Biblia/Vetule Testamento/Job/Job 40

←Job 39

Le Biblia in Interlingua Job

Job 41→

Job

40

Le responsa de Job al defia de Deo

¹Le Senior respondeva a Job assi: ²“Esque tu volerea ancora contender con le Omnipotente? Tu critica^[1] Deo, ma esque tu pote responder a lo que io te diceva?”.

³Alora Job respondeva a Deo dicente: ⁴“Ecce, io es completemente indigne de parlar - como poterea io dar te un responsa? Io pone mi mano sur mi bucca pro silentiar me. ⁵Io jam diceva troppo. Io non ha nihil plus a dicer”.

Le secunde elocution de Deo

⁶Alora le Senior respondeva a Job ex un tromba: ⁷“Sia virilmente^[2] preste pro un carga difficile, quia io ha alicun questiones a submitter te e tu debera docer me. ⁸Esque tu discreditara mi justitia e me condemnara justo proque tu vole justificar te? ⁹Esque tu es tanto forte quanto Deo^[3]. Pote tu tonitruar con un voce sicut le sue? ¹⁰Adorna te, ergo, con majestate e excellentia, e vesti te con gloria e honor. ¹¹Effunde le vehementia de tu furor. Respice omne homines arrogante e humilia les. ¹²Humilia le homines superbe con un sol reguardo e fulla le impios ubi illes se trova. ¹³Inhuma les in le pulvere; inprisiona les in le mundo del mortos^[4]. ¹⁴Tunc io mesme te laudarea, quia tu proprie fortia te salvarea.

Le description de Behemoth

¹⁵Reguarda Behemoth^[5], quem io creava justo como io creava te. Illo mangia herba como un bove. ¹⁶Reguarda le fortitude de su lumbos e le potentia del musculos de su ventre. ¹⁷Illo rende su cauda tanto rigide quanto un cedro, le tendines de su femore es constringite firmemente. ¹⁸Su ossos es tubos de bronzo, su membros como barras de ferro. ¹⁹Iste creatura es un exemplo primari del obras de Deo e su Creator le provideva de un gladio. ²⁰Le montes ubi tote le animales salvage joca, le offere lor melior alimentos, . ²¹Illo jace sub le arbore de loto, in le secretessa del cannas e del marisco. ²²Le arbores de loto lo occulta sub lor umbra; le poplos apud le torrente lo occulta. ²³Illo non es disturbate per le fluvio ragiante; illo remane secur mesmo si le fluvio Jordan surge usque su ore. ²³Esque alicuno poterea captar lo per su oculos o perforar su nares con un pedica?

Notas

1. O “vole reprehender”.
2. O “como un homine”.
3. O “Esque tu bracio es tanto forte quanto illo de Deo?”.
4. O “in lor tumbas”.
5. Le identification de Behemoth es disputate. Illo poterea esser un creatura del terra o un monstro mythic del mar, como describite per le litteratura antique.