Biblia/Vetule Testamento/Psalmos/Psalmos 1

From Wikisource
Jump to navigation Jump to search
Le Biblia in Interlingua
Psalmos

Le Psalmos[edit]

1. Beate es le homine que non seque le consilio del impios[edit]

In iste psalmo sapiential le autor consilia a su auditorio de repeller le stilo de vita del impios e de esser fedel a Deo. Le psalmista contrasta le destino del impios con illo del justos, accentuante que le destino del impios essera finalmente le perdition durante que le pios prospera sub le cura providente de Deo.

1Beate[1] es le homine que non seque le consilio del impios[2] ni sta in le vias del peccatores, ni se sede con le irrisores[3]. 2Al contrario, ille trova placer in obedir al voluntate del Senior e medita super illos jorno e nocte. 3Ille es como un arbore plantate apud cursos de aqua fluente, que da su fructo a su tempore e su folios nunquam se sicca. Ille prospera in toto lo que ille face.

4Non assi es le impios! Al contrario, illes es como vannatura sufflate per le vento. 5Pro iste ration, le impio non potera evitar un judicio de condemnation, ni le peccatores potera seder se con le justos. 6Certemente le Senior protege[4] le justos in lor vias, ma le vias del impios termina in le perdition.

Notas[edit]

  1. O “Quanto benedicite”, o "felice".
  2. Illo es: personas que vive sin considerar in alicun maniera Deo e su leges, que denega su existentia o interesse in lo que illes dice o face e que ergo non ha alicun scrupulo a dicer mentitas, calumniar e deciper alteres.
  3. Illo es: personas arrogante que ama le conflicto e rejecta vociferantemente le sapientia e le correction. “Seder in le assemblea” de tal personas significa identificar se completemente con illes in lor projectos e comportamento peccaminose.
  4. O “cognosce”.