servitor tu promissa, illo que tu faceva a qui te honora. ³⁹Adjuta me quitar omne comportamentos vergoniose, quia tu regulas de vita es bon. ⁴⁰Ecce, io compliva tu commandamentos; vivifica me in tu justitia.

ו (Vav) 41-48

⁴¹Que tu misericordia veni super me, oh Senior, e tu salvation, secundo tu promissas. ⁴²Alora io potera responder a les qui me insulta, quia io confide in tu parola. ⁴³Non me disprovide de un testimonio verace, quia tu regulas de vita es mi sol sperantia. ⁴⁴Alora io continuemente observara tu Lege, nunc e semper. ⁴⁵Io essera secur, quia io quere tu preceptos. ⁴⁶Io non me avergoniara parlar re tu regulas de vita in le presentia de reges. ⁴⁷Io me delecta in tu commandamentos, quia io los ama. ⁴⁸Io honora e ama tu commandos. Io medita super tu statutos.

ז (Zayin) 48-56

⁴⁹Recorda tu parola a tu servitor, quia tu me dava sperantia. ⁵⁰Tu promissa me revivisce; illo me conforta in tote mi afflictiones. ⁵¹Personas superbe me deride con vehementia, ma io non me vertera ab tu Lege. ⁵²Io medita super tu leges antique; oh Senior, illos me conforta. ⁵³Le indignation me sasi quando io considera le peccatores qui derelinque tu Lege. ⁵⁴Tu statutos esseva le thema de mi canticos ubicunque io ha vivite. ⁵⁵De nocte io reflecte super qui tu es^[4], oh Senior; ergo io obedi a tu Lege. ⁵⁶Io ha practicate isto tote mi vita, quia io observava tu commandamentos.

ח (Khet) 57-64

⁵⁷1Le Senior es le fonte de mi securitate. Io me determinava sequer tu parolas de instruction. ⁵⁸Io quere tu favor de tote corde. Sia misericordiose como tu promitteva. ⁵⁹Io ponderava le direction de mi vita e sequeva tu regulas. ⁶⁰Io me hastara sin retardo a obedir a tu commandos. ⁶¹Le funes del peccatores se stringeva circum me, ma io non oblidava tu Lege. ⁶²Io me leva in le medio del nocte pro regratiar te pro le juste regulas del vita que tu nos dava. ⁶³Io es amico de quicunque te respecta^[5], de quicunque observa tu commandamentos. ⁶⁴Oh Senior, le Terra es plen de tu misericordia; doce me tu statutos!

ט (Tet) 65-72

⁶⁵Tu faceva multe bon cosas pro me, oh Senior, justo como tu promitteva. ⁶⁶Doce me un juste discernimento e intelligentia, quia io considera tu commandos digne de confidentia. ⁶⁷Ante que tu me disciplinava, io soleva errar, ma nunc io observa tu parolas de instruction. ⁶⁸Tu es bon e face le ben. Doce me tu statutos. ⁶⁹Gente arrogante me calumnia, ma io observa tu preceptos de tote corde. ¹⁷⁰Lor cordes es callose e stupide, ma io me delecta in tu Lege. ⁷¹Mi suffrentias esseva bon pro me ut io apprendeva tu statutos. ¹⁷²Le Lege que tu nos revelava ha pro me un valor major que milles pecias de auro e de argento.

י (Yod) 73-80

⁷³Tu manos me faceva e me formava. Da me intellecto ut io apprende tu commandos. ⁷⁴Que tote illes qui te time me vide e se allegra, quia io poneva mi sperantia in tu parola. 1⁷⁵Io sape, oh Senior, que tu regulas de vita es juste. Tu me disciplinava propter tu fidel devotion verso me. ⁷⁶Que tu misericordia me consola, secundo lo que tu ha promittite a tu servitor. ⁷⁷Que io face le experientia de tu compassion e vive, quia io me delecta de tu Lege. ⁷⁸Que le gente arrogante sia avergoniate quia illes me calumniava; ma io medita super tu preceptos. ⁷⁹Que io sia le companion de omnes qui te time, omnes qui cognosce tu regulas de vita. 1⁸⁰Que io sia plenmente ingagiate^[6] in sequer tu statutos, ut io non sia unquam avergoniate.

כ (Kaf) 81-88

⁸¹Le expectation de tu intervention a liberar me me extenuava. Io trova sperantia in tu parola. ⁸²Mi oculos deveniva fatigate in attender le completion de tu promissa. Io dice: “Quando tu me consolara?”. ⁸³Io es corrugate sicut un utre exponite al fumo, ma io non oblidava obedir a tu statutos. ⁸⁴Quanto longemente ancora tu servitor debera sustener tote isto? Quando tu punira^[7] les qui me persecuta? ⁸⁵Personas arrogante qui violava tu Lege excava fossas pro trappar me. Illes non age secundo tu Lege. ⁸⁶Omne tu preceptos es digne de fide. Protege me ab les qui me persecuta sin causa. ⁸⁷Illes quasi me destrueva hic sur le Terra, ma io refusava derelinquer tu commandamentos. ⁸⁸Vivifica me secundo tu misericordia, ut io observa le regulas de vita que tu ha revelate.

