Biblia/Vetule Testamento/Psalmos/Psalmos 103

←Psalmos 102

Le Biblia in Interlingua Psalmos

Psalmos 104→

Psalmos

103. Que mi anima benedice le Senior!

Le psalmista lauda Deo pro su misericordia e bon disposition a pardonar su populo.

¹Un psalmo de David. Que mi anima benedice le Senior e que toto lo que es in me benedice su nomine sancte! ²Que mi anima benedice le Senior e que illo nunquam oblida tote le ben que ille me face! ³Ille es qui pardona tote tu peccatos, qui sana omne tu infirmitates; ⁴qui redime tu vita del morte^[1] e qui te corona con su misericordia e compassion; ⁵qui replena de bon cosas tu vita, tanto que tu juventute es renovate como illo de un aquila!

⁶Le Senior face lo que es juste e exeque justitia pro tote les qui es opprimite. ⁷Ille revelava su voluntate^[2] a Moses, su actos al israelitas. ⁸Le Senior es misericorde e pietose; ille es longanime e plen de misericordia. ⁹Ille non semper accusa^[3] nos ni ille irasce in eterno. ¹⁰Ille nos non tracta como nostre peccatos meritarea, ni ille nos repaga secundo nostre offensas^[4]. ¹¹Quia quanto le celos es alte super le Terra, tanto su misericordia prevale super les qui le time. ¹²Quanto le horizonte oriental dista ab le occidental, assi ille remove ab nos le culpa de nostre actos de rebellion. ¹³Quomodo un patre ha compassion de su filios, assi le Senior ha compassion de les qui le time. ¹⁴Quia ille sape como es le substantia del qual nos es facite; ille comprende que nos es solmente pulvere^[5]. ¹⁵Le vita de un persona es sicut feno^[6]. Assi como un flor in le agro floresce, ¹⁶ma quando le vento calide suffla, illo dispare, e nemo poterea mesmo trovar le loco ubi un vice illo cresceva. ¹⁷Le misericordia del Senior, tamen, es ab eterno e in eterno pro les qui le time. Ille es fidel mesmo a lor descendentes, ¹⁸a les qui serva su pacto e qui es diligente in obedir a su commandamentos.

¹⁹Le Senior ha rendite le celos su throno. Ab ibi ille domina super le universo.

²⁰Benedice le Senior, vos omnes, su angelos, vos potente guerreros angelic qui exeque su decretos e obedi a su ordines. ²¹Benedice le Senior, vos omnes armeas angelic qui le servi, su ministros, qui face su voluntate. ²²Benedice le Senior, vos omnes obras sue, in omne locos de su regno. Anima mie, benedice le Senior!

Notas

1. Litt. “del fossa”.
2. O “su vias”.
3. O “contende”.
4. O “iniquitates”.
5. O “argilla”.
6. O “herba”.