Biblia/Vetule Testamento/Job/Job 8

←Job 7

Le Biblia in Interlingua Job

Job 9→

Job

8

Le prime discurso de Bildad a Job

¹Alora Bildad le Suhita prendeva le parola e diceva a Job:

²“Usque a quando parlara tu assi con parolas como un vento vehemente? ³Esque Deo supplantarea le justitia? Esque le Omnipotente subverterea lo que es juste? ⁴Tu filios certo peccava contra Deo, alteremente illes non haberea recipite un tal punition^[1]! ⁵Ma si tu quere Deo e leva tu supplicationes al Omnipotente; ⁶si tu deveni un homine munde e recte, certo Deo surgera e restabilira tu demora de justitia^[2]. ⁷Alora le condition que tu habeva antea^[3] te parera parve in comparation al abundantia que Deo te concedera postea.

⁸In effecto, interroga le preterite generationes e investiga diligentemente le memorias^[4] del patres, ⁹proque nos nasceva solmente heri e non ha bastante cognoscentia, quia nostre dies super le terra es ephemere sicut un umbra. ¹⁰Nonne illes ipse te docera e te parlara, e de lor cordes illes extrahera lor eloquentia?

¹¹Illes te dicera: ‘Poterea le papyro crescer alte ubi il ha nulle palude? Poterea cannas florescer sin aqua? ¹²Durante que illos a pena comencia florescer e non es bastante matur pro esser taliate, illes pote marcescer plus rapidemente que altere herbas’. ¹³Tal es le via de tote illes que oblida Deo; le sperantia del persona impie peri; ¹⁴Lor sperantia es un filo tenue, e sicut un tela de aranea es lor fiducia. ¹⁵Illes se appoia contra lor domo ma illo non les sustene; illes lo retene ma illo non sta. ¹⁶Illes es como un planta ben rigate sub le sol; su plantones se extende per le jardin. ¹⁷Su radices se inveloppa circa un cumulo de petras e illo se cerca inter le petras un loco in le qual crescer. ¹⁸Si illo es displantate de su loco, alora ille loco ipse lo dismenti e lo dice: ‘Io nunquam te videva’! ¹⁹Sicut illo es le gaudio del impios: alteres sorti a prender lor placia.

²⁰Certo Deo non rejecta un homine irreprochabile, ni ille cape le mano del malfactores pro salvar les. ²¹Deo implera de novo le bucca del justo de riso e su labios se effundera jubilationes. 8:22 Qui te odia se vestira de vergonia e le tenta del persona impie non permanera.

Notas

1. O “Tu filios peccava contra le, e pro isto ille poneva les in le manos de lor crimines”.
2. Bildad presuppone que Job peccava e que debe supplicar le pardono de Deo. In ille caso, Deo certamente le restabilira in su benediction. Bildad compara le gratia del restabilimento de Job a un domo felice que gaude del benedictiones de Deo.
3. O “al comenciamento”.
4. O “le experientia”, lo que le patres apprehendeva.