Biblia/Vetule Testamento/Malachia/Malachia 2

←Malachia 1

Le Biblia in Interlingua Malachia

Malachia 3→

Malachia

2

Advertimento al sacerdotes

¹“Dunque, iste advertimento^[1] es pro vos, sacerdotes! ²Si vos non ascolta e non prende cura de dar gloria a mi nomine”, dice le Senior del Armeas, “io mandara un malediction tra vos e io maledicera vostre benedictiones. De facto, io ha jam comenciate a maledicer los, proque vos non prendeva cura de honorar me. ³Mira, per vostre culpa io punira vostre descendentes, io extendera stercore de bestias sur vostre facies, le stercore de vostre sacrificios festive, e vos sera portate via con illo. ⁴Alora vos sapera que io vos ha inviate iste admonition, si que mi pacto con Levi pote continuar”, dice le Senior del Armeas. ⁵Mi pacto era con ille, un pacto de vita e de pace, e io dava los a ille, perque ille me revererea, e ille me revereva, e tremeva pro timor reverential de mi nomine. ⁶Un inseniamento ver era in su bucca e nihil false ha essite trovate sur su labios. Ille camminava con me in pace e honestate, e faceva convertir multes da lor peccatos. ⁷Le labios del sacerdote debe preservar cognoscentia, proque ille es le messagero del Senior del Armeas e da su bucca le populo debe trovar inseniamento. ⁸Ma vos esseva disviate. A causa de vostre instructiones multes ha facite passos false. Vos ha violate le pacto de Levi”, dice le Senior del Armeas. ⁹Il es pro celle ration que io vos rendeva dispreciate e humiliate ante tote le populo, proque vos non sequeva mi via e in vostre instructiones vos monstrava partialitate.

Le infidelitate marital de Juda

¹⁰An nos omnes non ha un sol patre? An nos non esseva create per un sol Deo? Proque nos profana le pacto de nostre ancestres, essente infidel le un al altere? ¹¹Juda ha essite infidel. Un cosa detestabile ha essite committite in Israel e in Jerusalem: Juda ha profanate le Sanctuario del Senior, que ille ama, e ille ha maritate le filia de un deo estranie. ¹²Que le Senior remove del tentas de Jacob qui face isto, quicunque ille sia, mesmo si ille porta un oferta al Senior del Armeas. ¹³Il ha un altere cosa que vos face: vos coperi le altar del Senior con lacrimas, vos plora e geme proque ille non plus favorabilemente reguarda vostre ofertas e non los accepta con placer de vostre manos.

¹⁴Vos demanda: ‘Proque?’ Isto es proque mesmo si le Senior es un teste inter tu e le marita de tu juventute, tu ha essite infidel. Illa esseva tu companion, le marita al qual tu era ligate per un pacto. ¹⁵An le Deo non vos creava? Vos appertine a ille con corpore e spirito. Que cerca ille? Descendentes fidel a Deo. Dunque que vos sia vigilante, e non sia infidel contra le marita de vostre juventute. ¹⁶Si ille odia su sposa e divorcia da illa”, dice le Senior, Deo de Israel, “ille coperi de injustitia su vestimento”, dice le Senior del Armeas. “Dunque, que vos sia vigilante e non sia infidel”.

Judicamento a la venita del Senior

¹⁷“Vos fatiga le Senior con vostre parolas”, tamen vos dice: ‘In que maniera nos le ha fatigate?’ Quando vos dice: Quicunque face lo mal es bon ante le oculos del Senior, e ille es complacite con illes, o alteremente, ubi es le Deo del justitia?”.

Notas

1. O “Admonition”.