Biblia/Vetule Testamento/Proverbios/Proverbios 15

←Proverbios 14

Le Biblia in Interlingua Proverbios

Proverbios 16→

Le Proverbios

Capitulo 15

¹Un responsa gentil disinfla^[1] contentiones, ma parolas dur suscita furor.

²Le lingua del sapiente stilla cognoscientia^[2], ma le bucca del persona fatue eructa stultessa.

³In omne loco le oculos del Senior observa sia le personas mal que le personas bon.

⁴Un bocca que exprime parolas therapeutic es como le arbore del vita, ma quando illo es plen de perversitate illo fulla le spirito.

⁵Un stulto disprecia^[3] le disciplina paterne, ma quicunque custodia reprimendas es un persona sage.

⁶In le domo del justo il ha abundante richessa, ma le impio dissipa su rentas^[4].

⁷Le bucca del sapientes dissemina cognoscentia, ma ma le corde del stultos ha nihil de offerer.

⁸Le sacrificios del impios es abominabile pro le Senior, ma le preces del justos le es gradite.

⁹Pro le Senior le conducta^[5] del impios es abominabile, ma ille ama qui perseque le justitia.

¹⁰Quicunque desere le bon via essera severmente disciplinate; quicunque odia de esser corrigite va morir.

¹¹Mesmo le inferno^[6] e le destruction non pote occultar al Senior ulle secreto; quanto magis ille cognosce le corde del homines!

¹²Le derisor non ama esser corrigite; il es propter illo que ille nunquam se approxima al personas sage.

¹³Un corde gaudiose rende hilare le facie, ma un animo plen de amaritude fulla le spirito.

¹⁴Un corde sage quere cognoscentia, ma le bucca del stultos se pasce de stultessa.

¹⁵Pro le pauperes omne die comporta afflictiones, ma pro un corde hilare le vita es un continue festa.

¹⁶Melior es haber pauco ma con le timor del Senior, que haber grande thesauros e esser plen de sollicitudes.

¹⁷Melior es un scutella de vegetabiles con alicuno que tu ama, que un beefsteak con alicuno que tu odia.

¹⁸Un homine irascibile provoca altercationes, ma qui es patiente mitiga le lites.

¹⁹Le itinere del persona pigre es obstruite de spinas^[7], ma le via del persona recte es large e plan.

²⁰Un filio sage allegra su patre, ma le homine stulte disprecia su matre.

²¹Solmente personas insensate^[8] trova gaudio in le stultessa, ma un persona sensate procede con prudentia.

²²Planos executate sin querer consilios va faller, ma le successo se attinge depost plure consultationes.

²³Un responsa appropriate allegra omnes: optime es dicer le cosa opportun in le tempore juste.

²⁴Le sentiero del vita conduce le persona sage in alto e le preserva de declinar a basso verso le loco del mortos^[9].

²⁵Le Senior demoli le domo del personas superbe, ma ille protege le proprietates del viduas.

²⁶Cogitar le mal es un abomination pro le Senior, ma ille se allegra de parolas placente e gentil^[10].

²⁷Un personas avide causa afflictiones a su integre familia^[11], ma illes qui odia lo que le corruptor offere va viver.

²⁸Le corde del justo considera ben como responder, ma le bucca del impios^[12] redunda de mal parolas.

²⁹Le Senior remane longe del impios, ma ille exaudi le orationes del justos.

³⁰Oculos luminose allegra le corde, e bon novas da sanitate al corpore.

³¹Le persona qui audi le reprimenda que conduce al vita, edifica su domo inter le sagios.

³²Qui rejecta le disciplina, disprecia su anima ipse; ma qui presta attention al reprimendas, acquire sapientia.

³³Le timor del Senior doce sapientia, e le humilitate precede le gloria.

Notas

1. O “frange”.
2. O “rende acceptabile”, “attrahente”.
3. O “irride”.
4. O “le fructo”.
5. O “le via”.
6. O “le morte”.
7. O “sepes de spinas”.
8. O “sin discernimento”.
9. O “Sheol”, “Inferno”.
10. O “pur”.
11. O “domo”.
12. O “malfactor”.