Biblia/Vetule Testamento/Job/Job 39

←Job 38

Le Biblia in Interlingua Job

Job 40→

Job

39

Le defia del Senior continua

¹Esque tu observava quomodo le capras de montania o le cervas salvage parturi? ²Esque tu numerava le menses de graviditate que illos debe complir e sape tu qual es le tempore in le qual illos debe parer? ³Illas se quatta, parturi e le genitura veni al lumine. ⁴Lor filiation cresce e adolesce in le campo aperte, deinde illo quita su genitores e nunquam plus retorna.

⁵Qui da al onagro su libertate? Qui disliga su funes? ⁶Io lo poneva in le deserto; su habitation es sur solos salmastre. ⁷Illo contemne le multitudes del citates e non presta attention al clamor del asineros. ⁸Illo explora su pasturas sur le montes ubi illo perquire omne plantas verde. ⁹Esque le tauro salvage consenti esser domesticate? Esque illo volerea passar le nocte in tu boveria? ¹⁰Poterea tu ligar un tauro salvage a un aratro? Poterea illo arar un agro pro te? ¹¹Poterea tu confider in illo simplemente proque su fortia es grande? Poterea tu derelinquer a illo tu labores? ¹²Crede tu que illo reportarea a te tu grano e lo colligerea in tu aira?

¹³Le ave-struthio batte su alas impressivemente, ma illos non es comparabile al plumas del ciconia. ¹⁴Illa depone su ovos sur le terreno e los lassa caler sur le pulvere. ¹⁵Illa oblida que un pede poterea fullar los o que un animal salvage poterea calcar los. ¹⁶Illa es dur con su pullos como si illos non esseva le sues. Illa non reguarda que su labor poterea esser in van. ¹⁷De facto, Deo la privava de sapientia, ni ille la dava intelligentia, ¹⁸ma quandocunque illa leva in alto su alas, illa preterpassa le cavallo le plus veloce con su cavallero.

¹⁹Esque tu dava al cavallo su fortia o revestiva su collo con un criniera?²⁰Esque tu lo dava le habilitate de saltar como un locusta? Su hinnimento majestose es terrificante!²¹Su patas^[1] calca le terreno e illo se allegra de su fortia quando carga in battalia. ²²Illo contemne le pavor ni se lassa terrer mesmo per gladios. ²³Sur illo strepe le flechera; le lancea e le javelotto refulge. ²⁴Con excitation e impatientia su patas consume le terreno; illo non pote remaner firme quando le corno emitte su sonos. ²⁵Al sono del corno illo dice: “Uah!”. De procul illo odora le bello, audi le tonitro del commandos del capitanos e le ululation del battalia^[2].

²⁶Esque es il per tu sapientia que le falcon se eleva e extende su alas verso le sud? ²⁷Esque es il a tu commando que le aquila se eleva e fabrica su nido in alto? 39:28 Illo vive super le precipitios e face su habitation sur un distante rocca prominente. ^{{{2}}}De ibi illo localisa su preda e de longe su oculos lo prospice. ³⁰Su pullos ingluti le sanguine del predas e ubi se trova cadaveres, ibi tu tu los trova”.

Notas

1. O “ungulas”.
2. O “armeas”.