Biblia/Vetule Testamento/Job/Job 41

←Job 40

Le Biblia in Interlingua Job

Job 42→

Job

41

Le description de un Leviathan

¹(40:25) Poterea tu sasir Leviathan^[1] con un hamo e con un fun ligar su lingua? ²Poterea tu poner un corda in su nares o perforar su maxilla con un inclavatura? ³Esque illo te rogara misericordia o te implorara haber pietate? ⁴Esque illo facera con te un pacto tanto que tu potera prender lo como un servo sempiternemente? ⁵Poterea tu domesticar lo como un ave o dar lo a tu filiettas pro jocar? ⁶Esque mercatores essayara emer o vender lo in lor botecas? ⁷Poterea tu coperir su pelle de sagittas o harponar lo^[2]? ⁸Si tu ponerea tu mano sur illo, tu rememorarea le combatto pro longe tempore e tu non lo facerea plus! ¹⁹(41:1) No, il es un van sperantia essayar capturar lo. Le chassator que essaya facer lo essera ille mesme abattite. ¹⁰Nemo es tanto audace a disturbar lo. Qui poterea resister lo?

¹¹Pois que qui me dava qualcosa de sorta que io debe restituer lo? Tote lo que es sub le integre celo me pertine^[3].

Le membros de Leviathan

¹²Io non tacera super su membros, le extension de su potentia e su forma gratiose. ¹³Qui poterea unquam decorticar lo o penetrar le interior de su armatura? ¹⁴Qui poterea aperir a fortia su bucca? Le dentes que lo corona es formidabile. ¹⁵Le scalias de su dorso es como scutos sigillate compactemente. ¹⁶Illos es tanto conjungite que nulle fissura permitterea transpassar lo. ¹⁷Illos adhere uno al altere e se tene insimul tanto que non pote esser separate. ¹⁸Su sternutation es como scintillas de foco. Su oculos es como le rutilar del aurora. ¹⁹De su bucca sorti flammas sicut scintillas de foco. ²⁰De su nares veni fumo como le vapor que sorti ab un olla recalidate super carbones ardente. ²¹Su halito facerea accender carbones, quia flammas sorti de su bucca. ²²Le fortia tremende de su collo causa terror ubicunque illo vade. ²³Su pelle es dur e firme, e non pote esser penetrate. ²⁴Su corde es tanto dur quanto un lapide, dur como un mola inferior. ²⁵Quando illo surge le fortes treme, sasite per le terror. ²⁶Quicunque lo colpa con un gladio obtenera nulle effecto, non mesmo con un lancea, un flecha o un javelina. ²⁷Illo considera le ferro tanto quanto palea e le bronzo quanto ligno putride. ²⁸Le sagittas non lo face fugir; petras tirate con un funda es pro illo como vannatura. ²⁹Fustes es como laminas de herba; illo ride al vibration de javelinas. ³⁰Su ventre es coperite de scalias tanto acuminate quanto vitro. Illo lassa tracias in le fango como un slitta de arator.

³¹Le leviathan face bullir le aqua como un caldieron, e illo agita le mar como un vaso de unguento. ³²Illo se lassa retro un semita brillante; on poterea pensar que le profunditates del mar es como un capite de capillos blanc. ³³Il non ha sur le terra alicuno simile a illo, nulle creatura comparabile que sia talmente sin pavor quanto illo. ³⁴Illo reguarda ab alto omne sublime creaturas; illo es rege super omne bestias superbe.

Notas

1. Le identification de un Leviathan es disputate. Illo poterea esser un creatura del terra o un monstro mythic del mar, como describite per le litteratura antique.
2. O “sasir su capite con hamos”.
3. Iste verso pare un intrusion, ma lo que le texto dice es que il es plus periculose confrontar Deo que confrontar iste animal.