Biblia/Vetule Testamento/Proverbios/Proverbios 20

←Proverbios 19

Le Biblia in Interlingua Proverbios

Proverbios 21→

Le Proverbios

Capitulo 20

¹Vino^[1] produce burlatores e biberages alcoholic causa tumultos. Quicunque se delecta in illos non ha sagessa.

²Le rage del rege es tanto grande como le rugito de un leon: qui le provoca risca su proprie vita.

³Separar se de contentiones es un marca de honor; solmente stultos se misce in querelas.

⁴Le persona troppo pigre pro arar in le juste saison, mendicara in le tempore del recolta.

⁵Un bon consilio in le corde de un persona es sicut le aqua que jace in un puteo profunde: le persona sage es preste de haurir lo de ibi.

⁶Multe personas dice que illes es amicos loyal, ma qui pote trovar uno qui sia vermente digne de confidentia?

⁷Le persona juste se comporta con integritate: beate es su filios qui le seque.

⁸Quando un rege sede in judicio, ille balancia tote le evidentia e face un distinction inter le mal e le bon.

⁹Qui pote dicer: “Io mundava mi corde, io es pur de omne peccato”?

¹⁰False pesos e mensuras inequal - le Senior los detesta ambes.

¹¹Mesmo pueros es cognoscite per le maniera de lor comportamento, si lor conducta es munde e si lor obras es recte.

¹²Aures que audi e oculos que vide: ambes les faceva le Senior.

¹³Non ama le somno, de pavor que tu te depaupera; tene tu oculos aperte, e tu habera a mangiar in abundantia.

¹⁴“Isto es sin valor! Sin valor!”, dice le emptor, ma quando ille recede, tunc ille se gloria de su emption.

¹⁵Parolas sage es plus pretiose que multo auro e multe rubinos.

¹⁶Prende su vestimento quia ille se faceva garante pro le debitas un estraniero. Require un caution si ille lo face pro estranieros.

¹⁷Pan robate^[2] es suave, ma plus tarde illo deveni sicut arena in le bucca.

¹⁸Bon consilios face succeder planos; non face guerras sin bon consilios.

¹⁹Le commatrage revela secretos; ergo non commisce te con personas qui aperi troppo lor buccas.

²⁰Qui maledice su patre e su matre, su lanterna se extinguera in le medio del tenebras.

²¹Un hereditate obtenite tro tosto in le vita, non es finalmente un benediction.

²²Non dice: “Io repagara le mal”. Expecta que le Senior ipse te vindica.

²³Le Senior abhorre pesos inequal, e balancias dishoneste non es bon a su oculos.

²⁴Le Senior dirige le passos de un persona: qui ergo pote comprender le vias que ille percurre?

²⁵Non trappa te ipse facente a Deo un promissa^[3] inconsiderate e solmente plus tarde contar su costo

²⁶Un re sage ventila le impios qua frumento, ille fa rotar super illes le disgranator.

²⁷Le lumine del Senior penetra le spirito human e investiga tote le secretos occultate in le corde.

²⁸Misericordia e veritate custodia un rege, e su throno es sustenite per le clementia.

²⁹Le gloria del juvenes es lor fortia, e le splendor del vetules es lor capillos gris de experientias.

³⁰Le punition physic^[4] purifica ab le mal, un tal disciplina purifica le corde.

Notas

1. Le texto se refere a vino e bira de hordeo, que tunc esseva multo plus forte de hodie.
2. O “pan del deception”.
3. O “voto”. Litt. “Non critar ‘Sancte!’ inconsideratemente”.
4. O “battimentos e vulneres”.