Biblia/Vetule Testamento/Proverbios/Proverbios 19

←Proverbios 18

Le Biblia in Interlingua Proverbios

Proverbios 20→

Le Proverbios

Capitulo 19

¹Melior es un paupero, qui se comporta con integritate^[1], quam qui parla perversemente e es un insipiente.

²Il non es bon haber zelo sin cognoscentia e ille qui cammina tro in haste face passos false e cade^[2].

³Le stultitia de un homine causa le ruina^[3] de su vita e le conduce a blasmar injustemente Deo^[4].

⁴Ricchessas adduce multe “amicos”; le paupertate les separa^[5].

⁵Un false teste non remanera impunite e qui dice mendacios non potera escappar de su punition.

⁶Multes blandi le potentes, e omnes es amicos de qui confere donos.

⁷Le parentes de un paupero le disprecia^[6] e su amicos recede de ille. Quanquam ille les supplica remaner, illes non retorna.

⁸Qui acquire sapientia, ama se ipse e qui lo custodia es destinate haber toto lo que es bon.

⁹Un false teste non remanera impunite e qui dice mendacios perira.

¹⁰Le luxo non es appropriate pro un stulto, nec pro un servo dominar super princes.

¹¹Le sapientia causa un persona mitigar su ira e il es su gloria passar super offensas recipite.

¹²Le ira de un rege es sicut le rugito de un leon, ma su gratia es sicut rore super herba.

¹³Un filio stulte es un calamitate pro su patre; un uxor litigiose es tanto enoiante quanto un stillar persistente de guttas.

¹⁴Patres pote dar a lor filios un hereditage de domos e ricchessas, ma solmente Deo pote dar un uxor judiciose.

¹⁵Le pigritia infude sopor, ma le otiositate face affamar.

¹⁶Qui custodia le commandamentos de Deo, custodia su vita; qui tamen los neglige va morir.

¹⁷Qui adjuta le pauperes presta a Deo: le Senior le repagara pro su bon obras.

¹⁸Disciplina tu filio, dum il ha sperantia, alteremente tu ruinara tu vita ipse.

¹⁹Le impatientia de un persona comporta un mulcta a pagar^[7] ma si tu lo paga pro ille, tu lo debera facer altere vices ancora.

²⁰Recipe tote le consilios e le instructiones que tu pote, assi tu essera sapiente pro le resto de tu vita.

²¹Il ha multe cogitationes in le mente^[8] de un homine, ma solmente le propositos del Senior va prevaler.

²²Lo que es multo desiderabile in un persona es le loyalitate. Il es melior esser povre quam un homine mendace.

²³Le timor del Senior conduce al vita, da securitate e protege contra le mal.

²⁴Personas pigre prende alimentos in lor mano, ma pro illes il es tro fatigante portar los in lor buccas.

²⁵Verbera le irrisor e le imbecille apprendera un lection; si tu corrige le sapiente, illes devenira mesmo plus sapiente.

²⁶Qui afflige su patre e averte su matre, es embarassose e un public disgratia^[9].

²⁷Filio mie! Si tu cessa audir le bon doctrina, tu volvera tu dorso al cognoscentia.

²⁸Un teste corrupte rende le judicio un irrision; le buccas del impios devora iniquitate.

²⁹Le punition es facite pro le irrisores, e le dorso del stultos pro le verberation.

Notas

1. O “simplicitate”, “honestate”.
2. O “qui age hastivemente face pessime decisiones” “errores”, “peccatos”.
3. O “subverte”, “supplanta” (le vita de un homine).
4. O “a esser inragiate contra Deo” = accusar Deo de lo que un tal homine mesme causa.
5. O “averte”.
6. O “odia”.
7. O “un pena”.
8. O “corde”.
9. O “un filio dishoneste e ignominiose”.