Biblia/Vetule Testamento/Psalmos/Psalmos 118

←Psalmos 117

Le Biblia in Interlingua Psalmos

Psalmos 119→

Psalmos

118. Rende gratias al Senior quia ille es bon

Le Psalmista regratia Deo pro su liberation e suade alteres a unir se a ille in laudar le Senior..

¹Alleluia! Rende gratias al Senior, quia ille es bon, quia su amor fidel^[1] dura pro semper^[2]! ²Que tote le Israel dice nunc: “Si, su amor fidel dura pro semper!”. ³Que le sacerdotes, descendentes^[3] de Aaron, dice nunc: “Si, su amor fidel dura pro semper!”. ⁴Que omnes qui time le Senior dice nunc: “Si, su amor fidel dura pro semper!”. ⁵In mi tribulation io invocava le Senior, e ille me exaudiva e me conduceva al libertate^[4]. ⁶Le Senior es apud me: propter isto io ha nihil a timer, quid poterea facer me humanos^[5]? ⁷Le Senior es apud me^[6], ille es mi auxiliator e io despice mi inimicos. ⁸Il mes melio trovar asylo apud le Senior que confider in humanos. ⁹Il es melio trovar asylo apud le Senior que confider in princes.

¹⁰Gentes^[7] hostil me circuiva, ma omnes io los repulsava in le nomine del Senior. ¹¹Illos me circumfereva, si, illos me circumfereva, ma io los repulsava in le nomine del Senior. ¹²Illos essamava circa me sicut apes; illos flagrava sicut un foco in un arbusto spinose, ma io los repulsava in le nomine del Senior. ¹³Illos me impelleva aggressivemente e essayava de facer me cader, ma le Senior me adjuvava. ¹⁴Le Senior me da fortia e me guarda; ille deveniva mi liberator. ¹⁵Se audi cantos de gaudio e de victoria in le campamento del justos: “Le mano dextere del Senior face prodessas. ¹⁶Le mano dextere del Senior da victorias. Le mano dexter del Senior face prodessas. ¹⁷Io non morira, sed io vivera: io contara a omnes le obras del Senior. ¹⁸Le Senior me puniva severmente, ma ille non permitteva que io mori.

¹⁹Aperi pro me le portas per le quales le justos va passar^[8]; io va entrar per illos e va render gratias al Senior! ²⁰Iste portas conduce al presentia del Senior^[9] e le justos entrara per illos. ²¹Io te rendera gratias, quia tu me exaudiva e deveniva mi liberator.

²²Le lapide que le constructores reprobava, deveniva nunc le lapide angular. ²³Isto es le obra del Senior e illo es admirabile a nostre oculos. ²⁴Isto es le die que le Senior faceva. Nos exultara e nos nos allegrara. ²⁵Oh Senior, que tu me salva! Oh Senior que tu me da successo! ²⁶Que sia benedicite ille qui veni in le nomine del Senior! Nos benedice vos ab le domo del Senior. ²⁷Le Senior es Deo, e ille liberava nos. Liga le offerta con cordas al cornos del altar. ²⁸Tu es mi Deo e io va render te gratias. Tu es mi Deo e io va laudar te. ²⁹Rende gratias al Senior, quia ille es bon, e su amor fidel perdura!

Notas

1. O “misericordia”.
2. O “dura pro semper”.
3. O “familia”.
4. Litt. “A in un loco spatiose aperte”.
5. O “le homines”.
6. O “pro me”.
7. O “Omne gentes”, Omne nationes”.
8. O “Le portas del justitia”.
9. O “Istos es le portas del Senior”.