ל (Lamed) 89-96

⁸⁹Oh Senior, tu parola dura firmemente in eterno. ⁹⁰Tu demonstra tu fidelitate^[8] de generation a generation. Tu establiva le Terra e illo remane firme. ⁹¹Tu regulas permane hodie digne de fide, quia toto servi tu propositos. ⁹²Si io non habeva trovate incoragiamento in tu Lege, io haberea morite in mi affliction. ⁹³Io nunquam oblidara tu preceptos, quia per illos tu me revivisceva. ⁹⁴Io te pertine. Salva me! Quia io quere tu commandamentos. ⁹⁵Ben que le peccatores se occulta longe le strata pro occider me; nonobstante, io me concentra super tu regulas. ⁹⁶Mesmo le perfection ha su limites, ma tu commandamentos ha nulle limites.

מ (Mem) 97-104

⁹⁷Oh, quanto io ama tu Lege! Tote le die io medita super illo. ⁹⁸Tu commandamentos me rende plus sage que mi inimicos, quia illos es constantemente mi guida. ⁹⁹Io ha multo plus prudentia que tote mi docentes, quia io medita super tu regulas de vita. ¹⁰⁰Io ha major discernimento que mi seniores, quia io observa tu preceptos. ¹⁰¹Io me tene lontan de omne vias mal, ut io observa tu parolas de instruction. ¹⁰²Io non me disvia de tu regulas de vita, quia tu me ha instruite ben. ¹⁰³Tu parolas de instruction es in mi bucca plus dulce que le melle! ¹⁰⁴Tu commandamentos me da discernimento; propter isto io odia omne vias de mendacio.

נ (Nun) 105-112

¹⁰⁵Tu parola es un lanterna pro guidar mi cammino e un lumine pro mi sentieros. ¹⁰⁶Io lo promitteva^[9] un vice e io va promitter lo de novo: io obedira a tu juste regulas de vita^[10]. ¹⁰⁷Io ha multo patite, oh Senior; restabli de novo mi vita, secundo tu promissas^[11]. ¹⁸Oh Senior, accepta mi offerta de laude, e doce me tu regulas de vita. ¹⁰⁹Mi vita es in constante periculo, ma io non cessara^[12] obedir a tu leges. ¹¹⁰Gente malefic poneva insidias pro attrappar me, ma de tu commandamentos io non errava. ¹¹¹Tu leges essera mi tresor^[13] in eterno, mi corde se allegra in illos. 1¹¹²Mi determination es de observar semper tu decretos, usque al fin.

ס (Samek) 113-120

¹¹³Io odia le gente de duplice corde, ma io ama tu Lege. 1¹¹⁴u es mi refugio e mi scuto; io trova sperantia in tu parolas de instruction. ¹⁵Allontana vos ab me, gente malefic: io observa le commandamentos de mi Deo! ¹¹⁶Senior, sustine me como tu promitteva. Que mi sperantia non sia disappunctate! ¹¹⁷Supporta me, e io essera liberate, alora io meditara continuemente super tu statutos. ¹¹⁸Tu disprecia tote illes qui erra ab tu statutos, quia tal personas es mendace e inaffidabile. ¹¹⁹Como scorias tu dele omne peccatores del Terra; propter isto io ama tu regulas de vita. 1¹²⁰Mi corpore treme proque io te time; io ha pavor de tu judicios.

ע (Ayin) 121-128

¹²¹Io face lo que es juste e recte, non me livra a les qui me calumnia. ¹²²Garanti un benediction pro me. Que gente superbe non me calumnia! ¹²³Mi oculos es fatigate in le expectation de tu salvation; io desira ardentemente vider complite le veritate de tu promissas. ¹²⁴Tracta tu servitor secundo tu misericordia; doce me tu statutos. ¹²⁵Io es tu servitor; da me intellecto ut io comprende tu leges. ¹²⁶Oh Senior: il es tempore que tu age, quia multe gente viola tu Lege. ¹²⁷Propter iste ration io ama tu preceptos plus que le auro, mesmo plus que le auro le plus fin. ¹²⁸Propter iste ration io observa diligentemente tu commandamentos: io odia omne vias mendace.

פ (Pe) 129-136

¹²⁹Tu regulas de conducta es meraviliose, propter isto io los observa! ¹³⁰Le inseniamento de tu parola illumina. Illo da intellecto al personas inexperte. ¹³¹Io anhela con grande expectation, quia io desira ardentemente tu preceptos. ¹³²Verte te verso me e misera me como tu face verso omnes qui honora tu nomine. ¹³³Dirige mi passos secundo tu parola e non permitte que ulle iniquitates me domina. ¹³⁴Libera me ab le calumnias del homines ut io observa tu commandamentos. ¹³⁵Que tu facie surride a tu servitor. Doce me tu statutos. ³⁶Lacrimas flue de mi oculos quia multes non observa tu lege.

