Biblia/Vetule Testamento/Job/Job 42

←Job 37

Le Biblia in Interlingua Job

Psalmo 1→

Job

42

Job responde al Senior

¹Alora Job, respondente al Senior, diceva: ²“Io sape que tu pote facer qualcunque cosa tu vole e que nulle tu propositos pote esser frustrate. ³Tu peteva: “Qui es iste qui pone in question^[1] mi sapientia con tal ignorantia?”. Il esseva io - e io parlava re cosas que excedeva mi cognoscentia, cosas troppo meraviliose pro me a saper. ⁴Tu diceva: “Audi e io parlara! Quia Io ha pro te alcun questiones e tu debera responder me”. ⁵Antea io habeva solmente audite de te, ma nunc io te ha vidite con mi oculos. ⁶Ergo, io ipse retrahe lo que io diceva, e io me pone a seder in pulvere e cineres qua marca de mi repententia”.

Le restablimento de Job

⁷Postquam le Senior habeva dicite iste cosas a Job, Ille diceva a Eliphaz le temanita: “Io es indignate e irate contra te e contra tu duo amicos, quia tu non diceva de me lo que es juste como faceva mi servitor Job. ⁸Sume, ergo, septe tauros e septe arietes e offere los in holocausto pro vos. Mi servitor Job intercedera^[2] in vostre favor e io acceptara su precaria. Io non vos tractara como vos merita, quia vos non parlava justemente de me, como faceva mi servitor Job. ⁹Assi, Eliphaz le temanita, Bildad le shuhita, e Zophar le naamathita faceva sicut le Senior les habeva dicite, e le Senior acceptava le precaria de Job.

¹⁰Quando Job orava pro su amicos, le Senior restabliva lo que Job habeva perdite. De facto, le Senior duplava tote lo que Job habeva possedite antea. ¹¹Alora tote su fratres, sorores, e illes que ille habeva anteriormente cognoscite, conveniva e festeava con le in su domo. Illes le consolava e confortava propter tote le probas al quales le Senior le habeva submittite. E cata un de illes le portava un dono de pecunia^[3] e un anello auree.

¹²Assi le Senior benediceva Job in le secunde medietate de su vita magis quam antea. Quia nunc ille possedeva dece-quattro milles oves, sex milles camelos, mille copulas de boves, e mille asinas. ¹³Ille alsi dava a Job septe filios e tres filias de plus. ¹⁴Ille vocava su prime filia Jemimah^[4], le secunde Keziah^[5], e le tertie Keren-happuch^[6]. ¹⁵In tote le pais il non se trovava feminas plus belle que le filias de Job, e lor patre las accordava un hereditate tanto quanto lor fratres. ¹⁶Post isto, Job viveva cento-quaranta annos; ille videva su filios o granfilios usque al quarte generation. ¹⁷Assi Job moriva, un homine vetule qui viveva un vita longe e plen^[7].

Notas

1. O “obscura”.
2. O “pregara”.
3. Litt. “pecias de argento”.
4. O “Columba”.
5. O “Cassia”.
6. O “Corno de oculos pingite”, “Cornustibia”.
7. Litt. “vetule e plen de dies”.