Biblia/Vetule Testamento/Proverbios/Proverbios 23

←Proverbios 22

Le Biblia in Interlingua Proverbios

Proverbios 24→

Le Proverbios

Capitulo 23

¹Quando tu es sedite a tabula pro mangiar con un rector, presta attention a quid^[1] es ponite ante te, ²e pone un cultro a tu gutture^[2] si tu ha un grande appetito. ³Non desira su vivandas delicate, quia ille vivandas es deceptive^[3].

⁴Non extenua te pro devenir ric; sia satis sage a saper quando desister. ⁵Quando tu pensa de haber attingite le ricchessa, illo dispare, quia illo ha alas e subito vola via in celo como un aquila!

⁶Non mangia insimul a un persona illiberal e non desidera su vivandas delicate, ⁷quia ille es simile a les qui semper pensa a quanto illos costa. Illes dice: “Mangia e bibe”, ma illes non lo pensa vermente^[4]. ⁸Tu vomera mesmo le poco que tu mangiava e tu guastara tu complimentos.

⁹Non parla in le aures de un persona insipiente, quia ille despicera le sagessa de tu parolas.

¹⁰Non remove un antique petra de confinio o appropria te del agro de orphanos, ¹¹quia lor Redemptor es forte: ille plaitara contra te lor causa.

¹²Applica tu corde al instruction e tu aures al parolas de cognoscentia.

¹³Non subtraher le puero al disciplina; mesmo si tu le percute con un virga, ille non morira. ¹⁴Si tu le percute con un virga, tu liberara su anima del inferno.

¹⁵Filio mie, si tu corde es sage^[5], anque mi corde gaudera con te, ¹⁶e exultara mi anima quando tu labios pronuncia lo que es juste.

¹⁷Que tu corde non invidia peccatores, magis sia semper zelante in timer le Senior, ¹⁸quia certo tu essera recompensate^[6] e tu sperantia non essera unquam frustrate.

¹⁹Audi, filio mie, e sia sage; dirige tu animo in le juste via. ²⁰Non participa al festas ni del bibulos ni del gluttones, ²¹quia bibulos e gluttones impovrira, e le somnolentes se vestira con pannellos.

²²Audi tu patre, qui te generava, e non contemne tu matre in su senectute.

²³Eme le veritate e nunquam vende lo; eme sapientia, disciplina e intelligentia.

²⁴Le patre del justo exulta de gaudio; quicunque genera un filio sage se allegrara in ille. ²⁵Ergo, da gaudio a tu patre e tu matre; que illa qui te generava se allegra.

²⁶Filio mie, da me tu corde, e que tu oculos observa mi vias.

²⁷Un prostituta es un trappa periculose; un adultera^[7] es tanto periculose quanto cader in un puteo stricte, ²⁸nam illa ipse insidia le passantes sur le via como un fur e illa es alacre a render homines infidel a lor sposas.

²⁹Qui ha angustias? Qui ha dolos? Qui semper contende? Qui semper querela? Qui ha vulneres sin causa? Qui ha oculos inflate^[8]? ³⁰Il es ille qui mora longemente in tavernas a biber vino e qui perquire vino mixte. ³¹ Non contempla le rubescentia del vino, quando illo scintilla in le calice e quanto amabilemente illo descende in le gurgite. ³²Quia, postea, illo morde sicut un serpente e punge sicut un vipera. ³³Tu oculos hallucinara^[9] e tu corde dicera cosas perverse. ³⁴Alora tu essera sicut un dormiente in le medio del mar, adherente a un mast rolante. ³⁵E tu dicera: “Io esseva verberate, ma io non habeva dolor. Io esseva percutite, ma io non lo sentiva. Quando io me eveliara ut io pote retornar biber?”.

Notas

1. O “qui” (persona).
2. O “frena tu appetito”, controla te ipse.
3. Ille poterea essayar deciper te.
4. O “lor mente non es con te”.
5. O “sapiente”.
6. O “il habera un futuro”.
7. O “un femina estranie”. Sovente le estranieras que non habeva medios de subsistentia practicava le prostitution.
8. O “injectate de sanguine”, “rubie”.
9. O “videra cosas estranie”.