צ (Tsade) 138-144

¹³⁷Tu es juste, oh Senior, e tu judicios recte. ¹³⁸Tu leges es perfectemente juste e completemente digne de fide. ¹³⁹Mi zelo me consuma, quia mi inimicos oblida tu parolas de instruction. ¹⁴⁰Tu parolas de promissa esseva ponite a proba e se demonstrava fidel: ecce proque tu servitor los ama. ¹⁴¹Io es insignificante e dispreciate, ma io non oblida tu commandamentos. ¹⁴²Tu justitia dura in eterno e tu Lege es digne de fide. ¹⁴³Io es confrontate de tribulation e angustia, ma io me delecta de tu preceptos. ¹⁴⁴Tu regulas de vita es semper juste: adjuva me comprender los, ut io vive.

ק (Qof) 145-152

¹⁴⁵De tote corde io te clamava e diceva: “Exaudi me, Senior! Io observara tu statutos. 1¹⁴⁶Io te clamava e te diceva: “Salva me, ut io observa tu regulas de vita”. ¹⁴⁷Io me levava mane ante le alba clamante adjuta a te. Io trova sperantia in tu parola.¹⁴⁸Io vigila durante le nocte e medita super tu parola. ¹⁴⁹Ascolta mi voce secundo tu misericordia, oh Senior; vivifica me secundo tu judicio. ¹⁵⁰Se approxima a me illes qui, in lor malitia, me perseque; illes es longe de tu Lege. ¹⁵¹Tu, tamen, es proxime, oh Senior, e tote to preceptos es digne de fide. ¹⁵²Io ha cognoscite desde le dies de mi juventute que tu regulas de vita durara pro semper.

ר (Resh) 153-160

¹⁵³Vide mi humiliation e redime me, quia io non oblida tu Lege. ¹⁵⁴Sustene mi causa e redime me; vivifica me con tu parola. ¹⁵⁵Le peccatores ha nulle causa de esser salvate, quia ille non quere tu statutos. ¹⁵⁶Oh Senior, tu misericordia es grande. Vivifica me secundo tu regulas de vita. ¹⁵⁷Le inimicos qui me perseque e me causa tribulationes es multe. Nonobstante, io non quita sequer tu regulas de vita. ¹⁵⁸Solmente in vider le prevaricatores me face dispreciar les, quia illes non observa tu parola. ¹⁵⁹Vide quanto io ama tu commandamentos, oh Senior. Vivifica me secundo tu misericordia. 1¹⁶⁰Le essentia mesme de tu parolas es veritate; omne tu juste regulas de vita durara in eterno.

שׂ/שׁ (Sin/Shin) 161-168

¹⁶¹Gente potente me perseque sin ration, ma lo que io plus time es disobedir a tu parolas de instruction. ¹⁶²Io me allegra de tu parolas de instruction sicut qui trova un ric butino. ¹⁶³Io odia e disprecia omne mendacios, ma io ama tu Lege. ¹⁶⁴Io te lauda septe vices pro die propter tu juste regulas de vita. ¹⁶⁵Illes qui ama tu Lege acquire multe pace e nihil les face trappar. ¹⁶⁶Io expecta tu salvation, oh Senior, e obedi a tu preceptos. ¹⁶⁷Io observa tu regulas de vita, io los ama grandemente. ¹⁶⁸Io observa tu commandamentos, quia tu vide como io me conduce.

ת (Tav) 169-176

¹⁶⁹Que mi deprecation se approxima a te, oh Senior. Da me intellecto^[14] per tu parola. ¹⁷⁰Que mi requestas entra in tu presentia. Libera me, secundo tu promissas. ¹⁷¹Que ab mi labios se effunde hymnos de laude, quia tu me doce tu statutos. ¹⁷²Que mi lingua canta re tu parolas, quia omne tu commandamentos es juste. ¹⁷³Que tu mano me adjuta, quia io seligeva de obedir a tu commandamentos. ¹⁷⁴Io concupisce tu salvation, oh Senior, e tu Lege es mi delecto. ¹⁷⁵Que mi anima vive e te lauda; que tu regulas de vita me adjuva. 1¹⁷⁶Io errava sicut un ove perdite; veni a cercar tu servitor, ut io non oblida tu preceptos.

Notas

1. O “cammina”.
2. O “testimonios”.
3. O “super tu vias”·
4. O “super tu nomine”.
5. O “te time”.
6. O “Que mi corde sia immaculate”.
7. O “judicara”.
8. O “veritate”.
9. O “jurava”.
10. Litt. “Io custodiara tu juste judicios”.
11. O “parola”.
12. O “io non oblida tu lege”.
13. O “hereditate”.
14. O “un mente descernente”.